មន្ត្រីសង្គមស៊ីវិលខេត្តព្រះសីហនុ បានចាត់ទុកការចាប់ឃុំខ្លួនអ្នកជំនួញ ឬសេដ្ឋីជនជាតិអ៊ុយក្រែន ឈ្មោះ នីកូឡាយ ដារាសេនកូ (Nikolay Doroshenko) របស់តុលាការខេត្តនេះ ថាអាចជាសារព្រមានដល់ជនបរទេសផ្សេងទៀត ដែលយកមូលដ្ឋាននេះបង្កើតជម្លោះ បង្កឲ្យមានអសន្តិសុខនាពេលកន្លងមក។
មន្ត្រីអង្គការលីកាដូ (Licadho) និងប្រជាពលរដ្ឋមួយចំនួននាខេត្តព្រះសីហនុ បានសាទរចំណាត់ការរបស់តុលាការខេត្តព្រះសីហនុ ដែលមានវិធានការក្តៅតាមផ្លូវច្បាប់ចាប់ខ្លួនសេដ្ឋី ឬអ្នកជំនួញជនជាតិអ៊ុយក្រែន ម្នាក់ឈ្មោះ នីកូឡាយ ដារាសេនកូ (Nikolay Doroshenko) ដាក់ពន្ធនាគារកាលពីថ្ងៃទី២៥ ខែមីនា។
នីកូឡាយ ដារាសេនកូ ដែលមានសញ្ជាតិខ្មែរ ហើយមានដើមកំណើតមកពីប្រទេសអ៊ុយក្រែន ត្រូវកម្លាំងកងរាជអាវុធហត្ថខេត្តព្រះសីហនុ ដឹកនាំដោយលោកមេបញ្ជាការ ហេង ប៊ុនទី ចាប់ខ្លួនកាលពីល្ងាចថ្ងៃទី២៥ ខែមីនា ហើយបានបញ្ជូនភ្លាមៗទៅតុលាការឃុំខ្លួនក្នុងពន្ធនាគារ។ នីកូឡាយ ដារាសេនកូ ត្រូវតុលាការចោទពីបទក្លែងបន្លំហត្ថលេខា ប្រើប្រាស់ឯកសារក្លែងក្លាយ និងរំលោភលើទំនុកចិត្ត ពិសេសដោយអភិបាល ឬបុគ្គលផ្សេងទៀត។
ត្រង់ចំណុចនេះ លោក ឃុន សាវឿន មន្ត្រីអង្កេតអង្គការលីកាដូ ប្រចាំខេត្តព្រះសីហនុ បានស្នើដល់តុលាការ ឬសមត្ថកិច្ច ត្រូវអនុវត្តទៅលើជនបរទេសទាំងឡាយណាដែលយកខេត្តមាត់សមុទ្រមួយនេះ បង្កឲ្យមានអសន្តិសុខបង្កការភ័យខ្លាចដល់ពលរដ្ឋឲ្យបានជាស្ថាពរ។ មន្ត្រីសិទ្ធិមនុស្សរូបនេះ បានកត់សម្គាល់ថា ៣ខែដើមឆ្នាំ២០១៥ នេះ បញ្ហាអសន្តិសុខបង្កដោយជនបរទេសនាខេត្តព្រះសីហនុ មានដូចជាបទល្មើសបាញ់កាប់ចាក់ និងឈានដល់ដុតឡាននៅចំកណ្ដាលក្រុងទេសចរណ៍ មានសញ្ញាកើនច្រើនគួរឲ្យព្រួយបារម្ភ ទោះបីបទល្មើសទាំងនេះសមត្ថកិច្ចខិតខំទប់ស្កាត់បែបណាក្តី។
លោក ឃុន សាវឿន មានជំនឿថា បទល្មើសបង្កដោយជនបរទេសនាខេត្តព្រះសីហនុ អាចមានសញ្ញាថយចុះ ក្រោយពេលតុលាការចាប់ឃុំខ្លួនអ្នកជំនួញជនជាតិអ៊ុយក្រែន ដែលធ្លាប់បង្ករឿងអាស្រូវជាមួយភាគីគូជម្លោះមកពីក្រៅប្រទេសដូចគ្នា បានអូសបន្លាយយូរឆ្នាំ និងយកខេត្តព្រះសីហនុ សម្រាប់បង្កហិង្សាកន្លងមក៖ «ត្រីមាសទី១ ឆ្នាំ២០១៥ គឺមានភាពអនាធិបតេយ្យរបស់ជនបរទេស ដែលចូលមកស្រុកខ្មែរ មានរហូតដល់អាចកាន់អាវុធបាញ់ប្រហារគ្នាយ៉ាងអនាធិបតេយ្យ និងជារឿងមួយមានការព្រួយបារម្ភបំផុត។ បញ្ហានេះ ខ្ញុំគិតថា អាចជាប់ពាក់ព័ន្ធនឹងក្រុមជំនួញមកពីក្រៅប្រទេស។ ហើយពួកអ្នកជំនួញរកស៊ីធំៗដែលគេអាងថាមានលុយច្រើនទាំងនោះ បានធ្វើសកម្មភាពបាញ់បោះសេរី ដោយមិនខ្លាចកម្លាំងសមត្ថកិច្ចខេត្តព្រះសីហនុ នោះទេនាពេលកន្លងមក»។
យ៉ាងណាក៏ដោយ មន្ត្រីតុលាការខេត្តព្រះសីហនុ ស្នើមិនបង្ហាញអត្តសញ្ញាណ បានប្រាប់វិទ្យុអាស៊ីសេរី ថា អ្នកជំនួញឈ្មោះ នីកូឡាយ ដារាសេនកូ ត្រូវមេធាវីរបស់លោកដាក់ពាក្យស្នើនៅក្រៅឃុំ ក្រោយពេលមួយថ្ងៃចូលពន្ធនាគារ។ ប៉ុន្តែបញ្ហានេះ លោក ឈុន ជ្រា មេធាវីការពារក្តីឲ្យ លោក នីកូឡាយ ដារាសេនកូ មិនធ្វើអត្ថាធិប្បាយទេ។
ចំណែក អ្នកស្រី ចាត សូរស្មី ព្រះរាជអាជ្ញាអមសាលាដំបូងខេត្តព្រះសីហនុ ក៏មិនបំភ្លឺជុំវិញសំណុំរឿងជនត្រូវចោទឈ្មោះ នីកូឡាយ ដែលកំពុងជាប់ក្នុងពន្ធនាគារនេះដែរ។ ប៉ុន្តែអ្នកស្រីបានបង្វែរសំណួរឲ្យវិទ្យុអាស៊ីសេរី សួរទៅ លោក អ៊ី ឃាង ចៅក្រមស៊ើបសួរ ដែលជាអ្នកកាន់សំណុំរឿងផ្ទាល់ជំនួសវិញ ប៉ុន្តែមិនអាចទាក់ទងសុំការបំភ្លឺបានទេតាមទូរស័ព្ទ។
បុរសអ៊ុយក្រែន ដែលមហាជនស្គាល់ថាជាសេដ្ឋីរុស្ស៊ីឈ្មោះ នីកូឡាយ ដារាសេនកូ បានទទួលអត្តសញ្ញាណប័ណ្ណសញ្ជាតិខ្មែរកាលពីថ្ងៃទី២១ ខែមីនា ឆ្នាំ២០០៧។ អ្នកជំនួញរូបនេះ គឺជាម្ចាស់ផ្ទះសំណាក់ និងភោជនីយដ្ឋានផ្ទះពស់ (Snake House) មានទីតាំងនៅភូមិ៣ សង្កាត់លេខ៣ ក្រុងព្រះសីហនុ ខេត្តព្រះសីហនុ។
នីកូឡាយ ត្រូវតុលាការចោទពីបទក្លែងបន្លំហត្ថលេខា ប្រើប្រាស់ឯកសារក្លែងក្លាយ និងរំលោភលើទំនុកចិត្ត ពិសេសដោយអភិបាល ឬបុគ្គលផ្សេងទៀត ហើយបានប្រព្រឹត្តនៅភូមិ៣ សង្កាត់៣ ក្រុងព្រះសីហនុ ខេត្តព្រះសីហនុ កាលពីឆ្នាំ២០០៥ និងឆ្នាំ២០១០ បទល្មើសព្រហ្មទណ្ឌដែលមានបញ្ញត្តិក្នុងមាត្រា៦២៦ និងផ្ដន្ទាទោសតាមមាត្រា៦២៧ មាត្រា៦២៨ និងមាត្រា៣៩៣ នៃក្រមព្រហ្មទណ្ឌ។ ហើយថា បទល្មើសដែលចោទប្រកាន់លើជនជាប់ចោទជាបទមជ្ឈិម ដែលត្រូវផ្ដន្ទាទោសដាក់ពន្ធនាគារ។
កាលពីថ្ងៃទី១០ ខែកុម្ភៈ ឆ្នាំ២០១៥ តុលាការបានបង្គាប់ឲ្យជនត្រូវចោទឈ្មោះ នីកូឡាយ ដារាសេនកូ ចូលខ្លួនទៅបំភ្លឺតាមដីកាកោះ ប៉ុន្តែជនត្រូវចោទរូបនេះមិនបានបង្ហាញខ្លួនតាមកាលបរិច្ឆេទទេ។ ជាងនេះ នៅថ្ងៃទី២៦ ខែកុម្ភៈ ឆ្នាំ២០១៥ តុលាការក៏បានចេញដីកាបង្គាប់ឲ្យជនត្រូវចោទរូបនេះ ចូលខ្លួនជាលើកទី២ ប៉ុន្តែជនត្រូវចោទរូបនេះមិនបានបង្ហាញខ្លួនដដែល ហើយមិនដឹងថាជនត្រូវចោទឋិតនៅកន្លែងណាទេ។
ស្នងការនគរបាលខេត្តព្រះសីហនុ លោក ស៊ាង កុសល បានទទួលស្គាល់ថា រាល់បទល្មើសផ្សេងៗទាក់ទងនឹងជនបរទេសនៅខេត្តព្រះសីហនុ គឺជនបរទេសភាគច្រើនមិនបានសហការជាមួយកម្លាំងសមត្ថកិច្ចទេ ដែលជាហេតុនាំឲ្យសមត្ថកិច្ចជំនាញមានផលវិបាកក្នុងការវែករកមុខសញ្ញា នៃល្មើសផ្សេងៗកន្លងមក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។