សហជីពសភាពាណិជ្ជកម្មអង់គ្លេស សុំឲ្យរដ្ឋាភិបាលខ្លួនជំរុញឲ្យក្រុមហ៊ុនបញ្ជាទិញសំលៀកបំពាក់អង់គ្លេស ធ្វើការស៊ើបអង្កេតរោងចក្រកាត់ដេរនៅកម្ពុជា មួយចំនួន ថាតើ ថៅកែរោងចក្រទាំងនោះបានគោរពសិទ្ធិកម្មករ និងលក្ខខណ្ឌការងារបានត្រឹមត្រូវតាមស្តង់ដារអន្តរជាតិហើយឬនៅ?
សារព័ត៌មានអង់គ្លេសឈ្មោះ ឌឹ អ៊ិនដែភិនឌិន (The Independent) ផ្សាយនៅថ្ងៃទី៣ សីហា ថា អគ្គលេខាធិការសហជីពសភាពាណិជ្ជកម្មអង់គ្លេស អ្នកស្រី ហ្វ្រាណ្សិស អូហ្គ្រេឌី (Frances O'Grady) បានផ្ញើលិខិតមួយច្បាប់ទៅរដ្ឋលេខាធិការពាណិជ្ជកម្មអង់គ្លេស គឺលោក វិន ឃេបល (Vince Cable) ថា «ការបង្ក្រាបលើកម្មករដែលធ្វើសកម្មភាពបាតុកម្ម» កំពុងតែកើនឡើងនៅតាមរោងចក្រនានានៅកម្ពុជា ខណៈដែលការផ្គត់ផ្គង់ទំនិញទៅអង់គ្លេស និងសហគមន៍អឺរុបកំពុងកើនឡើងខ្លាំង។
លិខិតអ្នកស្រី ហ្វ្រាណ្សិស អូហ្គ្រេឌី បានជំរុញឲ្យរដ្ឋាភិបាលអង់គ្លេសនិងសហគមន៍អឺរ៉ុប លើកឡើងអំពីបញ្ហាលក្ខខណ្ឌការងារ ការដំឡើងប្រាក់ខែគោលរបស់កម្មករ ជាមួយរដ្ឋាភិបាលកម្ពុជា ឲ្យបានច្បាស់លាស់ ដោយអ្នកស្រីបញ្ជាក់ថា សហគមន៍អឺរ៉ុបគឺជាអ្នកធានាទទួលខុសត្រូវក្នុងការធ្វើឲ្យរដ្ឋាភិបាលគោរពសិទ្ធិកម្មករ។
វិទ្យុអាស៊ីសេរី មិនអាចទាក់ទងមន្ត្រីរដ្ឋាភិបាលបាននៅថ្ងៃទី៣ សីហា ដើម្បីសុំការឆ្លើយតបទៅនឹងព័ត៌មាននេះ។
ក៏ប៉ុន្តែប្រធានសហភាពសហព័ន្ធសហជីពជាតិកម្ពុជា លោក ជួន មុំថុល ដែលអះអាងថា ជាទូទៅស្ថានភាពរោងចក្រកាត់ដេរបានប្រសើរជាងមុននោះ បានឆ្លើយបកវិញថា ក្រុមហ៊ុនបញ្ជាទិញរបស់អង់គ្លេសទាំងអស់នោះ ក៏មានកំហុសធ្វើឲ្យកម្មករខ្មែរមិនអាចឡើងប្រាក់ខែបានដែរ ព្រោះក្រុមហ៊ុនបញ្ជាទិញរបស់អង់គ្លេសទាំងនោះ ឲ្យតម្លៃទំនិញកាត់ដេរថោកពេក ដែលធ្វើឲ្យថៅកែរោងចក្រមិនអាចរកប្រាក់ចំណូលបានច្រើនអាចដំឡើងប្រាក់ខែឲ្យកម្មករបាន៖ «សំឡេង»។
ទាក់ទងការទាមទារប្រាក់ខែគោលកម្មករវិញ លោកសន្យាថា នឹងធ្វើការតវ៉ាដំឡើងប្រាក់ខែអប្បបរមាឲ្យកម្មករឲ្យបានជាង ១៧០ដុល្លារ នៅចុងសប្ដាហ៍នេះ នៅសមាគមរោងចក្រកាត់ដេរកម្ពុជា៖ «សំឡេង»។
ក៏ប៉ុន្តែ មន្ត្រីជាន់ខ្ពស់សមាគមរោងចក្រកាត់ដេរកម្ពុជា លោក ជាតិ ខេមរា បញ្ជាក់ថា លោកមិនទាន់ដឹងអំពីគម្រោងការតវ៉ារបស់សហជីពលោក ជួន ម៉ុំថុល នៅឡើយទេ។
កម្ពុជាបាននាំចេញសំលៀកបំពាក់ទៅកាន់សហគមន៍អឺរ៉ុបចំនួន ១,១ពាន់លានដុល្លារ ក្នុងរយៈពេល ១១ខែដើមឆ្នាំ២០១៣ គឺកើនឡើង ៣១ភាគរយប្រៀបធៀបទៅឆ្នាំ២០១២។
ទោះយ៉ាងណា បញ្ហាលក្ខខណ្ឌការងារ ប្រព័ន្ធសុវត្ថិភាព និងបរិស្ថានរោងចក្រកាត់ដេរនៅកម្ពុជា នៅមានកម្រិតនៅឡើយ។ ជារឿយៗ កម្មករតែងតែដួលសន្លប់ពេលបំពេញការងារព្រោះមិនមានបំពាក់ប្រព័ន្ធខ្យល់និងបរិស្ថាននៅក្នុងរោងចក្រត្រឹមត្រូវ ជួលកាលមានភ្លើងឆេះរោងចក្របណ្ដាលឲ្យមនុស្សស្លាប់ទៀតផង ដែលការធ្វេសប្រហែសនេះ ធ្វើឲ្យសហជីពកម្មករនានាព្រួយបារម្ភយ៉ាងខ្លាំង ចំពោះការធានាសុវត្ថិភាពកម្មកររាប់សែននាក់ដែលបំពេញការងារប្រចាំថ្ងៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។