ប្រជាពលរដ្ឋខេត្តកណ្ដាល និងខេត្តកំពង់ស្ពឺ ដែលរស់នៅអមសងខាងថ្នល់ជាតិលេខ៥១ ចេញពីចំណុចផ្សារថ្នល់ទទឹង ឆ្ពោះទៅផ្សារឧដុង្គ ចម្ងាយជាង ៤០គីឡូម៉ែត្រ កំពុងប្រឈមបញ្ហាសុខភាព និងគ្រោះថ្នាក់ចរាចរណ៍ ដោយសារបញ្ហាផ្លូវខូចដីហុយខ្លាំង។
ប្រជាពលរដ្ឋ និងអាជីវករនៅអមសងខាងផ្លូវឲ្យដឹងនៅថ្ងៃទី២៧ ខែវិច្ឆិកា ថា ឡានគ្រប់ប្រភេទដែលធ្វើចរាចរណ៍លើថ្នល់ បោកបក់ធូលីដី ឬកម្ទេចថ្មចូលនំចំណីលក់ដូរ និងផ្ទះសម្បែងរបស់ពួកគាត់។ បញ្ហាផ្លូវខូច និងដីហុយនេះ បានកើតមានជាច្រើនឆ្នាំហើយ ប៉ុន្តែអាជ្ញាធរមិនអាចដោះស្រាយចេញក្រៅពីជួសជុលតិចតួចដោយដើរចាក់ថ្មតាមជង្ហុក ឬឈូសពង្រាបកន្លែងណាដែលខូចខាតខ្លាំងប៉ុណ្ណោះ។
ក្រុមអាជីវករលក់ចេកចៀន និងបាយកាហ្វេតាមចិញ្ចើមផ្លូវ នៃឃុំទំនប់ធំ ស្រុកពញាឮ ខេត្តកណ្ដាល ត្អូញត្អែរថា ពួកគាត់លំបាកដាក់តាំងនំចំណី ឬម្ហូបអាហារលក់ដូរដោយសារដីហុយពេក។ ពួកគាត់ស្នើឲ្យអាជ្ញាធរមានសមត្ថកិច្ចដោះស្រាយបញ្ហាដីហុយដោយការចាក់ទឹក ឬស្ថាបនាផ្លូវនេះឡើងវិញ បើមិនដូច្នេះទេ ធូលីដីនៅតែប៉ះពាល់ដល់ការលក់ដូរ និងការរស់នៅរបស់ប្រជាពលរដ្ឋ៖ «ចាក់ចេកចៀន និងដំឡូងចៀន! សូមឲ្យមានឡានបាញ់ទឹក។ ឡានជែងគ្នាវ៉ាវៗ ជាន់អត់មានដឹងឆ្កែ ឆ្មាអីទេ ហើយកូនចៅលក់ដូរហុយដល់ហើយក្មួយឯងមើល។ មានផលលំបាកហុយ កើតរោគផ្ដាសាយរាល់ថ្ងៃ ទាំងកូនទាំងម្ដាយ អ្នកភូមិក៏អ៊ីចឹងមានគ្រុន»។
ចំណែកបុរសវ័យប្រមាណ ៥០ឆ្នាំម្នាក់ កំពុងអង្គុយលើបង់មុខផ្ទះឋិតនៅឃុំក្សេមក្សាន្ត ស្រុកឧដុង្គ ខេត្តកំពង់ស្ពឺ គឺលោក ហ៊ុល ហឿន រៀបរាប់បណ្ដើរ និងដៃម្ខាងយកមួកខ្ទប់ច្រមុះបណ្ដើរថា បច្ចុប្បន្នអ្នកភូមិកំពុងប្រឈមបញ្ហាពីរសំខាន់ គឺបញ្ហាសុខភាពផ្លូវដង្ហើម និងគ្រោះថ្នាក់ចរាចរណ៍ដោយឡានបើកប្រជែងគ្នាទាំងយប់ទាំងថ្ងៃក្នុងស្ថានភាពផ្លូវលំបាក និងហុយខ្លាំងរកមើលអ្វីមិនឃើញ៖ «សំណូមពរធ្វើម៉េចឲ្យតែបានបន្ថយល្បឿនបន្តិចទៅកុំឲ្យវាលឿនពេក មិនទៅហាមឃាត់គេតែអារឿងហុយ ក្មួយដឹងស្រាប់ហើយ វាប៉ះពាល់ដល់សុខភាពមនុស្សទាំងអស់»។
ឆ្លើយតបបញ្ហានេះ អ្នកនាំពាក្យក្រសួងសាធារណការ និងដឹកជញ្ជូនលោក នូ វឌ្ឍនៈ ថ្លែងថា ផ្លូវលេខ៥១ អាចនឹងស្ដារឡើងវិញនៅក្នុងឆ្នាំ២០១៦ ដោយកម្ចីទឹកប្រាក់ពីប្រទេសចិន។ ប៉ុន្តែនៅចំពោះមុខក្រសួង និងមន្ទីរសាធារណការ និងដឹកជញ្ជូនខេត្តកំពង់ស្ពឺ មានវិធានការស្រោចទឹក ឬស្រោចកៅស៊ូស្ដើងៗនៅលើផ្លូវត្រង់ចំណុចណាដែលមានអ្នកភូមិរស់នៅដើម្បីកាត់បន្ថយការហុយ។
លោក នូ វឌ្ឍនៈ៖ «ខ្ញុំបានទាក់ទាងជាមួយប្រធានមន្ទីរថា កន្លងមកគាត់ស្រោចទឹកជាប់អ៊ីចឹងដែរ ប៉ុន្ដែដល់ឥឡូវចូលរដូវភ្លៀងគាត់អាក់ខានស្រោចវិញទៅ ប៉ុន្តែអារឿងស្រោចទឹកមានប្រសិទ្ធភាពតែមួយភ្លែតៗទេ ព្រោះស្រុកយើងក្ដៅ។ ឥឡូវនេះខ្ញុំចង់ឲ្យគាត់បាចកៅស៊ូខ្មៅ ដើម្បីគ្រប់ធូលីកាត់បន្ថយភាពហុយ ប៉ុន្ដែការងារហ្នឹងវាពាក់ព័ន្ធនឹងចំណាយ ហើយអ៊ីចឹងយើងមិនអាចធ្វើបានមួយចប់ផ្លូវបានទេ»។
លោកថា ពលរដ្ឋមួយចំនួនបានធ្វើតូបលក់ដូរ ឬផ្ទះរស់នៅលើចំណីផ្លូវជាតិ ខុសពីច្បាប់ដែលតម្រូវឲ្យធ្វើមានគម្លាតពីថ្នល់ជាតិចម្ងាយ ៣០ម៉ែត្រ។ លោកថា បើពលរដ្ឋអនុវត្តបានត្រឹមត្រូវតាមច្បាប់ចំណីផ្លូវថ្នល់ នោះពួកគាត់នឹងមិនប្រឈមបញ្ហាសុខភាព ឬរងនូវការហុយធូលីដោយផ្ទាល់នោះទេ។ ប៉ុន្តែលោកនឹងឲ្យជំនាញចុះពិនិត្យមើលជាក់ស្ដែងឡើងវិញ នៅចំណុចប៉ះពាល់ខ្លាំងដើម្បីដោះស្រាយ។
ផ្លូវជាតិលេខ៥១ ជាប្រភេទផ្លូវក្រាលកៅស៊ូ ឌី.ប៊ី.អេស.ធី (DBST) ប្រវែងជាង ៤០គីឡូម៉ែត្រ ចេញពីផ្សារថ្នល់ទទឹង ខេត្តកណ្ដាល ដល់ផ្សារឧដុង្គ ខេត្តកំពង់ស្ពឺ បានស្ថាបនាកាលពីជាង ១០ឆ្នាំមុន។ ផ្លូវមួយខ្សែនេះបានទ្រុឌទ្រោមខ្លាំងនៅក្នុងរយៈពេលប្រមាណ ៥ឆ្នាំ ចុងក្រោយនេះ ដោយមានរថយន្តធុនធំៗដឹកឈើ ដំឡូង និងស្រូវឆ្លងកាត់ដោយពុំមានការត្រួតបច្ចេកទេស ឬការផ្ទុកលើសទម្ងន់កំណត់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។