កម្មកររោងចក្រដេរខោខោវប៊យ ស៊ីនឆាងស៊ីន (Xin Chang Xin) រំសាយការតវ៉ានៅមុខក្រសួងការងារ និងបណ្តុះបណ្តាលវិជ្ជាជីវៈ នៅព្រឹកថ្ងៃទី១ ខែសីហា ក្រោយពីគណៈកម្មការដោះស្រាយបាតុកម្មកូដកម្ម នៃក្រសួងការងារ បានសន្យាទៅដោះស្រាយបញ្ហាកើតឡើងដល់រោងចក្រ នៅថ្ងៃច័ន្ទ សប្ដាហ៍ក្រោយ។
កម្មការិនីមួយរូប ឲ្យដឹងថា ពួកគាត់នាំគ្នាដើរថ្មើរជើងទៅក្រសួងការងារ និងបណ្តុះបណ្តាលវិជ្ជាជីវៈ ដើម្បីឲ្យក្រសួង ជំរុញថៅកែរោងចក្រ ស៊ីនឆាងស៊ីន កំណត់ថ្ងៃចូលធ្វើការច្បាស់លាស់ ព្រោះកម្មករគ្មានប្រាក់ខែទេ៖ «ការងារនៅរោងចក្រអត់មាន អត់មានក្រណាត់ អត់មានការងារធ្វើផង មិនដឹងថាមានលុយបើក ឬក៏មិនមានផង។ ខែមុនធ្វើ គេបើកឲ្យ តែវេទនាណាស់ ពិបាកបើកលុយណាស់ បើនិយាយទៅ។ បើកលុយខែ៦ បានបើក តែខែ៦ ធ្វើការធម្មតាទេ។ ដល់ពេលខែ៧ រោងចក្រហ្នឹងឲ្យពួកខ្ញុំឈប់សម្រាក ដល់ពេលឥឡូវមិនទាន់ដឹងថា បានបើកលុយ ឬក៏មិនបានទេ ព្រោះអីមិនទាន់ដល់ថ្ងៃបើកលុយ»។
កម្មការិនីបន្តថា ថៅកែបានព្យួរការងារតាំងពីថ្ងៃទី១ ខែកក្កដា មក ហើយឲ្យកម្មករត្រូវតែមានវត្តមានក្នុងរោងចក្រ ដោយថៅកែកំណត់ឲ្យកម្មករវាយប៉ុងប្រចាំថ្ងៃ បញ្ជាក់វត្តមាន ទោះបីកម្មករចង់ទៅរកការងារផ្សេងធ្វើក៏មិនបាន។
តំណាងសហជីពស៊ីខាវឌូ ប្រចាំរោងចក្រខោខោវប៊យ ស៊ីឆាងស៊ីន លោក ឈិន សំអន ឲ្យដឹងថា កម្មករទាមទារឲ្យក្រសួងការងារ បញ្ជាក់ឲ្យច្បាស់ ប្រសិនបើថៅកែក្ស័យធន ក៏ត្រូវតែសងប្រាក់អតីតភាពការងារ និងប្រាក់អត្ថប្រយោជន៍ផ្សេងទៀតទៅកម្មករនៅសល់ប្រមាណ ៧០០នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។