តំណាងកម្មកររោងចក្រ ស៊ីន ហ្វាង (Xin Fang) លោក ឆុន រិនដា អះអាងថា កម្មកររោងចក្រ ស៊ីន ហ្វាង ប្រមាណ ១០០នាក់ ប្រមូលផ្ដុំមុខតុលាការភ្នំពេញនៅថ្ងៃទី៣ កញ្ញា ដើម្បីតវ៉ាជំទាស់ទៅនឹងភាគីរោងចក្រ ដែលមិនព្រមអនុវត្តតាមសាលក្រមរបស់តុលាការរាជធានីភ្នំពេញ។
កាលពីថ្ងៃទី២ កញ្ញា ចៅក្រមសាលាដំបូងរាជធានីភ្នំពេញ លោក យ៉េត ប៉ូលិន ចេញដីកាបង្គាប់ឲ្យកម្មកររោងចក្រ ស៊ីន ហ្វាង ដែលបានធ្វើកូដកម្មអស់រយៈពេលជាង ១០ថ្ងៃមកហើយនោះ ចូលធ្វើការវិញដោយដាក់កំណត់រយៈពេល ៤៨ម៉ោង។
ក៏ប៉ុន្តែ លោក ឆុន រិនដា បន្តថា នៅពេលកម្មករព្រមចូលធ្វើការហើយ បែរជាថៅកែរោងចក្រមិនឲ្យកម្មករចូលធ្វើការទៅវិញ ដោយអនុញ្ញាតឲ្យកម្មករមួយចំនួនតូចបានចូលធ្វើការតែប៉ុណ្ណោះ។
ដោយឡែក អ្នកស្រី ឆេន សុវណ្ណ តំណាងកម្មករមួយរូប ដែលត្រូវថៅកែរោងចក្របណ្ដេញចេញ ក្នុងចំណោមបុគ្គលិក២ នាក់ទៀតនោះ ឲ្យដឹងក្រោយពេលចូលជួបមន្ត្រីតុលាការនៅរសៀលថ្ងៃដដែលបញ្ជាក់ថា អ្នកស្រីបានសុំឲ្យមន្ត្រីតុលាការភ្នំពេញ ជួយធ្វើអន្តរាគមន៍ទៅថៅកែរោងចក្រឲ្យអ្នកស្រីបានចូលធ្វើការវិញ តែមន្ត្រីតុលាការបានជំរុញឲ្យអ្នកស្រីបន្តប្ដឹងទៅឧទ្ធរណ៍។
វិទ្យុអាស៊ីសេរីមិនអាចទាក់ទងលោក វង់ ថារិន តំណាងភាគីរោងចក្របាន នៅរសៀលថ្ងៃទី៣ សីហា ដើម្បីសុំបញ្ជាក់ព័ត៌មានបន្ថែម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។