ពលរដ្ឋ និងអ្នករត់កង់បីនៅផ្សារពន្លៃ ស្រុកបរិបូរណ៍ ខេត្តកំពង់ឆ្នាំង បារម្ភពីការកើនឡើងនៃគ្រោះថ្នាក់ចរាចរណ៍នៅមុខផ្សារ ដោយសារស្ថានភាពផ្លូវកោង និងចង្អៀត។ អាជ្ញាធរមានសមត្ថកិច្ចអះអាងថា កម្លាំងសមត្ថកិច្ចចរាចរណ៍ផ្លូវគោកតែងតែរៀបចំសណ្ដាប់ធ្នាប់ និងសម្រួលចរាចរណ៍នៅចំណុចនេះ ដើម្បីបញ្ចៀសហេតុការណ៍គ្រោះថ្នាក់ចរាចរណ៍កើតឡើង។
ផ្សារពន្លៃដែលឋិតនៅក្បែរសាលាស្រុកបរិបូរណ៍ តាមបណ្ដោយផ្លូវជាតិលេខ៥ មានស្ថានភាពចង្អៀតខ្លាំងប៉ែកខាងត្បូង និងខាងមុខផ្សារតាមដងផ្លូវជាតិនៅពេលព្រឹក និងពេលល្ងាច ដោយសារអាជីវករលក់ដូរ និងមនុស្សធ្វើដំណើរចេញចូលទិញអីវ៉ាន់។ អ្នកធ្វើដំណើរទិញដូរអីវ៉ាន់ឆ្លងកាត់ផ្លូវខ្វាត់ខ្វែងភាគច្រើន គឺអ្នករស់នៅទីរួមស្រុក និងអ្នកភូមិបណ្ដែតទឹកតំបន់ឆ្នុកទ្រូឡើងមកផ្សារទិញទំនិញ។
អ្នករត់ម៉ូតូកង់បីនៅមុខផ្សារពន្លៃ លោក គឹម សូនី មានប្រសាសន៍ថា លោក និងអ្នកចាំឌុបម៉ូយចេញពីផ្សារដោយចតម៉ូតូ ឬរ៉ឺម៉កក្បែរផ្លូវ ខ្លាចមានគ្រោះថ្នាក់ដោយសារឡានបើកលឿនៗ បើទោះបីជាឃើញផ្លូវកោង និងចង្អៀតយ៉ាងណាក្ដី។ លោកថា អ្នកអង្គុយចាំម៉ូយលើម៉ូតូ ឬដើរឆ្លងកាត់ផ្លូវជាតិមានការប្រុងប្រយ័ត្នដោយខ្លួនឯង ក្រោយឃើញមានគ្រោះថ្នាក់ញឹកញយនៅចំណុចនេះ៖ « សំណូមពរឲ្យតែឡានតាមផ្លូវបើកបន្ថយល្បឿនតិចទៅ ព្រោះវានៅកន្លែងផ្លូវកោងខ្លាចមានគ្រោះថ្នាក់។ ប៉ូលិសចរាចរណ៍ធ្វើដែរ ប៉ុន្តែឡាននៅតែលឿនមកដល់ត្រង់ហ្នឹង។ មានឡានបុកម៉ូតូអីតែអត់ដល់ស្លាប់ទេ គ្រាន់តែរបួស »។
សមត្ថកិច្ច និងពលរដ្ឋខ្លះឲ្យដឹងថា បញ្ហាកកស្ទះ ឬប្រឈមនឹងគ្រោះថ្នាក់ចរាចរណ៍នៅតំបន់នេះ គឺបណ្ដាលមកពីកំណើនប្រជាជន ហើយនៅមុខផ្សារមានផ្លូវបំបែកជាបួនដែលទាំងអ្នកអង្គុយលើម៉ូតូចាំឌុបម៉ូយ អ្នកថ្មើរជើង និងអ្នកបើកឡានលើផ្លូវជាតិ សុទ្ធតែប្រឈមនឹងគ្រោះថ្នាក់ទាំងអស់។ បញ្ហាបើកបរលើសល្បឿនកំណត់ និងការថ្មើរជើងមិនសមស្រប អាចមកពីកត្តាមិនសូវគោរពច្បាប់។
ឆ្លើយតបបញ្ហានេះ នាយផ្នែកចរាចរណ៍ផ្លូវគោកនៃអធិការដ្ឋាននគរបាលស្រុកបរិបូរណ៍ លោក រស់ ប៊ុនណារិទ្ធិ ថាសព្វថ្ងៃបញ្ហាគ្រោះថ្នាក់ចរាចរណ៍ និងសណ្ដាប់ធ្នាប់នៅមុខផ្សារពន្លៃ តាមបណ្ដោយផ្លូវជាតិលេខ៥ មិនសូវជាប្រឈមប៉ុន្មាននោះទេ។ លោកថា ស្លាកសញ្ញាចរាចរណ៍ដែលបានដាក់ដោយក្រសួងសាធារណការ កន្លងទៅមានការខ្វះខាត ដែលគួរបន្ថែមស្លាកសញ្ញាខ្លះទៀត៖ « ដូចផ្លូវអីមានតើ ! ផ្លូវបំបែកជាបី ប៉ុន្តែវាមានហ្នឹងមិនទាន់មានគ្រប់គ្រាន់មួយរយភាគរយទេបង។ អាហ្នឹងទាល់តែថែមស្លាកមួយចំនួនទៀត »។
ផ្សារពន្លៃដែលខាងមុខមានផ្លូវកៅស៊ូតូចចង្អៀត ហើយកោង និងធ្លាប់មានតូបឈើដាក់តាំងលក់អីវ៉ាន់លយចេញមកផ្លូវបណ្ដាលឲ្យចង្អៀតការធ្វើដំណើរទាំងអ្នកថ្មើរជើង និងបើកឡានតាមផ្លូវជាតិលេខ៥ នោះ។ កាលពីពេលថ្មីៗ អាជ្ញាធរខេត្តបានសហការជាមួយអាជ្ញាធរស្រុក ក្នុងការរៀបចំសណ្ដាប់ធ្នាប់ផ្សារ និងដងផ្លូវឲ្យគ្រាន់ទូលាយឡើងវិញ ដើម្បីបញ្ចៀសការកកស្ទះ និងគ្រោះថ្នាក់ចរាចរណ៍៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។