ពួកគាត់អះអាងថា មន្ត្រីរបស់មន្ទីរអប់រំ លោក ម៉ូវ តឿ និងលោក ជូ បូរិន្ទ ព្រមទាំងមន្ត្រីការិយាល័យអប់រំក្រុងកំពង់ឆ្នាំង លោក គង់ សាវឿន បានអនុវត្តខុសនីតិវិធីច្រើនក្នុងការបោះឆ្នោតជ្រើសរើសថ្នាក់ដឹកនាំប្រចាំសាលានេះ។
ក្រុមគ្រូបង្រៀននៅវិទ្យាល័យ ព្រះបាទ សុរាម្រិត ចង់ឲ្យថ្នាក់ដឹកនាំមន្ទីរអប់រំ យុវជន និងកីឡា ខេត្តកំពង់ឆ្នាំង ដោះស្រាយសំណើរបស់ខ្លួនចំនួន ៣ចំណុចសំខាន់ៗ គឺទី១ សុំឲ្យមានការបោះឆ្នោតសាឡើងវិញ ទី២ សុំឲ្យមាននាយករង ឬនាយិការងកម្រិតបឋមភូមិចំនួន ២រូប ស្មើនឹងកម្រិតទុតិយភូមិ និងទី៣ សុំឲ្យប្រធានបច្ចេកទេសទាំងអស់ដែលឈរឈ្មោះឲ្យគេបោះឆ្នោត ត្រូវតែមានអតីតភាពការងារយ៉ាងតិច ១៥ឆ្នាំ។
តំណាងគ្រូបង្រៀនម្នាក់ក្នុងចំណោម ៣នាក់ លោក ជួន ចាំ មានប្រសាសន៍ថា ក្នុងករណីដែលបានពិភាក្សា និងដាក់សំណើដល់ដៃមន្ទីរ ក្នុងរយៈពេល ៧ថ្ងៃមិនទទួលបានលទ្ធផលអ្វីនោះ លោកនឹងបន្តដាក់ទៅខុទ្ទកាល័យអភិបាលខេត្ត ឬអាចដល់ក្រសួងអប់រំ ទៀតផង។ លោកបន្តថា នៅក្នុងរចនាសម្ព័ន្ធនៃគណៈគ្រប់គ្រងសាលាទាំងមូល គួរតែមាននាយកក្ដាប់រួម ១រូប ហើយនាយករងត្រូវតែមានពីររូប ស្មើគ្នារវាងកម្រិតបឋមភូមិ និងកម្រិតទុតិយភូមិ។
លោក ជួន ចាំ៖ «ផលប្រយោជន៍ធំជាងគេ គឺចង់បានឲ្យមានសមភាពរវាងអ្នកគ្រប់គ្រងនៅបឋមភូមិ ហើយនិងនៅទុតិយភូមិ ពីព្រោះនៅបឋមភូមិហ្នឹង គ្រូបឋមភូមិមានដល់ ១២៦នាក់ ចំណែកវិទ្យាល័យហ្នឹងមានតែ ៥៧នាក់ទេ។ ដូច្នេះ ឃើញថាចំនួនហ្នឹងខុសគ្នាច្រើន បានជាលោកគ្រូអ្នកគ្រូទាមទារឲ្យមានខាងគណៈគ្រប់គ្រងអនុវិទ្យាល័យរងចំនួន ២រូប»។
លោកបញ្ជាក់ថា កន្លងមក សាលាបានបោះឆ្នោតជ្រើសរើសនាយកគ្រប់គ្រងរួមចំនួន ១រូប និងនាយិការងកម្រិតទុតិយភូមិចំនួន ១រូប បានរួចហើយ ក៏ប៉ុន្តែ សាលាត្រូវការនាយករងចំនួន ៣រូបបន្ថែមទៀត។ ដូច្នេះហើយ ទើបក្រុមគ្រូបង្រៀនចង់ឲ្យថ្នាក់ដឹកនាំសាលាទាំងមូល មានសមាសភាពចេញពីកម្រិតបឋមភូមិចំនួន ២រូប និងទុតិយភូមិចំនួន ២រូបស្មើគ្នា។
នៅក្នុងពាក្យបណ្ដឹងដែលមានឈ្មោះគ្រូបង្រៀននៅវិទ្យាល័យ ព្រះបាទ សុរាម្រិត ចំនួនបីរូប គឺទី១ លោក ជួន ចាំ ទី២ លោក អ៊ុក ចាន់ស៊ឺន និងទី៣ លោក ឡុង ស៊ីដាវុធ បានបញ្ជាក់ថា លទ្ធផលនៃការបោះឆ្នោតជ្រើសរើសនាយករង ឬនាយិការងប្រចាំវិទ្យាល័យបន្ថែមបីរូបទៀតនោះ គឺមានសំឡេងក្រោម ៥០% មិនអាចយកជាផ្លូវការបានឡើយ។
វិទ្យុអាស៊ីសេរី មិនអាចទាក់ទងមន្ត្រីអប់រំ ដែលរងនូវការចោទប្រកាន់ថា បានប្រព្រឹត្តខុសក្នុងការរៀបចំការបោះឆ្នោតជ្រើសរើសនាយករងគ្រប់គ្រងវិទ្យាល័យ ព្រះបាទ សុរាម្រិត ដើម្បីសុំការអត្ថាធិប្បាយជុំវិញបញ្ហានេះបានទេ នៅរសៀលថ្ងៃទី៣១ ខែតុលា។
ទោះជាយ៉ាងណា ប្រធានមន្ទីរអប់រំ យុវជន និងកីឡា ខេត្តកំពង់ឆ្នាំង លោក ពេជ្រ សំបូរ មានប្រសាសន៍ថា លោកមិនទាន់បានទទួលសំណើនេះនៅឡើយទេ ក៏ប៉ុន្តែ លោកនឹងកោះប្រជុំបន្ទាន់មួយនៅល្ងាចថ្ងៃទី៣១ ខែតុលា ជាមួយអ្នកដែលត្រូវបានជ្រើសរើស ដើម្បីពិភាក្សា និងដោះស្រាយជុំវិញបញ្ហានេះ៖ «ខ្ញុំហៅមកប្រជុំឥឡូវហើយ ដើម្បីដោះស្រាយ ខ្ញុំថាធម្មតាមានបញ្ហាអីមានដំណោះស្រាយហើយ ខ្ញុំជឿថាអ៊ីចឹង លក្ខណៈវិនិច្ឆ័យដែលត្រូវបានសម្រេចដោយអង្គប្រជុំនោះយកជាផ្លូវ យើងគួរតែគោរពតាមមនុស្សភាគច្រើន»។
នៅក្នុងអំឡុងពេលនៃការបោះឆ្នោតជ្រើសរើសនាយករង ឬនាយិការងប្រចាំវិទ្យាល័យ ព្រះបាទ សុរាម្រិត មានគ្រូបង្រៀនដែលជាអ្នកបោះឆ្នោតប្រមាណជា ២០នាក់ បានដើរចេញពីបន្ទប់បោះឆ្នោត និងខ្លះមិនព្រមបោះឆ្នោត ដោយសារតែមិនពេញចិត្តនឹងការរៀបចំរបស់មន្ត្រីមន្ទីរ និងការិយាល័យអប់រំក្រុងកំពង់ឆ្នាំង។ វិទ្យាល័យ ព្រះបាទ សុរាម្រិត នៅក្នុងឆ្នាំសិក្សា ២០១២-២០១៣ មានសិស្សសរុបចំនួន ៣.២៣៣នាក់ ហើយមានគ្រូបង្រៀនទាំងកម្រិតទុតិយភូមិ និងបឋមភូមិសរុបចំនួន ១៨៣នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។