អ្នកស៊ើបអង្កេតអង្គការអាដហុក (Adhoc) ប្រចាំខេត្តកំពង់ស្ពឺ លោក រ័ត្ន ថាវី ឲ្យដឹងថា ការប៉ះទង្គិចគ្នានោះ បណ្ដាលឲ្យកម្មករជាច្រើននាក់រងរបួសធ្ងន់និងស្រាល ក្នុងនោះមានកម្មការិនីម្នាក់ដែលមានផ្ទៃពោះ ៣ខែ បានរលូតកូន បន្ទាប់ពីត្រូវកម្លាំងកងរាជអាវុធហត្ថយកដំបងឆក់នាង ហើយនាងបានដួលទៅលើដី។
តាមការអង្កេតផ្ទាល់ លោក រ័ត្ន ថាវី មើលឃើញថា មុននឹងឈានដល់ការប្រើអំពើហិង្សា ដំបូងឡើយកម្មករបានធ្វើកូដកម្មនៅមុខរោងចក្រ រហូតហៀរដល់លើផ្លូវជាតិលេខ៤ បង្កឲ្យកកស្ទះចរាចរណ៍ ទើបមានការបង្ក្រាបពីកម្លាំងកងរាជអាវុធហត្ថតែម្ដង។ រីឯកម្មករក៏បានយកដុំថ្មគប់ទៅលើកម្លាំងកងរាជអាវុធហត្ថវិញដែរ រហូតធ្វើឲ្យមានរបួសទាំងសងខាង។ ប៉ុន្តែខាងកម្មករបួសច្រើនជាង និងធ្វើឲ្យស្ត្រីរោងចក្ររលូតកូនថែមទៀត៖ «ស្ត្រីមានផ្ទៃពោះ ៣ខែម្នាក់ ត្រូវបានរលូតកូន ដោយសារតែប៉េអឹមឆក់ និងមានរបួសជាច្រើននាក់ គ្រាន់តែថា យើងកំពុងស៊ើបអង្កេត»។
ប្រធានសហជីពសេរីកម្មករនៃព្រះរាជាណាចក្រកម្ពុជា ប្រចាំរោងចក្រ សាប្រ៊ីណា លោក ស៊ុន វណ្ណនី បញ្ជាក់ថា កម្មការិនីដែលរលូតកូននោះមានឈ្មោះ អ៊ុំ ស្រីសូត្រ ហើយនាងបានចេញពីមន្ទីរពេទ្យហើយ កាលពីរសៀលថ្ងៃទី២៧ ខែឧសភា។
លោកបញ្ជាក់ថា តាមការស្រាវជ្រាវជំហានដំបូង កម្មករចំនួន ២៣នាក់រងរបួស ក្នុងនោះមាន ៣នាក់របួសធ្ងន់ ដោយម្នាក់រលូតកូន ហើយ ២នាក់ទៀតសន្លប់ មិនដឹងខ្លួននៅឡើយរហូតនៅរសៀលថ្ងៃដដែល៖ «អ្នកដែលរបួសពោកក្បាល ត្រូវជើង វាវ៉ៃជើង វ៉ៃដៃ។ ទើបតែរកឃើញម្នាក់ គាត់រលូតកូនបណ្ដាលមកពីប៉េអឹមគាត់រុញគាត់ ម្នាក់ទៀតខ្ញុំមិនទាន់ទាក់ទងបាន»។
វិទ្យុអាស៊ីសេរីមិនអាចទាក់ទងតំណាងរោងចក្រ សាប្រ៊ីណា និងតំណាងមន្ត្រីកងរាជអាវុធហត្ថបានទេ ជុំវិញការប៉ះទង្គិចគ្នាកាលពីថ្ងៃទី២៧ ខែឧសភា។
មន្ត្រីអង្គការអាដហុក ប្រចាំខេត្តកំពង់ស្ពឺ ចាត់ទុកការប្រើហិង្សារបស់កម្លាំងកងរាជអាវុធហត្ថថា មិនមែនជាដំណោះស្រាយប្រសើរនោះឡើយ ហើយស្នើសុំឲ្យខាងក្រុមហ៊ុន និងមន្ត្រីមន្ទីរការងារចេញមកជួយដោះស្រាយដោយសន្តិវិធី៖ «ដំណោះស្រាយបែបហ្នឹងវាមិនមែនជាដំណោះស្រាយដ៏ល្អ វាអំពើហិង្សាទៅលើកម្មករ កម្មការិនីទៅវិញ»។
កម្មករ សាប្រ៊ីណា បានធ្វើកូដកម្មតាំងពីថ្ងៃទី២១ ខែឧសភា ដើម្បីទាមទារឲ្យក្រុមហ៊ុនទទួលសំណើ ៩ចំណុច ជាអាទិ៍សុំឲ្យថៅកែរោងចក្រផ្ដល់ប្រាក់ចំនួន ១៤ដុល្លារ ដែលរដ្ឋាភិបាលប្រកាសឲ្យកម្មករចាប់ពីខែឧសភា តទៅ បន្ថែមលើប្រាក់ខែគោលដែលមានស្រាប់ចំនួន ៧៤ដុល្លារ។ ស្នើសុំ ថ្លៃធ្វើដំណើរ ៨ដុល្លារបន្ថែមទៀត លើប្រាក់ដែលមានស្រាប់ចំនួន ៧ដុល្លារ សុំថ្លៃអាហារបាយថ្ងៃត្រង់ចំនួន ៤ពាន់រៀលក្នុងមួយថ្ងៃជាដើម។
ការទាមទាររបស់កម្មករធ្លាប់ត្រូវសមត្ថកិច្ចបង្ក្រាបជាច្រើនលើក ដោយធ្លាប់បានប្រើរថយន្តទឹកបាញ់ទៅលើក្រុមកម្មករក្នុងហ្វូងកូដកម្ម កាលពីថ្ងៃទី២១ ខែឧសភា។
ជុំវិញការទាមទារលក្ខខណ្ឌការងាររបស់កម្មករ សាប្រ៊ីណា ប្រធានការិយាល័យការងារនៃមន្ទីរការងារខេត្តកំពង់ស្ពឺ លោក ចឹក បូរិន បញ្ជាក់ថា លោកបានចុះទៅចរចា ៥ ទៅ ៦លើកហើយជាមួយក្រុមហ៊ុន និងអាជ្ញាធរខេត្ត ប៉ុន្តែសំណើរបស់កម្មករវាលើសពីច្បាប់ដែលមានចែង ទើបខាងក្រុមហ៊ុនបដិសេធមិនទទួលយកបាន។
លោកពន្យល់ថា សព្វថ្ងៃនេះកម្មករបានទទួលប្រាក់ខែចំនួន ៩៥ដុល្លារ ចំពោះកម្មករធ្វើការយូរឆ្នាំ បានទទួលប្រាក់រហូត ១០២ដុល្លារក្នុងមួយខែ ដូច្នេះបើទាមទារដំឡើង ១៤ដុល្លារបន្ថែមទៀតនោះ វាមិនអាចទៅរួចបាននោះឡើយ។
យ៉ាងណាតំណាងសហជីពសេរីកម្មករប្រចាំរោងចក្រសាប្រ៊ីណា បញ្ជាក់ថា ភាគីរោងចក្រឲ្យប្រាក់ខែគោលកម្មករលើសពីរោងចក្រដទៃ ខណៈរោងចក្រផ្សេងពីមុនបាន ៦១ដុល្លារ ក្នុងមួយខែ តែនៅរោងចក្រ សាប្រ៊ីណា ទទួលបានរហូត ៧៤ដុល្លារក្នុងមួយខែ។ លុះដល់ពេលរដ្ឋាភិបាលប្រកាសដំឡើងប្រាក់ខែ ១៤ដុល្លារបន្ថែមលើប្រាក់ខែគោលចាប់ពីខែឧសភា នេះ ខាងរោងចក្របែរជាដំឡើងឲ្យកម្មករតែ ៩ដុល្លារប៉ុណ្ណោះ។
ជុំវិញរឿងនេះ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា លោក អាត់ ធន់ ពន្យល់ថា ដំបូងឡើយកម្មករ សាប្រ៊ីណា ទទួលប្រាក់ខែគោលចំនួន ៦៨ដុល្លារក្នុងមួយខែប៉ុណ្ណោះ ប៉ុន្តែដោយសហជីពលោកមានអនុស្សរណៈ (MOU) ជាមួយក្រុមហ៊ុន ទើបកាលពីខែមករា កន្លងទៅ លោកបានចរចាសុំដំឡើងប្រាក់ខែឲ្យកម្មករបាន ៦ដុល្លារបន្ថែមទៀត សរុបទៅកម្មករបានទទួលប្រាក់ខែ ៧៤ដុល្លារ។ ខាងក្រុមហ៊ុនសន្យាថា ប្រសិនបើមានការចរចាគ្នានៅថ្នាក់ជាតិដំឡើងបានប្រាក់លើសពីនេះទៀត ខាងក្រុមហ៊ុននឹងដំឡើងបន្ថែម។
លោក អាត់ ធន់ បញ្ជាក់ថា លុះកិច្ចចរចាថ្នាក់ជាតិសម្រេចដំឡើងប្រាក់ ១៤ដុល្លារបន្ថែមនោះ ខាងក្រុមហ៊ុនព្រមដំឡើង ៩ដុល្លារទៀតឲ្យកម្មករ ប៉ុន្តែបែរជាកម្មករស្នើសុំដំឡើងរហូត ១៤ដុល្លារថែមទៀត ដែលនេះជាមូលហេតុធ្វើឲ្យភាគីរោងចក្របដិសេធមិនទទួលសំណើរបស់កម្មករ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។