គ្រូបង្រៀន​១៤​នាក់​ផ្ដិត​មេដៃ​សុំ​ដក​តំណែង​នាយក​មជ្ឈមណ្ឌល​គរុកោសល្យ​ភូមិភាគ​ស្ទឹងត្រែង

0:00 / 0:00

ក្រុម​គ្រូបង្រៀន​ចំនួន ១៤​នាក់ បាន​ផ្ដិត​មេដៃ​ដាក់​ញត្តិ​ទៅ​សាលា​ខែត្រ​ស្ទឹងត្រែង និង​ស្ថាប័ន​ពាក់ព័ន្ធ ដោយ​ទាមទារ​ដក​តំណែង​នាយក​មជ្ឈមណ្ឌល​គរុកោសល្យ​ភូមិភាគ​ស្ទឹងត្រែង។ ការ​ទាមទារ​នេះ ក្រោយ​ពី​ពួក​គេ​រក​ឃើញ​ភាព​មិន​ប្រក្រតី​ច្រើន​ពាក់ព័ន្ធ​ការ​ប្រើប្រាស់​ថវិកា ភី.ប៊ី (PB) របស់​ក្រសួង​អប់រំ និង​ការ​ចំណាយ​ផ្គត់ផ្គង់​លើ​អគារ​ធនធាន​មិន​មាន​តម្លាភាព ជាដើម។ ចំណែក​នាយក​មជ្ឈមណ្ឌល​គរុកោសល្យ បាន​បដិសេធ​ការ​ចោទ​ប្រកាន់​នេះ។

ក្រុម​គ្រូបង្រៀន​អំពាវនាវ​នៅ​ថ្ងៃ​ទី​២៥ មិថុនា ស្នើ​ឲ្យ​ក្រសួង​អប់រំ យុវជន និង​កីឡា ចុះ​ស៊ើប​អង្កេត​ពី​ភាព​មិន​ប្រក្រតី​មួយ​ចំនួន​ទាក់ទិន​ដំណើរការ​គ្រប់គ្រង​មជ្ឈមណ្ឌល​គរុកោសល្យ​ភូមិភាគ​ស្ទឹងត្រែង ដែល​ពួក​គេ​ចោទ​ថា នាយក​មជ្ឈមណ្ឌល​ឈ្មោះ ស៊ើយ រង្សស៊ី បាន​ចាយវាយ​ថវិកា​ពុំ​មាន​តម្លាភាព និង​មាន​ភាព​មិន​ប្រក្រតី​ក្នុង​ការ​ដាក់​ពិន្ទុ និង​ចំណាត់​ថ្នាក់​គរុសិស្ស​នៅ​គ្រា​ប្រឡង​បញ្ចប់​ឆ្នាំ ជាដើម។ បញ្ហា​ទាំងនេះ ពួក​គេ​ចាត់​ទុក​ថា ធ្វើ​ឲ្យ​ប៉ះពាល់​គុណភាព​អប់រំ និង​សតិ​អារម្មណ៍​របស់​គ្រូបង្រៀន។

តំណាង​គ្រូបង្រៀន​នៃ​មជ្ឈមណ្ឌល​គរុកោសល្យ​ភូមិភាគ​ស្ទឹងត្រែង លោក ធូ សៀង យល់​ថា ប្រសិន​បើ​ក្រុម​គ្រូបង្រៀន​មិន​រើ​បម្រះ​ទេ ផល​ប៉ះពាល់​នឹង​កាន់​តែ​ធ្ងន់ធ្ងរ​ដល់​ការ​សិក្សា​របស់​គរុសិស្ស និង​សតិ​អារម្មណ៍​របស់​គ្រូឧទ្ទេស។ លោក​កត់​សម្គាល់​ថា កាល​ពី​ខែ​ឧសភា ឆ្នាំ​២០១៧ ក្រុម​គ្រូបង្រៀន​បាន​ដាក់​ញត្តិ​ទៅ​សាលា​ខែត្រ​ស្ទឹងត្រែង និង​មន្ទីរ​អប់រំ ឲ្យ​ចុះ​ពិនិត្យ​ករណី​នេះ ហើយ​អាជ្ញាធរ​ខែត្រ​កាល​ពី​ពេល​ថ្មីៗ​នេះ បាន​កោះ​ហៅ​ក្រុម​គ្រូឧទ្ទេស​មួយ​ចំនួន និង​លោក ស៊ើយ រង្សស៊ី មក​សម្របសម្រួល ក៏ប៉ុន្តែ​ការ​សម្របសម្រួល​នោះ ពួក​គេ​ពុំ​អាច​ទទួល​យក​បាន​ទេ ដោយសារ​អាជ្ញាធរ​ខែត្រ​ពុំ​ទាន់​ស៊ើប​អង្កេត​បញ្ហា​នេះ​ឲ្យ​គ្រប់​ជ្រុងជ្រោយ​នៅ​ឡើយ៖ « យក​ប្រាក់​ពី​សិស្ស​ដែល​បម្រុង​មុន​ចូល​មក​រៀន។ លុយ​អំណោយ​របស់​សម្ដេច ហ៊ុន សែន ដែល​បាន​ឧបត្ថម្ភ គ្រូ​ម្នាក់ ៥​ម៉ឺន​រៀល តែ​គាត់​មិន​បាន​ប្រគល់​ឲ្យ​បុគ្គលិក​មួយ​ចំនួន »

ខ្លឹមសារ​ញត្តិ​របស់​ក្រុម​គ្រូបង្រៀន​ទាំង ១៤​រូប ដែល​បាន​ផ្ញើ​ទៅ​រដ្ឋបាល​ខែត្រ​ស្ទឹងត្រែង និង​មន្ទីរ​អប់រំ កាល​ពី​ដើម​ខែ​ឧសភា ឆ្នាំ​២០១៧ បង្ហាញ​ថា ការ​ដឹកនាំ​របស់​នាយក​មជ្ឈមណ្ឌល​គរុកោសល្យ បង្ក​ប៉ះពាល់​សតិ​អារម្មណ៍​នៃ​ការ​បណ្តុះបណ្តាល និង​ធនធាន​មនុស្ស។ ហេតុ​នេះ ពួក​គេ​ទាមទារ​ឲ្យ​អាជ្ញាធរ​ពាក់ព័ន្ធ ស៊ើប​អង្កេត​ចំណុច​មួយ​ចំនួន​រួម​មាន៖

  • ការ​ប្រើប្រាស់​ថវិកា ភី.ប៊ី (PB) ឬ​ថវិកា​ដែល​ក្រសួង​អប់រំ ផ្តល់​ឲ្យ​គរុសិស្ស​ក្នុង​ម្នាក់ ១​ឆ្នាំ ១៣​ម៉ឺន​រៀល

  • ការ​ជួល​តូប​លក់​ដូរ​ក្នុង​ទីធ្លា​សាលា​គ្មាន​តម្លាភាព

  • អំណោយ​របស់​នាយក​រដ្ឋមន្ត្រី ហ៊ុន សែន មិន​បាន​ប្រគល់​ឲ្យ​បុគ្គលិក​មួយ​ចំនួន ក្រោម​ហេតុផល​ទិញ​ម៉ាស៊ីន​បូម​ទឹក

  • ពិន្ទុ​គរុសិស្ស​មាន​បញ្ហា​ពេល​ប្រឡង​បញ្ចប់​ឆ្នាំ

  • កាត់​ប្រាក់​អាហារូបករណ៍​ពី​សិស្ស​ដើម្បី​អភិវឌ្ឍ​សាលា​ដោយ​ពុំ​បាន​ផ្សព្វផ្សាយ​ដល់​បុគ្គលិក

  • និង​បិទ​បាំង​បុគ្គលិក​មួយ​រូប​ឲ្យ​ទៅ​ធ្វើ​ការងារ​ក្រៅ​អង្គភាព ជាដើម។

ឆ្លើយតប​ការ​លើក​ឡើង​នេះ នាយក​មជ្ឈមណ្ឌល​គរុកោសល្យ​ភូមិភាគ​ស្ទឹងត្រែង លោក ស៊ើយ វង្សស៊ី បាន​បដិសេធ​ការ​ចោទ​ប្រកាន់​នេះ ដោយ​លើក​ហេតុផល​ថា​មិន​សម​ហេតុផល។ លោក​បញ្ជាក់​ថា លោក​បាន​ធ្វើ​តារាង​បិទ​ផ្សាយ​ថវិកា​ចំណាយ​ប្រចាំ​ឆ្នាំ​ត្រឹមត្រូវ​តាម​ការ​ណែនាំ​របស់​ក្រសួង​អប់រំ និង​មាន​ការ​ចុះ​សវនកម្ម​ពី​ក្រសួង​សាមី ហើយ​ក្រសួង​ហិរញ្ញវត្ថុ ក៏​បាន​ចុះ​ត្រួត​ពិនិត្យ​ដែរ​ពាក់ព័ន្ធ​ការ​ចាយវាយ​ថវិកា ភី.ប៊ី (PB)។ លោក​ថា បើ​ក្រុម​គ្រូបង្រៀន​ចង់​ឲ្យ​លោក​ចុះ​ចេញ​ពី​តំណែង អាស្រ័យ​លើ​ការ​សម្រេច​របស់​មន្ទីរ​អប់រំ និង​រដ្ឋបាល​ខែត្រ​ស្ទឹងត្រែង ចុះ​ត្រួត​ពិនិត្យ​បញ្ហា​ទាំងនេះ​ជា​មុន​សិន បើ​រក​ឃើញ​ថា​មាន​កំហុស​ឆ្គង​មែន​នោះ លោក​សុខ​ចិត្ត​ចុះ​ចេញ​ពី​តំណែង​ដោយ​មិន​ជំទាស់​ទេ៖ « សាលា​ខែត្រ​លោក​បាន​សម្រេច​ថា ឲ្យ​យើង​ខ្ញុំ​សម្របសម្រួល ហើយ​ធ្វើ​ការ​ជាមួយ​គ្នា​ទៅ ស្រឡាញ់​គ្នា​សាមគ្គី​គ្នា និង​ធ្វើ​ការ​ជាមួយ​គ្នា ក៏ប៉ុន្តែ​ខាង​លោកគ្រូ​អ្នកគ្រូ​មួយ​ចំនួន​គាត់​នៅ​តែ​ថា​មិន​សុខ​ចិត្ត គាត់​ចង់​ឲ្យ​ខ្ញុំ​ចុះ​ចេញ »

អាស៊ីសេរី មិន​អាច​ទាក់ទង​អ្នក​នាំ​ពាក្យ​ក្រសួង​អប់រំ លោក រស់ សាលីន និង​អ្នក​នាំ​ពាក្យ​សាលា​ខែត្រ​ស្ទឹងត្រែង លោក ម៉ែន គុង ដើម្បី​សុំ​ការ​អធិប្បាយ​ករណី​នេះ​បាន​ទេ​នៅ​ថ្ងៃ​ទី​២៥ មិថុនា ព្រោះ​ទូរស័ព្ទ​មិន​អាច​ទាក់ទង​បាន។

ប្រធាន​សមាគម​គ្រូបង្រៀន​កម្ពុជា​ឯករាជ្យ អ្នកស្រី អ៊ុក ឆាយាវី យល់​ថា ការ​ទាមទារ​របស់​ក្រុម​គ្រូបង្រៀន គឺ​ជា​មូលដ្ឋាន​សំខាន់​ដែល​ក្រសួង​អប់រំ និង​អាជ្ញាធរ​ខែត្រ គួរ​ទទួល​យក​សំណូមពរ​របស់​ពួក​គេ​មក​ដោះស្រាយ​ជា​បន្ទាន់។ អ្នកស្រី​យល់​ថា ការ​ទាមទារ​របស់​គ្រូបង្រៀន​ក៏​ជា​ផ្នែក​មួយ​រួម​ចំណែក​ពង្រឹង​ប្រសិទ្ធភាព​ដល់​ការ​ដឹកនាំ​សាលា ព្រម​ទាំង​គិតគូរ​ពី​ផល​ប្រយោជន៍​វិស័យ​អប់រំ​ដែរ៖ « សុំ​ឲ្យ​ក្រសួង​ចុះ​ចាត់​វិធានការ​ដល់​នាយក​សាលា​ជា​បន្ទាន់ »

ប្រធាន​អង្គការ​សម្ព័ន្ធ​គណនេយ្យភាព​សង្គម​កម្ពុជា (ANSA) លោក សន ជ័យ យល់​ថា ការ​ទាមទារ​របស់​ក្រុម​គ្រូបង្រៀន​ក៏​ជា​ចំណុច​វិជ្ជមាន​មួយ ធ្វើ​យ៉ាង​ណា​ឲ្យ​ការ​ដឹកនាំ​នៅ​សាលារៀន​មាន​ភាព​ប្រសើរ​ឡើង។ លើស​ពី​នេះ ការ​ទាមទារ​នេះ គឺ​ជា​សញ្ញា​នាំ​ឲ្យ​កើត​ជំងឺ​មិន​ទុក​ចិត្ត​គ្នា​ក្នុង​វិស័យ​អប់រំ ដែល​នាំ​ឲ្យ​ប៉ះពាល់​ដល់​គុណភាព​អប់រំ និង​សតិ​អារម្មណ៍​របស់​ក្រុម​គ្រូបង្រៀន ដែល​ទាមទារ​ឲ្យ​មាន​ការ​ដោះស្រាយ៖ « ខ្ញុំ​យល់​ថា​ការ​ទាមទារ​របស់​ពួក​គេ​ជា​ការ​រួម​ចំណែក​មួយ ដើម្បី​ឲ្យ​ការ​ដឹកនាំ​មួយ​មាន​ប្រសិទ្ធភាព និង​ការ​គិតគូរ​ដល់​ផល​ប្រយោជន៍​ផ្នែក​អប់រំ។ ចឹង​ចាំបាច់​ណាស់​ក្រសួង​អប់រំ ទាំង​ថ្នាក់​ជាតិ និង​ថ្នាក់​ខែត្រ គួរ​តែ​ពិចារណា​ដើម្បី​យក​ទៅ​សំណូមពរ​របស់​លោកគ្រូ​អ្នកគ្រូ​ទៅ​ពិនិត្យ​មើល និង​ដោះស្រាយ​ឲ្យ​មាន​ពី​ចំណុច​វិជ្ជមាន និង​រីក​ចម្រើន​សម្រាប់​សាលារៀន »

មជ្ឈមណ្ឌល​គរុកោសល្យ​ភូមិភាគ​ស្ទឹងត្រែង មាន​គ្រូឧទ្ទេស​ចំនួន ២៩​រូប និង​មាន​គរុសិស្ស​សរុប ១៧៣​នាក់។ មជ្ឈមណ្ឌល​នោះ​ទទួល​បង្រៀន​គរុសិស្ស​មក​ពី​ខែត្រ​ចំនួន​៣ រួម​មាន​ខែត្រ​ស្ទឹងត្រែង ខែត្រ​មណ្ឌលគិរី និង​ខែត្រ​រតនគិរី៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។