កម្មកររោងចក្រ ស៊ីងហ្វាង (Xing Fang) ស្ថិតនៅតាមបណ្ដោយផ្លូវវ៉េងស្រេង សង្កាត់ចោមចៅ ខណ្ឌពោធិ៍សែនជ័យ ប្រមាណ ៣០០នាក់ បន្តធ្វើបាតុកម្មដុតកង់ឡានទាមទារលក្ខខណ្ឌការងារនៅខាងមុខរោងចក្រ។ រយៈពេល ១០ថ្ងៃហើយ ដែលកម្មកររោងចក្រនេះធ្វើបាតុកម្ម ដោយភាគីរោងចក្រ មិនបានចេញមកដោះស្រាយជាមួយអ្នកតវ៉ាឡើយ បើទោះបីជាមន្ត្រីក្រសួងការងារបានចុះទៅទីនោះដើម្បីជួយរកដំណោះស្រាយក៏ដោយ។
កម្មករតវ៉ាសម្ដែងការខកចិត្តចំពោះមន្ត្រីក្រសួងការងារនិងបណ្ដុះបណ្ដាលវិជ្ជាជីវៈ ដែលមិនបានផ្ដល់ចម្លើយអ្វីសោះឲ្យពួកគាត់ ក្រោយបានជួបចរចាជាមួយតំណាងក្រុមហ៊ុនអស់មួយព្រឹករួចមក។ បន្ទាប់ពីធ្វើបាតុកម្មដុតកង់ឡានជាប់គ្នារយៈពេល ១០ថ្ងៃរួចមក មន្ត្រីក្រសួងការងារជាច្រើននាក់បានចុះទៅដល់រោងចក្រស៊ីងហ្វាង នៅព្រឹកថ្ងៃទី២៨ សីហា។
តាមការអះអាងរបស់មន្ត្រីចងក្រងនិងដោះស្រាយវិវាទកម្មករនៃសហជីពប្រជាធិបតេយ្យកម្មករកាត់ដេរកម្ពុជា ហៅថា ស៊ីខាវឌូ (C-CAWDU) លោក ឆុន រិនដា ឲ្យដឹងថា បន្ទាប់ពីចូលជួបជាមួយភាគីក្រុមហ៊ុនរួច មន្ត្រីក្រសួងការងារទាំងនោះមិនបានផ្ដល់ដំណឹង ឬដំណោះស្រាយណាមួយដល់កម្មករដែលទន្ទឹងរង់ចាំលទ្ធផលនៅខាងមុខរោងចក្រទាំងអន្ទះសា។
លោក ឆុន រិនដា៖ «អត់មានព័ត៌មានអីបន្តិចសម្រាប់កម្មករ គឺទទេ គាត់ឡើងទៅហើយ ចុះមកវិញនាំគ្នាទៅអស់ អ៊ីចឹងកម្មករម្នាក់ៗខកបំណងខ្លាំងណាស់។ អ្នកខ្លះថា មិនដឹងចូលស្អីទេ រហូតអ្នកខ្លះទៀតថា ពួកហ្នឹងមកយកតែលុយ នេះមិនមែនជាសម្ដីរបស់ខ្ញុំទេ គឺជាសម្ដីរបស់កម្មករ»។
វិទ្យុអាស៊ីសេរី ព្យាយាមទាក់ទងមន្ត្រីក្រសួងការងារជាច្រើនលើកដើម្បីសួរនាំពីលទ្ធផលដែលក្រសួងបានជួបជាមួយតំណាងក្រុមហ៊ុន។ ប៉ុន្តែមិនមានមន្ត្រីណាលើកទូរស័ព្ទទេរហូតដល់រសៀលថ្ងៃទី២៨ សីហា។
តាមគំនិតលោក ឆុន រិនដា លោកគិតខាងក្រុមហ៊ុនហាក់មានចេតនាមិនចង់ចរចាបញ្ចប់វិវាទជាមួយកម្មករ។ លោកបញ្ជាក់ថា ការចរចាកន្លងមក ខាងក្រុមហ៊ុនបញ្ជូនមន្ត្រីតូចតាច គ្មានសិទ្ធិសម្រេចអ្វីសោះមកចរចាជាមួយកម្មករ។
ក្រុមកម្មករតវ៉ាទាមទារលក្ខខណ្ឌការងារ និងអត្ថប្រយោជន៍មួយចំនួន រួមមានសុំប្រាក់ថ្លៃបាយ ២ពាន់រៀលក្នុងមួយថ្ងៃ សុំប្រាក់ថ្លៃធ្វើដំណើរក្នុងមួយខែ ១៥ដុល្លារ ស្នើសុំឲ្យក្រុមហ៊ុនទទួលយកបុគ្គលិកនិងកម្មករ ៣នាក់ ដែលបញ្ឈប់គ្មានមូលហេតុឲ្យចូលធ្វើការវិញ និងសូមឲ្យក្រុមហ៊ុនកុំកាត់ប្រាក់ឈ្នួលកម្មករក្នុងអំឡុងពេលកម្មករធ្វើបាតុកម្ម។
អ្នកបកប្រែភាសាចិន និងជាប្រធានសហជីពប្រជាធិបតេយ្យកម្មករកាត់ដេរកម្ពុជា ប្រចាំរោងចក្រ ស៊ីងហ្វាង លោកស្រី ឆេន សុវណ្ណា បញ្ជាក់ថា រោងចក្របានរំលោភច្បាប់ការងារជាច្រើន ដូចជាជេរប្រមាថលើកម្មករ បង្ខំឲ្យកម្មករធ្វើការឲ្យបានតាមការកំណត់របស់ក្រុមហ៊ុន ពិសេសរើសអើងសហជីព៖ «ធ្វើទុក្ខបុកម្នេញនាងខ្ញុំជាពិសេស ព្រោះនាងខ្ញុំជាថ្នាក់ដឹកនាំសហជីពមួយនៅក្នុងរោងចក្រនោះ បន្ទាប់មកនរណាគាំទ្រខ្ញុំ គឺបញ្ចប់កុងត្រា បញ្ឈប់ដោយគ្មានលក្ខខណ្ឌគំរាមកំហែង ព្យួរការងារ»។
រោងចក្រ ស៊ីងហ្វាង ផលិតសម្លៀកបំពាក់ម៉ាកល្បី អាឌីដាស (Adidas) ភាគច្រើនអ្នកបញ្ជាទិញមកពីប្រទេសវៀតណាម។ តាមការអះអាងរបស់តំណាងកម្មករបញ្ជាក់ថា រោងចក្រនេះរំលោភច្បាប់ និងបានជួលកម្មករស៊ីប្រាក់ថ្ងៃ និងស៊ីម៉ោងជាច្រើននាក់ឲ្យធ្វើការនៅក្នុងរោងចក្រដែលខុសនឹងច្បាប់ការងារ។
ប្រធានរដ្ឋបាលរោងចក្រ ស៊ីងហ្វាង លោក វង្ស ថាវិន ធ្លាប់ប្រាប់ថា ភាគីរោងចក្របានដោះស្រាយតាមការទាមទាររបស់កម្មករជាច្រើន ហើយមានកម្មករតិចតួចប៉ុណ្ណោះ ដែលកំពុងធ្វើបាតុកម្មប្រឆាំងរោងចក្រ។
កាលពីថ្ងៃទី១៧ ខែកក្កដា ក្រសួងការងារនិងក្រុមប្រឹក្សាអាជ្ញាកណ្ដាលបានកាត់ឲ្យកម្មករឈ្នះក្ដីចំនួន ៩ចំណុចក្នុងចំណោម ១៤ចំណុចដែលកម្មករបានទាមទារ ប៉ុន្តែក្រុមហ៊ុនមិនបានអនុវត្តតាមការដោះស្រាយឡើយ។ កម្មករដែលតវ៉ាទាំងនោះ ប្តេជ្ញាថានឹងធ្វើបាតុកម្មដុតកង់ឡាន រហូតមានដំណោះស្រាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។