តំណាងកម្មករ និងកម្មករដែលកំពុងធ្វើកូដកម្មនៅរោងចក្រអូសេអង់ (Ocean) នៅសង្កាត់ចោមចៅ ខណ្ឌពោធិ៍សែនជ័យ ជាយរាជធានីភ្នំពេញ នៅថ្ងៃទី៤ មិថុនា ឲ្យដឹងថា ប៉ូលិសប្រឆាំងបាតុកម្មជាច្រើនប្រដាប់ដោយដំបងឆក់ និងខែល ត្រូវបានដាក់ពង្រាយនៅមុខរោងចក្រអូសេអង់។
កម្មកររោងចក្រអូសេអង់ បានធ្វើកូដកម្មជាច្រើនថ្ងៃមកហើយ ដើម្បីទាមទារលក្ខខណ្ឌការងារ និងសំណងពីថៅកែរោងចក្រ ក្នុងពេលដែលរោងចក្របានផ្អាកដំណើរការនៃសង្វាក់ផលិតកម្មក្នុងរយៈពេលមួយខែគិតចាប់តាំងពីថ្ងៃទី២៦ ឧសភា ដល់ថ្ងៃទី២៦ មិថុនា ឆ្នាំ២០១៤។
ទោះយ៉ាងណា កម្មករឲ្យដឹងថា មកទល់ម៉ោង ៩ និង៣០ នាទីព្រឹកថ្ងៃទី៤ មិថុនា នេះ មិនមានអំពើហិង្សាកើតឡើងរវាងកម្មករ និងក្រុមប៉ូលិសបង្ក្រាបបាតុកម្មនៅឡើយទេ។
ទាក់ទងការផ្អាកសង្វាក់ផលិតកម្មនេះ តំណាងភាគីរោងចក្រអះអាងថា ដោយសាររោងចក្រមិនមានអ្នកបញ្ជាទិញ ព្រោះតែកម្មករបានធ្វើកូដកម្ម និងបាតុកម្មញឹកញាប់ពេក បណ្ដាលឲ្យដាច់ម៉ូយអ្នកបញ្ជាទិញអស់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។