សហព័ន្ធសហជីពនិងសមាគម ១៨ស្ថាប័ន បានចាប់ផ្ដើមចែកខិត្តប័ណ្ណជាថ្មីម្ដងទៀតដល់កម្មករនិយោជិតនៅតាមបណ្ដារោងចក្រសហគ្រាសទូទាំងប្រទេស ឲ្យចូលរួមការតវ៉ាជំរុញឲ្យរដ្ឋាភិបាល និងតំណាងរោងចក្រដោះស្រាយបញ្ហាប្រាក់ខែគោលឲ្យបាន ១៦០ដុល្លារ និងសុំឲ្យដោះលែងមនុស្ស ២១នាក់ ដែលកំពុងជាប់ឃុំក្នុងពន្ធនាគារត្រពាំងផ្លុង ឲ្យមានសេរីភាព។
ខិត្តប័ណ្ណប្រមាណ ១០ម៉ឺនសន្លឹក ត្រូវបានមន្ត្រីសហព័ន្ធសហជីព និងសមាគមចំនួន ១៨ ចុះយកទៅចែកចាយនៅតាមរោងចក្រក្នុងរាជធានីភ្នំពេញ និងតាមបណ្ដាខេត្តមួយចំនួន ដើម្បីអំពាវនាវឲ្យកម្មករ មន្ត្រីរាជការ សិស្ស និស្សិត ចូលរួមតវ៉ាដោយប្រើប្រាស់សិទ្ធិឈប់សម្រាកប្រចាំឆ្នាំរបស់ខ្លួន បន្ទាប់ពីបុណ្យចូលឆ្នាំថ្មីប្រពៃណីជាតិ ១សប្ដាហ៍បន្តទៀត។
ក្នុងខិត្តប័ណ្ណនោះ សហព័ន្ធសហជីពស្នើសុំឲ្យពួកគេឈប់សម្រាកប្រចាំឆ្នាំចាប់ពីថ្ងៃទី១៧ ដល់ថ្ងៃទី២២ ខែមេសា ក្រោយពីពិធីបុណ្យចូលឆ្នាំ ដើម្បីដាក់សម្ពាធទៅរដ្ឋាភិបាលឲ្យដោះលែងកម្មករ ២១នាក់ និងទម្លាក់ការចោទប្រកាន់កម្មករ ២៣នាក់ រួមទាំងដំឡើងប្រាក់ខែគោលកម្មករឲ្យដល់ ១៦០ដុល្លារ។
ប្រធានសហព័ន្ធសហជីពមិត្តភាពកម្មករ លោក សៀង សម្បត្តិ ដែលចុះទៅចែកខិត្តប័ណ្ណដល់កម្មករនៅសួនឧស្សាហកម្មកាណាឌីយ៉ា និងរោងចក្រឯទៀតនៅផ្លូវវ៉េងស្រេង នៅព្រឹកថ្ងៃទី៩ មេសា ជឿថា កម្មករនិយោជិតជាច្រើននឹងគាំទ្រជំហររបស់សហព័ន្ធសហជីព ហើយឈប់សម្រាកបន្តក្រោយពិធីបុណ្យចូលឆ្នាំរហូតដល់ថ្ងៃទី២២ មេសា ដើម្បីបង្ហាញឲ្យរដ្ឋាភិបាលដឹងថា កម្មករត្រូវការប្រាក់ខែ ១៦០ដុល្លារ សម្រាប់រស់នៅសមរម្យ។
លោក សៀង សម្បត្តិ៖ «មកទល់ថ្ងៃនេះយើងឃើញថា កម្មករពិតជាគាំទ្រ ព្រោះការឈប់សម្រាកចាប់ពីថ្ងៃទី១៧ ដល់ថ្ងៃទី២២ គឺជាការប្រើប្រាស់ឈប់សម្រាកប្រចាំឆ្នាំ វាមិនមែនជាការធ្វើកូដកម្មទេ ប៉ុន្តែគឺជាការពហិការមួយសម្រាប់ការឈប់សម្រាក»។
មន្ត្រីសហព័ន្ធសហជីពជាច្រើនបានចុះចែកខិត្តប័ណ្ណដល់កម្មករនៅម៉ោងបាយថ្ងៃត្រង់ នាសួនឧស្សាហកម្មកាណាឌីយ៉ា នៅផ្លូវវ៉េងស្រេង រួចទៅចែកបន្តនៅរោងចក្រ ប្រាយ ស្កាយ (Bright Sky) មុននឹងមន្ត្រីទាំងនោះបង្ហួសទៅចែកខិត្តប័ណ្ណនៅសួនឧស្សាហកម្មវឌ្ឍនៈ។ នៅរោងចក្រប្រាយស្កាយ ខាងក្រុមហ៊ុនបានហាមមិនឲ្យកម្មករចេញមកហូបបាយថ្ងៃត្រង់នៅក្រៅរោងចក្រដូចរាល់ដងទេ។ បើតាមកម្មកររោងចក្រប្រាយស្កាយ ប្រាប់ថា ខាងរោងចក្រចេញបម្រាមហាមមិនឲ្យកម្មករហូបបាយខាងក្រៅរយៈពេល ៣ថ្ងៃ គឺចាប់ពីថ្ងៃទី៩ ដល់ថ្ងៃទី១១ ខែមេសា ដើម្បីកុំឲ្យខាងមន្ត្រីសហព័ន្ធសហជីពចែកខិត្តប័ណ្ណដល់ពួកគេ។
អ្នកលក់បាយឲ្យកម្មករនៅក្បែររោងចក្រត្រូវឲ្យទៅលក់នៅខាងក្នុងរោងចក្រ។ រីឯខិត្តប័ណ្ណខាងសហព័ន្ធសហជីពចែកដល់កម្មករខ្លះតាមផ្លូវនោះ ត្រូវសន្តិសុខរោងចក្រប្រមូលយកវិញ។ កម្មកររោងចក្រប្រាយស្កាយម្នាក់ កញ្ញា តក់ សុខរដ្ឋ ប្រាប់ថា ខាងក្រុមហ៊ុនមិនចង់ឲ្យកម្មករយកខិត្តប័ណ្ណដែលចែកនោះទេ ដោយខ្លាចកម្មករខ្លះបះបោរចេញមកធ្វើបាតុកម្ម។
កញ្ញាបន្តថា នាងទំនងជាចូលរួមតាមការអំពាវនាវរបស់សហព័ន្ធសហជីព និងបន្តឈប់សម្រាករហូតដល់ថ្ងៃទី២២ មេសា៖ «គេប្រាប់ថា កាត់ប្រាក់ខែទៅ។ បើយើងមានធុរៈ គេឲ្យយើងធ្វើក្រដាស (លិខិត) ស្នើសុំច្បាប់គេមុនថ្ងៃយើងឈប់ទៅផ្ទះបានអត់កាត់លុយ បើសិនជាយើងអត់សុំគេមុន គឺដាច់លុយហើយ បើយើងត្រឡប់មកវិញ ចាប់ដាក់លិខិតក៏ដាច់លុយដែរ»។
កម្មករម្នាក់ទៀតមកពីខេត្តព្រៃវែង ប្រាប់ថា ក្រោយពីឈប់សម្រាកបុណ្យចូលឆ្នាំខ្មែររួច នាងនឹងត្រឡប់មកធ្វើការវិញតាមការកំណត់របស់ក្រុមហ៊ុន ដែលកំណត់ឲ្យចូលធ្វើការនៅថ្ងៃទី២១ មេសា ដោយខ្លាចក្រុមហ៊ុនកាត់ប្រាក់ខែ៖ «បើគេឲ្យមកធ្វើការ ខ្ញុំនៅមក ព្រោះបើឈប់គេកាត់ប្រាក់ខែ»។
កម្មករខ្លះបានកត់សម្គាល់ថា នៅក្នុងពិធីបុណ្យចូលឆ្នាំលើកនេះ ខាងក្រុមហ៊ុនបានឲ្យកម្មករឈប់សម្រាកច្រើនខុសប្លែកពីឆ្នាំមុន។ រោងចក្រភាគច្រើនបានអនុញ្ញាតឲ្យកម្មករឈប់សម្រាកចាប់ពីថ្ងៃទី១៣ រហូតដល់ថ្ងៃទី២១ មេសា ខុសពីឆ្នាំមុនដែលឲ្យកម្មករឈប់ ៣ថ្ងៃ តាមប្រតិទិនថ្ងៃឈប់សម្រាកបុណ្យចូលឆ្នាំ។
កន្លងមករដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ លោក អ៊ិត សំហេង ក៏បានជូនដំណឹងស្ដីអំពីការឈប់ថ្ងៃបុណ្យចូលឆ្នាំខ្មែរប្រពៃណីជាតិរយៈពេល ៣ថ្ងៃ គឺពីថ្ងៃទី១៤ ដល់ថ្ងៃទី១៦ មេសា ហើយការឈប់សម្រាកចូលឆ្នាំរយៈពេលវែងខុសពីរាល់ដងនេះ ទំនងជាអាចខាងក្រុមហ៊ុនបញ្ចៀសការចូលរួមពហិការមិនធ្វើការរបស់កម្មករតាមការអំពាវនាវរបស់សហព័ន្ធសហជីព។ យ៉ាងណាប្រធានសមាគមកាត់ដេរកម្ពុជា លោក វ៉ាន់ ស៊ូអៀង ធ្លាប់ប្រាប់ថា ការចូលរួមកូដកម្មមិនចូលធ្វើការរបស់កម្មករ គឺជាសិទ្ធិរបស់ពួកគេ។ ប៉ុន្តែពួកគេមិនត្រូវមកទាមទារប្រាក់ថ្ងៃឈប់សម្រាកនោះឡើយ។
អនុប្រធានផ្នែកអង្កេតនៃសមាគមអាដហុក លោក ណៃ វ៉ង់ដា យល់ឃើញថា ការដាក់សម្ពាធបែបថ្មីដោយមិនចូលធ្វើការរបស់កម្មករអាចជាសារមួយឲ្យរដ្ឋាភិបាល និងថៅកែរោងចក្រគិតគូរឡើងវិញចំពោះស្ថានភាពរស់នៅរបស់ពួកគេ៖ «ហើយក៏មិនមែនជាទាសករសម័យថ្មីដែរ ដូច្នេះគាត់ជាមនុស្សធាតុជាមនុស្សត្រូវការហូបចុកគ្រប់គ្រាន់ ការស្លៀកពាក់ ការរស់នៅសមរម្យ ដូច្នេះត្រូវដល់ពេលគិតពិចារណាថា កម្មករជាមនុស្សសំខាន់»។
ខ្លឹមសារនៃលិខិតអំពាវនាវរបស់សហព័ន្ធសហជីពចំនួន ១៨ ដែលចែកជូនកម្មករនោះ រួមមានជាអាទិ៍ ស្នើទៅតុលាការដោះលែងជនជាប់ចោទទាំង ២១នាក់ និងទម្លាក់ការចោទប្រកាន់លើមនុស្សទាំង ២៣ទាំងស្រុង។ ស្នើទៅរដ្ឋាភិបាលសម្របសម្រួលភាគីសហជីព និងនិយោជក ឲ្យមានការចរចាដំឡើងប្រាក់ឈ្នួលគោល ១៦០ដុល្លារក្នុងមួយខែ ស្នើឲ្យតុលាការចោទប្រកាន់ដល់ជនដែលប្រព្រឹត្តបាញ់សម្លាប់កម្មករ ដោយផ្ដន្ទាទោសផ្ដល់សំណងជំងឺចិត្តដល់ជនរងគ្រោះ និងអ្នកជាប់ឃុំ និងស្នើឲ្យរដ្ឋាភិបាលដកបម្រាមនៃការជួបប្រជុំជាសាធារណៈរបស់ប្រជាពលរដ្ឋចេញវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។