សមាគមការពារសិទ្ធិមនុស្សអាដហុក (ADHOC) ខេត្តឧត្តរមានជ័យ មានគម្រោងនឹងចុះស៊ើបអង្កេតទៅលើកម្លាំងសន្តិសុខរបស់កាស៊ីណូនៅតំបន់អូស្មាច់ មួយក្រុម ដែលបានព្រួតគ្នាវាយសំពងទៅលើប្រជាពលរដ្ឋម្នាក់ បណ្ដាលឱ្យរងរបួសធ្ងន់ធ្ងរ។
អង្គការសិទ្ធិមនុស្សក្រៅរដ្ឋាភិបាល ចាត់ទុកថា អំពើហិង្សានេះ គឺជាការរំលោភសិទ្ធិមនុស្សយ៉ាងខ្លាំង ដែលសមត្ថកិច្ចរដ្ឋាភិបាលមិនគួរព្រងើយកន្តើយមិនចាត់ការតាមច្បាប់ដូច្នេះទេ។
ប្រភពពីមន្ត្រីទំនាក់ទំនងព្រំដែនកម្ពុជាថៃ និងអង្គការសិទ្ធិមនុស្ស ឱ្យដឹងថា យ៉ាងហោចណាស់ក៏មានប្រជាពលរដ្ឋម្នាក់ក្នុងចំណោម ២នាក់ នៅសង្កាត់អូស្មាច់ នៃក្រុងសំរោង បានរងរបួសក្បាលធ្ងន់ធ្ងរ ដោយសារតែកម្លាំងសន្តិសុខរបស់កាស៊ីណូជាច្រើននាក់ បានព្រួតគ្នាវាយ។
មន្ត្រីទំនាក់ទំនងព្រំដែនកម្ពុជាថៃ ប្រចាំច្រកអូស្មាច់ ១រូប ដែលសុំមិនបញ្ចេញឈ្មោះ។ គាត់មានប្រសាសន៍កាលពីរសៀលថ្ងៃសៅរ៍ ទី១៦ ខែសីហា ថា កាលពីរំលងអាធ្រាត្រថ្ងៃទី១៥ ខែសីហា កន្លងទៅ លោកបានប្រទះឃើញក្រុមមនុស្សប្រុសប្រមាណជិត ៤០នាក់ ប្រដាប់ដោយដំបង ព្រួតគ្នាវាយសំពងទៅលើយុវជន ២នាក់ នៅជាប់ច្រកទ្វារព្រំដែនកម្ពុជាថៃ។
មន្ត្រីដដែលបញ្ជាក់ថា ក្នុងចំណោមយុវជនដែលគេព្រួតគ្នាវាយនោះ លោកស្គាល់ម្នាក់ឈ្មោះ ហួ ចិត្រា អាយុ ២៣ឆ្នាំ បានរងរបួសក្បាលធ្ងន់ធ្ងរ៖ «សាច់រឿងចេញពីណាអីទៅណានោះ ខ្ញុំអត់បានដឹងទេ ក៏ប៉ុន្តែខ្ញុំទាន់ឃើញប្រតាយគ្នា ដំបង១កំណាត់ៗម្នាក់រត់ប្រសាច វាយតប់គ្នានៅមាត់ច្រកទ្វារអន្តរជាតិហ្នឹង។ បើរាប់ទៅចូល ៣០-៤០នាក់ដែរ រយះក្បាលវាធ្ងន់ដែរ ដល់លលាដ៍ដល់អីដែរ ក៏ប៉ុន្តែវាមិនធ្ងន់ដល់ថ្នាក់ងើបមិនរួចអីទេ។ គេថាសន្តិសុខកាស៊ីណូ ប៉ុន្តែគ្រាន់ថាវាមិនឃើញមានឯកសណ្ឋានអីច្បាស់លាស់ គ្រាន់តែឃើញទាហានដែលការពារកាស៊ីណូ ២-៣នាក់នោះ គេនៅជាមួយដែរ»។
ទោះយ៉ាងណា វិទ្យុអាស៊ីសេរី មិនអាចទាក់ទងអ្នកគ្រប់គ្រងកាស៊ីណូតំបន់អូស្មាច់ ដើម្បីសុំការអធិប្បាយជុំវិញការចោទប្រកាន់នេះបានថាយ៉ាងណានៅឡើយ។
ប្រភពពីប្រជាពលរដ្ឋ ឱ្យដឹងថា មូលហេតុដែលសន្តិសុខរបស់កាស៊ីណូជាច្រើននាក់ ទៅព្រួតគ្នាវាយសំពងលើយុវជន ២នាក់នោះ ដោយសារគេចោទប្រកាន់ថា ក្រុមយុវជនទាំងនោះធ្លាប់ទៅអុកឡុកដោយប្រើចម្ពាមកៅស៊ូ បាញ់ទៅលើបុគ្គលិករបស់កាស៊ីណូជាញឹកញាប់។
បើទោះបីជាក្រុមសន្តិសុខរបស់កាស៊ីណូបានប្រើហិង្សាទៅលើប្រជាពលរដ្ឋក៏ដោយ ក៏ប៉ូលិសប៉ុស្តិ៍អូស្មាច់ មិនបានចាត់វិធានការផ្លូវច្បាប់ ប្រឆាំងនឹងអ្នកប្រើហិង្សាទាំងនោះទេ។
កាលពីរសៀលថ្ងៃសៅរ៍ វិទ្យុអាស៊ីសេរី មិនអាចស្វែងរកការទាក់ទងជាមួយ លោក ជ័យ វាសនា ដែលជាប្រធានប៉ុស្តិ៍នគរបាលសង្កាត់អូស្មាច់ បានទេ។
ចំណែកចៅសង្កាត់អូស្មាច់ លោក ភេម សំអាត មានប្រសាសន៍ថា លោកមិនទាន់បានដឹងរឿងនោះនៅឡើយ។ លោក ភេម សំអាត បញ្ជាក់ថា ប្រសិនបើកម្លាំងសន្តិសុខរបស់កាស៊ីណូជាច្រើន ពិតជាបានព្រួតគ្នាវាយប្រជាពលរដ្ឋមែន គឺជាបទល្មើសព្រហ្មទណ្ឌ ដែលត្រូវតែចាត់វិធានការតាមច្បាប់៖ «បទបង្ករបួសស្នាម អំពើហិង្សាត្រូវតែដោះស្រាយ។ ចាំមើលខ្ញុំស៊ើបសួរទៅប៉ូលិសសិន»។
អ្នកសម្របសម្រួលសមាគមការពារសិទ្ធិមនុស្សអាដហុក ខេត្តឧត្តរមានជ័យ លោក ស្រី ណារ៉េន មានប្រសាសន៍ថា លោកទើបតែទទួលបានព័ត៌មានអំពីករណីនេះ។ អង្គការអាដហុក នឹងចុះស៊ើបអង្កេតលើករណីនោះឱ្យបានឆាប់បំផុត។
ព័ត៌មានបន្ថែម៖
នគរបាលរដ្ឋបាលប៉ុស្តិ៍អូស្មាច់ ក្រុងសំរោង ខេត្តឧត្តរមានជ័យ បានជូនដំណឹងថាព័ត៌មានអំពីកម្លាំងសន្តិសុខរបស់កាស៊ីណូ១ក្រុម ព្រួតគ្នាវាយសំពងទៅលើយុវជន ២នាក់បណ្ដាលឱ្យយុវជនម្នាក់ ក្នុងចំណោមនោះ រងរបួសក្បាលធ្ងន់ធ្ងរកាលពីរំលងអធ្រាត្រថ្ងៃទី១៥ ខែសីហា គឺមិនមែននៅក្នុងទឹកដីអូស្មាច់ទេ។
នាយប៉ុស្តិ៍នគរបាលអូស្មាច់ គឺលោក ជ័យ វាសនា។ លោកមានប្រសាសន៍កាលពីរសៀលថ្ងៃអាទិត្យ ទី១៧ ខែសីហា ថា ហេតុការណ៍ដែលក្រុមសន្តិសុខកាស៊ីណូ ជិត ៤០នាក់ ព្រួតគ្នាវាយសំពងទៅលើយុវជន ២នាក់ បណ្ដាលឱ្យរងរបួសធ្ងន់ គឺនៅកាស៊ីណូ ច្រកព្រំដែនជាំសាង៉ាំ នៃស្រុកអន្លង់វែង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។