ក្រសួងការងារ និងបណ្តុះបណ្តាលវិជ្ជាជីវៈ ប្រកាសរំឭកជាថ្មីទៀតដល់ក្រុមហ៊ុនដែលប្រើប្រាស់កម្លាំងពលកម្មបរទេស សុំឲ្យគោរពទៅតាមច្បាប់វិនិយោគ និងច្បាប់ការងារ ដែលកំណត់ចំនួនបុគ្គលិកក្នុងគ្រឹះស្ថាន ឬក្រុមហ៊ុននីមួយៗត្រឹម ១០ភាគរយ នៃបុគ្គលិកសរុប។
ចំណែកខាងក្រុមហ៊ុន ស្វាគមន៍ចំពោះការកំណត់នេះ ហើយបញ្ជាក់ថា ស្ថានភាពធនធានមនុស្សក្នុងស្រុកបច្ចុប្បន្ន អាចឲ្យពួកគេដំណើរការងារទៅតាមច្បាប់នេះបាន។
ក្រសួងមហាផ្ទៃ និងក្រសួងការងារ និងបណ្តុះបណ្តាលវិជ្ជាជីវៈ រឹតបន្តឹងការប្រើប្រាស់កម្លាំងពលកម្មបរទេស ដោយអនុវត្តច្បាប់វិនិយោគ និងច្បាប់ការងារ។
មន្ត្រីនាំពាក្យក្រសួងការងារ លោក ហេង សួ មានប្រសាសន៍នៅថ្ងៃសុក្រ ទី៥ កញ្ញា ថា ក្រសួងនឹងធ្វើការផាកពិន័យចំពោះក្រុមហ៊ុនណា ដែលមិនគោរពទៅតាមច្បាប់ និងសេចក្តីប្រកាសរបស់ក្រសួង ដែលចេញផ្សាយជាថ្មីទៀត កាលពីថ្ងៃទី២០ សីហា កន្លងទៅ ស្ដីពីការប្រើប្រាស់ពលកម្មបរទេស។
លោកបន្តថា ក្រុមហ៊ុននីមួយៗអាចប្រកាសឲ្យដឹងនូវចំនួនពលកម្មដែលនាំយកមកពីបរទេសលើសពី ១០% ដែលច្បាប់កំណត់ដោយបំពេញបែបបទ ក្នុងករណីចាំបាច់ទៅដល់សមត្ថកិច្ច មុនពេលចុះធ្វើអធិការកិច្ចប្រចាំឆ្នាំ ដើម្បីជៀសផុតពីការផាកពិន័យ៖ «លើកទឹកចិត្តឲ្យក្រុមហ៊ុនប្រកាស ជាជាងប្រឈមនឹងការពិន័យ ហើយយើងទុកសិទ្ធិឲ្យគាត់ធ្វើស្វ័យប្រកាស ហើយក្រសួងទាំងពីរនឹងធ្វើអធិការកិច្ចទៅតាមក្រុមហ៊ុននីមួយៗ ឥឡូវនេះវាស្ថិតនៅក្នុង យើងធ្វើអធិការកិច្ចជាប្រចាំ»។
ការផាកពិន័យនោះ បុគ្គលិកម្នាក់ ៧២ម៉ឺនរៀលសម្រាប់ការល្មើសច្បាប់វិនិយោគ និងច្បាប់ការងារ និងបូកថែម ២០ម៉ឺនរៀលទៅ ៥០ម៉ឺនរៀលផ្សេងទៀត សម្រាប់ច្បាប់អន្តោប្រវេសន៍ បើសិនជាក្រុមអធិការកិច្ចចម្រុះរវាងក្រសួងមហាផ្ទៃ និងក្រសួងការងារ រកឃើញថា ក្រុមនោះមានលាក់បុគ្គលិកបរទេសធ្វើការដោយគ្មានការអនុញ្ញាត។
ទន្ទឹមនេះ ក្រសួងមានសមត្ថកិច្ច ក៏មានការយោគយល់ចំពោះក្រុមហ៊ុនមួយចំនួនដែលទើបបើកថ្មី ឬមុខជំនាញខ្លះដែលពិបាករកកម្លាំងពលកម្មក្នុងស្រុក ប៉ុន្តែត្រូវតែសុំការអនុញ្ញាតពីក្រសួងការងារ និងត្រូវបំពេញលក្ខខណ្ឌច្បាប់មួយចំនួនទៅតាមលទ្ធភាពជាក់ស្តែង៖ «អ៊ីចឹង គឺថាភាគរយនៅពេលដែលក្រុមហ៊ុនមួយទើបនឹងចាប់ផ្ដើម គឺអាចមានការលើកលែង ប៉ុន្តែនៅពេលដែលក្រុមហ៊ុនហ្នឹងធ្វើប្រតិបត្តិការពេញសមត្ថភាពហើយហ្នឹង គឺភាគរយ គឺស្ថិតនៅក្រោមច្បាប់ទាំងអស់»។
ទាក់ទងបញ្ហានេះដែរ លោកឧកញ៉ា ស៊ន សុខណា ជាសមាជិកសភាពាណិជ្ជកម្មកម្ពុជា និងកំពុងវិយោគលើគម្រោងពាណិជ្ជកម្មជាច្រើនទាំងក្នុងស្រុក និងក្រៅស្រុក បានស្វាគមន៍ចំពោះការកំណត់នេះ។ លោកបញ្ជាក់ថា ក្រុមហ៊ុនពិតតម្រូវការពលកម្មបរទេស ជាពិសេសអ្នកជំនាញគ្រប់គ្រងគម្រោងធំៗ ប៉ុន្តែ លោកអាចលៃលកតម្រូវទៅតាមច្បាប់កំណត់បាន ដោយយោងទៅតាមបរិបទកម្ពុជា បច្ចុប្បន្ន ចាប់ផ្ដើមមានធនធានមនុស្សចេះតែកើនឡើងពីមួយថ្ងៃទៅមួយថ្ងៃ ដែលអាចប្រើជំនួសជនបរទេសបាន៖ «ពីមុនយកមកច្រើនដែរ ក្រោយមកខ្ញុំបង្ហាត់អ្នកក្នុងស្រុកធ្វើបាន! អ៊ីចឹងខ្ញុំអាចតម្រូវតាម ១០% ហ្នឹងបាន ហើយនៅមានមុខការខ្លះនៅខ្វះដែរ តែខ្ញុំយកមករយៈពេលខ្លី អ្នកបច្ចេកទេសខ្លះ»។
លោកបន្តថា បញ្ហានេះវាពិតជាមានការលំបាកខ្លះដែរ ប៉ុន្តែក៏អាចចំណេញថវិកាមួយផ្នែកសម្រាប់ការកាត់បន្ថយចំណាយលើប្រាក់ខែបុគ្គលិកពីបរទេសនោះ។
បច្ចុប្បន្ន ជនបរទេសដែលកំពុងធ្វើការងារក្នុងស្រុកខ្មែរ ហើយតម្រូវឲ្យធ្វើប័ណ្ណការងារស្របច្បាប់នោះ មានប្រមាណ ៨ពាន់នាក់។ ក្នុងចំណោមកម្លាំងពលកម្មជាជនបរទេស ១០% ដែលច្បាប់បានកំណត់នោះ ត្រូវបែងចែកទៅតាមជំនាញនីមួយៗថែមទៀត ដូចជា អ្នកធ្វើការនៅតាមការិយាល័យ ៣% កម្មករឯកទេស ឬនិយោជិត ៦% និងកម្មករគ្មានឯកទេសមាន ១%។
មន្ត្រីក្រសួងការងារ បញ្ជាក់ថា ការកំណត់បែបនេះក្នុងគោលដៅជំរុញឲ្យម្ចាស់ក្រុមហ៊ុន ផ្តល់អាទិភាពដល់កម្លាំងពលកម្មក្នុងស្រុក ឲ្យពលរដ្ឋម្ចាស់ស្រុកមានការងារធ្វើឲ្យបានច្រើនតាមដែលអាចធ្វើទៅបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។