កម្មកររោងចក្រស្បែងជើង កាលីង តុន (CALING TON) ដែលមានទីតាំងនៅឃុំខ្នុរដំបង ស្រុកជើងព្រៃ ខេត្តកំពង់ចាម ប្រមាណជាង ១ពាន់នាក់ នាំគ្នាធ្វើកូដកម្មនៅមុខច្រកចូលរោងចក្រ ដើម្បីទាមទារលក្ខខណ្ឌការងារដែលខាងភាគីរោងចក្រមិនទាន់បានបំពេញជូនកម្មករ។
ប្រធានសហជីពសំឡេងយុវជនខ្មែរប្រចាំរោងចក្រ កាលីង តុន លោក សួស សំនៀង ឱ្យដឹងថា កម្មករបាននាំគ្នាធ្វើកូដកម្មចំនួន ៥ថ្ងៃមកហើយ ប៉ុន្តែខាងក្រុមហ៊ុនមិនបានចេញមុខមកដោះស្រាយជូនពួកគាត់ឱ្យបានស្ងប់ចិត្តនោះឡើយ។ កម្មករបាននាំគ្នាបំបែកការតវ៉ានៅម៉ោងប្រមាណ ១១ថ្ងៃត្រង់ ដោយមិនមានតំណាងក្រុមហ៊ុនមកជួបដោះស្រាយដដែល ប៉ុន្តែពួកគេនឹងជួបជុំគ្នា ដើម្បីធ្វើការតវ៉ាបន្តទៀតនៅថ្ងៃច័ន្ទ ទី២៨ កក្កដា គឺអាចនឹងមានការហែក្បួនធំមួយ។
លោក សួស សំនៀង៖ «ពួកខ្ញុំក៏ដូចជាបងប្អូនកម្មករកម្មការិនីនៅតែប្ដេជ្ញាប្រកាន់ជំហរក្នុងការទាមទារ ក៏ដូចជាបងប្អូនខាងកម្មករនៅជិតៗនេះ ក៏គាត់ពេញចិត្តក្នុងការទាមទារ។ ពួកគាត់នឹងចូលរួមក្នុងការទាមទារក្នុងពេលឆាប់ៗនេះ។ អត់ គឺគាត់អត់មាននេះទេ គឺគាត់ប្រកាន់ជំហរមួយ សូម្បីតែហៅថាចរចាបាន ឬក៏មិនបាន ក៏អត់មានតែម្តង»។
លោកបន្តថា កម្មករបានទាមទារ ៨ចំណុច រួមមានសុំបន្ថែមលុយបាយ ៤ពាន់រៀល ឬក៏ផ្តល់បាយជូនកម្មករមួយពេលក្នុងមួយថ្ងៃ ស្នើបន្ថែមប្រាក់លើកទឹកចិត្ត ១៥ដុល្លារ សោហ៊ុយធ្វើដំណើរ ១៥ដុល្លារ និងប្រាក់ ២ពាន់រៀលជាថ្លៃបាយនៅពេលថែមម៉ោង ស្នើប្ដូររបៀបទូទាត់ប្រាក់ថែមម៉ោងសម្រាប់ប្រធានក្រុម ដោយត្រូវគិតបញ្ចូលប្រាក់តួនាទី ស្នើអនុគ្រោះកុំកាត់ប្រាក់ប្រធានក្រុមដែលស្នាក់ក្នុងរោងចក្រ ធានាសិទ្ធិសេរីភាពរបស់អ្នកបើកបរឡានដឹកកម្មករ និងផ្តល់រង្វាន់លើកទឹកចិត្តអ្នកបើកបរដែលធានាសុវត្ថិភាពកម្មករ។
អ្នកបកប្រែភាសាចិន នៅក្នុងរោងចក្រ កាលីង តុន លោក ឃីម វីរ ឱ្យដឹងថា ខាងក្រុមហ៊ុនមិនឯកភាពទៅនឹងការទាមទារទាំង ៨ចំណុចនោះឡើយ ដោយអះអាងថា ការទាមទារនោះលើសពីគោលការណ៍ច្បាប់។ លោកបន្តថា ខាងក្រុមហ៊ុនបញ្ជូនបញ្ហានេះទៅខាងមន្ទីរការងារ ខេត្តកំពង់ចាម ប៉ុន្តែមិនអាចរកចំណុចរួមបាន ហើយក៏បញ្ជូនសំណុំរឿងនេះបន្តទៅក្រុមប្រឹក្សាអាជ្ញាកណ្ដាល ដើម្បីដោះស្រាយ។ ដូចនេះ ខាងក្រុមហ៊ុនរង់ចាំការសម្រេចរបស់ក្រុមប្រឹក្សាអាជ្ញាកណ្ដាល ជុំវិញការទាមទារនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។