សណ្តែកសៀងជាដំណាំដែលនាំចំណូលឲ្យកសិករខ្មែរបានក្រាស់ក្រែល ហើយមិនពិបាកក្នុងការដាំប៉ុន្មានឡើយ ។ សណ្តែកសៀងក្រៅពីជាវត្ថុធាតុដើមសម្រាប់ផលិតទឹកសណ្តែក តៅហ៊ូ និងសៀងសម្រាប់បរិភោគហើយ នៅមានផលិតផលពីសណ្តែកប្រភេទនេះមួយមុខទៀត ដែលជាទីនិយមបរិភោគរបស់ជនជាតិជប៉ុន អាហារនេះ គឺណាត់តូ ។
ណាត់តូគឺជាសណ្តែកសៀងស្ងោរ ឬចំហុយដែលទុកឲ្យឡើងជូរដោយសារមេ មានសរសៃរអិលៗ ស្អិតៗដូចកៅស៊ូថ្លាៗជាប់ពេញគ្រាប់សណ្តែក ។
ជនជាតិជប៉ុននិយមបរិភោគណាត់តូ ដែលមានក្លិនឆ្អេះដូចទឹកមូត្រ ឬអាម៉ូនីញាក់ប្រមាណជាជាង១ពាន់ឆ្នាំមកហើយ ដោយសារណាត់តូមានគុណប្រយោជន៍ទាំងខាងភោជនាហារ ទាំងខាងសុខភាព ។
វេជ្ជបណ្ឌិតStephen Sinatra អ្នកឯកទេសអាមេរិកាំងខាងបេះដូង ចំណីអាហារ និងការទប់ស្កាត់ជរាភាពមានប្រសាសន៍ថា ជនជាតិជប៉ុនមានអាយុវែងជាងគេលើពិភពលោក គឺនៅជប៉ុន លោកបានជួបប្រទះមនុស្សអាយុ ៧០, ៨០ ឬរហូតដល់ ៩០ឆ្នាំ ដែលមានសុខភាពរឹងមាំច្រើនជាងនៅទីណាៗក្នុងលោក ។
ក្រោយដែលបានឮមិត្តភក្តិអួតសរសើរពីគុណសម្បត្តិរបស់ណាត់តូ និងបានសាកល្បងទទួលទានដោយខ្លួនឯង លោកវេជ្ជបណ្ឌិត ស៊ីណាត្រា មានប្រសាសន៍ថា លោកមិនឆ្ងល់សោះទេ ដែលអាហារមួយប្រភេទនេះបានជួយឲ្យជនជាតិជប៉ុនមានសុខភាពល្អ និងមានអាយុវែង ។
លោកគ្រូពេទ្យល្បីល្បាញខាងព្យាបាលជំងឺបេះដូងនេះ បានធ្វើការស្រាវជ្រាវលើណាត់តូ និងជាពិសេសគឺអង់ស៊ីម ឬអណូជីវសាស្ត្ររបស់វាឈ្មោះ ណាត់តូខៃនេហ្ស៍ (Nattokinase) ដែលជាតួជួយឲ្យចរាចរណ៍លោហិតក្នុងខ្លួនមនុស្សប្រព្រឹត្តទៅបានយ៉ាងល្អប្រសើរ និងជួយធ្វើឲ្យសរសៃឈាម ទន់ និងបត់បែនបានងាយ ការពារការដាច់សរសៃឈាមក្នុងខួរក្បាល និងការស្ទះឈាមក្នុងបេះដូង ទាំងនេះព្រោះថាគុណសម្បត្តិសំខាន់របស់ណាត់តូខៃនេហ្ស៍ គឺវាជួយពង្រាវឈាមកុំឲ្យខាប់ពេក ។មនុស្សខ្លះមានឈាមខាប់ពេក ចាំបាច់ត្រូវផឹកថ្នាំពង្រាវឈាម ហើយថ្នាំប្រភេទនេះដែលគេនិយមប្រើជាងគេគឺអាស្ពីរីន ។
ក៏ប៉ុន្តែអ្នកខ្លះមានបញ្ហាជាមួយអាស្ពីរីន ដូចជាលោកវិស្វករ ព្រំ សៅរ៍នរ៉ា ដែលជំនាញខាងថាមពលមិនចេះរីងស្ងួតម្នាក់នេះ ហើយលោកប្រាប់ខ្ញុំដូច្នេះ ៖ «ខ្ញុំលេបអាស្ពីរីនអត់បាន ដាក់អាស្ពីរីនវាធ្វើទុក្ខក្រពះ ហើយបើលោក សុ វិទ្យ អី មិនជាចំណោទទេ យើងញ៉ាំតែស្រាក្រហមអីទៅវាជួយហើយ» ។
ដូច្នេះហើយលោកក៏គិតគូរប្រើណាត់តូជាគ្រាប់ ហៅថាណាត់តូផ្ល័ស ដែលលោកវេជ្ជបណ្ឌិត Stephen Sinatra ចម្រាញ់យកសារធាតុណាត់តូខៃនេហ្ស៍ ពីណាត់តូមកចំណាយ ។
ចំពោះអ្នកដែលទ្រាំនឹងក្លិនឆ្អេះរបស់ណាត់តូបាន អាចទទួលទានស្រស់ៗ ដែលសព្វថ្ងៃនេះជប៉ុនបានដាក់ក្នុងកូនកញ្ចប់ ឬកូនប្រអប់តូចៗ មានលក់តាមហាងលក់ម្ហូបនៅទូទាំងពិភពលោក ។
សូមជម្រាបថា ទោះជាជនជាតិជប៉ុនខ្លួនឯងហ្នឹង ក៏មានខ្លះទ្រាំនឹងក្លិនដ៏សែនខ្លាំងរបស់ណាត់តូហ្នឹងមិនបានផង ។
ឥឡូវងាកមកមើលថាតើកសិករខ្មែរដែលដាំសណ្តែកសៀង ឬសយប៊ីនដោយខ្លួនឯងអាចផលិតណាត់តូទុកទទួលទានបានដោយវិធីណា ?
ខ្ញុំបានសន្ទនាជាមួយលោកវិស្វករ ព្រំ សៅរ៍នរ៉ា ដែលបានធ្វើការពិសោធន៍ផលិតដោយខ្លួនឯងបានសេចក្តីដូច្នេះ ៖ «យើងធ្វើដូចជាសៀងអ៊ីចឹង គ្រាន់តែថាធ្វើមិនឲ្យ...។ មុនដំបូងយើងយកសណ្ដែកសៀងហ្នឹងមក យើងស្ងោរវាទៅឲ្យពុះទៅ ឬក៏ចំហុយវាទៅ ។ ដល់ចំហុយវាឆ្អិនហើយ យើងយកដំបែយើងហ្នឹង យកមកដាក់រោយវាទៅ ហើយទុកវា ២-៣ថ្ងៃទៅ ឲ្យវាឡើងមេ យើងដាក់អំបិលបន្តិចៗឲ្យល្មមទៅ ។ ដល់វាឡើងមេហើយ យើងយកវាមកហាលថ្ងៃដើម្បីកុំឲ្យវាឡើងជូរ បើយើងចង់យកមកញ៉ាំភ្លាមក៏បានដែរ គ្រាន់តែវាស្អិតៗអ៊ីចឹង ។ យកមកយើងថែមជីរ ស្លឹកខ្ទឹម... អីអ៊ីចឹងទៅ ដើម្បីបន្លំអារអិលៗហ្នឹង ។ បើពួកជប៉ុន តាមខ្ញុំដឹងគេយកវាហាលថ្ងៃសិន ហាលឲ្យស្ងួតអាហ្នឹងសិន ហើយពេលដែលយើងចង់ញ៉ាំទៅវិញ បានយកទៅដាក់ចំហុយវាវិញ អាហ្នឹងវាអន់អាស្អិតៗហ្នឹងហើយ» ។
ដើម្បីជាការរំឭកពីវិធីធ្វើណាត់តូម្តងទៀតនោះ ខ្ញុំបានបន្តសន្ទនាជាមួយលោក ព្រំ សៅរ៍នរ៉ា ដែលលោកក៍បានអធិប្បាយបញ្ជាក់ដូចតទៅ ៖ «សាន សុវិទ្យ ៖ អ៊ីចឹងបានន័យថា យើងយកសណ្ដែកសៀងយកមកស្ងោរ ? ព្រំ សៅរ៍នរ៉ា ៖ បាទ! ស្ងោរ ឬចំហុយ ដូចយើងចង់ធ្វើត្រប៉ែអ៊ីចឹង យើងដាំបាយ ។ អាហ្នឹងយើងដាំសណ្ដែកសៀងហ្នឹងហើយ យើងស្ងោរ ឬមួយចំហុយ ដល់ឆ្អិនហើយយើងយកមេដំបែ ហើយយើងដាក់អំបិលចូលវាទៅ ឲ្យវាល្មមកុំឲ្យវាប្រៃពេក ពីព្រោះយើងធ្វើសៀង ដាក់អំបិលឲ្យច្រើនដើម្បីឲ្យប្រៃ ។ ដល់ដាក់អ៊ីចឹងហើយ បានគេទុកឲ្យវាកាច់ទៅ មេដំបែហ្នឹងវាកាច់ហើយ ។ រួចហើយយើងយកមកញ៉ាំ ថែមជីរអីទៅ ដាក់ម្ទេសអីទៅ ឬមួយក៏យើងចង់ទុក យើងយកវាទៅហាលឲ្យស្ងួតទៅ ដើម្បីបញ្ឈប់... ដល់វាស្ងួតហើយ យើងចង់យកទៅញ៉ាំពេលណាក៏បានដែរ ដាក់ដប ឬខ្ចប់ទុកទៅ យើងត្រូវការយើងចង់ញ៉ាំ យកមកចំហុយវាឡើងវិញ ឬមួយដាក់ Microwave អ៊ីចឹងទៅ ហើយយើងញ៉ាំជាមួយបាយ» ។
លោក ព្រំ សោរ៍នរ៉ា មានប្រសាសន៍ប្រាប់ថា ការផលិតណាត់តូគឺស្រដៀងគ្នានឹងការផលិតសៀង គ្រាន់តែគេលាងសារធាតុរអិលៗស្អិតៗនោះចោល ៖ «ពួកគេធ្វើសៀង គេធ្វើអ៊ីចឹង គេយកអាហ្នឹងទៅ ធម្មតាខ្មែរយើង គេមិនចូលចិត្តទេ អារអិលៗហ្នឹង គេលាងអាហ្នឹងចោល ។ គេលាងអាហ្នឹងចោលហើយ បានគេយកមក គេកម្លោចស្ករ ដូចទឹកស៊ីអីវខាប់ វាចេញពណ៌ ហើយគេដាក់អំបិលដាក់អីអ៊ីចឹងទៅ គេយកមកចាក់ចូលក្នុងសៀងដែលយើងធ្វើឲ្យកាច់ហើយ ។ គេយកមកគេបិទក្រឡ បិទភ្ជិតវាទៅ ឲ្យដល់ទៅមួយខែអីទៅ អាហ្នឹងបានវាទៅជាសៀងហើយ ប៉ុន្តែយើងលាងចោលអាណាត់តូហ្នឹងអស់ហើយ...» ។
បើមិត្តអ្នកស្តាប់ប្រាថ្នាចង់មានសុខភាពល្អ និងអាយុវែងដូចជនជាតិជប៉ុន ជម្រើសមួយគឺងាកមកដាំសណ្តែកសៀង ហើយផលិតណាត់តូទុកទទួលទាន ៕
0:00 / 0:00