តើប្រទេសអាស៊ានកំណត់យកពលកម្មជំនាញអ្វីខ្លះដែលត្រូវបើកចំហនៅឆ្នាំ២០១៥?
2014.07.01
លំហូរពលកម្មជំនាញដោយសេរី និងការអភិវឌ្ឍធនធានមនុស្ស គឺជាផ្នែកមួយនៃការតភ្ជាប់អាស៊ានដែលប្រទេសសមាជិកទាំងអស់ត្រូវសម្រេចឲ្យបានក្នុងធម្មនុញ្ញអាស៊ាននាឆ្នាំ២០១៥។
ប្រទេសសមាជិកអាស៊ានមានកម្លាំងពលកម្មដែលទទួលបានកម្រិតអប់រំខុសគ្នា មានជំនាញខុសគ្នា មានកម្រិតជីវភាពខុសគ្នា ដែលបញ្ហានេះនឹងប៉ះពាល់ដល់លំហូរពលកម្មសេរីនៅក្នុងបរិបទអាស៊ាន។
វិស័យពលកម្មអាស៊ានបានក្លាយជាប្រធានបទសំខាន់ដែលប្រទេសជាសមាជិកត្រូវជជែកពិភាក្សាគ្នាឲ្យកាន់តែខ្លាំងថែមទៀត ដើម្បីធ្វើសមាហរណកម្មទីផ្សារការងារអាស៊ាន។ នៅក្នុងទស្សនៈវិស័យនេះ អាស៊ានបានបង្កើតឲ្យមានកិច្ចប្រជុំមន្ត្រីជាន់ខ្ពស់ផ្នែកការងារអាស៊ាន ដើម្បីពិនិត្យអំពីកិច្ចខិតខំប្រឹងប្រែងរបស់ប្រទេសជាសមាជិកទាំងអស់លើការបង្កើតឲ្យមានការទទួលស្គាល់គ្នាទៅវិញទៅមកនូវលំហូរពលកម្មជំនាញ និងការអភិវឌ្ឍធនធានមនុស្ស។
បច្ចុប្បន្នប្រទេសសមាជិកអាស៊ានមួយចំនួន មិនទាន់បង្កើតផែនការជាតិរបស់ខ្លួនឡើយ លើការទទួលយកពលកម្មនិងផ្គត់ផ្គង់ដែលអាចប៉ះពាល់ដល់ការតភ្ជាប់អាស៊ាន។ បញ្ហានេះ អាស៊ានបានបង្កើតក្របខ័ណ្ឌការងារអាស៊ាន ដែលអនុវត្តចាប់តាំងពីឆ្នាំ២០១០ ដល់ឆ្នាំ២០១៥។ គោលបំណងនោះ រួមមានការបង្កើតបទដ្ឋានរួមគ្នា ការអនុវត្តរួមគ្នាដើម្បីបង្កើតការផ្គត់ផ្គង់កម្លាំងពលកម្មជំនាញ ដោយទទួលស្គាល់គ្នាទៅវិញទៅមក។
បន្ទាប់មកកិច្ចព្រមព្រៀងទទួលស្គាល់គ្នាទៅវិញទៅមក ត្រូវបានគេបង្កើតឡើងជាបន្តបន្ទាប់ចាប់តាំងពីឆ្នាំ២០០៥ រហូតដល់បច្ចុប្បន្ន ដើម្បីជួយសម្រួលដល់ការធ្វើលំហូរពលកម្មដោយសេរី។ បច្ចុប្បន្នកិច្ចព្រមព្រៀងចំនួន ៨ ដែលអនុញ្ញាតឲ្យមានការចរាចរដោយសេរីនៅក្នុងសមាហរណកម្មអាស៊ានក្រោយឆ្នាំ២០១៥។ កិច្ចព្រមព្រៀងទីមួយ គឺផ្ដោតលើវិស័យវិស្វកម្ម ដែលបានចុះកិច្ចព្រមព្រៀង កាលពីឆ្នាំ២០០៥។ មួយឆ្នាំក្រោយមក កិច្ចព្រមព្រៀងលើផ្នែកគិលានុបដ្ឋាកក៏បានបង្កើតឡើងនៅក្នុងឆ្នាំ២០០៦។
ប៉ុន្តែក្នុងឆ្នាំ២០០៧ កិច្ចព្រមព្រៀងចំនួនពីបង្កើតឡើងព្រមគ្នា គឺកិច្ចព្រមព្រៀងលើផ្នែកស្ថាបត្យកម្ម និងទទួលស្គាល់គុណភាពនៃការស្រាវជ្រាវ និងចុងក្រោយ នៅឆ្នាំ២០០៩ កិច្ចព្រមព្រៀងចំនួនបួនផ្សេងទៀត ក៏ត្រូវបានបង្កើតឡើងដែរ គឺផ្នែកទេសចរណ៍ សុខាភិបាល ពេទ្យធ្មេញ និងសេវាកម្មផ្នែកគណនេយ្យ។
ទីប្រឹក្សារាជរដ្ឋាភិបាលកម្ពុជា លោកបណ្ឌិត សុខ ស៊ីផាន់ណា មានប្រសាសន៍ថា ការលំហូរពលកម្មជំនាញរបស់ប្រទេសនីមួយៗ ហាក់ជារឿងមួយពិបាកក្នុងការបំពេញការងារមួយនៅប្រទេសមួយទៀត។ បន្ថែមលើនេះ លំហូរពលកម្មជំនាញដោយសេរីនៅក្នុងអាស៊ាន គឺអាស្រ័យលើលំហូរវិនិយោគទុនរបស់ប្រទេសនីមួយៗ។
«សំឡេង»
លោក សុខ ស៊ីផាន់ណា មានប្រសាសន៍បន្ថែមទៀតថា លំហូរវិនិយោគទុនបង្កើតឲ្យលំហូរពលកម្មជំនាញ ក្នុងនោះប្រទេសកម្ពុជា បើកឱកាសអ្នកពលកម្មជំនាញចូលមកកម្ពុជា នៅពេលដែលកម្ពុជា ខ្វះខាត។ ចំពោះលំហូរពលកម្មជំនាញដទៃទៀត ត្រូវស្របតាមច្បាប់អន្តោប្រវេសន៍របស់ប្រទេសសមាជិកអាស៊ាននីមួយៗ។
រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ ធ្លាប់បានអះអាងថា លំហូរពលកម្មដោយសេរីនៅក្នុងបរិបទអាស៊ាន ជាបញ្ហារសើបខ្លាំងរបស់ប្រទេសសមាជិកអាស៊ាន។ បញ្ហានេះអាចធ្វើឲ្យអ្នកនយោបាយមកប្រើប្រាស់ដើម្បីវាយប្រហារគណបក្សដទៃក្នុងគោលបំណងរកសំឡេងគាំទ្រនៅពេលឃោសនាបោះឆ្នោត។ លោកបញ្ជាក់ទៀតថា សម្រាប់ប្រទេសកម្ពុជាវិញ បានខិតខំប្រឹងប្រែងផ្សព្វផ្សាយអំពីលំហូរពលកម្មនៅក្នុងបរិបទអាស៊ាន នៅឆ្នាំ២០១៥ ដើម្បីកាត់បន្ថយហានិភ័យទាំងនោះ។
«សំឡេង»
លោក ខៀវ កាញារីទ្ធ មានប្រសាសន៍បន្ថែមទៀតថា ប្រជាពលរដ្ឋកម្ពុជា មិនត្រូវព្រួយបារម្ភអំពីភាពគ្មានការងារធ្វើនៅក្នុងសមាហរណកម្មអាស៊ាន ឆ្នាំ២០១៥ នោះទេ ដោយសារតែច្បាប់អន្តោប្រវេសន៍កម្ពុជា បានអនុញ្ញាតឲ្យពលករបរទេសហូរចូលមកកម្ពុជា ប្រមាណ ១០% ប៉ុណ្ណោះ។ ម៉្យាងវិញទៀត ទីផ្សារការងារក៏សម្បូរ ជាពិសេសនៅក្នុងកសិឧស្សាហកម្មដំណាំកៅស៊ូ ដែលត្រូវការពលកម្មរាប់ពាន់នាក់។
ទោះជាយ៉ាងណាក៏ដោយ ថ្នាក់ដឹកនាំអាស៊ានក៏បានទទួលស្គាល់ថា ឧបសគ្គចម្បងនៃការតភ្ជាប់អាស៊ាន គឺបញ្ហាពាក់ព័ន្ធលំហូរពលកម្មជំនាញ និងការអភិវឌ្ឍធនធានមនុស្ស។
សេចក្ដីប្រកាសព័ត៌មានរបស់អាស៊ានកាលពីដើមខែឧសភា ឆ្នាំ២០១៤ បានបង្ហាញថា ការតភ្ជាប់អាស៊ានជាបញ្ហាដែលដោះស្រាយគ្មានព្រំដែន។ ភាពជោគជ័យនៃការសម្រេចគោលដៅលំហូរពលកម្មជំនាញដោយសេរីរវាងអាស៊ាន លុះត្រាប្រទេសសមាជិកនីមួយៗ ពន្លឿនលើការអនុវត្តសមត្ថភាពប្រជាពលរដ្ឋ លើកកម្ពស់ការយល់ដឹងរបស់សហគមន៍ និងអ្នកនយោបាយ រួមទាំងការបង្កើតច្បាប់ថ្មីបន្ថែមទៀតគាំទ្រ និងជួយសម្រួលដល់ការអភិវឌ្ឍធនធានមនុស្ស ដែលអាចឈានដល់ការទទួលស្គាល់គ្នាទៅវិញទៅមករវាងអាស៊ាន។
បច្ចុប្បន្នប្រទេសសមាជិកអាស៊ានទាំង១០ ដែលមានប្រជាពលរដ្ឋសរុប ៦០០លាននាក់ សម្រេចបាននូវផែនការគោលរបស់ខ្លួនលើការបង្កើតតំបន់អាស៊ានប្រមាណ ៨០% ប៉ុណ្ណោះ៕