Opens in new windowពលរដ្ឋរស់នៅស្រុកព្រែកប្រសព្វ ខេត្តក្រចេះ អំពាវនាវឲ្យរដ្ឋាភិបាល ឬក្រសួងអប់រំ ចុះសិក្សាស្រាវជ្រាវពីតម្រូវការរបស់សិស្ស ដែលត្រូវការសាលារៀនជាចាំបាច់។ ការអំពាវនាវនេះ កើតឡើងស្របពេលដែលវិទ្យាល័យក្នុងស្រុកនេះ មិនអាចបំពេញតម្រូវការសិក្សារបស់សិស្សក្នុងស្រុកទាំងមូលបាននោះទេ។ បញ្ហានេះ បង្កការលំបាកធ្ងន់ធ្ងរដល់ការសិក្សារបស់សិស្ស ហើយក៏ជាកត្តារួមផ្សំមួយ ដែលអាចឲ្យយុវជនងាយនឹងបោះបង់ការសិក្សា។
ពលរដ្ឋរស់នៅភូមិព្រែកជីក ឃុំសោប ស្រុកព្រែកប្រសព្វ ឲ្យដឹងនៅថ្ងៃទី២៦ កញ្ញា ថា ខ្វះសាលារៀន គឺជាក្តីបារម្ភរបស់អ្នកភូមិ ខណៈចំនួនយុវជនកាន់តែកើនឡើង រីឯវិទ្យាល័យឆ្ងាយពីលំនៅឋាន។ បញ្ហាទាំងនេះ អាចជាកត្តារួមផ្សំមួយ បង្កជាឧបសគ្គចម្បងដែលជំរុញឲ្យយុវជនភាគច្រើន ពុំអាចតស៊ូបន្តការសិក្សាកម្រិតមធ្យមសិក្សា ឬកម្រិតវិទ្យាល័យបាន។
ពលរដ្ឋម្នាក់ គឺលោក ថៃ ម៉ាប់ រៀបរាប់នៅថ្ងៃទី២៦ កញ្ញា ថា បច្ចុប្បន្នយុវជនជាច្រើនរស់នៅក្នុងស្រុកព្រែកប្រសព្វ បានបោះបង់ការសិក្សានៅកម្រិតវិទ្យាល័យ។ ជាក់ស្ដែង កូនៗរបស់លោកត្រូវបង្ខំចិត្តឈប់រៀននៅកម្រិតថ្នាក់អនុវិទ្យាល័យ ដោយសារកត្តាជីវភាព ការធ្វើដំណើរឆ្ងាយ និងខ្វះសាលារៀន ជាដើម។ លោកសង្កត់ធ្ងន់ថា ពីមួយឆ្នាំទៅមួយឆ្នាំ យុវសិស្សដែលរស់នៅឃុំឆ្ងាយដាច់ស្រយាល ប្រឈមការលំបាកធ្វើដំណើរទៅវិទ្យាល័យ ព្រោះសាលារៀនមានចម្ងាយឆ្ងាយពីផ្ទះរបស់ពួកគេចាប់ពីជាង ១០គីឡូម៉ែត្រដល់ជាង ៥០គីឡូម៉ែត្រ ម្យ៉ាង ផ្លូវលំបាកធ្វើដំណើរផង៖ «អ្នកធំៗគេអត់សូវគិតគូរខាងអប់រំហ្នឹងទេ។ ការអប់រំស្រុកព្រែកប្រសព្វ នេះ យ៉ាប់ណាស់វេទនាណាស់ ទម្រាំរៀនចប់មួយៗមិនងាយទេ ហើយលុយចងការគេទៅ ខ្ញុំអ្នកក្រអ៊ីចឹង។ ខ្ញុំអត់ហ៊ានចងការគេទេ ចង់ឈប់អី ខ្ញុំនឹងជំរុញឲ្យទៅរៀនទៀត ក្រែងលោថ្ងៃណាមួយគេបានសាលា»។
ឆ្លើយតបបញ្ហានេះ ប្រធានមន្ទីរអប់រំ ខេត្តក្រចេះ លោក ឡាយ បូរ៉ា មានប្រសាសន៍ថា ប្រសិនបើពលរដ្ឋពិតជាចង់បានវិទ្យាល័យបន្ថែមមែន ត្រូវធ្វើសំណើដែលទទួលស្គាល់ដោយអាជ្ញាធរមូលដ្ឋាន ដើម្បីឲ្យមន្ត្រីជំនាញនៃមន្ទីរអប់រំ ចុះស្រាវជ្រាវពីលទ្ធភាពនៃតម្រូវការប្រើប្រាស់ជាក់ស្តែង នៅតំបន់នោះជាមុនសិន។ លោកបដិសេធថា តម្រូវការសិក្សារបស់សិស្សថ្នាក់មធ្យមសិក្សា ពុំមានអ្វីលំបាកដូចពីមុននោះឡើយ ហើយសិស្សក៏អាចមានជម្រើសច្រើនដើម្បីសិក្សានៅមធ្យមសិក្សាបាន ដូចជាអាចជិះទូកឆ្លងទន្លេមកសិក្សានៅវិទ្យាល័យនៅទីរួមខេត្ត ហើយក៏អាចសិក្សានៅវិទ្យាល័យនៅទីរួមស្រុកព្រែកប្រសព្វ ក៏បាន៖ «តើបើការងារចាំបាច់ យើងមើលទៅ ថាវាច្រើនអាហ្នឹងយើងនឹងសុំគោលការណ៍ទៅក្រសួង ព្រោះកន្លងមក យើងមើលឃើញថា វាមិនពិបាកដែរទេ វាគ្រាន់ថាឆ្លងទឹកបន្តិច សម្រាប់គាត់មិនឆ្លងទឹក គាត់ទៅខាងព្រែកប្រសព្វ អត់ឆ្លងទឹកទេ»។
មន្ត្រីសង្គមស៊ីវិលមើលឃើញថា បញ្ហាខ្វះសាលារៀននេះបង្ហាញថា ក្រសួងអប់រំ ហាក់កំពុងដើរបញ្ច្រាសពីគោលនយោបាយពង្រឹងវិស័យអប់រំ និងការអនុវត្តយុទ្ធសាស្ត្រលើកកម្ពស់វិស័យអប់រំជាអាទិភាពក្នុងគោលដៅ ដើម្បីទប់ស្កាត់អត្រាបោះបង់ការសិក្សារបស់សិស្ស។
ទាក់ទងបញ្ហានេះ អ្នកសម្របសម្រួលនៃបណ្ដាញរួបរួមដើម្បីគណនេយ្យភាពសង្គម នៅអាស៊ីបូព៌ា និងប៉ាស៊ីហ្វិក ប្រចាំកម្ពុជា លោក សន ជ័យ ថ្លែងបញ្ជាក់ថា ក្តីកង្វក់របស់ពលរដ្ឋទាក់ទិនការខ្វះសាលារៀន គឺជាបញ្ហាចម្បង ដែលក្រសួងអប់រំ ត្រូវយកចិត្តទុកដាក់ដោះស្រាយជាបន្ទាន់ ដើម្បីឲ្យអនុលោមតាមគោលនយោបាយកំណែទម្រង់ស៊ីជម្រៅរបស់វិស័យអប់រំ។ លោកថា ជាក់ស្តែង រដ្ឋសភាបានអនុម័តកញ្ចប់ថវិកាសម្រាប់ក្រសួងអប់រំ ប្រមាណ ៥០០លានដុល្លារក្នុងឆ្នាំ២០១៥ ស្មើនឹង ១១ភាគរយនៃថវិកាជាតិសរុប ដែលមិនគួរទុកឲ្យពលរដ្ឋត្អូញត្អែរបញ្ហាខ្វះសាលារៀនឡើយ៖ «ការបែងចែកថវិកាជាតិ គឺក្រសួងអប់រំ បានច្រើនជាងគេ។ ការដែលច្រើនជាងគេ គឺមានទំហំច្រើន ហើយបើសិនជាទំហំវាច្រើន នៅតែខ្វះសាលារៀន យើងសួរថា តើការចាយលុយកាក់វាមានប្រសិទ្ធភាពត្រឹមណា? ហើយយើងចង់ឲ្យសិស្សមានសាលារៀន យើងចង់ឲ្យស្ថានភាពក្រសួងអប់រំ ប្រសើរឡើងយ៉ាងម៉េចទេ? បានន័យថា អ្នកសម្រេចចិត្តផ្នែកគោលនយោបាយ គេកំពុងតែចាប់អារម្មណ៍ហើយ បានលើកទឹកចិត្តវិស័យអប់រំហ្នឹង»។
ស្ថិតិ និងសូចនាករអប់រំខេត្តក្រចេះ ក្នុងឆ្នាំ២០១៤-២០១៥ ក្នុងស្រុកព្រែកប្រសព្វ បង្ហាញថា ស្រុកព្រែកប្រសព្វ មានវិទ្យាល័យចំនួន២ ហើយមានសិស្សសិក្សាចំនួន ១.៧៤០នាក់ មានអនុវិទ្យាល័យចំនួន៧ មានសិស្សសិក្សាចំនួន ១.៥៣៧នាក់ និងមានសាលាបឋមសិក្សាចំនួន៤៤ ដែលមានសិស្សចំនួន ១៣.៦២៥នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។