ក្រុមកម្មករប្រដាប់ដោយគ្រឿងបំពងសំឡេងផងនោះ ពួកគេតវ៉ាទាមទារអត្ថប្រយោជន៍ការងារ បន្ទាប់ពីស្នើសុំក្រុមហ៊ុនកន្លងមក តែគ្មានដំណោះស្រាយ។ អត្ថប្រយោជន៍ការងារដែលក្រុមកម្មករទាមទារនោះរួមមាន ស្នើឲ្យក្រុមហ៊ុនដោះស្រាយប្រាក់ឈ្នួលសម្រាប់កម្មករធ្វើការងារថ្ងៃឈប់សម្រាកពីជាង ៣ដុល្លារ ទៅជាង ៦ដុល្លារក្នុងមួយថ្ងៃ ដោយមិនរាប់បញ្ចូលប្រាក់ខែគោល ៨១ដុល្លារនោះទេ។ ក្រៅពីនេះទៀត ទាមទារប្រាក់ថ្លៃបាយ ១៣ដុល្លារ ប្រាក់ថ្លៃឡានធ្វើដំណើរ ១៣ដុល្លារ និងប្រាក់រង្វាន់ការងារល្អ ១០ដុល្លារក្នុងមួយខែ និងមិនឲ្យក្រុមហ៊ុនកាត់ប្រាក់ឈ្នួលអំឡុងពេលកម្មករធ្វើកូដកម្មជាដើម។
តំណាងកម្មកររោងចក្រកាត់ដេរម្នាក់ឈ្មោះលោក ពេញ ដា ថ្លែងនៅថ្ងៃទី២៧ វិច្ឆិកា ថា កម្មករធ្វើកូដកម្មទាមទារដោយសារក្រុមហ៊ុននិយាយបាតដៃខ្នងដៃ ដោយពុំបានគោរពតាមកិច្ចសន្យាដែលបានយល់ព្រមគ្នាជាមួយកម្មករនៅពេលកន្លងមក៖ «គាត់វាយត្រាសន្យាជាមួយកម្មករថា បើធ្វើកូដកម្មទៀត ឲ្យដាច់លុយ គេក៏យល់ព្រមចេញលុយ។ គេថាបើសិនរោងចក្រក្រោយទៀតមានការបើកលុយមិនទាន់ឲ្យ គេមានដាក់កង្ហារដាក់អី ធ្វើអ្វីមួយដែលក្រុមហ៊ុនធ្វើវាមិនបានគ្រប់យ៉ាងឲ្យគេ គេនឹងកូដកម្មទៀត គាត់ក៏យល់ព្រមវ៉ៃត្រាដែរ»។
កម្មការិនីម្នាក់ទៀតសុំមិនឲ្យបញ្ចេញឈ្មោះ និយាយថា ដើមឡើយក្រុមហ៊ុនធ្លាប់បានសន្យាយល់ព្រមផ្ដល់ប្រាក់អត្ថប្រយោជន៍ការងារសម្រាប់កម្មករធ្វើការថ្ងៃឈប់សម្រាកសៅរ៍ អាទិត្យ និងថ្ងៃបុណ្យទាន ៦ដុល្លារក្នុងមួយថ្ងៃ។ ប៉ុន្តែការអនុវត្តជាក់ស្ដែង ក្រុមហ៊ុនបែរជាកេងចំណេញពុំបានបើកឲ្យកម្មករ ៦ដុល្លារ ដូចការសន្យាឡើយ៖ «គិតទៅបើខ្ញុំមកធ្វើការថ្ងៃអាទិត្យ វាខាតលុយ ហើយប្រាក់ខែគោលរោងចក្រគេផ្សេងៗវាដដែល។ ដល់ពេលរោងចក្រហ្នឹងគេមិនអ៊ីចឹងណា គេដកពីប្រាក់ហ្នឹងមកបូកជាមួយថ្ងៃអាទិត្យ ថ្ងៃបុណ្យ គេដកមកគិតឲ្យយើងអ៊ីចឹងអត់ត្រូវ»។
វិទ្យុអាស៊ីសេរី ពុំទាន់អាចទាក់ទងភាគីរោងចក្រដើម្បីសុំការបកស្រាយបំភ្លឺជុំវិញបញ្ហានេះបានទេ នៅថ្ងៃទី២៧ វិច្ឆិកា។ ប៉ុន្តែអនុប្រធានមន្ទីរការងារខេត្តស្វាយរៀង លោក អ៊ូ សុខឿន មានប្រសាសន៍ថា ភាគីទាំង២ មានការខ្វែងគំនិតគ្នារឿងប្រាក់អត្ថប្រយោជន៍ការងារ ហើយខាងកម្មករចង់ឲ្យភាគីក្រុមហ៊ុនដោះស្រាយដំឡើងប្រាក់អត្ថប្រយោជន៍ការងារកម្មករឲ្យបានឆាប់។ ចំណែកឯភាគីក្រុមហ៊ុនកំពុងនាំយកបញ្ហារបស់កម្មករទៅពិចារណាដោះស្រាយនៅឡើយ។
លោក អ៊ូ សុខឿន៖ «ប៉ុន្តែរឿងទាំងនោះយើងបានដោះស្រាយត្រូវរ៉ូវគ្នាអស់ហើយ។ ប៉ុន្តែនៅខុសគ្នាពាក់ព័ន្ធរឿងថ្ងៃធ្វើកូដកម្មប៉ុន្មានថ្ងៃហ្នឹង។ បាទ! ជំហរកម្មករសុំឲ្យកាត់តែ ៥០ភាគរយ ហើយភាគីរោងចក្រហ្នឹងគាត់សុំអនុវត្តច្បាប់កាត់ទាំងអស់ អាហ្នឹងនៅខុសគ្នាតែប៉ុណ្ណឹងទេ»។
លោក សុ ខឿន បញ្ជាក់បន្ថែមថា នៅរសៀលថ្ងៃទី២៧ វិច្ឆិកា នឹងមានរៀបចំកិច្ចប្រជុំរកដំណោះស្រាយនៅខាងក្នុងរោងចក្រ។ ក្នុងពិធីរកដំណោះស្រាយនោះរួមមានមន្ត្រីមន្ទីរការងារខេត្តស្វាយរៀង ភាគីក្រុមហ៊ុន និងមន្ត្រីសហជីពតំណាងកម្មករចូលរួម។
យ៉ាងណាក៏ដោយ កិច្ចប្រជុំដែលរៀបចំឡើងនៅខាងរោងចក្រនោះ ពុំទទួលបានលទ្ធផលជាដុំកំភួនឡើយ។ ក្រុមកម្មករអះអាងថា ពួកគេនឹងបន្តធ្វើកូដកម្មនៅថ្ងៃស្អែកទៀត ប្រសិនបើក្រុមហ៊ុនមួយនេះនៅតែរឹងរុះដោយពុំព្រមដោះស្រាយឲ្យបានសមស្របតាមសំណើរបស់កម្មករនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។