កម្មករកម្មការិនីរោងចក្រដំឡើងកង់ឈ្មោះ ស្មាត ថេក (Smart tech) ប្រមាណ ១ពាន់នាក់ នៅព្រឹកថ្ងៃទី២១ មេសា បានប្រមូលផ្ដុំគ្នាបន្តធ្វើកូដកម្មជាថ្មីនៅខាងមុខរោងចក្រ នាតំបន់សេដ្ឋកិច្ចពិសេស តាយសេង (Tai Seng) នៅក្រុងបាវិត ខេត្តស្វាយរៀង។
ការធ្វើកូដកម្មនេះ ដោយសារថៅកែរោងចក្រមិនបានដោះស្រាយលក្ខខណ្ឌការងារមួយចំនួន តាមការស្នើសុំរបស់កម្មករ។
នេះជាថ្ងៃទី២ហើយដែលក្រុមកម្មករប្រមូលផ្ដុំគ្នាធ្វើកូដកម្មជាថ្មី ក្រោយពីបុណ្យចូលឆ្នាំប្រពៃណីខ្មែររួច។ ក្រុមកម្មករបញ្ជាក់ថា ការធ្វើកូដកម្មជាថ្មីនេះដើម្បីដាក់សម្ពាធឲ្យថៅកែរោងចក្រដោះស្រាយលក្ខខណ្ឌការងារមួយចំនួនដែលបានទាមទារនាពេលកន្លងមក។
តំណាងកម្មកររោងចក្រដំឡើងកង់ម្នាក់ លោក សុខ ជា ថ្លែងនៅថ្ងៃទី២១ មេសា ថា លក្ខខណ្ឌការងារសំខាន់ដែលក្រុមកម្មករទាមទារនោះ គឺឲ្យថៅកែរោងចក្រទទួលយកកម្មករដែលបានបញ្ឈប់ពីការងារចំនួន ៤១នាក់ ពេលកន្លងទៅឲ្យត្រឡប់ចូលធ្វើការវិញជាធម្មតា។ សុំឲ្យក្រុមហ៊ុនបើកប្រាក់ឲ្យកម្មករម្នាក់ ៥០ដុល្លារ ដែលបានសន្យាថា បើក្រុមកម្មករមិនធ្វើកូដកម្មកាលពីមុនបុណ្យចូលឆ្នាំខ្មែរ។ កម្មករមិនបានធ្វើកូដកម្មទេ ផ្ទុយទៅវិញថៅកែមិនបានប្រគល់លុយ ៥០ដុល្លារដល់កម្មករតាមការសន្យាឡើយ។
លោក សុខ ជា ឲ្យដឹងថា ក្រុមហ៊ុនហាក់មានចេតនាមិនព្រមដោះស្រាយតាមការស្នើសុំរបស់កម្មករទេ៖ «ឲ្យលុយ ៥០ដុល្លារហ្នឹង គេថាបើអត់កូដកម្មគេឲ្យ ៥០ដុល្លារ បើ៣ខែអត់កូដទៀតគេឡើងឲ្យ ២៥ដុល្លារទៀត ទាំងអស់ ៧០ដុល្លារ។ ដល់ហើយរោងចក្រខ្ញុំនៅតំបន់ហ្នឹងដែរ អត់បាន ពួកខ្ញុំគ្រាន់តែថា ថៅកែរោងចក្រដូចគ្នាគេបានខ្ញុំអត់បាន ខ្ញុំធ្វើកូដកម្មដែរ។ ឃើញតែអាជ្ញាធរដែនដីគេមកឈរមើលពួកខ្ញុំធ្វើកូដកម្ម គេអត់មានថា ដោះស្រាយអីផង ហើយឥឡូវកម្មករទាំងអស់ហ្នឹងតាមរោងចក្រគេកញ្ជ្រោលធ្វើកូដកម្មទាំងអស់ហ្នឹង»។
រីឯមន្ត្រីសម្ពន្ធសហជីពចលនាកម្មករ លោក មាស សុខណា គូសបញ្ជាក់ថា ការធ្វើកូដកម្មរបស់ក្រុមកម្មកររយៈក្រោយនេះ ជួបការលំបាកខ្លាំង។ លោកបន្តថា មន្ត្រីសម្ពន្ធសហជីពក៏ត្រូវក្រុមហ៊ុននិងអាជ្ញាធរ រឹតបន្តឹងមិនឲ្យចូលរួមដោះស្រាយបញ្ហាជាមួយកម្មករនោះទេ គឺឲ្យកម្មករដោះស្រាយជាមួយក្រុមហ៊ុនផ្ទាល់ដោយខ្លួនឯង។
លោកថា ក្រុមហ៊ុនធ្វើដូចនេះដើម្បីងាយស្រួលគាបសង្កត់ទៅលើក្រុមកម្មករមិនឲ្យងើបតវ៉ាទាមទារសិទ្ធិការងារនាពេលខាងមុខ៖ «គេអត់មានប្រើកាយវិការទេបង គេប្រើចិត្តសាស្ត្រ គឺថា ក្រុមហ៊ុនសុខចិត្តឲ្យកម្មករចរចា ក៏ប៉ុន្តែគេមិនឲ្យសហជីពចូលចរចាទេ។ សមត្ថកិច្ចហ្នឹង ក្រុមហ៊ុនគេថា មានសហជីពដូចមានឆ្អឹងទទឹងករបស់ក្រុមហ៊ុន ពីព្រោះរោងចក្រគេគិតថា អត់សហជីពគេអាចជិះជាន់កេងប្រវ័ញ្ចលើកម្លាំងពលកម្មរបស់កម្មករបានគ្រប់ពេល។ កាលណាដែលមានសហជីពដោះស្រាយគឺវាមិនអាចធ្វើអីតាមអំពើចិត្តវាបាន»។
ឆ្លើយតបបញ្ហានេះ អនុប្រធានមន្ទីរការងារខេត្តស្វាយរៀង លោក អ៊ូ សុខឿន មានប្រសាសន៍ថា ហេតុដែលក្រុមហ៊ុនមិនឲ្យមន្ត្រីសម្ព័ន្ធសហជីពចលនាកម្មករចូលរួមដោះស្រាយបញ្ហាជាមួយកម្មករ ដោយសារក្រុមហ៊ុនខ្លាចមន្ត្រីសហជីពបង្កបញ្ហាដល់កម្មករក្នុងពេលរកដំណោះស្រាយ។ រីឯបញ្ហា ការធ្វើកូដកម្មរបស់ក្រុមកម្មករក្រោយបុណ្យចូលឆ្នាំខ្មែរ លោក អ៊ូ សុខឿន បញ្ជាក់ថា ដោយសារការខ្វែងគំនិតគ្នារឿងប្រាក់លើកទឹកចិត្ត ៥០ដុល្លារ ដល់ក្រុមកម្មករដែលមិនរួមធ្វើកូដកម្ម ហើយក្រុមហ៊ុនបដិសេធថា មិនបានសន្យាផ្ដល់ប្រាក់ ៥០ដុល្លារនោះឲ្យក្រុមកម្មករឡើយ។
លោកថា បញ្ហានេះនឹងដោះស្រាយបញ្ចប់ដែលអាចទទួលយកបានក្នុងពេលឆាប់ៗខាងមុខ៖ «អ៊ីចឹងសំណូមពរហ្នឹងគាត់មិនអាចដោះស្រាយជូនបានទេ។ ប៉ុន្តែគាត់ហ្នឹងមានគោលនយោបាយថ្មី របស់គាត់សម្រាប់ការលើកទឹកចិត្តទៅដល់កម្មករទៅថ្ងៃខាងមុខ។ ឧទាហរណ៍ថា ចាប់ពីខែប្រាំទៅខ្សែផលិតកម្មណាខិតខំធ្វើការទទួលបានលទ្ធផលល្អមិនមានកម្មករឈប់ច្រើន មិនមានកូដកម្ម ផលិតបានតាមសេចក្ដីត្រូវការរបស់ក្រុមហ៊ុន អ៊ីចឹងក្នុង៣ខែគេលើកទឹកចិត្តម្នាក់ ២៥ដុល្លារ។ ប៉ុន្តែដោយឡែកលុយដែលបងប្អូនធ្វើកូដកម្មទាមទារសុំថ្ងៃមិនធ្វើកូដកម្ម ៥០នោះ គាត់មិនឲ្យបានទេ ព្រោះគាត់និយាយថាបងប្អូនកំពុងធ្វើកូដកម្ម»។
តែយ៉ាងណាក្រុមកម្មករបញ្ជាក់ថា ការសន្យារបស់ក្រុមហ៊ុនកន្លងមកភាគច្រើនជាការសន្យាខ្យល់ គឺតែងតែបោកប្រាស់មកលើកម្មករជានិច្ច។ ក្រុមកម្មករឲ្យដឹងថា ប្រសិនបើថៅកែរោងចក្រនៅតែរឹងរុះមិនដោះស្រាយតាមការស្នើសុំរបស់កម្មករទេ នោះពួកគេនឹងមិនបោះបង់ការទាមទាររបស់ខ្លួនឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។