សហព័ន្ធសហជីពចំនួន ១៨ បានអំពាវនាវឲ្យកម្មករ មន្ត្រីរាជការ សិស្សនិស្សិត ចូលរួមការតវ៉ាមួយដោយប្រើប្រាស់សិទ្ធិឈប់សម្រាកប្រចាំឆ្នាំរបស់ខ្លួន បន្ទាប់ពីបុណ្យចូលឆ្នាំថ្មីប្រពៃណីជាតិ ១សប្ដាហ៍បន្តទៀត ដោយការទាមទារនោះមានលក្ខខណ្ឌ ៧ចំណុច ក្នុងគោលដៅការពារសិទ្ធិសេរីភាពរបស់កម្មករ និងផ្ដល់អត្ថប្រយោជន៍ដល់កម្មករ។
សហព័ន្ធសហជីពចំនួន ១៨ បានចេញលិខិត ២ ស្របគ្នាមួយជាលិខិតអំពាវនាវដល់កម្មករ និងមួយទៀតដាក់ទៅសមាគមរោងចក្រកាត់ដេរ ទាមទារឲ្យកម្មករបានឈប់សម្រាកប្រចាំឆ្នាំ បន្ទាប់ពីបុណ្យចូលឆ្នាំថ្មីប្រពៃណីជាតិចំនួន ១សប្ដាហ៍ ដើម្បីដាក់សម្ពាធទៅរដ្ឋាភិបាលឲ្យដោះលែងកម្មករ ២១នាក់ និងទម្លាក់ការចោទប្រកាន់កម្មករ ២៣នាក់ រួមទាំងដំឡើងប្រាក់ខែគោលកម្មករឲ្យដល់ ១៦០ដុល្លារ។
នៅក្នុងលិខិតអំពាវនាវ និងលិខិតដាក់ទៅសមាគមរោងចក្រកាត់ដេរ នៅថ្ងៃទី២ មេសា មានខ្លឹមសារដូចគ្នាដោយមានការទាមទារចំណុចសំខាន់ចំនួន ៧ចំណុច មានជាអាទិ៍ ស្នើទៅតុលាការដោះលែងជនជាប់ចោទទាំង ២១នាក់ និងទម្លាក់ការចោទប្រកាន់លើមនុស្សទាំង ២៣ ទាំងស្រុង។ ស្នើទៅរដ្ឋាភិបាលសម្របសម្រួលភាគីសហជីព និងនិយោជក ឲ្យមានការចរចាដំឡើងប្រាក់ឈ្នួលគោល ១៦០ដុល្លារក្នុងមួយខែ ស្នើឲ្យតុលាការចោទប្រកាន់ដល់ជនដែលប្រព្រឹត្តបាញ់សម្លាប់កម្មករ ដោយផ្ដន្ទាទោសផ្ដល់សំណងជំងឺចិត្តដល់ជនរងគ្រោះ និងអ្នកជាប់ឃុំ និងស្នើឲ្យរដ្ឋាភិបាលដកបម្រាមនៃការជួបប្រជុំជាសាធារណៈរបស់ប្រជាពលរដ្ឋចេញវិញ។
ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ហៅកាត់ថា ស៊ីខាវឌូ (CCAWDU) លោក អាត់ ធន់ ដែលជាសមាជិកក្នុងចំណោមសហព័ន្ធសហជីពចំនួន ១៨ បានថ្លែងថា ក្រុមការងារបានដាក់លិខិតនេះទៅប្រធានសមាគមរោងចក្រកាត់ដេរនៅកម្ពុជា ដោយស្នើសុំឲ្យកម្មករក្នុងវិស័យកាត់ដេរបានប្រើប្រាស់សិទ្ធិរបស់ខ្លួនឈប់សម្រាកប្រចាំឆ្នាំចាប់ពីថ្ងៃទី១៧ ដល់ថ្ងៃទី២២ មេសា។ លោកថា នេះជាការស្នើឲ្យដោះស្រាយបញ្ហាមួយចំនួនដែលមិនទាន់ដោះស្រាយចប់។
ឆ្លើយតបបញ្ហានេះ ប្រធានសមាគមរោងចក្រកាត់ដេរនៅកម្ពុជា លោក វ៉ាន៉ ស៊ូអៀង បានចោទថា ការស្នើសុំរបស់សហជីពនេះគឺជាការខុសច្បាប់។ រីឯចំណុចខ្លះនៃសំណើនេះ គឺមិនមែនសមាគមជាអ្នកសម្រេចបានទេ។
ទាក់ទងការអំពាវនាវនេះ មន្ត្រីកម្មវិធីផ្នែកសិទ្ធិការងារនៃមជ្ឈមណ្ឌលអប់រំច្បាប់សម្រាប់សហគមន៍ លោកស្រី ឆន សុខា មានមតិថា នេះជាការស្នើសុំស្របច្បាប់មួយ។ លោកស្រីយល់ឃើញថា ការស្នើសុំប្រើប្រាស់សិទ្ធិមួយនេះ កម្មករមិនធ្លាប់បានប្រើកន្លងមកនោះទេ ប៉ុន្តែការប្រើសិទ្ធិនេះទំនងជាសម្ពាធមួយដែរ ដោយសារតែកម្មករមិនសប្បាយចិត្តនឹងការទាមទាររបស់ពួកគេកន្លងមកដែលពុំទាន់មានលទ្ធផលនៅឡើយនោះ។
ថ្មីៗនេះរដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ លោក អ៊ិត សំហេង ក៏បានជូនដំណឹងស្ដីអំពីការឈប់ថ្ងៃបុណ្យចូលឆ្នាំខ្មែរប្រពៃណីជាតិ រយៈពេល ៣ថ្ងៃ គឺពីថ្ងៃទី១៤ ដល់ថ្ងៃទី១៦ មេសា ដែរ។ ក្នុងលិខិតបានបញ្ជាក់ថា ការអនុញ្ញាតឲ្យមានការឈប់សម្រាកក្នុងអំឡុងពេលពិធីបុណ្យនេះ ត្រូវរក្សាប្រាក់ឈ្នួលប្រចាំឆ្នាំ ហើយថា បើសិនជាមិនអាចបញ្ឈប់សកម្មភាពរបស់ខ្លួនបានទេ ម្ចាស់សហគ្រាសត្រូវសម្របសម្រួលជាមួយកម្មករនិងនិយោជិតដោយមានការស្ម័គ្រចិត្ត ព្រមទាំងបែងចែកពេលវេលានៅថ្ងៃឈប់សម្រាកបុណ្យឲ្យបានសមស្រប និងទទួលបានប្រាក់បំណាច់បន្ថែមដែលមានចំនួនស្មើនឹងប្រាក់ឈ្នួលថ្ងៃធម្មតា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។