អតីតអ្នកបើកបររថយន្តដឹកអ្នកដំណើររបស់ក្រុមហ៊ុនភ្នំពេញសុរិយា ដែលត្រូវថៅកែក្រុមហ៊ុនបញ្ឈប់ពីការងារ បានប្រមូលផ្តុំគ្នាតវ៉ាជាថ្មីទៀតនៅពីមុខទីស្នាក់ការក្រុមហ៊ុន ក្នុងក្រុងភ្នំពេញ នៅព្រឹកថ្ងៃច័ន្ទ ទី២៥ ខែសីហា ដើម្បីទាមទារឲ្យក្រុមហ៊ុនទទួលយកអ្នកបើកបររថយន្តចំនួន ១៧នាក់ ឲ្យចូលធ្វើការវិញ។
វិវាទនេះ មន្ត្រីក្រសួងការងារសន្យាកោះហៅតំណាងភាគីក្រុមហ៊ុនទៅជួបរកដំណោះស្រាយជាមួយភាគីពាក់ព័ន្ធនៅថ្ងៃទី២៦ ខែសីហា បន្តទៀត។
តំណាងអតីតអ្នកបើកបររថយន្តទាំង ១៧នាក់ លោក សម្បត្តិ វន បានឲ្យដឹងនៅថ្ងៃច័ន្ទនេះថា នៅក្នុងការតវ៉ានៅព្រឹកថ្ងៃច័ន្ទ គឺមានការគំរាមកំហែង និងការចាក់ធុងបាសរំខានពីភាគីថៅកែរោងចក្រនិងកងសន្តិសុខមកលើក្រុមអ្នកតវ៉ាផង។
លោកបន្តថា ការតវ៉ាដោយមានទាំងលើកបដានៅព្រឹកថ្ងៃច័ន្ទនេះ មិនមានតំណាងភាគីក្រុមហ៊ុនចេញមុខដោះស្រាយ ឬជួបជាមួយពួកគេទេ។ ប៉ុន្តែមានមន្ត្រីដោះស្រាយវិវាទមកពីក្រសួងការងារ បានចេញមុខសន្យាជាមួយក្រុមអ្នកតវ៉ាថា នឹងកោះហៅតំណាងភាគីក្រុមហ៊ុនទៅដោះស្រាយនៅថ្ងៃទី២៦ ខែសីហា៖ «រយៈពេលធ្វើកូដកម្ម ២ថ្ងៃនេះ អត់ឃើញខាងក្រុមហ៊ុន ឬខាងអាជ្ញាធរចេញមុខជួយអន្តរាគមន៍ ឬជួយដោះស្រាយទេរហូតមកដល់ថ្ងៃនេះ»។
លោក សុខ ឈុនអឿង អនុប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ ដែលចូលរួមស្វែងរកដំណោះស្រាយ ឬជួយទាមទារសិទ្ធជូនអតីតអ្នកបើកបររថយន្តទាំង ១៧នាក់ បានចូលធ្វើការវិញ។ លោកបញ្ជាក់ថា ទំនាស់នេះ ខាងភាគីក្រុមហ៊ុនទំនងជាគ្មានចេតនាចង់ជួបចរចាបញ្ចប់វិវាទជាមួយក្រុមអ្នកតវ៉ាទេ និងព្យាយាមគេចពីតំណាងអ្នកបើកបររថយន្តដែលស្វែងរកដំណោះស្រាយបញ្ចប់វិវាទនេះ។
លោកស្នើឲ្យផ្នែកពាក់ព័ន្ធជួយមានវិធានការដោះស្រាយបញ្ចប់ជម្លោះនៅក្រុមហ៊ុនភ្នំពេញសុរិយា ឲ្យបានឆាប់ ដើម្បីបញ្ឈប់ការតវ៉ាជាបន្តបន្ទាប់នៅថ្ងៃអនាគត៖ «សូមឲ្យក្រុមហ៊ុនហ្នឹងធ្វើតាមសេចក្តីបង្គាប់របស់ក្រុមប្រឹក្សាអាជ្ញាកណ្ដាល។ ព្រោះអាជ្ញាកណ្ដាលបង្គាប់ឲ្យក្រុមហ៊ុនហ្នឹងយកអ្នកទាំង ១៧នាក់ហ្នឹងចូលធ្វើការវិញ។ ខាងក្រុមហ៊ុនត្រូវតែមានជំហរដោះស្រាយ ដើម្បីឲ្យពួកគេមានការងារធ្វើវិញ»។
អ្នកគ្រប់គ្រងទូទៅរបស់ក្រុមហ៊ុនដឹកអ្នកដំណើរភ្នំពេញសុរិយា លោក ចាន់ សុផាន់ណា ធ្លាប់បញ្ជាក់ថា ក្រុមហ៊ុនព្រមផ្ដល់សំណងជំងឺចិត្តតាមច្បាប់ការងារទៅដល់អតីតអ្នកបើកបររថយន្តទាំង ១៧នាក់។ ប៉ុន្តែមិនអាចទទួលពួកគេឲ្យចូលធ្វើការនៅក្រុមហ៊ុននេះវិញបានទេ។ លោកពន្យល់ថា សព្វថ្ងៃក្រុមហ៊ុនមានអ្នកបើកបររហូតដល់ជិត ១៥០នាក់ (១៤៧) គឺលើសពីចំនួនរថយន្តដែលមានចំនួនជាង ១២០គ្រឿង (១២៣)។ ជាងនេះ ក្រុមហ៊ុនបានចេញខាតជាច្រើនដើម្បីផ្ដល់ប្រាក់ខែឲ្យអ្នកបើកបរទាំងនោះ និងបានកាត់សេវាដឹកអ្នកដំណើរនៅតំបន់ខ្លះទៀត ដោយសារតែគ្មានអតិថិជន ហើយក្រុមហ៊ុនក៏កំពុងប្រឈមនឹងវិបត្តិហិរញ្ញវត្ថុ ដែលមិនអាចទទួលយកបុគ្គលិកបន្ថែមទៀតបានទេ។
ក្រុមហ៊ុនរថយន្តដឹកអ្នកដំណើរភ្នំពេញសុរិយា បានបញ្ឈប់អ្នកបើកបរចំនួន ១៧នាក់ កាលពីខែមេសា ឆ្នាំ២០១៤ ដោយប្រាប់បុគ្គលិកថា ក្រុមហ៊ុនអត់ការងារធ្វើ ហើយត្រូវកាត់បន្ថយបុគ្គលិក។ ប៉ុន្តែបើតាមការអះអាងរបស់បុគ្គលិកក្រុមហ៊ុននេះឲ្យដឹងថា មូលហេតុពិតដែលក្រុមហ៊ុនបញ្ឈប់អតីតអ្នកបើកបររថយន្តទាំង ១៧នាក់នោះ គឺដើមហេតុដោយសារពួកគេត្រៀមបង្កើតសហជីពមួយនៅក្នុងក្រុមហ៊ុន ដើម្បីការពារផលប្រយោជន៍ឲ្យបុគ្គលិក ឲ្យស្របតាមច្បាប់ការងារកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។