ប្រធានសហភាពការងារកម្ពុជា និងជាប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ហៅកាត់ថា ស៊ីខាវឌូ (CCAWDU) លោក អាត់ ធន់ បង្កើតកម្មវិធីផ្ដល់ពានរង្វាន់លើកទឹកចិត្តដល់សកម្មជនសហជីព ដែលមានសកម្មភាពមមាញឹក ចេញមុខការពារសិទ្ធិកម្មករ និងហ៊ានប្រឈមផ្លូវច្បាប់។
ពិធីផ្ដល់ពានរង្វាន់លើកទឹកចិត្តនេះ ធ្វើឡើងនៅព្រឹកថ្ងៃទី៩ ខែមិថុនា នាខេត្តព្រះសីហនុ និងមានសកម្មជនសហជីពចំនួន ៨នាក់ បានទទួលពានរង្វាន់លើកទឹកចិត្តនេះ។
លោក អាត់ ធន់៖ «ថ្ងៃនេះគឺយើងផ្ដល់ជូនដល់សកម្មជនដែលត្រូវបានចាប់ខ្លួននៅខេត្តតាកែវ ចំនួន ៨នាក់ ហើយនៅថ្ងៃផ្សេងៗទៀត យើងនឹងរៀបចំផ្ដល់ជូនទៅដល់សកម្មជន ៤នាក់ទៀត គឺ ២នាក់ មានលោក វន់ ពៅ និងលោក សុខ ឈុនអឿង ហើយ ២នាក់ទៀត គឺជាសកម្មជនសហជីពនៅតាមរោងចក្រផ្សេងៗ។ សម្រេចផ្តល់ជូនពានរង្វាន់ឆ្នើម ១ និងថវិកាមួយចំនួន»។
លោក អាត់ ធន់ បន្តថា គោលបំណងនៃការផ្ដល់ពានរង្វាន់លើកទឹកចិត្តនេះ គឺជាការបង្ហាញការយកចិត្តទុកដាក់របស់សហជីពទាំងក្នុង និងក្រៅប្រទេសទៅលើសកម្មជននៅតាមរោងចក្រនានា ឲ្យបន្តសកម្មភាពជួយការពារសិទ្ធិជូនកម្មករថែមទៀត នាថ្ងៃអនាគត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។