គ្រូពេទ្យ​ប្រាប់​វិធី​សង្គ្រោះ​បឋម​មុន​បញ្ជូន​អ្នក​រងគ្រោះ​ដោយ​ពស់​ចឹក​ទៅ​មន្ទីរពេទ្យ

ដោយ ខែ សុណង
2017-01-26
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
សត្វ​ពស់​មួយ​ក្បាល​ដែល​ត្រូវ​អ្នក​ភូមិ​វាយ​សម្លាប់​នៅ​តំបន់​បឹងកក់ រាជធានី​ភ្នំពេញ កាល​ពី​ថ្ងៃ​ទី​២៩ ខែ​តុលា ឆ្នាំ​២០១៣។
សត្វ​ពស់​មួយ​ក្បាល​ដែល​ត្រូវ​អ្នក​ភូមិ​វាយ​សម្លាប់​នៅ​តំបន់​បឹងកក់ រាជធានី​ភ្នំពេញ កាល​ពី​ថ្ងៃ​ទី​២៩ ខែ​តុលា ឆ្នាំ​២០១៣។
Photo: RFA

នៅ​ពេល​និយាយ​អំពី​បញ្ហា​សត្វ​ពស់​ខាំ ឬ​ចឹក​សម្រាប់​អ្នក​នៅ​ភ្នំពេញ​ហាក់​មិន​សូវ​ចាប់​អារម្មណ៍​ដូច​ពលរដ្ឋ​រស់នៅ​តំបន់​ព្រៃ​ភ្នំ តំបន់​ទឹក ស្រុក​ស្រែ​ចម្ការ ឬ​អ្នក​នៅ​ចុងកាត់មាត់ញក​នោះ​ទេ។ នៅ​តាម​បណ្ដា​ខេត្ត​នានា អ្នក​ជំងឺ​ដោយ​ពស់​ខាំ ឬ​ចឹក ត្រូវ​បាន​គេ​បញ្ជូន​ទៅ​កាន់​មន្ទីរពេទ្យ​ស្ទើរ​ជា​រៀង​រាល់​ថ្ងៃ។

តើ​មាន​សញ្ញា​អ្វី​ខ្លះ​ដើម្បី​សម្គាល់​ថា អ្នក​ជំងឺ​ត្រូវ​រងគ្រោះ​ដោយ​សត្វ​ពស់​ចឹក ឬ​ខាំ? តើ​មាន​វិធី​ណា​អាច​ជួយ​សង្គ្រោះ​ជន​រងគ្រោះ​ដោយ​ពស់​ចឹក ឬ​ខាំ មុន​បញ្ជូន​ទៅ​កាន់​មន្ទីរពេទ្យ?

គ្រូពេទ្យ​បាន​ណែនាំ​ថា សត្វ​ពស់​ដែល​បាន​ចឹក​មនុស្ស គឺ​មាន​លក្ខណៈ​ខុសៗ​គ្នា ដោយ​ខ្លះ​វា​មាន​ពិស​ខ្លាំង និង​ខ្លះ​ទៀត​មាន​ពិស​ខ្សោយ ប៉ុន្តែ​ចាំបាច់​ត្រូវ​តែ​បញ្ជូន​ជន​រងគ្រោះ​ទៅ​ដល់​មន្ទីរពេទ្យ​ឲ្យ​បាន​ទាន់​ពេល ដើម្បី​ជួយ​សង្គ្រោះ​ជីវិត។

អនុប្រធាន​មន្ទីរពេទ្យ​ខេត្ត​ឧត្ដរមានជ័យ លោក​វេជ្ជបណ្ឌិត កែវ ស្ដើង មាន​ប្រសាសន៍​ថា នៅ​មន្ទីរពេទ្យ​របស់​លោក​យ៉ាង​ហោច​ណាស់​ក្នុង​មួយ​ខែ មាន​អ្នក​ពស់​ចឹក​ពី ៥ ទៅ ១០​នាក់​ដែរ។ លោក​បាន​ផ្ដល់​ឱវាទ​ថា ជន​រងគ្រោះ​បើ​ដឹង​ខ្លួន​ថា​ត្រូវ​ពស់​ចឹក សូម​ប្រញាប់​ឲ្យ​ដំណឹង​អ្នក​នៅ​ក្បែរ​ខ្លួន​ភ្លាម ឬ​បើ​នៅ​ម្នាក់​ឯង ត្រូវ​រក​វិធី​ប្រាប់​ដំណឹង​ឲ្យ​គេ​មក​ជួយ ដើម្បី​ឆាប់​បាន​ទៅ​ដល់​មន្ទីរពេទ្យ។

លោក​វេជ្ជបណ្ឌិត​បញ្ជាក់​ថា ការ​សង្គ្រោះ​បឋម​ដែល​ត្រឹមត្រូវ​នោះ ត្រូវ​ប្រើ​ឈើ​អប​រួច​រុំ​ថ្នមៗ ល្មមៗ កុំ​រឹត​តឹង​ពេក ឯ​ការ​អប​នោះ​ជា​របៀប​ដូច​អប​ជើង ឬ​ដៃ​បាក់​ឆ្អឹង​ដូច្នោះ​ដែរ ហើយ​ជៀសវាង​កុំ​ឲ្យ​រងគ្រោះ​ធ្វើ​ចលនា​ច្រើន ដើម្បី​កុំ​ឲ្យ​ពិស​នោះ​រត់​ឡើង​លឿន​ទៅ​តាម​ក្រពេញ​ទឹក​រងៃ៖ «តាម​របៀប​របប​ថ្មី​ដែល​មាន​ការ​ណែនាំ ជា​មគ្គុទ្ទេសក៍​ថ្មី វិធីសាស្ត្រ​ថ្មី​ដែល​ក្រសួង​សុខាភិបាល បាន​រៀបចំ​គឺ​ការ​ជួយ​សង្គ្រោះ​បឋម​នោះ គឺ​អាច​ថា យក​ឈើ​អប មួយ​ល្មម​កុំ​ឲ្យ​តឹង​ពេក​គ្រាន់​តែ​រុញ​អប​កុំ​ឲ្យ​គាត់​កម្រើក​ជើង​ខ្លាំង ព្រោះ​ថា គេ​គិត​ថា ពស់​ចឹក​ពិស​វា​ទៅ​តាម​ឈាម​ទេ វា​ទៅ​តាម​ក្រពេញ​ទឹក​រងៃ​វា​ទៅ​យឺតៗ​ទេ វា​មិន​ឡើង​លឿន​ដូច​ពស់​ផ្កាចារ ពស់​ពព្លាក់ អ៊ីចឹង​វា​ឡើង​យឺតៗ ប៉ុន្តែ​មិន​បាន​រុំ​អប​ក៏​ហ្អី​ទៅ សំខាន់​ឲ្យ​គាត់​បាន​មក​ដល់​ពេទ្យ​ឲ្យ​បាន​លឿន»

លោក​បន្ត​ថា ប្រសិន​ជា​តំបន់​ដែល​ជន​រងគ្រោះ​នៅ​ឆ្ងាយ​ពេក បច្ចុប្បន្ន​នៅ​តាម​មន្ទីរពេទ្យ​រដ្ឋ​មួយ​ចំនួន​ក៏​មាន​រថយន្ត​សង្គ្រោះ​បន្ទាន់ ដូច្នេះ​អាច​ហៅ​ទៅ​មន្ទីរពេទ្យ​ដើម្បី​ដឹក​ជញ្ជូន​ឲ្យ​អ្នក​ជំងឺ​ឲ្យ​បាន​ទៅ​ដល់​មន្ទីរពេទ្យ​ឆាប់​រហ័ស។

ជួនកាល ពលរដ្ឋ​ដែល​គាត់​ធ្វើ​ការ​ប្រកប​របរ​រក​ម្ហូប​ក្នុង​ព្រៃ​ក្នុង​ស្រែ គាត់​មិន​បាន​ដឹង​ថា ខ្លួន​ត្រូវ​ពស់​ចឹក ឬ​ខាំ​នោះ​ទេ។ ជា​សញ្ញា​សម្គាល់​ស្នាម​ពស់​ដែល​មាន​ពិស​ចឹក គ្រូពេទ្យ​បាន​ប្រាប់​ថា វា​បាន​បង្កើត​ជា​ចំណុច​សម្គាល់​តូចៗ​ពីរ​ដែល​នៅ​ឆ្ងាយ​ពី​គ្នា​ប្រមាណ​ជា ២​មិល្លីម៉ែត្រ​ទៅ ១០​មិល្លីម៉ែត្រ។ ពេល​ខ្លះ ពស់​ដែល​ចឹក​នោះ​មិន​បាន​បញ្ចេញ​ជាតិ​ពិស​របស់​វា​ទេ ដោយ​គ្រាន់​តែ​បន្សល់​ស្នាម​ចឹក​របស់​វា។ ចំណែក​រោគ​សញ្ញា​ពស់​មាន​ពិស​ចឹក​វិញ​មាន​ដូចជា ហើម ស្ពឹក ឈឺ និង​ក្រហម​នៅ​នឹង​កន្លែង និង​ធ្វើ​ឲ្យ​ងងុយ​ដេក​ក៏​មាន ប៉ុន្តែ​រោគ​សញ្ញា​នេះ​អាច​នឹង​ប្រែប្រួល​ដែរ​អាស្រ័យ​ទៅ​លើ​សុខភាព​របស់​ជន​រងគ្រោះ។

តាម​បទពិសោធន៍ លោក​វេជ្ជបណ្ឌិត​កត់​សម្គាល់​ថា មាន​ប្រភេទ​ពស់​ខ្លះ​ចឹក​អ្នក​រងគ្រោះ ហើយ​មិន​អាច​មក​ដល់​មន្ទីរពេទ្យ​បាន​ទេ គឺ​អាច​ស្លាប់​នៅ​នឹង​ព្រៃ​តែ​ម្ដង ដូចជា​ប្រភេទ​ពស់​វែក​រនាម ពស់​វែក​ក្របី ជាដើម។ លោក​វេជ្ជបណ្ឌិត កែវ ស្ដើង បាន​អះអាង​ថា នៅ​ពេល​មក​ដល់​មន្ទីរពេទ្យ​ទាន់​ពេល គ្រូពេទ្យ​មាន​ថ្នាំ​បន្សាប ឬ​ថ្នាំ​សម្រាប់​ព្យាបាល​អ្នក​ជំងឺ​ភាគច្រើន​អាច​មាន​សង្ឃឹម៖ «ឥឡូវ​មន្ទីរពេទ្យ​យើង​មាន​សម្រាប់​ថ្នាំ​ពស់​ចឹក ហូរ​ឈាម និង​ពស់​មួយ​ចឹក​មិន​បង្ក​ឲ្យ​ហូរ​ឈាម​ទេ វា​ទៅ​ជា​ងងុយ​ដេក អត់​ដក​ដង្ហើម​អត់​អ៊ីចឹង​ពស់​វា​ខុស​គ្នា អ៊ីចឹង​ថ្នាំ​មាន ២​មុខ។ មក​ដល់​មន្ទីរពេទ្យ​ធម្មតា ត្រូវ​សាកសួរ​អ្នក​ជំងឺ ឬ​អាច​អ្នក​នាំ​មក​អាច​ដឹង​ថា ពស់​ដែល​ខាំ​នោះ​ប្រភេទ​ពស់​អី​ដែល​ចឹក​គាត់ ប្រសិន​ជា​ដឹង​វា​ងាយ​នឹង​ប្រើ​ថ្នាំ បាន​ជោគជ័យ។ បើ​អត់​ដឹង​ពេល​ខ្លះ​យើង​ប្រើ​ថ្នាំ​ទាំង​ពីរ​ព្រោះ​អី​វា​មិន​អាច​ថា​អត់​ប្រើ​ទេ បើ​សិន​ជា​សង្ស័យ​ថា ជា​ពស់​វែក​ដំបូក ឬ​មួយ​ក៏​ពស់​ផ្កាចារ។ ពិបាក​ពេល​យប់​ចឹក​មើល​មិន​ឃើញ​អ៊ីចឹង វិធីសាស្ត្រ​របស់​មន្ទីរពេទ្យ​ប្រើ​ថ្នាំ​ទាំង​ពីរ»

អនុប្រធាន​មន្ទីរពេទ្យ​ខេត្ត​ឧត្ដរមានជ័យ លោក​វេជ្ជបណ្ឌិត កែវ ស្ដើង មាន​ប្រសាសន៍​ទៀត​ថា ឥរិយាបថ ឬ​ទម្លាប់​ដែល​តែងតែ​ធ្វើ​ខុស​ឆ្គង និង​មិន​គួរ​គប្បី​កន្លង​មក លោក​មើល​ឃើញ​ថា ពលរដ្ឋ​មួយ​ចំនួន​នៅ​ខ្វះ​ការ​យល់​ដឹង និង​តែងតែ​ធ្វើ​អ្វី​តាម​ជំនឿ​តៗ​គ្នា ដូចជា​ប្រជាពលរដ្ឋ​តាម​ទម្លាប់​អ្នក​ស្រុក​តែង​ចង​រឹត​ឃាត់​ពិស ឬ​អាច​ធ្វើ​ពិធី​ផ្សេងៗ​ទៀត ជាដើម៖ «កន្លង​មក​ពី​បុរាណ​យើង​តែង​តែ​លឺ​ថា មាន​ពស់​ចឹក អ៊ីចឹង​គេ​វះ​អា​មុខ​ពស់​ចឹក​នោះ​ដើម្បី​បឺត​ឈាម​បឺត​អី តែ​ឥឡូវ​ការ​ធ្វើ​បែប​នេះ គឺ​មិន​ឲ្យ​ធ្វើ​ទៀត​ទេ ព្រោះ​ការ​វះ​បឺត​ឈាម​ភ្លាមៗ វា​ធ្វើ​ឲ្យ​ពិស​ពស់​អាច​ចូល​ទៅ​ក្នុង​មាត់​អ្នក​បឺត​ឈាម ហើយ​ទី​២ អាច​ធ្វើ​ឲ្យ​ហូរ​ឈាម​នៅ​ត្រង់​កន្លែង​ចឹក ព្រោះ​ពស់​ខ្លះ​វា ការ​ចឹក​នោះ​ហូរ​ឈាម។ តែ​ប្រជាជន​យើង​គាត់​មិន​សូវ​ដឹង​ទេ គាត់​ច្រើន​តែ​ចង ពស់​ចឹក​ក​ជើង​គាត់​ច្រើន​យក​ខ្សែ​ក្រវាត់ ឬ​កន្សែង​មក​រឹត​ភ្លៅ ឬ​កំភួន​ជើង។ តាម​ការ​គិត​របស់​ខ្ញុំ​គឺ​ថា ការ​ចង​ស្លាក់​បែប​នេះ គឺ​កុំ​ឲ្យ​ពិស​វា​ឡើង​លឿន​មក​តាម​ឈាម ប៉ុន្តែ​ការ​ជួយ​សង្គ្រោះ​បែប​នោះ វា​ខុស​ខាង​ផ្នែក​វិទ្យាសាស្ត្រ​គេ​មិន​ឲ្យ​ចង​ទេ ព្រោះ​កាល​ណា​ចង​វា​ស្លាក់​ឈាម​បើ​កាល​ណា​ចង​រហូត​ដល់​លើស ៣០​នាទី ធ្វើ​ឲ្យ​អុកស៊ីហ្សែន មិន​អាច​មក​ចិញ្ចឹម​កោសិកា​ផ្នែក​ខាង​ក្រោម​ការ​ចង​នោះ​ធ្វើ​ឲ្យ​ខូច អាច​គ្រោះថ្នាក់​ដល់​កាត់​ជើង»

ទន្ទឹម​នឹង​គ្នា​នេះ លោក​ក៏​មិន​ហ៊ាន​បដិសេធ​ថា គ្រូ​ខ្មែរ​មិន​អាច​ជួយ​សង្គ្រោះ​ជីវិត​អ្នក​ត្រូវ​ពស់​ចឹក​បាន​នោះ​ទេ ប៉ុន្តែ​លោក​សង្កេត​ឃើញ​ថា ពេល​ខ្លះ​បើ​អ្នក​ជំងឺ​រវល់ ឬ​ជាប់​ព្យាបាល​ជាមួយ​គ្រូ​ខ្មែរ ដោយ​ប្រើ​ថ្នាំ​បុរាណ​នោះ ភាគច្រើន​តែង​ហួស​ពេល​ជួយ​សង្គ្រោះ ដោយសារ​មុខ​របួស​ក៏​ឡើង​ហើម​ខ្លាំង និង​មាន​ពង​បែក មាន​ហូរ​ឈាម ឬ​រលួយ​សាច់​ក៏​មាន ក្រៅ​ពី​នោះ​ពិស​អាច​ជ្រាប​សព្វ​អស់​ទៅ​ហើយ​ក្រៅ​អំពី​ការ​ចង​ស្លាក់៖ «យើង​ធ្លាប់​ឃើញ​គាត់​ស្ដោះ ព្រោះ​ហើយ​គាត់​បិទ អ្នក​ខ្លះ​គាត់​យក​អាចម៍​ក្របី​មក​បិទ រុំ​អ៊ីចឹង​ធ្វើ​ឲ្យ​វា​ស្លោក​ពង​បែក​នៅ​លើ​ស្បែក​វា​បង្ក​កាន់​តែ​ក្លាយ»

ទាក់ទង​នឹង​ការ​ព្យាបាល​ពស់​ចឹក​បែប​បុរាណ លោក ជ័យ ស៊ួន វ័យ ៨១​ឆ្នាំ ជា​ចាស់​ទុំ​មួយ​រូប​រស់នៅ​ភូមិ​ត្រពាំងក្រាញ់ ឃុំ​ចំបក់ ស្រុក​ភ្នំស្រួច ខេត្ត​កំពង់ស្ពឺ ថ្លែង​ថា លោក​ធ្លាប់​ព្យាបាល​អ្នក​ភូមិ​ដែល​មាន​ពស់​ចឹក​មិន​តិច​ជាង ១០០​នាក់​នោះ​ទេ ការ​ព្យាបាល​នៅ​ដៃ​លោក​មិន​ងាយ​នឹង​របូត​ឡើយ។ លោក​ថា លោក​បាន​ព្យាបាល​ដោយ​ប្រើ​ថ្នាំ​បុរាណ​ឫស​ឈើ ដើម​ឈើ និង​វល្លិ​នៅ​ក្នុង​ព្រៃ ដោយ​បិត​ផង និង​ត្រាំ​ទឹក​ផង និង​ការ​ព្យាបាល​ដោយ​ប្រើ​មន្តអាគម​ផ្សំ​ផង។ ប៉ុន្តែ​បច្ចុប្បន្ន លោក​រាង​ធូរ​បន្តិច​ដោយសារ​មាន​មន្ទីរពេទ្យ​ច្រើន ដូច្នេះ​អ្នក​ភូមិ​គាត់​យក​ទៅ​មន្ទីរពេទ្យ​ព្យាបាល​តែ​ម្ដង៖ «គេ​មិន​ព្រម​ទៅ​គេ​ខ្លាច​អស់​លុយ​ច្រើន​ទៅ បង្ខំ​អង្វរ​ខ្ញុំ​ទៅ​ក៏​ខ្ញុំ​ចេះ​តែ​ទទួល​ទៅ តែ​បាន​ឥឡូវ​គេ អត់​ត្រូវ​ការ​ខ្ញុំ​អរ​ទៅ​ហើយ ព្រោះ​ខ្លួន​ចាស់​ផង។ ពី​ដើម​អត់​មាន​ពេទ្យ​មាន​អី​ក្រ​មនុស្ស​ចេះ​ដឹង​បាន អង្វរ​ប្រកែក​យ៉ាង​ម៉េច​ក៏​មិន​ឈ្នះ​គេ​ដែរ គេ​សុខ​ចិត្ត​ទុក​នៅ​ហ្នឹង សុខ​ចិត្ត​ថា ស្លាប់​ក៏​ស្លាប់​លើ​ដៃ​តា ឬ​ក៏​ស្លាប់​លើ​ដៃ​បង​អ៊ីចឹង​ទៅ​ចុះ​ពី​ដើម​ក្រ​ពេទ្យ បាន​កប​អ៊ីចឹង​ទៅ»

ដើម្បី​បង្ការ និង​បញ្ចៀស​ពស់​ចឹក លោក​វេជ្ជបណ្ឌិត​បាន​ផ្ដល់​ឱវាទ​ជាពិសេស​ដល់​ប្រជាពលរដ្ឋ​ដែល​ដើរ​រក​ម្ហូប​អាហារ​នៅ​ពេល​យប់ និង​ពេល​មាន​ភ្លៀង​ធ្លាក់ ដូចជា​ដើរ​ឆ្លុះ​កង្កែប បរបាញ់​សត្វ ជាដើម ឲ្យ​មាន​ការ​ប្រុង​ប្រយ័ត្ន​ពាក់​ស្បែក​ជើង​ក​វែង។ ចំណែក​នៅ​រដូវ​ច្រូត​កាត់ រដូវ​ទឹក​ជំនន់ ក៏​ជា​ពេលវេលា​មួយ​គួរ​ប្រុង​ប្រយ័ត្ន​ខ្ពស់​ដែរ។

លោក​វេជ្ជបណ្ឌិត​បាន​តំណាល​ថា ពាក្យ​ចាស់​ទុំ​នៅ​តំបន់​គាត់​តែង​ពោល​ថា ពស់​វែក​ដំបូក ចឹក​រត់​បាន​ពីរ​បី​ស្រែ ពស់​វែក​ស្រងែ រត់​រួច​ពីរ​បី​ព្យាម ឯ​ពស់​វែក​រនាម ចឹក​ភ្លាម​ស្លាប់​បាត់៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
  • បោះពុម្ព
  • ចែករំលែក
  • អ៊ីម៉ែល
គេហទំព័រ​ទាំងមូល