ប្រជាពលរដ្ឋជាង ៣០គ្រួសារនៅស្រុកបន្ទាយអំពិល ខេត្តឧត្ដរមានជ័យ នាំគ្នាផ្ដិតស្នាមមេដៃដើម្បីដាក់ទៅអាជ្ញាធរស្រុក ឲ្យដកមេភូមិចេញពីតំណែង។ ពួកគាត់បញ្ជាក់ថា កន្លងទៅមេភូមិនោះបម្រើការងារប្រកាន់បក្ខពួកនិយម និងបង្កផលលំបាកដល់ការធ្វើលិខិតស្នាមរបស់ប្រជាពលរដ្ឋក្នុងមូលដ្ឋាន ប៉ុន្តែមេភូមិបដិសេធចំពោះការចោទប្រកាន់នេះ ថាជារឿងមិនពិតឡើយ។
ប្រជាពលរដ្ឋនៅស្រុកបន្ទាយអំពិល សម្ដែងការមិនពេញចិត្តទៅនឹងកាយវិការរបស់មេភូមិ ព្រមទាំងសមាជិក ថាអនុវត្តការងារគិតតែពីផលប្រយោជន៍បក្ខពួករបស់ខ្លួនហួសហេតុ ហើយមិនខ្វល់ពីទុក្ខលំបាករបស់ប្រជាពលរដ្ឋក្នុងភូមិឡើយ។
ក្រុមប្រជាពលរដ្ឋនៅភូមិពោធិ៍ចាស់ ឃុំបេង ស្រុកបន្ទាយអំពិល ខេត្តឧត្ដរមានជ័យ ថ្លែងនៅថ្ងៃទី២២ កក្កដា ថា មេភូមិពោធិ៍ចាស់ គឺអ្នកស្រី តែង សុផាត ព្រមទាំងសមាជិកភូមិ គឺអ្នកស្រី រ័ត្ន សារឿន បម្រើការងារក្នុងភូមិប្រកាន់បក្ខពួកនិយម គឺធ្វើលិខិតស្នាមជូនប្រជាពលរដ្ឋណាដែលជាក្រុមសាច់ញាតិ និងបក្ខពួករបស់ខ្លួនបានឆាប់រហ័ស ហើយមិនខ្វល់ទុក្ខលំបាកពីប្រជាពលរដ្ឋដទៃឡើយ។
អ្នកភូមិបញ្ជាក់ថា ទង្វើរបស់មេភូមិនេះបានប៉ះពាល់យ៉ាងខ្លាំងដល់ការរស់នៅរបស់ប្រជាពលរដ្ឋ គឺអ្នកភូមិជួបការលំបាកមិនអាចធ្វើលិខិតស្នាមទៅខ្ចីប្រាក់ពីស្ថាប័នមីក្រូហិរញ្ញវត្ថុ យកទៅប្រកបរបរចិញ្ចឹមជីវិតបាននោះទេ៖ «ដូចជាស្រូវសហគមន៍ភូមិជាដើម មេភូមិគាត់គ្រប់គ្រងមិនបានត្រឹមត្រូវនោះទេ ហើយពេលប្រជាពលរដ្ឋនិយាយរិះគន់ គាត់តែងប្រើអំណាចបិទសិទ្ធិពលរដ្ឋមិនឲ្យនិយាយឡើយ។ គាត់ចង់ឲ្យប្រជាពលរដ្ឋឱនលំទោនគាត់ គឺបើគាត់ពេញចិត្តបានជាមេភូមិគាត់ស៊ីញេឲ្យទៅ»។
ឆ្លើយតបនឹងការចោទប្រកាន់នេះ មេភូមិពោធិ៍ចាស់ អ្នកស្រី តែង សុផាត បដិសេធចំពោះការចោទប្រកាន់របស់ប្រជាពលរដ្ឋដែលថា អ្នកស្រីប្រកាន់បក្ខពួកនិយមក្នុងការធ្វើលិខិតស្នាម និងបង្កផលលំបាកដល់ប្រជាពលរដ្ឋក្នុងភូមិនោះ ជារឿងមិនពិតឡើយ។ អ្នកស្រីអះអាងថា ការដឹកនាំកន្លងទៅ អ្នកស្រីតែងយកចិត្តទុកដាក់អំពីសុខទុក្ខរបស់ប្រជាពលរដ្ឋជាធំ ដោយមិនប្រកាន់និន្នាការគណបក្សនយោបាយ ឬប្រជាពលរដ្ឋអ្នកមានអ្នកក្រនោះទេ៖ «ខ្ញុំធ្វើមេភូមិនេះវាធ្ងន់ណាស់ តែខ្ញុំមិននិយាយទេ។ រហូតដល់ប្រជាពលរដ្ឋនាំគ្នាផ្ដិតស្នាមមេដៃតាមផ្ទះដកខ្ញុំចេញពីតំណែង ក៏ខ្ញុំមិនថាអីដែរ។ ចំពោះបញ្ហាស្រូវសហគមន៍វិញ ខ្ញុំធ្វើបញ្ជីត្រឹមត្រូវ គឺពុំមានបាត់បង់ទៅណានោះទេ»។
ទាក់ទងនឹងបញ្ហានេះដែរ មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តឧត្ដរមានជ័យ លោក ស្រី ណារ៉េន មានប្រសាសន៍ថា ករណីដែលកើតឡើងនោះ វាជាទុក្ខកង្វល់របស់ប្រជាពលរដ្ឋ ដែលពួកគាត់ជួបការលំបាកក្នុងមូលដ្ឋាន។ លោកបញ្ជាក់ថា ប្រជាពលរដ្ឋមានសិទ្ធិផ្ដិតស្នាមមេដៃស្នើទៅអាជ្ញាធរពាក់ព័ន្ធ ដកហូតតំណែងមេភូមិបាន ប្រសិនមេភូមិ ឬអាជ្ញាធរពាក់ព័ន្ធ ធ្វើការងារមិនបម្រើផលប្រយោជន៍របស់ប្រជាពលរដ្ឋនោះ៖ «ប្រជាពលរដ្ឋមានសំណូមពរហើយ មេឃុំគាត់គួរធ្វើការពិចារណានឹងសំណើរបស់ប្រជាពលរដ្ឋនោះ ពីព្រោះជាធម្មតាទាល់តែមានបញ្ហាកើតឡើងហើយ បានជាពួកគាត់នាំគ្នាផ្ដិតស្នាមមេដៃដកមេភូមិនោះ»។
អ្នកភូមិឲ្យដឹងថា រហូតមកទល់ពេលនេះ ពួកគាត់ប្រមូលស្នាមមេដៃបានប្រមាណជាង ៣០គ្រួសារហើយ ក្នុងចំណោមប្រជាពលរដ្ឋចំនួន ៧២គ្រួសារនោះ។ អ្នកភូមិគ្រោងនាំស្នាមមេដៃដែលប្រមូលបាននេះ ដាក់ជូនទៅអភិបាលស្រុកបន្ទាយអំពិល ដើម្បីធ្វើការពិចារណាដកមេភូមិនោះចេញពីតំណែងក្នុងពេលឆាប់ៗ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។