កម្មការិនីជាច្រើននាក់បម្រើការនៅរោងចក្រ ខេមបូ ខូថប (Cambo Kotop) បានដួលសន្លប់នៅក្នុងរោងចក្រ នៅព្រឹកថ្ងៃទី១៤ ខែមីនា។ ក្រុមកម្មករបានអះអាងថា ពួកគេមានអាការៈណែនទ្រូង និងថប់ដង្ហើមនៅមុនពេលដួលសន្លប់នោះ។
កម្មករប្រមាណ ៤០នាក់ នៅរោងចក្រកាត់ដេរសម្លៀកបំពាក់ ខេមបូ ខូថប បានសន្លប់ជាបន្តបន្ទាប់ ដោយពុំដឹងមូលហេតុច្បាស់លាស់។
កម្មការិនីឈ្មោះ សុង សំអាន អោយដឹងថា កម្មករជាច្រើននាក់ចាប់ផ្ដើមដួលសន្លប់ជាបន្តបន្ទាប់នៅក្នុងរោងចក្រក្នុងពេលបំពេញការងារ។ កម្មការិនីដដែលបញ្ជាក់នៅក្រោយពេលដឹងខ្លួនពីសន្លប់មកវិញថា នាងបានថប់ដង្ហើម និងណែនដើមទ្រូងបន្ទាប់មកបានដួលសន្លប់៖ «ភាគច្រើន គឺទន់តែម្ដង ទន់ទៅស្មិល ។ ចេញពីរោងចក្រមកខ្លះគ្រាន់តែដើរៗដួលស្មិលម៉ង។ អត់ដឹងមូលហេតុអីទេបង ព្រោះអីអោយតែអ្នកសន្លប់ភាគច្រើន គឺសុទ្ធតែណែនទ្រូង ដកដង្ហើមមិនរួចហាតែមាត់»។
កម្មការិនី សុង សំអាន រំឭកថា កាលពីថ្ងៃទី១៣ មីនា រូបនាង និងកម្មករប្រមាណ ២០នាក់ទៀត បានសន្លប់ម្ដងរួចហើយ ដែលមិននឹកស្មានថាដួលសន្លប់ជាថ្មីទៀតនៅពេលនេះឡើយ។
ការដួលសន្លប់របស់កម្មករនៃរោងចក្រ ខេមបូ ខូថប ដែលមានទីតាំងនៅក្នុងភូមិអង្គ សង្កាត់កន្ទោក ខណ្ឌពោធិ៍សែនជ័យ កើតឡើងបន្ទាប់ពីកម្មការិនីម្នាក់បានស្លាប់នៅក្នុងពេលកំពុងធ្វើការ។
តំណាងរដ្ឋបាលរោងចក្រ ខេមបូ ខូថប មួយរូបបញ្ជាក់ថា ការដួលសន្លប់របស់ក្រុមកម្មករ គឺបណ្ដាលមកពីការភ័យតៗគ្នានៅក្រោយពេលដែលមានកម្មការិនីម្នាក់បានស្លាប់ដោយខ្យល់គរ ដែលមិនពាក់ព័ន្ធដល់បរិយាកាសក្នុងរោងចក្រឡើយ។
មន្ត្រីផ្នែកសិទ្ធិការងារនៃមជ្ឈមណ្ឌលអប់រំច្បាប់សម្រាប់សហគមន៍ អ្នកស្រី ឆន សុខា ដែលបានចុះស៊ើបអង្កេតករណីនេះ ថ្លែងថា បញ្ហាដួលសន្លប់របស់ក្រុមកម្មករអាចជាប់ពាក់ព័ន្ធនឹងប្រាក់ខែតិច ដែលធ្វើអោយពួកគេមានសុខភាពទ្រុឌទ្រោម។
«សំឡេង»
ពាក់ព័ន្ធនឹងការស្លាប់របស់កម្មការិនីម្នាក់នៅពេលបំពេញការងារក្នុងរោងចក្រនេះ កាលពីថ្ងៃទី១៣ ខែមីនា សហជីពកម្មករ និងអង្គការមិនមែនរដ្ឋាភិបាលធ្វើការងារការពារសិទ្ធិការងារ កំពុងស៊ើបអង្កេតដើម្បីស្វែងរកមូលហេតុពិតប្រាកដ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។