ក្រុមមេដឹកនាំសហជីពបានអះអាងថា ភាគីរោងចក្រពន្យារពេលឲ្យកម្មករបានឈប់សម្រាកក្រោយថ្ងៃបុណ្យចូលឆ្នាំខ្មែររួច រហូតដល់ថ្ងៃទី២១ មេសា គឺជាលទ្ធផលពីការតស៊ូមតិរបស់ពួកគេ។ ប៉ុន្តែក្នុងលិខិតរបស់រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានជូនដំណឹងស្ដីអំពីការឈប់សម្រាកថ្ងៃបុណ្យចូលឆ្នាំខ្មែរ គឺមានរយៈពេល ៣ថ្ងៃ ចាប់ពីថ្ងៃទី១៤ ដល់ថ្ងៃទី១៦ មេសា។
មេដឹកនាំសហជីពមួយចំនួនឲ្យដឹងថា ក្រោយពីយុទ្ធនាការកម្មករធ្វើកូដកម្មនៅតាមផ្ទះមិនចូលធ្វើការ ត្រូវបិទបញ្ចប់នៅដើមសប្ដាហ៍ខាងមុខនេះ ចំណែកយុទ្ធសាស្ត្របន្ទាប់ដើម្បីទាមទារយុត្តិធម៌ដល់អ្នកជាប់ឃុំទាំង ២១នាក់ និងសកម្មភាពដំឡើងប្រាក់ឈ្នួលយ៉ាងតិច ១៦០ដុល្លារ សម្រាប់កម្មករត្រូវប្រាកដថានឹងរៀបចំបន្តទៀតមិនរាថយឡើយ។
លោក ប៉ាវ ស៊ីណា ប្រធានសហព័ន្ធសហជីពចលនាកម្មករ ដែលជាសមាជិកសហជីពក្នុងចំណោមសម្ព័ន្ធសមាគម និងសជីពទាំង ១៨ស្ថាប័ន ឲ្យដឹងនៅថ្ងៃទី១៩ មេសា ថា ក្រោយពីយុទ្ធនាការធ្វើកូដកម្មប្រឆាំងនឹងប្រាក់ឈ្នួលដ៏តិចតួច ព្រមទាំងទាមទារឲ្យដោះលែងលោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ និងមនុស្ស ២០នាក់ផ្សេងទៀត បានកន្លងផុតក្នុងរយៈពេល ២ថ្ងៃខាងមុខទៀតនេះ។ ចំណែកខាងសម្ព័ន្ធសហជីពទាំង ១៨ នឹងរៀបចំផែនការបន្ទាប់ ប្រសិនបើការទាមទាររបស់ខ្លួននៅតែមិនត្រូវបានរដ្ឋាភិបាលដោះស្រាយ និងយកចិត្តទុកដាក់នោះទេ។
លោកបន្តថា៖ «បន្ទាប់ពីសកម្មភាពយើងនេះ ហៅថា ត្រូវបានបញ្ចប់ ។ ដូច្នេះសហជីពយើងនឹងធ្វើការជួបប្រជុំគ្នាដើម្បីរៀបចំយុទ្ធសាស្ត្រថ្មី និងហៅថា ផែនការថ្មី ដើម្បីរៀបចំធ្វើបន្តទៀត។ ប៉ុន្តែបញ្ចប់ថ្ងៃទី២២ នេះ យើងមានគម្រោងជួបជុំគ្នានៅថ្ងៃទី១ ឧសភា ដែរ ដើម្បីរៀបចំថ្លែងសារទៅកាន់អ្នកពាក់ព័ន្ធទាំងអស់ជុំវិញ ការទាមទាររបស់យើង។ អ៊ីចឹងមានន័យថា សកម្មភាពសហព័ន្ធសហជីពយើង មិនមានការថយទេ គឺនៅតែបន្តហៅថា គ្រប់សកម្មភាពដដែល»។
នៅមុនពិធីបុណ្យចូលឆ្នាំខ្មែរចូលមកដល់ ក្រុមសម្ព័ន្ធសហជីពចំនួន ១៨ស្ថាប័ន បានអំពាវនាវឲ្យកម្មករនៅតាមរោងចក្រ ធ្វើកូដកម្មនៅតាមផ្ទះ មិនចូលធ្វើក្រោយត្រឡប់ពីចូលឆ្នាំវិញ។ យុទ្ធនាការដែលគ្រោងនឹងបញ្ចប់នៅថ្ងៃទី២២ នេះ គឺជាអ្វីដែលក្រុមសហជីពហៅថា ជាការប្រឆាំងទៅនឹងប្រាក់ខែ មិនអាចរស់បានរបស់កម្មករហើយ ទាមទារឲ្យដោះលែងក្រុមសហជីព និងកម្មករ ២១នាក់ ដែលត្រូវបានកម្លាំងសមត្ថកិច្ចបង្ក្រាបដ៏ហិង្សាកាលពីដើមឆ្នាំ២០១៤។
ចំណែកលោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ហៅកាត់ថា ស៊ីខាវឌូ (CCAWDU) ឲ្យដឹងដែរថា ថ្វីបើនៅពេលនេះ កម្មករត្រូវបានភាគីរោងចក្រផ្ដល់សិទ្ធិឲ្យឈប់រហូតដល់ថ្ងៃទី២១ ទើបចូលធ្វើការជាធម្មតាឡើងវិញ ក៏ពិតមែនដែលវាស៊ីទៅនឹងការអំពាវនាវរបស់សហជីព នោះពុំមែនន័យថា យុទ្ធនាការរបស់សហជីពដែលទាមទារឲ្យកម្មករមិនចូលធ្វើការក្រោយថ្ងៃបុណ្យចូលឆ្នាំរួចនោះ ត្រូវបរាជ័យឡើយ។ ក៏ប៉ុន្តែលោក អាត់ ធន់ ថ្លែងដោយមោទនភាពថា ទាំងនេះជាការតស៊ូមតិដ៏មានតម្លៃបំផុតសម្រាប់សហជីព និងកម្មករ បើទោះជាមើលទៅឃើញរូបភាពហាក់ដូចអូសទូកបណ្ដោយទឹកក្ដី។ លោកចាត់ទុកថា ព្រោះជាទម្លាប់គេកម្របានឃើញភាគីរោងចក្រអនុញ្ញាតច្បាប់កម្មករបានឈប់សម្រាកច្រើនថ្ងៃដូចអ្វីដែលក្រុមសហជីព ទាមទារឲ្យកម្មករធ្វើកូដកម្មដូច្នេះឡើយ។
លោក អាត់ ធន់៖ «យើងមិនខ្វល់ថានិយោជកឲ្យ ឬនិយោជកមិនឲ្យ ឬក៏ខាងកម្មករព្រម ឬមិនព្រមទេ។ សំខាន់ថា អ្វីដែលនៅក្នុងអំឡុងពេលដែលយើងធ្វើហ្នឹង ថាតើមានការចូលរួមច្រើនប៉ុណ្ណា ប៉ុណ្ណឹងទេ។ ហ្នឹងជាអ្វីដែលជាលទ្ធផលរបស់ពួកយើង។ ខ្ញុំសូមបញ្ជាក់ថា ជារៀងរាល់ឆ្នាំ គឺយើងបានមើលគឺថា និយោជកភាគច្រើនឲ្យឈប់មុនមួយថ្ងៃ ក្រោយមួយថ្ងៃហ្នឹងជារៀងរាល់ឆ្នាំ។ ប៉ុន្តែឆ្នាំនេះ គឺយើងឃើញថា មុនមួយថ្ងៃហើយក្រោយហ្នឹងរហូតដល់ថ្ងៃ២១។ ដោយសារស្នើសុំរបស់តំណាងសហជីពហ្នឹងហើយ បានជានិយោជកភាគច្រើនផ្ដល់ឲ្យហ្នឹង ហើយកម្មករស្នើសុំនៅតាមរោងចក្រផ្សេងៗថែមទៀត។ អ៊ីចឹងអាហ្នឹងគឺជាចលនាមួយ ដែលធ្វើឲ្យមានការឈប់ព្រមៗគ្នាហ្នឹង»។
កម្មករភាគច្រើនបានអះអាងថា នេះទើបតែលោកទីមួយហើយដែលខាងរោងចក្រសហគ្រាសផ្ដល់ឱកាសឲ្យកម្មករបានឈប់សម្រាកច្រើនថ្ងៃរហូតដល់ថ្ងៃទី២១ មេសា ទើបឲ្យចូលធ្វើការជាធម្មតាឡើងវិញ។
ភ្ជាប់នឹងបញ្ហានេះ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ លោក អ៊ិត សំហេង បានជូនដំណឹងស្ដីអំពីការឈប់ថ្ងៃបុណ្យចូលឆ្នាំខ្មែរប្រពៃណីជាតិរយៈពេល ៣ថ្ងៃ គឺពីថ្ងៃទី១៤ ដល់ថ្ងៃទី១៦ មេសា ហើយការឈប់សម្រាកចូលឆ្នាំរយៈពេលវែងខុសពីរាល់ដងនេះ ទំនងជាអាចខាងក្រុមហ៊ុនបញ្ចៀសការចូលរួមពហិការមិនធ្វើការរបស់កម្មករតាមការអំពាវនាវរបស់សហព័ន្ធសហជីព។
រស់នៅខេត្តឧត្តរមានជ័យ កញ្ញា ហេង ទិវា ថ្លែងថា អស់រយៈពេលជាង ៤ឆ្នាំកន្លងទៅហើយ ដែលបានបម្រើការនៅក្នុងវិស័យឧស្សាហកម្មកាត់ដេរ។ ក៏ប៉ុន្តែ ហេង ទិវា បញ្ជាក់ថា នេះទើបតែលើកទីមួយដែលបានឃើញភាគីរោងចក្របើកសិទ្ធិឲ្យកម្មករបានឈប់សម្រាកច្រើនថ្ងៃដូច្នេះ៖ «ឆ្នាំនេះដូចច្រើនជាងឆ្នាំមុន។ ឈប់ថ្ងៃ ១២ ១៣ ១៤ ១៥ ១៦ ១៧ ឡើង ២០ជាង។ រាល់ដងឈប់បានតែ ៥ថ្ងៃអីទេ។ ប្រាំថ្ងៃ ប្រាំមួយថ្ងៃអស់ហើយ។ តាំងពីបាតុកម្មមក ដូចថាឥតសូវមានការងារ»។
សហព័ន្ធសហជីពនិងសមាគម ១៨ស្ថាប័ន បានផ្ដើមចែកខិត្តប័ណ្ណជាថ្មីម្ដងទៀតដល់កម្មករនៅតាមរោងចក្រសហគ្រាសទូទាំងប្រទេស ដើម្បីជំរុញឲ្យរដ្ឋាភិបាល និងតំណាងរោងចក្រដោះស្រាយបញ្ហាប្រាក់ខែគោលឲ្យបាន ១៦០ដុល្លារ។ លើសពីនេះទៀត សុំឲ្យដោះលែងមនុស្ស ២១នាក់ ដែលកំពុងជាប់ឃុំក្នុងពន្ធនាគារត្រពាំងផ្លុង ឲ្យមានសេរីភាព។
ដោយឡែកខិត្តប័ណ្ណប្រមាណចំនួន ១០ម៉ឺនសន្លឹក ត្រូវបានមន្ត្រីសហព័ន្ធសហជីព និងសមាគមចំនួន ១៨ ចែកចាយកាលណោះ នៅតាមរោងចក្រក្នុងរាជធានីភ្នំពេញ និងតាមបណ្ដាខេត្តមួយចំនួន គឺអំពាវនាវឲ្យកម្មករ មន្ត្រីរាជការ សិស្ស និង និស្សិត ចូលរួមតវ៉ាដោយប្រើប្រាស់សិទ្ធិឈប់សម្រាកប្រចាំឆ្នាំរបស់ខ្លួនបន្ទាប់ពីបុណ្យចូលឆ្នាំប្រពៃណីជាតិ ១សប្ដាហ៍បន្តទៀត។
ក្នុងខិត្តប័ណ្ណនោះ សហព័ន្ធសហជីពស្នើសុំឲ្យពួកគេឈប់សម្រាកប្រចាំឆ្នាំចាប់ពីថ្ងៃទី១៧ ដល់ថ្ងៃទី២២ ខែមេសា ក្រោយពីពិធីបុណ្យចូលឆ្នាំ ដើម្បីដាក់សម្ពាធទៅរដ្ឋាភិបាលឲ្យដោះលែងកម្មករ ២១នាក់ និងទម្លាក់បទចោទប្រឆាំងកម្មករ ២៣នាក់ រួមទាំងដំឡើងប្រាក់ខែគោលកម្មករឲ្យដល់ ១៦០ដុល្លារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។