កម្មករកម្មការិនីក្នុងវិស័យកាត់ដេរសម្លៀកបំពាក់ គ្រោងរៀបចំកម្មវិធីបង្ហាញម៉ូតសម្លៀកបំពាក់មួយ នៅថ្ងៃទី២៥ ឧសភា ក្រោមពាក្យស្លោក ធាតុពិតនៃសម្លៀកបំពាក់ដ៏ស្រស់ស្អាត ដើម្បីប្រឆាំងទៅនឹងការជាប់គាំងយុទ្ធនាការទាមទារដំឡើងប្រាក់ឈ្នួលអប្បបរមា និងការបន្តគាបសង្កត់របស់រដ្ឋាភិបាល។
អ្នកសម្របសម្រួលស្ដីទីនៃមណ្ឌលព័ត៌មានកម្មករ កញ្ញា សុខ ថារ៉េត ថ្លែងថា កម្មវិធីនេះ គឺចង់បង្ហាញអំពីគម្លាតប្រាក់ចំណូលរវាងកម្មករកាត់ដេរ និងប្រាក់ចំណូលរបស់នាយកប្រតិបត្តិក្រុមហ៊ុនផលិតសម្លៀកបំពាក់ដែលជាអ្នកបញ្ជាទិញ ដើម្បីទាមទារឲ្យពួកគេទទួលខុសត្រូវចំពោះការជាប់គាំងនៃយុទ្ធនាការទាមទារប្រាក់ឈ្នួលរបស់កម្មករ។ កញ្ញាបន្តថា កម្មវិធីនេះក៏នឹងទាមទារដល់រដ្ឋាភិបាល ឲ្យបញ្ឈប់ការប្រើអំពើហិង្សាគ្រប់ទម្រង់ និងបញ្ឈប់ការហាមប្រាមនូវការជួបជុំគ្នាជាសាធារណៈជាបន្ទាន់។
កញ្ញា សុខ ថារ៉េត៖ «ប្រាក់ឈ្នួលកម្មករពេលដែលយើងទាមទារទៅវាច្រើន តែអត់ទទួលនូវអ្វីដែលយើងចង់បាន ១៦០ យើងបានតែ ១០០ ការទាមទារហ្នឹង គឺយើងប្រឈមមុខខ្លាំងមែនទែន។ គោលបំណងរបស់យើង គឺយើងធ្វើម៉េច ចង់បង្ហាញទៅម្ចាស់ផ្លាក បង្ហាញពីគម្លាតនៃប្រាក់ចំណូលរបស់កម្មករក្នុងមួយខែហ្នឹង ដែលរកបានត្រឹមតែ ១០០ ទៅនឹងគម្លាតរបស់ម្ចាស់ផ្លាកមួយចំនួនដែលគាត់កំពុងតែផលិតឲ្យ ហើយនាំទៅក្រៅប្រទេស ហើយល្បីៗស្អាតៗហ្នឹង គាត់ចំណេញវាល់លានដុល្លារ។ ទាមទារឲ្យម្ចាស់ផ្លាកទាំងអស់ហ្នឹង ទទួលខុសត្រូវទៅលើស្ថានភាពរបស់កម្មករហ្នឹង។ ទី២ ចង់បង្ហាញពីចំណាប់អារម្មណ៍របស់កម្មករដែលគាត់ទទួលរងនូវការបង្ក្រាបកន្លងមក មានន័យថា ចាប់ពីថ្ងៃធ្វើកូដកម្មទាមទារប្រាក់ឈ្នួលហ្នឹងមក គាត់ប្រឈមមុខនឹងបញ្ហាអ្វីខ្លះ ក៏គាត់ទាមទារឲ្យមានការដោះស្រាយឲ្យមានយុត្តិធម៌ដែរ»។
កម្មវិធីបង្ហាញម៉ូតសម្លៀកបំពាក់នេះ គេគ្រោងធ្វើនៅម៉ោង ៣រសៀល ដល់ម៉ោង ៧យប់ ថ្ងៃអាទិត្យ ទី២៥ ខែឧសភា នៅការិយាល័យមណ្ឌលព័ត៌មានកម្មករ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។