កម្មករផលិតស្បែកជើងប្រហែល ១ពាន់នាក់ ដែលបម្រើការនៅរោងចក្រ ប៊ីយូធី (Beauty) នៅស្រុកត្រាំកក់ ខេត្តតាកែវ ធ្វើកូដកម្មនៅខាងមុខរោងចក្រប្រឆាំងជនជាតិចិន ដែលយកស្បែកជើងគប់ស្ត្រីមានផ្ទៃពោះបណ្ដាលឲ្យមានរបួស។
កម្មករផ្នែកជាងម៉ាស៊ីន លោក ធៀម សុភាន់ ឲ្យដឹងនៅថ្ងៃទី២៣ មិថុនា ថា មូលហេតុដែលកម្មករធ្វើកូដកម្មមិនចូលធ្វើការនេះ ព្រោះតែខឹងជនជាតិចិនប្រើហិង្សាទៅលើស្ត្រីមានផ្ទៃពោះ ៧ខែ ឲ្យមានរបួស ខណៈកម្មការិនីរូបនេះកំពុងបំពេញការងារ។ លោកបន្តថា ក្នុងពេលកម្មករតវ៉ាប្រឆាំងជនជាតិចិន ប្រើហិង្សាលើស្ត្រីមានផ្ទៃពោះនេះដែរ កម្មករបានទាមទារលក្ខខណ្ឌមួយចំនួនទៀត ដូចជាទាមទារប្រាក់ថ្លៃបាយ និងប្រាក់ថ្លៃធ្វើដំណើរជាដើម ថែមទៀតផង។
រោងចក្រប៊ីយូធី ដែលមានទីតាំងនៅឃុំលាយបូ ស្រុកត្រាំកក់ ខេត្តតាកែវ នេះ មានកម្មករប្រមាណជាង ១.៥០០នាក់។ កម្មករអះអាងថា រហូតមកដល់ពេលនេះ ភាគីរោងចក្រនៅមិនព្រមចេញមុខដោះស្រាយ។ ផ្ទុយទៅវិញ ថៅកែរោងចក្រដែលជាជនជាតិចិនដែរ បានយកលុយជាង ១០០ដុល្លារ ប្រគល់ឲ្យស្ត្រីមានផ្ទៃពោះ ជាថ្នូរនឹងការបិទការតវ៉ាកាលពីថ្ងៃទី២២ មិថុនា។ ប៉ុន្តែលុយជាង ១០០ដុល្លារនោះ ត្រូវបានស្ត្រីមានផ្ទៃពោះបដិសេធ រួចប្រគល់ឲ្យភាគីរោងចក្រវិញ ហើយកម្មករនៅតែបន្តតវ៉ា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។