យោបល់ រូបភាព ខ្សែអាត់សំឡេង និងវីដេអូ ត្រូវបានចែកចាយពាសពេញបណ្ដាញសង្គមថ្មីនេះ ដើម្បីផ្ដល់ទៅឱ្យបណ្ដាញ ឬហៅថា មិត្តភក្តិហ្វេសប៊ុក របស់ពួកគេ។ ទន្ទឹមនឹងនេះដែរ វាក៏បានក្លាយជាសមរភូមិថ្មីមួយនៃការវាយប្រហារពាក្យសម្ដីបញ្ចើចបញ្ចើដាក់គ្នា ជាពិសេសនៅមុន និងក្រោយការបោះឆ្នោត ការប្រកាសលទ្ធផលបឋមដែលកំពុងមានភាពចម្រូងចម្រាសនៅកម្ពុជា។
ការរីកចម្រើននៃបច្ចេកវិទ្យាបានធ្វើឱ្យសង្គមមនុស្សមានការផ្លាស់ប្ដូរកាន់តែខ្លាំង។ សព្វថ្ងៃនេះ ក្រៅពីប្រព័ន្ធផ្សព្វផ្សាយចម្បង មានទូរទស្សន៍ វិទ្យុ និងកាសែតជាដើមនោះ បណ្ដាញសង្គមហ្វេសប៊ុក កំពុងដើរតួនាទីយ៉ាងសំខាន់ក្នុងការផ្ដល់ និងចែករំលែកព័ត៌មានដល់សាធារណជន ពិសេសអ្នកប្រើប្រាស់បណ្ដាញនេះ។
ដំបូងឡើយ អ្នកប្រើប្រាស់ហ្វេសប៊ុកនៅកម្ពុជា ប្រើប្រាស់បណ្ដាញថ្មីនេះក្នុងគោលបំណងបង្កើនទំនាក់ទំនង និងចែករំលែកភាពសប្បាយរីករាយជាមួយគ្នា។ ជាបន្តបន្ទាប់ មានក្រុមហ៊ុន និងអ្នកជំនួញមួយចំនួន បានចាប់ផ្ដើមប្រើប្រាស់ហ្វេសប៊ុកដើម្បីឃោសនាផលិតផល ឬសេវាកម្មរបស់ខ្លួន។ដោយសម្លឹងឃើញពីអត្ថប្រយោជន៍ដ៏ច្រើនដែលអាចទាញយកពីហ្វេសប៊ុក ក្រុមហ៊ុន សហគ្រាស ស្ថាប័នព័ត៌មាន ស្ថាប័នរដ្ឋ និងសាធារណជនមួយចំនួន ក៏បានបង្កើតទំព័រហ្វេសប៊ុក ផ្ទាល់ខ្លួន ដើម្បីប្រមូលនិងចែកចាយព័ត៌មានទៅតាមអ្វីដែលគេចង់បាន។
យ៉ាងណាមិញ ស្របពេលដែលការប្រើប្រាស់ហ្វេសប៊ុកនៅកម្ពុជា មានការកើនឡើងយ៉ាងច្រើនលើសលប់នោះ ការបោះឆ្នោតជ្រើសតាំងតំណាងរាស្ត្រអាណត្តិទី៥ ក៏បានមកដល់ ដែលធ្វើឱ្យអ្នកប្រើប្រាស់ភាគច្រើនបានងាកមកចាប់អារម្មណ៍ និងប្រើប្រាស់វាក្នុងគោលបំណងនយោបាយវិញ។
យោបល់ រូបភាព ខ្សែអាត់សំឡេង និងវីដេអូផ្សេងៗ ដែលជាចេតនានយោបាយ ក៏ត្រូវបានបង្ហោះពាសពេញហ្វេសប៊ុក ហើយបន្ថែមពីលើនេះ វាក៏បានក្លាយជាវេទិកានៃការឆ្លើយឆ្លងគ្នារវាងអ្នកគាំទ្រគណបក្សនយោបាយធំៗនៅកម្ពុជា។
នៅមុនពេលបោះឆ្នោត បណ្ដាញសង្គមថ្មីនេះជាទីលាននៃការប្រជែងរកសំឡេងឆ្នោត ដោយគណបក្សនយោបាយបានប្រើប្រាស់វាជាប្រព័ន្ធផ្សព្វផ្សាយគោលនយោបាយរបស់ខ្លួន។ ប៉ុន្តែក្រោយការបោះឆ្នោត និងការប្រកាសលទ្ធផលដ៏ចម្រូងចម្រាសដែលគណបក្សប្រឆាំងប្រកាសមិនទទួលស្គាល់លទ្ធផលនោះ ហ្វេសប៊ុកបានក្លាយជាកន្លែងវាយប្រហារពាក្យសម្ដីគ្នារវាងអ្នកមាននិន្នាការទៅរកគណបក្សប្រជាជនកម្ពុជា និងគណបក្សសង្គ្រោះជាតិ ទៅវិញ។
ទំព័រហ្វេសប៊ុក ដែលគាំទ្រគណបក្សប្រជាជនមួយ ឈ្មោះ "ទស្សនៈកូនខ្មែរ" បានបង្ហោះនិងចែកបន្តរូបភាពជាច្រើនដែលមានចេតនាវាយប្រហារគណបក្សសង្គ្រោះជាតិ។ ក្នុងចំណោមរូបភាពទាំងនោះ មានរូបមួយសន្លឹកដែលគេយករូបលោក សម រង្ស៊ី ប្រធានគណបក្សមកកែច្នៃ ហើយដាក់ទន្ទឹមនឹងពាក្យថា "ចំណុចទាំង៣ ដែលមិនគួរទុកចិត្តលោក សម រង្ស៊ី គឺលោកតែងតែរត់ចោលស្រុក ភូតភរ កុហកគ្មានការពិត និងមានគំនិតចងគំនុំនិងបង្ហូរឈាម"។ បន្ថែមពីលើនេះ ទំព័រទស្សនៈកូនខ្មែរ ក៏បានបង្ហោះខ្សែវីដេអូមួយដែលមានលក្ខណៈកំប្លែង តែវាយប្រហារចំៗតែម្ដងទៅលើលោក សម រង្ស៊ី។
ចំណែកអ្នកគាំទ្រគណបក្សសង្គ្រោះជាតិវិញ ក៏បានធ្វើការវាយប្រហារគណបក្សប្រជាជនកម្ពុជា និងថ្នាក់ដឹកនាំគណបក្សនោះលើបណ្ដាញថ្មីនេះដែរ។ ទំព័រហ្វេសប៊ុកមួយដែលមានឈ្មោះថា "ខ្មែរសូស្យល មីឌា (Khmer Social Media) បានបង្ហោះរូបភាពមួយសន្លឹកដែលភ្ជាប់នឹងរូបថត និងស្លាកសញ្ញាគណបក្សប្រជាជនកម្ពុជា អមទៅដោយវោហារសាស្ត្ររិះគន់ចំៗចំពោះការដឹកនាំរបស់លោកនាយករដ្ឋមន្ត្រី ហ៊ុន សែន ថារាជរដ្ឋាភិបាលរបស់លោកធ្វើឱ្យប្រជាពលរដ្ឋឃ្លាន ខ្លៅ និងខ្លោច ដើម្បីងាយគ្រប់គ្រង។ រូបភាពនេះបានបញ្ជាក់ថា រដ្ឋាភិបាលធ្វើឱ្យពលរដ្ឋឃ្លានដោយសារតែមានអំពើពុករលួយ ធ្វើឱ្យខ្លៅដោយសារគុណភាពអប់រំទាប គ្រប់គ្រងព័ត៌មានតែឯង បំភ័ន្តការពិត។ ចំពោះគូប្រជែងនយោបាយ លោកបំបែកបំបាក់ដើម្បីត្រួតត្រា ហើយលោកពង្រឹងអំណាចតាមការចងសម្ព័ន្ធមង្គលការកូនប្រុសស្រី។
មិនខុសពីទំព័រហ្វេសប៊ុកដែលគាំទ្របក្សប្រជាជនទេ ទំព័រដែលមាននិន្នាការទៅរកបក្សសង្គ្រោះជាតិ ក៏បានបង្ហោះវីដេអូ ដែលសម្ដែងពីឆន្ទៈរបស់ខ្លួនដែរ។
ទំព័រហ្វេសប៊ុកដែលសកម្មក្នុងការគាំទ្រគណបក្សសង្គ្រោះជាតិ និងវាយប្រហារបក្សប្រជាជន មានដូចជា I Love Cambodia Hot News, Khmer Media, The Cambodia Photography Hot News, Manora Khmer, ទស្សនៈយុវជនខ្មែរ, តេជោកុយ, សំឡេងជាតិ និងខ្មែរសុវណ្ណភូមិជាដើម។ ដោយឡែកទំព័រដែលគាំទ្រគណបក្សប្រជាជន ហើយវាយប្រហារបក្សសង្គ្រោះជាតិវិញ មានដូចជា Phe Sovannarith ទស្សនៈកូនខ្មែរ សន្តិភាពខ្មែរ និង Chanthorn Sok ជាដើម។
ទាក់ទងនឹងបញ្ហានេះដែរ ប្រធានក្លឹបអ្នកកាសែតកម្ពុជា លោក ប៉ែន សមិទ្ធិ បានបញ្ជាក់ថា ការរិះគន់ ឬវាយប្រហារតាមបណ្ដាញហ្វេសប៊ុក ជាសិទ្ធិរបស់អ្នកប្រើប្រាស់ ក៏ប៉ុន្តែពួកគេអាចនឹងប្រឈមមុខនឹងបញ្ហាផ្លូវច្បាប់ បើសិនជាអ្វីដែលគេបញ្ចេញនោះមិនមែនជាការពិត។
លោក ប៉ែន សមិទ្ធិ៖ «វាជាសេរីភាពហើយ ប៉ុន្តែបើសិនណាជាគាត់ធ្វើខុស គឺវានឹងធ្វើឱ្យគាត់មានទោស ចៀសអត់រួចទេអាហ្នឹង មិនមែនសរសេរកាសែតខុស ធ្វើវិទ្យុខុសមានទោស ធ្វើទូរទស្សន៍ខុសមានទោស ហើយបង្ហោះហ្វេសប៊ុក ខុសរួចខ្លួន អាហ្នឹងវាអត់ទៅរួចទេ»។
លោកបានបន្តទៀតថា អ្នកដែលប្រើប្រាស់ហ្វេសប៊ុក ដើម្បីបញ្ជូនសារនយោបាយ គប្បីទទួលបានការបណ្ដុះបណ្ដាល បើសិនជាគេធ្វើការឱ្យគណបក្សណាមួយ ឬក៏ថា គេគប្បីពិចារណាដោយខ្លួនឯងអំពីបញ្ហាផ្លូវច្បាប់ និងសីលធម៌ដែលគេអាចយកក្រមសីលធម៌អ្នកសារព័ត៌មានមកប្រើប្រាស់បាន។
លោក ប៉ែន សមិទ្ធិ៖ «បើសិនជាគាត់នៅក្រោមឆត្ររបស់នរណា ឧបមាថា មានបក្សណាមួយចាត់តាំងមនុស្សឱ្យធ្វើ គឺបក្សហ្នឹងក៏គួរតែមានការបណ្ដុះបណ្ដាល ឬមួយក៏អ្នកនោះឯង គាត់ធ្វើដោយឯក ចិត្តគាត់ ដោយឯករាជ្យរបស់គាត់ ក៏គួរតែមិត្តភក្តិទាំងអស់ហ្នឹង អ្នកដែលលេងហ្វេសប៊ុក ចង់បញ្ជូនសារ ឬគំនិតរបស់ខ្លួនហ្នឹង ផ្ទៀងផ្ទាត់មើលច្បាប់ទម្លាប់ឱ្យមែនទែន»។
ខ្លឹមសារនៃក្រមសីលធម៌សំខាន់ៗដែលអ្នកប្រើប្រាស់ហ្វេសប៊ុក ក្នុងគោលបំណងនយោបាយអាចអនុវត្តបាន មានដូចជា ផ្សព្វផ្សាយតែព័ត៌មានពិតនិងត្រឹមត្រូវ មិនបំភ្លៃ មិនត្រូវផ្សាយព័ត៌មានណាដែលរំលោភលើសិទ្ធិបុគ្គល គោរពសិទ្ធិរបស់ពលរដ្ឋ និងសិទ្ធិបុគ្គលស្របតាមគោលការណ៍ច្បាប់ និងកុំចែកផ្សាយព័ត៌មានណាដែលមានលក្ខណៈញុះញង់ មួលបង្កាច់ ឬបំភ្លៃការពិត ដែលនាំទៅរកចលាចលសង្គមនិងប្រទេសជាតិ។
ទោះបីជានៅកម្ពុជា មិនទាន់មានករណីដាក់ទោសទណ្ឌដល់អ្នកប្រើហ្វេសប៊ុក ដែលវាយប្រហារ ឬជេរប្រមាថអ្នកដទៃក្តី មុននឹងបញ្ចេញ ឬចែកចាយព័ត៌មានណាមួយ អ្នកប្រើប្រាស់ទាំងឡាយគប្បីចងចាំនូវគោលការណ៍ច្បាប់បួនដែលសំខាន់បំផុត រួមមាន៖ ទីមួយ អ្នកជាពលរដ្ឋស្ថិតក្រោមច្បាប់របស់ប្រទេស ទីពីរ បទបរិហារកេរ្តិ៍ បទនិយាយមួលបង្កាច់ និងបទបង្ខូចកេរ្តិ៍ឈ្មោះ ទីបី បទបរិហារកេរ្តិ៍ព្រហ្មទណ្ឌ និងទីបួន បទបំពានអង្គព្រះមហាក្សត្រ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។