គ្រូបង្រៀននៅតាមសាលាបឋមសិក្សាមួយចំនួននាខេត្តពោធិ៍សាត់ បានស្នើដល់ លោក អ៊ឹម សិទ្ធី រដ្ឋមន្ត្រីក្រសួងអប់រំ ឲ្យស៊ើបអង្កេតចំពោះសកម្មភាពបក្ខពួកនិយមរបស់ លោក វង្ស សុត្តម អនុប្រធានមន្ទីរអប់រំខេត្តពោធិ៍សាត់។
ក្រុមគ្រូបង្រៀនបានចោទ លោក វង្ស សុត្តម ថា បានបញ្ជូនឈ្មោះកូនស្រីឈ្មោះ វង្ស សម្បត្តិនារី អតីតគ្រូបង្រៀននៅសាលាបឋមសិក្សាពោធិ៍សាត់ ដែលទើបមានអតីតភាពបង្រៀនចំនួន ៥ឆ្នាំ អាចមានសិទ្ធិទៅរៀនគ្រូកម្រិតមូលដ្ឋាន។ ប៉ុន្តែ បែរជាលោកគ្រូអ្នកគ្រូដែលខ្លះមានអតីតភាពការងារជាង ១០ឆ្នាំ ឬជិត ២០ឆ្នាំ មិនអាចដាក់ពាក្យចូលរៀនបានទៅវិញ។ ក្រៅពីនេះ ក្រុមគ្រូបង្រៀនខេត្តពោធិ៍សាត់ បានស្នើដល់រាជរដ្ឋាភិបាល ឲ្យជួយរកយុត្តិធម៌ជូនក្រុមគ្រូបង្រៀនថែមទៀត។
នាយកសាលាបឋមសិក្សាពោធិ៍សាត់ លោក ញ៉ូវ សារឿម មានប្រសាសន៍ថា គ្រូបង្រៀនថ្នាក់បឋមដែលមានសិទ្ធិដាក់ពាក្យចូលរៀនគ្រូកម្រិតមូលដ្ឋានបាន ទាល់តែមានអតីតភាពបង្រៀនចំនួន ២០ឆ្នាំ ឬជិត ២០ឆ្នាំ។ ប៉ុន្តែ លោកថា បើសិនជាសមាជិកគ្រូបង្រៀនណាម្នាក់បានផ្ទេរពីតួនាទីគ្រូបង្រៀន ទៅបម្រើការជាបុគ្គលិកតាមការិយាល័យអប់រំ ឬមន្ទីរអប់រំខេត្ត គឺពួកគេមានអាទិភាពចូលរៀនគ្រូកម្រិតមូលដ្ឋាន។
អនុប្រធានមន្ទីរអប់រំខេត្តពោធិ៍សាត់ លោក វង្ស សុត្តម ត្រូវជាឪពុកអ្នកគ្រូឈ្មោះ វង្ស សម្បត្តិនារី ដែលត្រូវក្រុមគ្រូបង្រៀនចោទប្រកាន់ បានឲ្យដឹងថា កូនស្រីគាត់បានផ្ទេរពីសាលាបឋមសិក្សាពោធិ៍សាត់ មកបម្រើការងារជាបុគ្គលិកនៅមន្ទីរអប់រំចំនួន១ឆ្នាំហើយ ហើយរូបគេមានសិទ្ធិចូលរៀនគ្រូកម្រិតមូលដ្ឋាន ដោយមិនចាំបាច់មានអតីតភាពការងារ ២០ឆ្នាំដូចគ្រូបង្រៀនផ្ទាល់ទេ។
ទោះយ៉ាងណា លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ បានចាត់ទុកសកម្មភាពរបស់ លោក វង្ស សុត្តម ថា ជាអំពើពុករលួយ និងទាមទារឲ្យ លោក អ៊ឹម សិទ្ធី មានវិធានការជាបន្ទាន់ ដើម្បីផ្តល់យុត្តិធម៌ជូនគ្រូបង្រៀនដទៃទៀត។
ភាពមិនប្រក្រតីនេះ គ្រូបង្រៀននៅតាមសាលាបឋមសិក្សាខេត្តពោធិ៍សាត់ បានស្នើដល់ លោក អ៊ឹម សិទ្ធី រដ្ឋមន្ត្រីក្រសួងអប់រំ ជួយពិនិត្យ និងចាត់វិធានការដោះស្រាយជាបន្ទាន់ ដើម្បីផ្តល់យុត្តិធម៌ជូនគ្រូបង្រៀនដទៃទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។