នៅខាងក្រៅបរិវេណជុំវិញអគារតុលាការ កងកម្លាំងអាជ្ញាធរចម្រុះ និងកងសន្តិសុខសាលាខណ្ឌ បានដាក់ពង្រាយបិទច្រកផ្លូវជាច្រើន ដែលអាចចេញចូលទៅកាន់អគារតុលាការ។
សហជីពកម្មករ សមាជិកសមាគមប្រជាធិបតេយ្យ នៃសេដ្ឋកិច្ចក្រៅប្រព័ន្ធរបស់ លោក វន់ ពៅ អ្នកមានជម្លោះដីធ្លី ជាពិសេសអ្នកបឹងកក់ និងព្រះសង្ឃជាដើមសរុបប្រមាណ ៣០០នាក់ ប្រមូលផ្ដុំគ្នានៅលើច្រកផ្លូវចូលទៅខាងមុខតុលាការ ដោយចែកជា ២ក្រុម។ មួយក្រុមនៅក្បែររង្វង់មូលអាងទឹក និងមួយក្រុមទៀតនៅរង្វង់មូលក្បែរវត្តព្រះពុទ្ធ។ ពួកគេស្រែកតវ៉ាអោយអាជ្ញាធរពាក់ព័ន្ធដោះលែងអ្នកទាំង ២៣នាក់ អោយមានសេរីភាព។
ការប៉ះទង្គិចមួយបានកើតឡើងរវាងកងកម្លាំងសន្តិសុខ និងព្រះសង្ឃ បណ្ដាលអោយសន្តិសុខមួយចំនួនរបួស។
សំឡេងទាមទារ៖ «យើងត្រូវការយុត្តិធម៌អោយដោះលែងអ្នកទាំង ២៣នាក់នៅថ្ងៃនេះ!»។
យ៉ាងហោចណាស់មានកងកម្លាំងសន្តិសុខសាលាខណ្ឌដូនពេញចំនួន ៤នាក់ បានរបួសនៅក្នុងការប៉ះទង្គិចមួយប្រាវរវាងក្រុមនេះ និងព្រះសង្ឃ ដែលចូលរួមជាមួយក្រុមអ្នកតវ៉ា។
អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ ថ្លែងថា ការបង្កហិង្សាចាប់ផ្ដើមដោយព្រះសង្ឃ ដែលមិនបានគោរពដល់តួនាទីរបស់កម្លាំងអាជ្ញាធរ៖ «ឃើញសង្ឃយកដុំថ្មគប់ទៅខាងអាជ្ញាធរមុនហ្នឹង ជាទង្វើជាសកម្មភាពមួយដែលមិនអាចទទួលយកបានទេ ព្រោះធម្មតាជាបព្វជិតជាសង្ឃ ត្រូវរក្សាសីល កាន់ធម៌ណាស់ តែបែរជាមកប្រើហិង្សា ហើយទៅអាជ្ញាធរទៀត គឺជារឿងដែលខ្ញុំថ្កោលទោសណាស់ ដែលមិនអាចអត់អោយបាន»។
តំណាងអ្នកបឹងកក់ អ្នកស្រី ទេព វន្នី បានអះអាងពីការប៉ះទង្គិចនោះថា ក្រុមសន្តិសុខពុំមានសិទ្ធិអំណាចអ្វីមកវាយអ្នកតវ៉ាឡើយ។ ពួកគេត្រូវតែទទួលខុសត្រូវចំពោះអំពើហិង្សាទាំងឡាយ៖ «ឥឡូវនេះរដ្ឋាភិបាលកំពុងគេចវេសនូវការទទួលខុសត្រូវ។ គាត់យកអ្នកទាំងអស់ហ្នឹងម៉ោប្រើហិង្សាទៅលើប្រជាពលរដ្ឋ និងព្រះសង្ឃ។ គាត់យកលេសថាគាត់អត់បានបញ្ជាអត់បានធ្វើ អ្នកហ្នឹងអត់ដឹងអ្នកណាគ្រប់គ្រងពិតប្រាកដ ហើយអ្នកហ្នឹងវ៉ៃដោយសារអី?»។
ទាក់ទិននឹងស្ថានភាពទូទៅខាងក្រៅតុលាការវិញ ចរាចរណ៍នៅផ្លូវខាងមុខតុលាការត្រូវបិទទាំងស្រុង រនាំងដែកជាច្រើនជាន់ត្រូវគេដាក់បណ្ដាក់គ្នា ឡានទឹកជិត ១០គ្រឿងត្រូវបញ្ឈរចាំនៅចំពោះមុខអ្នកតវ៉ា។ សមត្ថកិច្ចជាច្រើនរយនាក់ប្រដាប់ដោយដំបងឆក់ និងខែល ត្រូវដាក់ពង្រាយតាមដងផ្លូវ និងឈរជើងក្នុងពហុកីឡាដ្ឋានអូឡាំពិក និងវត្តព្រះពុទ្ធ ជាដើម។
ខុសប្លែកគ្នាបន្តិចពីការតវ៉ានៅលើកមុនៗ ក្រុមស្ត្រីនៃតំបន់បឹងកក់ វិញ ពួកគេបានតុបតែងខ្លួនជាស្ត្រីស្រស់ស្អាត មានសៀតផ្កាចំប៉ីនៅនឹងត្រចៀក ដោយសរសេរថា ដោះលែងអ្នក ២៣នាក់។ ពួកគេស្រែកច្រៀងចំអកឡកឡឺយដល់កងកម្លាំងអាជ្ញាធរ និងមន្ត្រីតុលាការ៖ «ប៉ូលិសខូចណាស់យិះ គិតតែពីដើរបិទផ្លូវ គ្រាន់តែអូនស្រីដើរទៅ នែក! ប្រុសពៅបិទផ្លូវធ្វើហី។ មេបញ្ជាពេលណានែក! ជីវ៉ាចេះតែចង់វ៉ៃស្រីៗ តើអូនស្រីខុសអ្វីប្រុសថ្លៃម្ដេចមិនមេត្តា»។
ក្រៅពីនេះ ពួកគេបានរៀបចំសំណែនសែនព្រេនព្រលឹង ដោយធ្វើរូបទីងមោងមួយអោយស្លៀកពាក់ពណ៌ខ្មៅ សរសេរអក្សរពណ៌ស ដាក់ឈ្មោះទីងមោងថា ចៅក្រម ព្រះរាជអាជ្ញា និងមេធាវី។ គេក៏បានចងមាន់ឆ្កាងពណ៌ខ្មៅចំនួនពីរ ដាក់នៅខាងមុខបាយសីដែលគេរៀបជារណ្ដាប់សម្រាប់ពិធីនេះ។ បន្ថែមលើនេះ ពួកគេបានបង្ហាញរូបភាពនៃការរងទោសកម្មនៅឯឋាននរករបស់អ្នកដែលបានសាងអំពើអាក្រក់ក្នុងជាតិនេះ ទៅតាមទ្រឹស្ដីកម្មផលក្នុងព្រះពុទ្ធសាសនា។
ក្នុងពេលនោះ ព្រះសង្ឃក៏បានស្វាធ្យាយប្រោះព្រំអោយមានសេរីភាពដល់អ្នកទាំង ២៣នាក់។ ក្រុមអ្នកតវ៉ាក៏បានប្រកូកប្រកាសអោយតុលាការ ត្រូវកាត់ក្ដីដោយយុត្តិធម៌ បើពុំនោះសោត តុលាការនឹងប្រឈមចំពោះមុខការដាក់ទោសទណ្ឌពីសំណាក់បារមីសក្ដិសិទ្ធិដូចទីងមោង និងមាន់ឆ្កាង ដែលពួកគាត់ដាក់បង្ហាញនៅពេលនេះ៖ «សូមអោយប្រព័ន្ធតុលាការថ្ងៃនេះឈរលើគោលការណ៍ឯករាជ្យ មិននៅក្រោមការគាបសង្កត់ ឬកន្ទុយក្បិនរបស់អ្នកណាម្នាក់។ បើសិនជានៅក្រោមកន្ទុយក្បិន ឬមានការគាបសង្កត់ពីជនបុគ្គលណាមួយ សូមអោយតុលាការថ្ងៃនេះដូចមាន់ឆ្កាងមួយគូនេះចឹង»។
នៅពេលថ្ងៃក្ដៅខ្លាំង ពួកគេបានចងសំពត់តង់តូចមួយ ហើយនាំគ្នាជ្រក។ យូរៗម្ដង គេនាំគ្នាចេញទៅរាំវង់នៅកណ្ដាលថ្ងៃក្ដៅខ្លាំងនោះ ដើម្បីបន្ថយភាពតានតឹង។ ក្នុងពេលនោះ អ្នកតវ៉ាបានចាក់ទឹកលក្ខពណ៌ក្រហម តំណាងអោយឈាមទៅលើរូបទីងមោង ដោយឧទ្ទិសថា វាសនាចៅក្រម ព្រះរាជអាជ្ញា និងមេធាវី ដែលកាត់ក្ដីមិនត្រឹមត្រូវ ឬមិនយុត្តិធម៌ គឺនឹងដូចរូបទីងមោងនោះហើយ។
ការតវ៉ាបានបញ្ចប់នៅពេលដែលតុលាការបានសម្រេចផ្អាកសវនាការអ្នកទាំង ២៣នាក់។ ក្រុមអ្នកតវ៉ាបានអះអាងថា នឹងវិលមកតវ៉ានៅកន្លែងដដែលជាថ្មីទៀត នៅព្រឹកថ្ងៃទី២១ ខែឧសភា បន្តទៀត ដើម្បីទាមទាររកសេរីភាពដល់មនុស្សជាប់ចោទទាំង ២៣នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។