ពិធីបុណ្យអុំទូកនៅខេត្តសៀមរាប រយៈពេលពីរថ្ងៃបានបញ្ចប់ហើយកាលពីល្ងាចថ្ងៃច័ន្ទ ទី១៤ ខែវិច្ឆិកា ក៏ប៉ុន្តែអាជ្ញាធរខេត្តសៀមរាប នៅមានរៀបចំពិធីបាញ់កាំជ្រួច ប្រគំតន្ត្រី ដើម្បីអបអរសាទរពិធីអកអំបុក បណ្ដែតប្រទីប និងសំពះព្រះខែ ដើម្បីផ្ដល់ឱកាសឲ្យភ្ញៀវទេសចរជាតិ និងអន្តរជាតិ បានចូលរួមសប្បាយរហូតដល់រំលងអាធ្រាត្រថ្ងៃទី១៤ ឈានចូលថ្ងៃទី១៥ ខែវិច្ឆិកា។
អាជ្ញាធរខេត្តសៀមរាប អះអាងថា ការរៀបចំពិធីបុណ្យអុំទូកនេះ ខេត្តបានទទួលភ្ញៀវទេសចរជាតិ និងអន្តរជាតិ ដែលមកលេងកម្សាន្តចំនួនប្រមាណ ១១ម៉ឺននាក់។
អភិបាលរង និងជាអ្នកនាំពាក្យសាលាខេត្តសៀមរាប គឺលោក លី សំរិទ្ធ។ លោកមានប្រសាសន៍នៅមុនពេលចាប់ផ្ដើមការប្រណាំងទូកផ្ដាច់ព្រ័ត្រនៅរសៀលថ្ងៃច័ន្ទ ទី១៤ ខែវិច្ឆិកា ថា រយៈពេល ៣ថ្ងៃនៃបុណ្យអុំទូកនេះ លោកសង្កេតឃើញភ្ញៀវទេសចរជាតិ និងអន្តរជាតិ បានសម្រុកចូលមកទីរួមខេត្តសៀមរាប យ៉ាងច្រើន។
លោក លី សំរិទ្ធ បញ្ជាក់ថា តាមតួលេខសរុបគិតពីថ្ងៃទី១២ ដល់ថ្ងៃទី១៤ គឺមានភ្ញៀវទេសចរបរទេសប្រមាណ ៣ម៉ឺននាក់ និងភ្ញៀវទេសចរជាតិប្រមាណ ៨ម៉ឺននាក់ បានមកលេងកម្សាន្តនៅខេត្តសៀមរាប។ លោក លី សំរិទ្ធ យល់ថា ភាពពិសេសដែលទាក់ទាញភ្ញៀវទេសចរជាតិ និងអន្តរជាតិឲ្យមកទស្សនាខេត្តសៀមរាប ពេលនេះ ដោយសារព្រឹត្តិការណ៍បុណ្យផង និងប្រាសាទបុរាណដែលធ្វើឲ្យមានភាពល្បីល្បាញផង៖ « ខ្ញុំគិតថាការទាក់ទាញជាពិសេសនៅតំបន់សៀមរាប គឺដោយសារតែទីនេះជាទឹកដីអតីតរាជធានីអង្គរ ដែលមានសម្បត្តិបេតិកភណ្ឌ វប្បធម៌ប្រវត្តិសាស្ត្រហ្នឹងច្រើន »។
មន្ត្រីមន្ទីរទេសចរណ៍ បានយល់ស្របទៅនឹងតួលេខអ្នកទេសចរដែលអះអាងដោយអាជ្ញាធរខេត្តសៀមរាប នេះដែរ។
ប្រធានមន្ទីរទេសចរណ៍ខេត្តសៀមរាប លោក ង៉ូវ សេងកាក់ ឲ្យដឹងថា ចំនួនភ្ញៀវទេសចរជាតិ និងអន្តរជាតិដែលមកកម្សាន្តក្នុងថ្ងៃបុណ្យអុំទូកឆ្នាំនេះ គឺកើនឡើងប្រមាណ ៣១% បើប្រៀបធៀបទៅនឹងពិធីបុណ្យអុំទូកកាលពីឆ្នាំ២០១៥។
លោក ង៉ូវ សេងកាក់ សម្គាល់ឃើញថា ចំនួនភ្ញៀវទេសចរបរទេសដែលចូលមកខេត្តសៀមរាប រយៈពេល ៣ថ្ងៃជាប់គ្នា គឺមានចំនួនពី ៧.០០០នាក់ទៅ ៨.០០០នាក់ក្នុងមួយថ្ងៃៗ។ មូលហេតុដែលចំនួនភ្ញៀវបរទេសកើនឡើងនេះ ដោយសារតែទីភ្នាក់ងារទេសចរណ៍ខ្លះបានលក់កញ្ចប់ទេសចរណ៍ភ្ជាប់គ្នាជាមួយនឹងពិធីបុណ្យអុំទូកនេះ ហើយម្យ៉ាងទៀតវាក៏ដល់រដូវដែលភ្ញៀវទេសចរបរទេសកើនឡើងដែរ៖ « ចាប់ពីថ្ងៃទី១២ ទី១៣ ខែវិច្ឆិកា ខ្ញុំឃើញភ្ញៀវទេសចរសម្រុកចូលមកខេត្តសៀមរាប ព្រោះពិធីបុណ្យអុំទូក ខេត្តគេផ្សេងៗគេធ្វើអស់ហើយ នៅសល់តែខេត្តសៀមរាប »។
អាជ្ញាធរខេត្តសៀមរាប ឲ្យដឹងថា ដោយសារតែចំនួនភ្ញៀវទេសចរជាតិ និងអន្តរជាតិប្រមាណ ១១ម៉ឺននាក់ កំពុងមកលេងកម្សាន្តពិធីបុណ្យអុំទូក គឺគេបានរៀបចំកម្លាំងសន្តិសុខរហូតដល់ទៅជាង ៥ពាន់នាក់ ដើម្បីការពារ និងធានាសន្តិសុខដល់ភ្ញៀវទេសចរទាំងឡាយ។ កម្លាំងសន្តិសុខទាំងនោះ មានប៉ូលិស កងរាជអាវុធហត្ថ ទាហាន ព្រមទាំងប្រជាការពារផង បានដាក់ពង្រាយនៅតាមដងផ្លូវក្នុងទីក្រុង ប្រាសាទបុរាណ និងកន្លែងរមណីយដ្ឋានជាច្រើនទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។