អតីតសមាជិកគណៈកម្មាធិការជាតិរៀបចំការបោះឆ្នោត (គ.ជ.ប) លោក រ៉ុង ឈុន ត្រូវបានគណៈកម្មាធិការនាយកនៃសមាគមគ្រូបង្រៀនកម្ពុជាឯករាជ្យ សម្រេចតែងតាំងរូបលោកជាទីប្រឹក្សានៃសមាគមនេះ កាលពីថ្ងៃទី២១ ខែមករា កន្លងទៅ។
លោក រ៉ុង ឈុន បានថ្លែងឲ្យដឹងថា លោកវិលចូលរួមធ្វើការក្នុងសមាគមនេះវិញ គឺដើម្បីជួយការងារសមាគមគ្រូបង្រៀនកម្ពុជាឯករាជ្យ ឲ្យដំណើរការល្អ និងមានសកម្មភាពក្នុងការជួយលើកកម្ពស់វិស័យអប់រំ ការពារសិទ្ធិរបស់គ្រូបង្រៀន និងជួយសម្រួលការងារមួយចំនួនទៀតនៅក្នុងសមាគមនេះ។
លោកបន្ថែមថា ក្រៅពីជួយកិច្ចការនៅក្នុងសមាគមគ្រូបង្រៀនកម្ពុជាឯករាជ្យ ឲ្យបានល្អប្រសើរឡើង លោកនៅតែបន្តធ្វើការងារជួយលើកស្ទួយសិទ្ធិមនុស្ស ជាពិសេសជួយដល់កម្មករ កម្មការិនីដែលរងការរំលោភច្បាប់ការងារពីសំណាក់ថៅកែរោងចក្រ និងជួយការពារសិទ្ធិពួកគាត់ក្នុងការទាមទារផលប្រយោជន៍ស្របច្បាប់៖ «ខ្ញុំនឹងជួយកិច្ចការងារដូចជាទំនាក់ទំនងកិច្ចការជាតិ អន្តរជាតិ ជួយផ្ដល់បទសម្ភាសន៍ទាក់ទងទៅនឹងកិច្ចការសមាគម ក៏ដូចជារឿងវិស័យអប់រំ រឿងសង្គមជូនដល់អ្នកសារព័ត៌មានជាតិ អន្តរជាតិ និងរៀបចំផែនការយុត្តិសាស្ត្រសម្រាប់សមាគមគ្រូបង្រៀនកម្ពុជាឯករាជ្យ ដែរ»។
លោក រ៉ុង ឈុន ធ្លាប់ជាអតីតប្រធានសមាគមគ្រូបង្រៀនកម្ពុជាឯករាជ្យ មុននឹងលោកត្រូវបានគណបក្សសង្គ្រោះជាតិ ជ្រើសរើសឲ្យធ្វើជាសមាជិក គ.ជ.ប នៅក្រោយការបោះឆ្នោតជាតិ ឆ្នាំ២០១៣ ហើយក្រោយពេលដែលតុលាការកំពូលបានសម្រេចរំលាយគណបក្សសង្គ្រោះជាតិ តាមបញ្ជាលោកនាយករដ្ឋមន្ត្រី ហ៊ុន សែន កាលពីពាក់កណ្ដាលខែវិច្ឆិកា ឆ្នាំ២០១៧ លោកក៏បានសម្រេចចិត្តលាឈប់ពីតួនាទីជាសមាជិកគណៈកម្មាធិការជាតិរៀបចំបោះឆ្នោត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។