សហជីពអន្តរជាតិ និងក្រុមហ៊ុនអ្នកបញ្ជាទិញដែលមានម៉ាកយីហោល្បីៗមួយចំនួន នឹងជួបប្រជុំជាមួយមន្ត្រីរដ្ឋាភិបាលជាថ្មីម្ដងទៀត នៅថ្ងៃច័ន្ទ ទី២៦ ឧសភា។ ក្រៅតែពីបញ្ហាដ៏ចម្រូងចម្រាសពាក់ព័ន្ធការដំឡើងប្រាក់ខែកម្មករហើយនោះ ក៏មានរបៀបវារៈនៃសកម្មជនសិទ្ធិមនុស្ស និងកម្មករទាំង ២២នាក់ ក៏ត្រូវដាក់ចូលក្នុងកិច្ចប្រជុំនេះដែរ។
សមាគមវិស័យឧស្សាហកម្មកាត់ដេរអន្តរជាតិ ឲ្យដឹងថា កិច្ចប្រជុំដែលរៀបចំឡើងនៅថ្ងៃច័ន្ទ ដើមសប្ដាហ៍នេះ រវាងរដ្ឋាភិបាលកម្ពុជា និងក្រុមអ្នកបញ្ជាទិញ គឺជាផ្នែកមួយដែលសហជីពពិភពលោកចាត់ទុកថា វាគឺជាកិច្ចប្រជុំជំនួបកំពូលរបស់ខ្លួន ពាក់ព័ន្ធនឹងស្ថានភាពរបស់កម្មករផ្នែកវិស័យកាត់ដេរនៅកម្ពុជា។
កិច្ចប្រជុំនេះ ធ្វើឡើងនៅចំពេលដែលអំពើហិង្សាប្រឆាំងកម្មករ បានឡើងកម្ដៅមួយកម្រិតទៀតនៅពេលនេះ ខណៈសំណុំរឿងសកម្មជនសិទ្ធិមនុស្ស លោក វន់ ពៅ និង មនុស្ស ២២នាក់ទៀត កំពុងស្ថិតនៅក្នុងដៃតុលាការនៅឡើយ។ ក្រៅពីនេះ មន្ត្រីសហជីពរបស់លោក អាត់ ធន់ ៨នាក់ផ្សេងទៀត ត្រូវបានសមត្ថកិច្ចរបស់រដ្ឋាភិបាលចាប់ខ្លួន ក្រោមបទចោទថា បានញុះញង់កម្មករ និងបំផ្លិចបំផ្លាញទ្រព្យសម្បត្តិរបស់រោងចក្រ នៅខេត្តតាកែវ ថែមទៀតផង។
ក្រុមអង្គការសិទ្ធិមនុស្សក្នុងស្រុក មើលឃើញថា ហិង្សាផ្នែកវិស័យវាយនភណ្ឌនៅពេលនេះ មិនថមថយឡើយ។
ភ្ជាប់នឹងបញ្ហានេះ កាលពីថ្ងៃទី២២ ឧសភា អង្គការសហជីពអន្តរជាតិ អ៊ិនដាសទ្រី អល (IndustriAll) បានចេញផ្សាយរបាយការណ៍របស់ខ្លួនឲ្យដឹងថា សហជីពអន្តរជាតិ រួមមាន ITUC, IndustriAll ព្រមទាំង Uni Global Union នឹងជួបប្រជុំជាមួយរដ្ឋាភិបាលនៅថ្ងៃច័ន្ទនេះ។ របាយការណ៍ឲ្យដឹងថា នៅក្នុងជំនួបនោះ ផ្ដោតសំខាន់ចំពោះការប្រើអំពើហិង្សាប្រឆាំងកម្មករក្នុងពេលបច្ចុប្បន្ន។ សហជីពអន្តរជាតិ កត់សំគាល់ថា ក្នុងរយៈពេល ២ខែកន្លងមកនេះរដ្ឋាភិបាលកម្ពុជា មិនត្រឹមតែពុំបានទប់ស្កាត់ការប្រើហិង្សាដែលធានាពីសុវត្ថិភាពចំពោះកម្មករទេ ក៏ប៉ុន្តែថែមទាំងបានឈរអោបដៃបណ្ដោយឲ្យមានហិង្សាកាន់តែធ្ងន់ៗឡើង ចំពោះពួកគេថែមទៀតផង។
អគ្គលេខាធិការនៃសហជីពអន្តរជាតិ IndustriAll លោក ស៊ីរីគី រ៉ៃណា (Jyrki Raina) ឲ្យដឹងតាមរយៈបកប្រែក្រៅផ្លូវការថា បើទោះជារដ្ឋាភិបាលកម្ពុជា បានធានារួចហើយចាប់ពីតាំងពីខែកុម្ភៈ មកថា នឹងពុំមានទៀតទេ ការគំរាមកំហែង និងអំពើហិង្សា ដែលជាផ្នែកមួយនៃស្នូលនីតិរដ្ឋ។ ក៏ប៉ុន្តែយើងត្រូវរួមគ្នាប្រយុទ្ធប្រឆាំងបន្ថែមទៀត ការប្រើហិង្សាលើកម្មករ។
លោកបន្តថា៖ «សាររួមគ្នាពីសហជីពអន្តរជាតិ និងក្រុមអ្នកបញ្ជាទិញ ទៅកាន់រដ្ឋាភិបាលកម្ពុជា គឺយើងត្រូវប្រាកដណាស់ថា រដ្ឋាភិបាលគប្បីធានាការគោរពសិទ្ធិមនុស្ស ស្ថិរភាពនយោបាយ និងសិទ្ធិរបស់កម្មករ ជាពិសេស ក្នុងការកសាងផ្នែកធនធានមនុស្សនៅក្នុងប្រទេសកម្ពុជា»។
កិច្ចប្រជុំដែលរៀបចំជាថ្មីម្ដងទៀតនៅពេលនេះ ក្រៅពីសហជីពអន្តរជាតិចូលរួមហើយនោះ លើសពីនេះទៀត មានក្រុមអ្នកបញ្ជាទិញដែលមានម៉ាក់យីហោល្បីៗ មួយចំនួនចូលរួមដែរ ដូចជា H&M, Gap, Levi's, Puma, Inditex, Debenhams និងសមាគមអ្នកបញ្ជាទិញមួយចំនួនទៀត។ ចំណែករបៀបវារៈដែលគ្រោងនឹងលើកឡើងក្នុងកិច្ចប្រជុំនៅថ្ងៃច័ន្ទនេះ ផ្ដោតលើការប្រើហិង្សាប្រឆាំងកម្មករ សំណុំរឿងអ្នកទាំង ២៣នាក់ និងមូលហេតុនៃភាពយឺតយ៉ាវនៃការដំឡើងប្រាក់ខែគោល ដូចការចង់បានរបស់កម្មករ។
បញ្ហានេះ ត្រូវបានលោក ផៃ ស៊ីផាន រដ្ឋលេខាធិការ និងជាអ្នកនាំពាក្យនៃទីស្ដីការគណៈរដ្ឋមន្ត្រីចាត់ទុកថា ជាបរិយាកាសមួយដ៏ល្អដែលជំរុញឲ្យគ្រប់គូរភាគីអាចខិតជិតរកគ្នា ហើយបើកការចរចាដើម្បីទម្លាយភាពជាប់គាំងនេះ។ បើទោះជាបែបនេះក៏ដោយចុះ ក៏លោក ផៃ ស៊ីផាន យល់ឃើញថា កិច្ចសន្ទនានៅថ្ងៃច័ន្ទនេះ ភាគីនីមួយៗ នឹងពុំមានខាងណាជាចំណាប់ខ្មាំងឡើយ ជាពិសេសរដ្ឋាភិបាលគឺជាតួអង្គក្នុងការសម្របសម្រួលលើផ្នែកនេះដ៏សំខាន់ ហើយថែមទាំងពុំមានស្ថាប័នណាមួយអាចដាក់សម្ពាធបានទេ បើទោះជាសហជីពអន្តរជាតិទាំងនេះ បានលើកយកបញ្ហាដែលកើតឡើង ហើយដាក់លើតុចរចាក៏ដោយចុះ។
លោក ផៃ ស៊ីផាន៖ «អាហ្នឹងជារឿងដាច់ដោយឡែកពីការទាមទារ។ ដូច្នេះ មានន័យថាភាគីទាំងអស់ហ្នឹងមានលក្ខណៈសមភាគី គ្មានអ្នកណាបញ្ជាអ្នកណាបានទេ។ បើទោះជាអ្នកហ្នឹងប្រើផ្លាកអន្តរជាតិយ៉ាងណាក៏ដោយ»។
ពាក់ព័ន្ធបញ្ហានេះ ទាំងលោក រ៉ុង ឈុន ប្រធានសហភាពសហជីពកម្ពុជា និងលោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា សុទ្ធតែបានអះអាងថា ពួកគេពុំបានទទួលលិខិតអញ្ជើញជាផ្លូវការណាមួយដើម្បីចូលរួមក្នុងកិច្ចប្រជុំនេះទេ។ ក៏ប៉ុន្តែពួកគេបានលើកបញ្ហារួចអស់ហើយ ជាមួយសហជីពអន្តរជាតិ និងក្រុមអ្នកបញ្ជាទិញ ដើម្បីឲ្យដាក់សម្ពាធមកលើរដ្ឋាភិបាល ជុំវិញការប្រើហិង្សាប្រឆាំងកម្មករ និងការរឹតត្បិតសេរីភាពសហជីពនៅកម្ពុជា។ ក្រៅពីនេះ ពួកគេបន្តឃ្លាំមើលកិច្ចប្រជុំនេះ ដោយយកចិត្តទុកដាក់។
ពួកគាត់បន្តថា៖ «យើងនឹងចូលរួមតាមឃ្លាំមើល ទោះបីមិនមានការអញ្ជើញឲ្យទៅចូលរួមប្រជុំរវាងរដ្ឋាភិបាល និងអ្នកបញ្ជាទិញក៏ដោយ។ អ្វីដែលសហជីពអន្តរជាតិយកទៅនិយាយ ក៏ដូចជាអ្នកបញ្ជាទិញយកទៅនិយាយហ្នឹង សុទ្ធតែជាសំណើរបស់កម្មករ។ សំណើរបស់កម្មករបានស្នើឡើងតាមរយៈសហជីពយើង ដែលបានស្នើឡើងទាំងអស់។ មិនមែនជាការធ្វើឡើងដោយសហជីពអន្តរជាតិ ឬក៏ Buyer (អ្នកបញ្ជាទិញ) ទេ»។
ក្រុមអ្នកសង្កេតការណ៍មើលឃើញថា គិតមកដល់មកពេលនេះទៅហើយ រដ្ឋាភិបាលបានខកខានម្ដងហើយម្ដងទៀត ក្នុងការស៊ើបអង្កេតដោយឯករាជ្យ រកឲ្យឃើញពីក្រុមសមត្ថកិច្ចបង្ក្រាបបាតុកម្មរហូតបណ្ដាលឲ្យកម្មករស្លាប់ និងរបួស កាលពីដើមខែមករា ឆ្នាំ២០១៤។ ជាពិសេសសំណងរដ្ឋប្បវេណី ពួកគេពុំទទួលបាន ហើយថែមទាំងត្រូវរងបណ្ដឹងតាមផ្លូវតុលាការទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។