ការផ្ទុះឡើងជំងឺកញ្ជ្រឹល ១ករណីនៅខេត្តកំពង់ស្ពឺ ថ្មីៗនេះ ជាសញ្ញាបង្ហាញថា ក្រសួងសុខាភិបាល និងប្រជាពលរដ្ឋ ត្រូវមានការប្រុងប្រយ័ត្នចំពោះជំងឺនេះ។ ការចាក់វ៉ាក់សាំងការពារជំងឺនេះ ជាមធ្យោបាយប្រសើរបំផុត ដែលអាចជួយកុមារគ្រប់រូបមិនឲ្យប្រឈមមុខនឹងការកើតជំងឺកញ្ជ្រឹល។
ជំងឺកញ្ជ្រឹល គឺងាយកើតចំពោះកុមារដែលខ្វះអាហារូបត្ថម្ភ កុមារដែលកើតជំងឺរបេង កុមារដែលមិនបានបៅទឹកដោះដំបូងរបស់ម្តាយគ្រប់គ្រាន់ និងការរស់នៅប្រចាំថ្ងៃខ្វះអនាម័យ។
ប្រធានកម្មវិធីជាតិផ្តល់ថ្នាំបង្ការ នៃមជ្ឈមណ្ឌលគាំពារមាតា និងទារក លោកវេជ្ជបណ្ឌិត ឱក វិជិត ពន្យល់ថា ជំងឺកញ្ជ្រឹល គឺងាយកើតចំពោះកុមារដែលមានអាយុចាប់ពី ៩ខែរហូតដល់ ១៥ឆ្នាំ។ កុមារងាយកើតជំងឺកញ្ជ្រឹល ព្រោះកុមារមានប្រព័ន្ធភាពសុំានៃរាងកាយខ្សោយ ម្ល៉ោះហើយជាហេតុបណ្ដាលឲ្យកុមារងាយប្រឈមនឹងការកើតជំងឺឆ្លងផ្សេងៗ ដែលបណ្ដាលមកពីបាក់តេរី និងមេរោគ។ ការផ្តល់អាហារូបត្ថម្ភ ការរស់នៅមានអនាម័យល្អ និងការបំបៅដោះទារកដែលទើបនឹងកើតឲ្យបានយ៉ាងតិច ៦ខែ គឺជាមធ្យោបាយល្អ ដើម្បីជួយការពារកុមារមិនឲ្យប្រឈមមុខនឹងការកើតជំងឺកញ្ជ្រឹល៖ « អាហារូបត្ថម្ភធ្វើឲ្យកុមារសុខភាពល្អ ហើយធ្វើឲ្យមានសុខភាពមាំទាំ។ អ៊ីចឹងកុមារដែលមានគីឡូក្រោមស្តង់ដារហ្នឹង គឺមិនមានសុខភាពល្អដូចក្មេងធម្មតា »។
ជំងឺកញ្ជ្រឹល បង្កមកពីមេរោគមួយប្រភេទមានឈ្មោះថា វឺរាយសេឡា សុះស្ទឺ វីរុស (Varicella Zoster Virus) ជាប្រភេទមេរោគដែលងាយចម្លងពីមនុស្សម្នាក់ទៅមនុស្សម្នាក់ផ្សេងទៀត តាមរយៈការក្អក កណ្ដាស់ និងការប៉ះពាល់ទឹករងៃដំបៅរបស់អ្នកជំងឺ។
តើជំងឺកញ្ជ្រឹលអាចស្ដែងចេញជារោគសញ្ញាអ្វីខ្លះ?
លោកវេជ្ជបណ្ឌិត ឱក វិជិត មានប្រសាសន៍ថា នៅពេលដែលកុមារឆ្លងជំងឺកញ្ជ្រឹល កុមារនោះនឹងស្ដែងចេញជារោគសញ្ញាស្រដៀងនឹងជំងឺគ្រុនផ្ដាសាយដែរ គឺរោគសញ្ញាគ្រុនក្តៅ ហៀរសំបោរ ឈឺភ្នែក ក្អក និងស្ដែងចេញជាកន្ទួលក្រហមលើស្បែករបស់កុមារ។ បន្ថែមពីលើនេះ កុមារអាចនឹងមានសភាពធ្ងន់ធ្ងរខ្លាំង ហើយមាត់របស់កុមារមានអាការៈឈឺចាប់ និងអាចស្ដែងចេញជារោគសញ្ញារាករូស។
សៀវភៅទីណាគ្មានវេជ្ជបញ្ជា សរសេរថា ២ ឬ ៣ថ្ងៃបន្ទាប់ពីកើតជំងឺកញ្ជ្រឹល កុមារនឹងស្ដែងចេញចំណុចតូចៗខ្លះ មានពណ៌ស ដូចគ្រាប់អំបិលចេញនៅក្នុងមាត់ ហើយ ១ ឬ ២ថ្ងៃក្រោយមកទៀត នឹងស្ដែងជារោគសញ្ញាកន្ទួលក្រហមលើស្បែក។ រោគសញ្ញាកន្ទួលក្រហមនេះ ដំបូងស្ដែងចេញនៅខាងក្រោយត្រចៀក និងនៅក បន្ទាប់មកនៅលើមុខ និងដងខ្លួន ហើយរោគសញ្ញានៃកន្ទួលក្រហមចុងក្រោយ គឺស្ដែងចេញនៅលើដៃ និងជើង។ ជាការកត់សម្គាល់ រោគសញ្ញាកន្ទួលក្រហមនេះអាចបន្តស្ថិតនៅលើដងខ្លួនកុមារប្រហែល ៥ថ្ងៃបន្តទៀត។
លោកវេជ្ជបណ្ឌិត ឱក វិជិត ពន្យល់ថា ជំងឺកញ្ជ្រឹលនេះបន្ទាប់ពីមានចេញរោគសញ្ញាកន្ទួលក្រហមហើយ តាមធម្មតា កុមារក៏ចាប់ផ្ដើមមានភាពធូរស្រាលដែរ។ ជំងឺកញ្ជ្រឹលនេះមិនមែនជាប្រភេទជំងឺកាចសាហាវនោះទេ ព្រោះថា ជំងឺកញ្ជ្រឹលអាចនឹងបាត់ទៅវិញដោយឯកឯង។ ប៉ុន្តែកុមារដែលកើតជំងឺនេះ គឺមានប្រព័ន្ធភាពសុំានៃរាងកាយចុះខ្សោយ។ ដូចនេះ ជាហេតុបណ្ដាលឲ្យកុមារងាយប្រឈមមុខនឹងកើតជំងឺរលាកទងសួត ផ្លូវដង្ហើមស្រួចស្រាល់ អាចប្រឈមនឹងការកើតជំងឺរលាកស្រោមខួរក្បាល និងជំងឺដទៃផ្សេងទៀតដែលបណ្ដាលមកពីមេរោគ និងបាក់តេរី៖ « ប្រសិនបើយើងធ្វេសប្រហែស កុមារនោះនឹងរឹតតែធ្ងន់ធ្ងរ។ ឧទាហរណ៍ ក្មេងដែលកើតជំងឺកញ្ជ្រឹល គឺហូបបាយមិនសូវបានទេ។ កុមារខ្វះជីវជាតិ ពិសេសខ្វះជីវជាតិ អា (A) មានការធ្លាក់ចុះខ្លាំង ឬក្មេងពិការ។ នៅពេលមានជំងឺកញ្ជ្រឹល ប្រព័ន្ធភាពសុំាចុះខ្សោយ អាចមានមេរោគឆ្លៀតចូល ពិសេសបាក់តេរី បង្កឲ្យរលាកសួត បង្កឲ្យរលាកស្រោមខួរក្បាល »។
នៅពេលកុមារកើតជំងឺកញ្ជ្រឹល អាណាព្យាបាលគ្រប់រូបមិនត្រូវឲ្យកុមារងូតទឹកដែលត្រាំដោយដើមជ្រៃក្រឹម ធាងត្នោត ស្លឹកកន្ទួត ស្លឹកចេក ឬរុក្ខជាតិដទៃផ្សេងទៀតជាដាច់ខាត។
មន្ត្រីជំនាញផ្នែកសុខភាព អះអាងថា ជំងឺកញ្ជ្រឹលមិនអាចជាសះស្បើយដោយការងូតទឹកកខ្វក់នោះទេ។ តាមទ្រឹស្ដីពេទ្យ ទឹកកខ្វក់ គឺជាប្រភពនៃមេរោគ បាក់តេរី ប៉ារ៉ាស៊ីត និងផ្សិត ម្ល៉ោះហើយគ្មានភស្តុតាងណាមួយជាក់លាក់ដែលបញ្ជាក់ថា ការងូតទឹកដែលត្រាំដោយរុក្ខជាតិអាចព្យាបាលជំងឺកញ្ជ្រឹលជាសះស្បើយនោះទេ៖ « មិនត្រឹមតែប៉ុណ្ណឹង អ្នកខ្លះឲ្យក្មេងផឹកទឹកដូង ទឹកកកដាក់ជន្លេន និងអាចម៍ក្រៀម ដើម្បីឲ្យក្មេងផឹកដើម្បីព្យាបាលជំងឺកញ្ជ្រឹល។ ការធ្វើបែបនេះ គឺមិនត្រឹមត្រូវទេ និងធ្វើឲ្យកុមាររឹតតែប្រឈមមុខនឹងបញ្ហាជាច្រើនដទៃផ្សេងទៀត »។
តើជំងឺកញ្ជ្រឹលអាចមានផលប៉ះពាល់អ្វីខ្លះចំពោះកុមារ?
កុមារដែលកើតជំងឺកញ្ជ្រឹល អាចបណ្ដាលឲ្យខូចប្រព័ន្ធប្រសាទ ដែលជាហេតុបណ្ដាលឲ្យកុមារឈឺក សតិបញ្ញាមិនល្អ ការចងចាំចុះខ្សោយ ហើយការលូតលាស់មានសភាពយឺតយ៉ាវខុសធម្មតា។ ជាការកត់សម្គាល់លើកុមារដែលកើតជំងឺកញ្ជ្រឹល គឺប្រឈមមុខនឹងការមានស្លាកស្នាម ពិសេសមនុស្សពេញវ័យ។
របៀបនៃការព្យាបាលជំងឺកញ្ជ្រឹល
មន្ត្រីជំនាញផ្នែកសុខភាពពន្យល់ថា កុមារដែលកើតជំងឺកញ្ជ្រឹល គួរសម្រាកឲ្យបានច្រើន និងត្រូវទទួលទានទឹកឲ្យបានច្រើន ដើម្បីផ្តល់ជាតិទឹកដល់កុមារ ព្រោះថា កុមារដែលកើតជំងឺកញ្ជ្រឹល គឺមានសភាពក្តៅខ្លួនខុសធម្មតា។
កុមារត្រូវទទួលអាហារូបត្ថម្ភឲ្យច្រើន មានដូចជា ស្លឹកបាស ននោង ត្រកួន ស្ពៃ ការ៉ុត ផ្ទី បន្លែពណ៌បៃតង ត្រី សាច់ ស្ករ ជាដើម។ ទន្ទឹមនឹងដែរ ស្ត្រីជាម្តាយគ្រប់រូបអាចធ្វើបបរខាប់គ្រប់គ្រឿងឲ្យទារក ឬកុមារទទួលទានបន្ទាប់ពីបានបៅដោះម្តាយបាន ៦ខែ។ ការទទួលទានបបរខាប់គ្រប់គ្រឿង អាចកាត់បន្ថយការចំណាយលើថ្លៃទឹកដោះគោ ហើយអាចជួយឲ្យកុមារមានសុខភាពល្អ និងមានប្រព័ន្ធសុំារាងកាយល្អប្រសើរ។ ម្យ៉ាងវិញទៀត បបរខាប់គ្រប់គ្រឿង ជាមធ្យោបាយថ្មីមួយទៀតដែលក្រសួងសុខាភិបាល លើកទឹកចិត្តឲ្យម្តាយគ្រប់រូប ធ្វើឲ្យកូនតូចទទួលទាន។
ការការពារកុំឲ្យកើតជំងឺកញ្ជ្រឹល
បច្ចុប្បន្ននៅកម្ពុជា មានវ៉ាក់សាំងចាក់ការពារជំងឺកញ្ជ្រឹល ស្អូច ហើយការចាក់វ៉ាក់សាំងនោះទៀតសោត ប្រជាពលរដ្ឋមិនចាំបាច់ចំណាយលុយនោះទេ។
ប្រធានកម្មវិធីជាតិផ្តល់ថ្នាំបង្ការ នៃមជ្ឈមណ្ឌលគាំពារមាតា និងទារក លោកវេជ្ជបណ្ឌិត ឱក វិជិត មានវេជ្ជបញ្ជាបន្តថា អាណាព្យាបាលត្រូវតែនាំកុមារដែលមានអាយុចាប់ពីអាយុ ៩ ដល់ ១៨ខែ និងចាប់ពីអាយុ ១៨ខែ ដល់ ២៨ខែ ទៅចាក់វ៉ាក់សាំងការពារជំងឺកញ្ជ្រឹល៖ « ចាក់វ៉ាក់សាំងហ្នឹងយើងមានកម្មវិធីពីរ ដែលមណ្ឌលសុខភាពចុះទៅចាក់ហ្នឹង គឺមានពីរដូស។ ដូសទី១ អាយុ ៩ ដល់ ១៨ និងដូសទី២ គឺ១៨ ដល់ ២៣ខែ។ ដើម្បីបន្ថែមភាពសុំាលើកុមារទៀតនោះ គឺ១៨ ដល់ ២៣ខែ។ វ៉ាក់សាំងដែលយើចាក់ឲ្យនោះ គឺការពារជំងឺកញ្ជ្រឹល និងស្អូច។ ការចាក់វ៉ាក់សាំងពី ៩ ដល់ ១៥ឆ្នាំដល់កុមារ គឺដើម្បីឲ្យការមានប្រព័ន្ធភាពសុំារាងកាយល្អប្រសើរ »។
អ្នកជំនាញផ្នែកសុខភាព ណែនាំថា ជាប្រការល្អប្រសើរសម្រាប់ប្រជាពលរដ្ឋ នៅពេលសង្ស័យថាកុមារកើតជំងឺកញ្ជ្រឹល សូមជៀសជំនឿមិនសមហេតុផលមួយចំនួន ដូចជា ការបន់ស្រន់ម្ចាស់ទឹកម្ចាស់ដីព្រៃព្រឹក្សា ការស្ដោះរបស់គ្រូខ្មែរបុរាណដែលមានលាយជាមួយទឹកម្លូ និងមិនត្រូវផ្សំថ្នាំឲ្យកុមារលេបផ្ដេសផ្ដាស ដោយគ្មានវេជ្ជបញ្ជាត្រឹមត្រូវជាដាច់ខាត។ ភាពយឺតយ៉ាវក្នុងការនាំកុមារដែលមានសភាពជំងឺកញ្ជ្រឹលកម្រិតធ្ងន់ទៅមណ្ឌលសុខភាព និងមន្ទីរពេទ្យ គឺអាចបណ្ដាលឲ្យកុមារបាត់បង់អាយុជីវិត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។