មន្ត្រីរដ្ឋាភិបាល អ្នកសេដ្ឋកិច្ច និងយុវជន លើកឡើងថា ការកកស្ទះចរាចរណ៍នៅតាមបណ្ដាទីប្រជុំជននានា ជាពិសេសនៅក្នុងទីក្រុង បានក្លាយជាបញ្ហាចម្បង ធ្វើឲ្យពលរដ្ឋគ្រប់រូប លើកយកទៅពិភាក្សាស្ទើរគ្រប់ទីកន្លែង។ ចំណែកអ្នកសេដ្ឋកិច្ចយល់ថា បញ្ហាកកស្ទះចរាចរណ៍ កំពុងប៉ះពាល់ដល់ការអភិវឌ្ឍសេដ្ឋកិច្ច ការអប់រំ និងរបៀបរបបនៅក្នុងសង្គម។
ការមិនគោរពភ្លើងសញ្ញាចរាចរណ៍ ការមិនគោរពសិទ្ធអាទិភាព កង្វះការយល់ដឹងពីច្បាប់ចរាចរណ៍ បើកបរមិនអធ្យាស្រ័យគ្នា វត្តមានយានយន្តដឹកទំនិញធំៗក្នុងទីក្រុងកើនឡើង ការធ្វើអាជីវកម្មលើចំណីផ្លូវ ការចតយានយន្តគ្មានសណ្ដាប់ធ្នាប់ ជាមូលហេតុសំខាន់បង្កឲ្យកក់ស្ទះចរាចរណ៍។
ថ្លែងទៅកាន់សិក្ខាសាលាស្ដីពី «ទស្សនៈ ៣៦០ដឺក្រេ លើការកក់ស្ទះចរាចរណ៍» កាលពីថ្ងៃទី១៣ ខែមិថុនា អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ មានប្រសាសន៍ថា បញ្ហាកកស្ទះចរាចរណ៍បានក្លាយជាបញ្ហាអាទិភាពដែលសាលារាជធានីត្រូវដោះស្រាយជាបន្ទាន់ ព្រោះកកស្ទះចរាចរណ៍ជាមូលហេតុសំខាន់ ដែលជាប់ពាក់ព័ន្ធនឹងបញ្ហាគ្រោះថ្នាក់ចរាចរណ៍។ លោកឲ្យដឹងទៀតថា ក្នុងមួយថ្ងៃនៅកម្ពុជា មានជនរងគ្រោះប្រមាណ ៩នាក់ បានស្លាប់ដោយសារគ្រោះថ្នាក់ចរាចរណ៍នេះ។
អ្នកនាំពាក្យសាលារាជធានីភ្នំពេញ រូបនេះ បានឲ្យដឹងទៀតថា កន្លងមកបើទោះជាសាលារាជធានីខិតខំកសាងហេដ្ឋារចនាសម្ព័ន្ធ និងធ្វើសកម្មភាពជាច្រើនទៀតដើម្បីដោះស្រាយបញ្ហាការកកស្ទះចរាចរណ៍ ក៏បញ្ហានេះនៅតែជាបញ្ហាប្រឈម។
លោកបន្តទៀតថា បញ្ហាកកស្ទះចរាចរណ៍នៅរាជធានីភ្នំពេញ ភាគច្រើនបណ្ដាលមកពីកំណើនប្រជាពលរដ្ឋរស់នៅកាន់តែច្រើន ការកើនឡើងនៃចំនួនយានយន្ត និងការមិនគោរពច្បាប់ចរាចរណ៍របស់ពលរដ្ឋ បញ្ហានេះលោកស្នើឲ្យពលរដ្ឋគោរពច្បាប់ចរាចរណ៍ទាំងអស់គ្នា៖ «ការកកស្ទះចរាចរណ៍វាជារឿងសំខាន់ដែលយើងទាំងអស់គ្នាចាំបាច់ត្រូវដោះស្រាយ ព្រោះវាបង្កឲ្យបាត់បង់ដល់អាយុជីវិត និងទ្រព្យសម្បត្តិ និងប៉ះពាល់ជាច្រើនទៀត ដូច្នេះខ្ញុំសូមឲ្យពលរដ្ឋទាំងអស់យកចិត្តទុកលើបញ្ហានេះ»។
ឆ្លើយតបនឹងបញ្ហាការកកស្ទះចរាចរណ៍ អ្នកវិភាគសេដ្ឋកិច្ចឯករាជ្យ លោក ចាន់ សុផល បានលើកឡើងថា តាមទ្រឹស្ដីសេដ្ឋកិច្ចភាគកកស្ទះចរាចរណ៍ច្រើនកើតឡើងក្នុងប្រទេសកំពុងអភិវឌ្ឍ ដូចជាការប្រមូលផ្តុំនៃបណ្ដារោងចក្រ និងសហគ្រាស កំណើនមនុស្សរស់នៅទីប្រជុំដើម្បីស្វែងរកប្រយោជន៍សេដ្ឋកិច្ច កត្តាបរិស្ថាន កត្តាច្បាប់ធូររលុង និងកត្តាសង្គម និងនយោបាយជាដើម។
លោក ចាន់ សុផល បានលើកឡើងទៀតថា ការកកស្ទះចរាចរណ៍នឹងជះឥទ្ធិពលដល់ពេលវេលាដំណើរការអាជីវកម្ម ចំណាយលើការធ្វើដំណើរកើនឡើង និងប៉ះពាល់ដល់ផ្លូវចិត្តដែលអាចរាំងស្ទះដល់ការប្រកបរបរចិញ្ចឹមជីវិតជាដើម៖ «កត្តាផលប៉ះពាល់ទៅលើសេដ្ឋកិច្ច វាប៉ះពាល់ជាលក្ខណៈប្រព័ន្ធ និងមានច្រើនជុំ ដូចជាត្រូវចំណាយពេលវេលាច្រើន ដែលអាចបង្កឲ្យប៉ះពាល់អាជីវកម្មរបស់យើង»។
អ្នកវិភាគសេដ្ឋកិច្ចរូបនេះបានផ្ដល់ដំណោះស្រាយចំនួន ១០ចំណុចលើបញ្ហាកកស្ទះចរាចរណ៍ដែលជាផែនការរយៈពេលខ្លីស្របតាមស្ថានភាពកម្ពុជា បច្ចុប្បន្ន ដើម្បីចំណេញដល់សេដ្ឋកិច្ច រួមមាន បន្ថែមប្រាក់លើកចិត្តដល់ប៉ូលិសចរាចរណ៍ បង្កើនចំនួនប៉ូលិសចរាចរណ៍បានច្រើន បង្កើនចំនួនភ្លើងស្តុប បង្កើនស្លាកសញ្ញាចរាចរណ៍ ការរឹតបន្តឹងលើច្បាប់ចរាចរណ៍ឲ្យទៀងទាត់ ការចំណាយទុនទិញដីឯកជនដើម្បីធ្វើហេដ្ឋារចនាសម្ព័ន្ធ ជៀសវាងបិទផ្លូវសាធារណៈនៅពេលមានព្រឹត្តិការណ៍ណាមួយ ការជួសជុលផ្លូវស្តារប្រព័ន្ធលូឲ្យបានឆាប់រហ័ស និងពង្រឹងការទទួលខុសត្រូវផ្នែកគមនាគមន៍ឲ្យបានច្បាស់លាស់។
អង្គការសុខភាពពិភពលោក (WHO) បានបង្ហាញរបាយការណ៍ថា កាលពីឆ្នាំ២០១៣ កន្លងទៅ កម្ពុជា ខាតបង់សេដ្ឋកិច្ចជាតិប្រមាណ ៣៣៧លានដុល្លារសហរដ្ឋអាមេរិក ដោយសារបញ្ហាគ្រោះថ្នាក់ចរាចរណ៍។ ទឹកប្រាក់ខាតបង់នេះ គឺកើនឡើងចំនួន ៨លានដុល្លារ បើប្រៀបធៀបទៅនឹងឆ្នាំ២០១២ កន្លងទៅ ដែលគ្រោះថ្នាក់ចរាចរណ៍ខូចខាតសេដ្ឋកិច្ចជាតិប្រមាណ ៣២៩លានដុល្លារអាមេរិក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។