កម្មករម្នាក់ទៀតដែលរបួសនៅក្នុងហេតុការណ៍កងកម្លាំងអាជ្ញាធរបង្ក្រាបការតវ៉ារបស់កម្មករនៅសួនឧស្សាហកម្មកាណាឌីយ៉ា តាមបណ្ដោយផ្លូវវ៉េងស្រេង បានស្លាប់នៅម៉ោង ៣ទៀបភ្លឺថ្ងៃសៅរ៍ ទី១៧ ខែឧសភា ដោយសាររបួសគ្រាំក្នុងក្បាលបានរើឡើង។
កម្មកររូបនោះមានឈ្មោះ មួន សុខមាន អាយុ ២៩ឆ្នាំ មានស្រុកកំណើតនៅភូមិរលាំងទឹក ឃុំស្រង់ ស្រុកគងពិសី ខេត្តកំពង់ស្ពឺ ធ្លាប់ជាកម្មករនៅរោងចក្រមួយក្នុងសួនឧស្សាហកម្មកាណាឌីយ៉ា។ មួន សុខមាន ត្រូវវាយអោយរបួសក្បាលធ្ងន់ធ្ងរ និងងងឹតភ្នែកខាងឆ្វេង នៅពេលកម្លាំងអាជ្ញាធរចុះទៅបង្ក្រាបការតវ៉ារបស់កម្មករ ដែលទាមទារដំឡើងប្រាក់ខែគោល ១៦០ដុល្លារ នៅលើផ្លូវវ៉េងស្រេង កាលពីថ្ងៃទី៣ ខែមករា ឆ្នាំ២០១៤។
ក្រុមគ្រួសារ មួន សុខមាន បញ្ជាក់ថា របួសចាស់នៅតែបន្តធ្វើទុក្ខរូបគេ ហើយកាន់តែរើខ្លាំងឡើងៗ ប៉ុន្តែគ្រួសារគេពុំមានប្រាក់សម្រាប់ព្យាបាលឡើយ រហូតគេស្លាប់នៅក្នុងផ្ទះជួលក្នុងសង្កាត់ចោមចៅ ខណ្ឌពោធិ៍សែនជ័យ។ ក្រុមគ្រួសារបានដឹកសពតាមម៉ូតូ ចេញពីផ្ទះជួលទៅតម្កល់នៅវត្តសំបួរមាស ក្នុងខណ្ឌដង្កោ រាជធានីភ្នំពេញ។ លើសពីនេះ ពួកគេក៏កំពុងខ្វះខាតថវិកាធ្វើបុណ្យសពតាមប្រពៃណី។
ការស្លាប់របស់ មួន សុខមាន បន្សល់ទុកភរិយាអោយមេម៉ាយ និងកូនប្រុសអាយុ ៣ឆ្នាំ អោយកំព្រាឪពុក។
សូមស្ដាប់សេចក្ដីរាយការណ៍របស់អ្នកស្រី អ៊ុក សាវបូរី ដូចតទៅ៖
លោក សម រង្ស៊ី ចូលរួមរំលែកទុក្ខ
ប្រធានគណបក្សសង្គ្រោះជាតិ លោក សម រង្ស៊ី បានអញ្ជើញទៅសំដែងក្តីគោរព និងចូលរួមរំលែកមរណៈទុក្ខជាមួយក្រុមគ្រួសារនៃសពកម្មករឈ្មោះ មួន សុខមាន ដែលបានស្លាប់ បន្ទាប់ពីរងរបួសក្បាលធ្ងន់ធ្ងរ ក្រោយក្រុមអាជ្ញាធរចម្រុះបានប្រើអំពើហិង្សាបង្ក្រាបកាលពីដើមខែមករា កន្លងមកនេះ។
លោក សម រង្ស៊ី មានប្រសាសន៍ប្រាប់វិទ្យុអាស៊ីសេរី តាមទូរស័ព្ទកាលពីយប់ថ្ងៃសៅរ៍ ទី១៧ ឧសភា ថា សពរបស់ជនរងគ្រោះនោះបានបូជារួចហើយ កាលពីរសៀលថ្ងៃសៅរ៍ នៅវត្តសំបួរមាស ក្នុង ខណ្ឌដង្កោ រាជធានីភ្នំពេញ៖ «គាត់ឈឺរ៉ាំរ៉ៃ ស្នាមរបួសគាត់ អត់ជាសះស្បើយទេ មានតែធ្ងន់ទៅៗ ហើយគាត់ស្លាប់ព្រឹកមិញនេះ។ គណបក្សសង្គ្រោះជាតិបានទទួលដំណឹងក្រៀមក្រំនេះ ក៏បានសម្រេចថា ខ្ញុំឋានៈជាប្រធានគណបក្សសង្គ្រោះជាតិ នឹងទៅផ្ទាល់ដើម្បីរំលែកទុក្ខជាមួយក្រុមគ្រួសារជនរងគ្រោះ និងសំដែងការគោរព ការដឹងគុណដល់វិញ្ញាណក្ខន្ធអ្នកដែលបានស្លាប់ ដែលបានលះបង់ជីវិត អ៊ីចឹងហើយបានជាខ្ញុំទៅចូលរួមក្នុងពិធីបុណ្យសព និងបានបូជាកាលពីរសៀលថ្ងៃនេះបាទ...»។
នៅទន្ទឹមនេះ គណបក្សសង្គ្រោះជាតិ ក៏អំពាវនាវដល់សាធារណជន ចូលរួមរំលែកទុក្ខនិងចូលបុណ្យតាមសទ្ធា ដល់ក្រុមគ្រួសារសព មួន សុខមាន ដែលមានជីវភាពរស់នៅទីទាល់ក្រ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។