វិធានការ​កាត់​បន្ថយ​ហានិភ័យ​ស្រូវ​ស្កក​ពេល​ជួប​គ្រោះ​រាំង​ស្ងួត​ក្នុង​រដូវ​វស្សា

ដោយ ជិន ជេដ្ឋា
2017-06-26
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
វាលស្រែ​របស់​កសិករ​នៅ​ឃុំ​ស្រែថ្មី ស្រុក​រលាប្អៀរ ខេត្ត​កំពង់ឆ្នាំង កាល​ពី​ថ្ងៃ​ទី​១៥ ខែ​មិថុនា ឆ្នាំ​២០១៧។
វាលស្រែ​របស់​កសិករ​នៅ​ឃុំ​ស្រែថ្មី ស្រុក​រលាប្អៀរ ខេត្ត​កំពង់ឆ្នាំង កាល​ពី​ថ្ងៃ​ទី​១៥ ខែ​មិថុនា ឆ្នាំ​២០១៧។
RFA/Chin Chetha

ការ​បង្កបង្កើនផល​ស្រូវ​រដូវ​វស្សា​តែងតែ​ជួប​គ្រោះ​ទឹក​ជំនន់ ឬ​រាំង​ស្ងួត​ស្ទើរ​រាល់​ឆ្នាំ បណ្ដាល​ឲ្យ​សន្ទូង​ខូច​បាត់​ទិន្នផល។ ក្រសួង​ធនធាន​ទឹក និង​ឧតុនិយម ប្រកាស​ថា នៅ​ពាក់​កណ្ដាល​រដូវ​វស្សា​ឆ្នាំ​២០១៧ នេះ នឹង​មាន​កូន​រដូវ​ប្រាំង​តូច​មួយ ដែល​ធ្វើ​ឲ្យ​សន្ទូង​ប្រឈម​នឹង​ការ​ស្វិត​ងាប់​ដោយសារ​ខ្វះ​ទឹក​ភ្លៀង​នៅ​តាម​បណ្ដា​ខេត្ត​មួយ​ចំនួន។ តើ​កសិករ​គួរ​ធ្វើ​បែប​ណា​ដើម្បី​កាត់​បន្ថយ​ការ​ប្រឈម​នេះ?

វិធានការ​បន្ទាន់​ក្នុង​ការ​ជួយ​សង្គ្រោះ​សន្ទូង​របស់​កសិករ​ពី​គ្រោះ​រាំង​ស្ងួត ដែល​រដ្ឋាភិបាល ឬ​អាជ្ញាធរ​ពាក់ព័ន្ធ​តែងតែ​ធ្វើ គឺ​ផ្ដល់​ប្រេង និង​ម៉ាស៊ីន​បូម​ទឹក​ដាក់​ស្រែ​សង្គ្រោះ​ដើម​ស្រូវ។ ចំពោះ​ស្រែ​ដែល​គ្មាន​ប្រភព​ទឹក ឬ​សង្គ្រោះ​មិន​ទាន់​ពេល អាជ្ញាធរ​តែងតែ​ផ្ដល់​គ្រាប់ពូជ​ដល់​កសិករ ដើម្បី​សាប​ព្រោះ និង​ស្ទូង​ឡើង​វិញ​នៅ​ពេល​ដែល​មាន​ភ្លៀង​ធ្លាក់​គ្រប់គ្រាន់ ឬ​ចាស់ៗ​ហៅ​ថា ភ្លៀង​ជូន​ចុង​រដូវ​វស្សា។

លិខិត​របស់​ក្រសួង​ធនធាន​ទឹក និង​ឧតុនិយម ចុះ​ថ្ងៃ​ទី​១៨ ខែ​មេសា ឆ្នាំ​២០១៧ ជូន​ដំណឹង​ថា រដូវ​វស្សា​ឆ្នាំ​២០១៧ នឹង​មាន​កូន​រដូវ​ប្រាំង​មួយ​នៅ​ចន្លោះ​សប្ដាហ៍​ទី​៣ និង​ទី​៤ នៃ​ខែ​កក្កដា ដែល​ខេត្ត​មួយ​ចំនួន​ដូចជា កំពង់ស្ពឺ តាកែវ កណ្ដាល កំពត និង​ខេត្ត​ស្វាយរៀង អាច​មាន​ភ្លៀង​ធ្លាក់​តិចតួច។

ដើម្បី​កាត់​បន្ថយ​ផល​ប៉ះពាល់​ធ្ងន់ធ្ងរ​ពី​គ្រោះ​រាំង​ស្ងួត​ដែល​អាច​កើត​មាន​នៅ​ក្នុង​រដូវ​វស្សា​ខាង​មុខ​នេះ ប្រធាន​ការិយាល័យ​ក្សេត្រសាស្ត្រ និង​ផលិតភាព​កសិកម្ម នៃ​មន្ទីរ​កសិកម្ម​ខេត្ត​កំពង់ឆ្នាំង លោក ជា សុផុន បាន​ណែនាំ​ថា កសិករ​គួរ​កុំ​ចាប់​ផ្ដើម​សាប​ព្រោះ​ស្រូវ​នៅ​ដើម​រដូវ​ពេក ពោល​គួរ​ចាប់​ផ្ដើម​នៅ​ចុង​ខែ​កក្កដា ដើម្បី​ជៀស​ផុត​ពី​កូន​រដូវ​ប្រាំង ហើយ​គួរ​ធ្វើ​ស្រែ​ដែល​មាន​ប្រភព​ទឹក​នៅ​ក្បែរ៖ «បើ​សិន​ជា​មាន​កើត​ឡើង​នូវ​កូន​រដូវ​ប្រាំង ហើយ​មាន​រយៈពេល​វែង ដែល​ធ្វើ​ឲ្យ​ប៉ះពាល់​ដល់​សន្ទូង ឬ​សំណាប​របស់​គាត់ គឺ​មន្ទីរ​នឹង​ចុះ​តាមដាន និង​ត្រួត​ពិនិត្យ ហើយ​សហការ​ជាមួយ​អាជ្ញាធរ​ដែនដី​ដើម្បី​ឲ្យ​គាត់​ធ្វើ​ជា​សំណើ​មក ដើម្បី​សុំ​ប្រេង​អន្តរាគមន៍​ពី​មន្ទីរ​កសិកម្ម ជាមួយ​ការិយាល័យ​ជំនាញ​ទៅ​តាម​ស្ថានភាព​ជាក់ស្ដែង និង​តម្រូវការ​ជាក់ស្ដែង​តាម​លទ្ធភាព​ដែល​មន្ទីរ​មាន​ផ្ដល់​ជូន​គាត់»

ការ​ពន្យារ​ពេល​សាប​ព្រោះ គឺ​ធ្វើ​បាន​តែ​ទៅ​លើ​ប្រភេទ​ស្រូវ​កណ្ដាល ឬ​ស្រូវ​ស្រាល​ប៉ុណ្ណោះ ដែល​ប្រើ​រយៈពេល​បង្កបង្កើនផល​ចន្លោះ​ពី ៣ ទៅ ៤​ខែ។ កសិករ​អាច​ជ្រើសរើស​ពូជ​ស្រូវ​រំដួល ចម្រៀក​ផ្ដៅ ខ្មង​រមាំង ជាដើម។ ចំណែក​ប្រភេទ​ស្រូវ​ស្រាល​គួរ​ជ្រើសរើស​យក​ពូជ​ស្រូវ​ជលសា អ៊ីអ៊ែ (IR) ៦៦ និង​ពូជ​ស្រូវ​សែន​ពិដោរ ជាដើម ដោយ​ស្រូវ​ទាំងនេះ​ប្រើ​រយៈពេល​តិច​សមាមាត្រ​នឹង​បរិមាណ​ទឹក​ភ្លៀង។

ចំពោះ​ស្រូវ​ធ្ងន់​ដែល​ប្រើ​រយៈពេល ៦​ខែ​ទើប​ទទួល​បាន​ផល​នោះ អ្នក​ជំនាញ​កសិកម្ម​មិន​បាន​ណែនាំ ឬ​កំណត់​ពេល ថា​កសិករ​គួរ​ចាប់​ផ្ដើម​ធ្វើ​នៅ​ខែ​ណា​នោះ​ទេ កសិករ​ត្រូវ​ធ្វើ​ទៅ​តាម​លទ្ធភាព៖ «បើ​តំបន់​ហ្នឹង​គាត់​ធ្វើ​ស្រូវ​ធ្ងន់​ជួប​បញ្ហា​រាំង​ស្ងួត​ចុង​រដូវ គាត់​ត្រូវ​បង្វែរ​ទិស​មក​ធ្វើ​ស្រូវ​កណ្ដាល​វិញ ហើយ​សិន​ធ្វើ​ស្រូវ​កណ្ដាល​វា​ជួប​បញ្ហា​ហើយ កុំ​ធ្វើ យើង​មក​ធ្វើ​ស្រូវ​ស្រាល​វិញ។ អ៊ីចឹង​ទី​១ ពាក់ព័ន្ធ​នឹង​ការ​ផ្លាស់ប្ដូរ​ពូជ​ជាក់ស្ដែង។ ទី​២ កសិកម្ម​វៃឆ្លាត​ធ្វើ​ដាំ​ដុះ​ទៅ​បើ​រាំង​ស្ងួត​ក៏​បាន​ផល ជួប​បញ្ហា​ភ្លៀង​ក៏​យើង​បាន​ផល ដោយសារ​យើង​ប្រើប្រាស់​លើ​កត្តា​ពូជ និង​ភូមិសាស្ត្រ​ជាក់ស្ដែង​នេះ​ឯង»

កសិករ​បាត់​ធារស្រូវ និង​ហូប​ចុក​មិន​គ្រប់គ្រាន់​នៅ​ពេល​ជួប​គ្រោះ​រាំង​ស្ងួត​ម្ដងៗ បើ​ទោះ​ជា​អាជ្ញាធរ​ប្រឹងប្រែង​ជួយ​សង្គ្រោះ​សន្ទូង​កសិករ ខណៈ​ដែល​ប្រភព​ទឹក ឬ​ប្រព័ន្ធ​ធារាសាស្ត្រ​មិន​ទាន់​ឆ្លើយតប។

កំពុង​លី​ចបកាប់​ដើរ​មើល​ស្រែ​ទើប​ព្រោះ​ស្រូវ ដោយ​ដៃ​ម្ខាង​ដឹក​ដៃ​កូន​ស្រី​ម្នាក់ នៅ​ឃុំ​ស្រែថ្មី ស្រុក​រលាប្អៀរ លោកស្រី ស្រី ហូយ មាន​ប្រសាសន៍​ថា ដើម​រដូវ​វស្សា​ឆ្នាំ​នេះ​ទឹក​នៅ​ក្នុង​ស្រែ​មាន​ច្រើន តែ​លោកស្រី​បារម្ភ​ខ្លាច​បាក់​ភ្លឺ​ស្រែ​ទឹក​ហូរ​អស់ ម្យ៉ាង​ខ្លាច​គ្មាន​ភ្លៀង​ធ្លាក់​នៅ​ពាក់​កណ្ដាល​រដូវ​ទៀត​នោះ ទើប​លោកស្រី​រក្សា​ទឹក​ទុក​ក្នុង​ស្រែ​រហូត ដោយ​ចេញ​ចូល​មើល​ស្រែ​ស្ទើរ​រាល់​ថ្ងៃ៖ «ឮ​គេ​ថា​រាំង​ចេះ​តែ​ភ័យ​ដែរ តែ​រាំង​ទៅ​អស់​ស្រូវ​ពូជ ត្រូវ​ព្រោះ​ម្ដង​ទៀត បាន​ស្រូវ​ពូជ​ណា​ព្រោះ បើ​យើង​ព្រោះ​អស់​ហើយ ទុក​សម្រាប់​ព្រោះ​តែ​មួយ​ឆ្នាំៗ។ លោក ជិន ជេដ្ឋា៖ នៅ​តំបន់​បង​នេះ​មាន​ប្រព័ន្ធ​ធារាសាស្ត្រ​ដើម្បី​ស្រោចស្រព​ទេ ពេល​រាំង​ស្ងួត​អី? អត់​ទេ អត់​មាន​ក្រពីង (ត្រពាំង​ទឹក) អី​ទប់ទល់​ផង»

លោកស្រី​បញ្ជាក់​ថា ស្រែ​ស្រាប់​ធ្វើ​ស្រូវ​វស្សា​តូច​ល្មម​ចំនួន ៦​ស្រែ ដែល​គ្រួសារ​លោកស្រី​បាន​ប្ដូរ​ទម្លាប់​ពី​ស្ទូង​មក​ព្រោះ​វិញ​នោះ មិន​ដែល​ស្វិត​ងាប់​ដោយ​ខ្វះ​ទឹក​ឡើយ ត្បិត​នៅ​តំបន់​គាត់​ពុំ​មាន​ប្រភព​ទឹក​ស្រោចស្រព​ក្រៅ​ពី​ពឹង​លើ​ទឹក​ភ្លៀង។ ទោះ​ជា​យ៉ាង​ណា លោកស្រី​ចង់​ឲ្យ​មន្ត្រី​ជំនាញ ឬ​ក្រសួង​ធនធាន​ទឹក ចុះ​សិក្សា និង​អភិវឌ្ឍ​ប្រព័ន្ធ​ធារាសាស្ត្រ​នៅ​តំបន់​ជាច្រើន​ដែល​កំពុង​ប្រឈម​នឹង​គ្រោះ​រាំង​ស្ងួត។

ប្រធាន​ការិយាល័យ​ក្សេត្រសាស្ត្រ និង​ផលិតភាព​កសិកម្ម នៃ​មន្ទីរ​កសិកម្ម​ខេត្ត​កំពង់ឆ្នាំង លោក ជា សុផុន ឲ្យ​ដឹង​ថា មន្ត្រី​ជំនាញ និង​អាជ្ញាធរ​ពាក់ព័ន្ធ ខ្នះខ្នែង​ជួយ​សង្គ្រោះ​ស្រូវ​កសិករ​ពេល​ជួប​គ្រោះ​រាំង​ស្ងួត​ម្ដងៗ ប៉ុន្តែ​តំបន់​ខ្លះ​លំបាក​នឹង​សង្គ្រោះ ដោយសារ​គ្មាន​ប្រភព​ទឹក និង​ប្រព័ន្ធ​ធារាសាស្ត្រ​អាច​ទាញ​ទឹក​មក​ស្រោចស្រព​បាន។ លោក​ថា អាជ្ញាធរ​ពាក់ព័ន្ធ​គួរ​ពិនិត្យ​បញ្ហា​នេះ​ដែរ៖ «វិធានការ​សំខាន់​បំផុត គឺ​ស្ថាប័ន​ពាក់ព័ន្ធ​ដូច​ក្រសួង​ធនធាន​ទឹក ធ្វើ​យ៉ាង​ណា​ចំពោះ​ទំនប់ ឬ​ប្រឡាយ​ដែល​មាន​ស្រាប់ ត្រូវ​ស្ដារ​ឡើង​វិញ​ដើម្បី​អាច​ដំណើរការ​បាន។ ជួនកាល​មាន​ប្រឡាយ​ហើយ តែ​វា​រាក់ អ៊ីចឹង​យើង​មិន​អាច​យក​ទឹក​បាន​ទេ។ អ៊ីចឹង​ត្រូវ​ពិនិត្យ​ឡើង​វិញ​កន្លែង​ណា​មាន​ទឹក គឺ​ត្រូវ​យក​ទឹក​ហ្នឹង​ប្រើប្រាស់​បាន»

លោក ជា សុផុន បញ្ជាក់​ថា ទំនប់ ឬ​ប្រឡាយ​ទឹក​មាន​ច្រើន ប៉ុន្តែ​ភាគច្រើន​មិន​អាច​ប្រើប្រាស់​បាន។ ជាក់ស្ដែង​ផ្ទៃដី​កសិកម្ម​ខេត្ត​កំពង់ឆ្នាំង ជាង ២​សែន​ហិកតារ (២១២.០០០​ហិកតារ) មាន​ទំនប់ ឬ​ប្រឡាយ​ទឹក​ប្រមាណ ៣០% ប៉ុន្តែ​តាម​លោក​សង្កេត​មើល​ជាក់ស្ដែង​មាន​ប្រព័ន្ធ​ប្រឡាយ​ដែល​អាច​ប្រើប្រាស់​ក្នុង​ការ​ស្រោចស្រព​ស្រូវ​របស់​កសិករ​បាន គឺ​មាន​តែ​ប្រមាណ ២០% ប៉ុណ្ណោះ​នៃ​ផ្ទៃដី​កសិកម្ម​សរុប៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
  • បោះពុម្ព
  • ចែករំលែក
  • អ៊ីម៉ែល
គេហទំព័រ​ទាំងមូល