សមាគមគ្រូបង្រៀនកម្ពុជាឯករាជ្យ នៅថ្ងៃច័ន្ទ ទី២៨ ខែតុលា បានដាក់លិខិតជូនលោក ហង់ ជួនណារ៉ុន រដ្ឋមន្ត្រីក្រសួងអប់រំយុវជននិងកីឡា ឲ្យជួយមានវិធានការ ឬស៊ើបអង្កេតពីភាពមិនប្រក្រតីរបស់លោក ប៊ូ សុវណ្ណារិទ្ធ នាយកវិទ្យាល័យ ទា ចំរ៉ាត់ និងអ្នកស្រី ឈុំ ម៉ុន្ថា ជានាយិការងដែលតម្រូវឲ្យសិស្សបង់ថ្លៃសាលាខុសច្បាប់ស្ដីពីការអប់រំ។
លិខិតសមាគមគ្រូភ្ជាប់ដោយពាក្យបណ្ដឹងរបស់អ្នកគ្រូ ផាត់ ម៉ាលីន បង្រៀននៅវិទ្យាល័យ ទា ចំរ៉ាត់ បានចោទលោក ប៊ូ សុវណ្ណារិទ្ធ និងអ្នកស្រី ឈុំ ម៉ុន្ថា ជានាយក និងនាយិការងវិទ្យាល័យ ទា ចំរ៉ាត់ ថាបានតម្រូវឲ្យសិស្សបង់ថ្លៃសាលាចំនួន ៥ពាន់រៀល សម្រាប់សិស្សម្នាក់ ដើម្បីបានចូលរៀន។ ជាងនេះ សិស្សានុសិស្សដែលផ្ទេរពីសាលាផ្សេងចូលរៀននៅវិទ្យាល័យនេះ ក៏តម្រូវឲ្យសិស្សបង់លុយចាប់ពី ២ម៉ឺន ដល់ ៨ម៉ឺនរៀល ទើបទទួលឲ្យចូលរៀន។
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ មានប្រសាសន៍ថា បើសិនជានាយក និងនាយករងវិទ្យាល័យ ទា ចំរ៉ាត់ ខេត្តពោធិ៍សាត់ ពិតជាបានប្រព្រឹត្តដូចការចោទមែននោះ គឺបានអនុវត្តខុសច្បាប់ស្ដីពីការអប់រំត្រង់មាត្រា ៣១។ មាត្រា ៣១ បានសរសេរថា រាល់ការចុះឈ្មោះចូលរៀនរបស់សិស្សនៅសាលារដ្ឋក្រសួងអប់រំមិនតម្រូវឲ្យបង់ថ្លៃសាលា ឬមិនយកលុយពីសិស្សទេ។
លោក រ៉ុង ឈុន៖ «យើងចង់ឲ្យរដ្ឋមន្ត្រីក្រសួងអប់រំមានវិធានការ និងចាត់ការចំពោះលោកនាយក និងនាយិការងវិទ្យាល័យ ទា ចំរ៉ាត់ ទៅតាមផ្លូវច្បាប់ ពីព្រោះយើងដឹងហើយថា អំពើពុករលួយនៅក្នុងវិស័យអប់រំ មិនត្រូវបានបោសសំអាត ហើយម្នាក់ៗរង់ចាំមើលសមត្ថភាពលោករដ្ឋមន្ត្រីថ្មី តើមានសេចក្ដីក្លាហានប៉ុណ្ណា»។
អ្នកគ្រូ ផាត់ ម៉ាលីន បង្រៀននៅវិទ្យាល័យ ទា ចំរ៉ាត់ ខេត្តពោធិ៍សាត់ ដែលបានដាក់ពាក្យបណ្ដឹងថ្នាក់ដឹកនាំខ្លួន បានទទូចដល់លោករដ្ឋមន្ត្រីក្រសួងអប់រំ ជួយមានវិធានការលុបបំបាត់អំពើពុករលួយក្នុងវិស័យអប់រំ ដើម្បីលើកស្ទួយស្ថាប័ននេះ។
អ្នកគ្រូបន្តថា នៅវិទ្យាល័យ ទា ចំរ៉ាត់ សូម្បីតែសៀវភៅមេរៀន ក៏អ្នកគ្រប់គ្រងបណ្ណាល័យ ឬអ្នកទទួលខុសត្រូវវិទ្យាល័យនេះ តម្រូវឲ្យសិស្សបង់លុយ ទើបអាចខ្ចីសៀវភៅមេរៀនយកទៅរៀនបាន៖ «គឺគាត់ដាក់សៀវភៅពុម្ពឲ្យសិស្សខ្ចី ដោយកំណត់ចំនួនលុយម្នាក់ ១ពាន់រៀល ដើម្បីខ្ចីសៀវភៅពុម្ពនោះទេ គឺគាត់មិនអនុញ្ញាតឲ្យខ្ចីសៀវភៅពុម្ពនោះទេ។ ឥឡូវនេះ សិស្សខ្ញុំមិនទាន់មានសៀវភៅពុម្ពគ្រប់គ្នានៅឡើយទេ សិស្សថ្នាក់ទី១០ ព្រោះគាត់អត់មានលុយបង់បន្ត ហើយបង់បន្តទៀត»។
ជាងនេះ សិស្សានុសិស្សក៏ត្រូវនាយកសាលាតម្រូវឲ្យកាត់សម្លៀកបំពាក់ជាឯកសណ្ឋានសិស្សទើបអនុញ្ញាតឲ្យចូលរៀន ប៉ុន្តែបើសិស្សណាមិនអនុវត្តតាមនឹងត្រូវទទួលពិន័យ។ អ្នកគ្រូ ម៉ាលីន បន្តថា ការតម្រូវឲ្យសិស្សកាត់សម្លៀកបំពាក់តាមការចង់បានរបស់នាយក គឺបានប៉ះពាល់ដល់សិស្សមានជីវភាពក្រីក្រដែលគ្មានថវិកាចំណាយ។
ទាក់ទិនបញ្ហានេះ លោក ប៊ូ សុវណ្ណារិទ្ធ នាយកវិទ្យាល័យ ទា ចំរ៉ាត់ ខេត្តពោធិ៍សាត់ បានបដិសេធថា មិនបានប្រព្រឹត្តខុសច្បាប់ស្តីពីការអប់រំដូចការចោទទេ។
លោកបញ្ជាក់ថា មិនបានតម្រូវឲ្យសិស្សបង់ថ្លៃសាលាចំនួន ៥ពាន់រៀល ឬក៏សិស្សផ្ទេរពីសាលាផ្សេងមករៀននៅវិទ្យាល័យ ទា ចំរ៉ាត់ សាលាមិនបានយកលុយទេ។ ចំណែកការតម្រូវឲ្យសិស្សានុសិស្សកាត់សម្លៀកបំពាក់ គឺលោកមានបំណងចង់ឲ្យសិស្សវិទ្យាល័យ ទា ចំរ៉ាត់ សិស្សមានឯកសណ្ឋានត្រឹមត្រូវតែប៉ុណ្ណោះ។
លោក ប៊ូ សុវណ្ណារិទ្ធ៖ «ប្រើរួម ដើម្បីថែរក្សាសៀវភៅហ្នឹងកុំឲ្យបាត់ ខាងបណ្ណាល័យហ្នឹងគេមានគំនិតមួយថាចង់ឲ្យសិស្សវិទ្យាល័យចេញថ្លៃជួសជុលសៀវភៅហ្នឹងក្នុង ១ក្បាល ១០០រៀល ក្នុង ១ឆ្នាំ។ ប៉ុន្តែមិនដឹងថា គេយកហ្នឹងគេយកតាមគំនិតរបស់គេធ្វើហ្នឹងអត់ ខ្ញុំវាមិនបានដឹងថា គេប្រមូលលុយហ្នឹងយ៉ាងម៉េចដែរ ពីព្រោះអាហ្នឹងខាងបណ្ណាល័យ»។
យ៉ាងណាក៏ដោយ លោក អ៊ឹង ង៉ោហុក ប្រធាននាយកដ្ឋានមធ្យមសិក្សានៃក្រសួងអប់រំ មិនទាន់មានអត្ថាធិប្បាយជុំវិញបញ្ហាកើតមាននៅវិទ្យាល័យ ទា ចំរ៉ាត់ ខេត្តពោធិ៍សាត់ ទេ ព្រោះជាប់រវល់ប្រជុំ។
ទោះជាបែបណា លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ មានជំនឿថា លោក ហង់ ជួនណារ៉ុន រដ្ឋមន្ត្រីក្រសួងអប់រំទើបឡើងកាន់តំណែងថ្មី នឹងបញ្ជូនមន្ត្រីចុះស៊ើបអង្កេត ឬមានវិធានការលុបបំបាត់អំពើពុករលួយនៅវិទ្យាល័យ ទា ចំរ៉ាត់ ឬកើតមានក្នុងវិស័យអប់រំ ដើម្បីលើកស្ទួយវិស័យនេះឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ៕