ទន្ទឹមនឹងប្រទេសកំពុងអភិវឌ្ឍ មានពលរដ្ឋមួយចំនួនហាក់ព្រងើយកន្តើយ និងមិនអើពើចំពោះកិច្ចការពារបរិស្ថាននៅជុំវិញខ្លួន។ មន្ត្រីជាន់ខ្ពស់នៃក្រសួងបរិស្ថាន អំពាវនាវឲ្យពលរដ្ឋខ្មែរចាប់អារម្មណ៍ និងរួមចំណែកទាំងអស់គ្នាក្នុងការការពារបរិស្ថាន។
យុវជនខ្លះដែលសកម្មរឿងបញ្ហាសង្គមគិតថា ការថែរក្សាបរិស្ថានអាចធ្វើទៅបាន លុះត្រាតែផ្ដើមចេញពីខ្លួនយើងផ្ទាល់។
ក្នុងនាទីយុវជន និងសង្គមសប្ដាហ៍នេះ អ្នកនាង ទេព សុរ៉ាវី មានសេចក្តីរាយការណ៍មួយអំពីការចូលរួមចំណែករបស់យុវជន ក្នុងកិច្ចការពារបរិស្ថានដូចតទៅ៖
ការចូលរួមការពារបរិស្ថាន ត្រូវមានមនុស្សគ្រប់វ័យទាំងអស់ចូលរួម ក្នុងនោះយុវវ័យជាកម្លាំងមួយចាំបាច់ ពីព្រោះពួកគេជាសសរទ្រូងប្រទេសជាតិទៅថ្ងៃអនាគត។
តាមការប៉ាន់ស្មានរបស់ក្រសួងបរិស្ថាន បង្ហាញថា មានពលរដ្ឋកម្ពុជា ប្រមាណពី ៦០ ទៅ ៧០ភាគរយដែលយល់ដឹងពីកិច្ចគាំពារបរិស្ថាន។ ប៉ុន្តែពលរដ្ឋខ្លះយល់ដឹងបញ្ហាបរិស្ថានហើយ តែមិនបានចូលរួមចំណែកការពារបរិស្ថានឡើយ។
យុវជន កឹម សុក្រិត និស្សិតឆ្នាំទី១ នៃសកលវិទ្យាល័យបញ្ញាសាស្ត្រ គិតថា ពលរដ្ឋខ្មែរត្រូវការចំណេះដឹងបន្ថែមពីផលប៉ះពាល់បរិស្ថាននៅលើពិភពលោក។ ការចែករំលែកចំណេះដឹងពីកិច្ចគាំពារបរិស្ថានដល់ក្មេងជំនាន់ក្រោយ គឺជារឿងសំខាន់ដែលរដ្ឋាភិបាលត្រូវតែយកចិត្តទុកដាក់។ យុវជនរូបនេះបន្តថា របៀបរបបរស់នៅស្អាត ក៏ជាកត្តាធ្វើឲ្យបរិស្ថានស្អាតបានដែរតាមរយៈការចោលសំរាមក្នុងធុងឲ្យបានត្រឹមត្រូវ ពិសេសការកាត់បន្ថយប្រើប្រាស់នូវឧបករណ៍ ឬយានយន្តដែលបញ្ចេញឧស្ម័នពុលដល់បរិយាកាស ដែលធ្វើឲ្យខូចដល់ស្រទាប់អូហ្សូន (Ozone)៖ «ខែនេះជាខែត្រជាក់ ពេលជិះឡានយើងអាចបើកកញ្ចក់បាន កុំបើកម៉ាស៊ីនត្រជាក់ ដើម្បីកុំឲ្យបញ្ចេញឧស្ម័នពុលទៅបរិស្ថានទៅថ្ងៃមុខទៀត។ អ៊ីចឹងបើយើងយល់ដឹង យើងមិនខ្លាចខ្មាសគេទេ»។
សព្វថ្ងៃនេះ ប្រទេសជាច្រើននៅក្នុងពិភពលោកកំពុងសម្ដែងការព្រួយបារម្ភ ដោយថាស្រទាប់អូហ្សូន (Ozone) ដែលការពារបរិយាកាសផែនដីកំពុងផ្លាស់ប្ដូរយ៉ាងខ្លាំង និងឈានទៅរកការអន្តរាយធ្ងន់ធ្ងរ ដោយសារតែសកម្មភាពរបស់មនុស្សបង្កឡើង។ ការព្រួយបារម្ភនេះ បានទាមទារឲ្យបណ្ដារដ្ឋទាំងអស់នៅក្នុងពិភពលោក ជួយការពារជាបន្ទាន់ទៅលើបរិស្ថាន និងការកាត់បន្ថយសារធាតុទាំងឡាយដែលអាចបំផ្លាញស្រទាប់អូហ្សូន។
យុវតីមួយរូបទៀតឈ្មោះ ស៊ីថា ឆដារដ្ឋ ឲ្យដឹងថា ប្រទេសកម្ពុជា កំពុងតែប្រឈមធ្ងន់ធ្ងរនូវការកាប់បំផ្លាញឈើខុសច្បាប់ ដែលជាប្រព័ន្ធការពារបរិស្ថានយ៉ាងសំខាន់។ យុវតីរូបនេះ និងក្រុមយុវជនឯទៀតដែលជាក្រុមការងារស្ម័គ្រចិត្ត កំពុងតែចូលរួមផ្សព្វផ្សាយនៅតាមសាលារៀនមួយចំនួនក្នុងរាជធានីភ្នំពេញ ដើម្បីរំឭកឲ្យយុវជនចូលរួមការពារបរិស្ថានទាំងអស់គ្នា និងលើកទឹកចិត្តឲ្យពួកគេចូលរួមសិក្ខាសាលាថ្នាក់ជាតិ ឬថ្នាក់តំបន់ដែលពាក់ព័ន្ធនឹងការយល់ដឹងបន្ថែមពីកិច្ចគាំពារបរិស្ថានលើពិភពលោក ហើយចែករំលែកចំណេះដឹងទាំងនោះទៅដល់យុវជនឯទៀត៖ «កន្លងមកខ្ញុំធ្វើការស្ម័គ្រចិត្តផ្សព្វផ្សាយពីកិច្ចការពារបរិស្ថាន និងជួយដើររើសសំរាម ពន្យល់ពលរដ្ឋពីការបោះចោលសំរាមក្នុងធុង របៀបបែងចែកសំរាមដែលអាចប្រើឡើងវិញបាន។ យើងក៏អាចកាត់បន្ថយពេលយើងធ្វើដំណើរផ្លូវជាមួយគ្នា។ យើងជិះម៉ូតូ ឬឡានជាមួយគ្នា ឬអាចជិះឡានក្រុងដើម្បីកាត់បន្ថយការបញ្ចេញឧស្ម័នទៅបរិយាកាស»។
ការយល់ដឹងផ្នែកបរិស្ថានរបស់ពលរដ្ឋ ត្រូវបានអនុរដ្ឋលេខាធិការក្រសួងបរិស្ថាន លោក ស៊ូ សាវុត វាយតម្លៃថាមានដំណើរទៅយឺត។ បញ្ហាសង្គ្រាមរ៉ាំរ៉ៃដែលកម្ពុជា ជួបប្រទះកន្លងមក ភាពក្រីក្ររបស់ពលរដ្ឋ គឺជាកត្តាដែលធ្វើឲ្យពលរដ្ឋមិនសូវយល់ដឹងពីបរិស្ថាន។ លោកគិតថា បញ្ហាបរិស្ថានចម្បងដែលកម្ពុជា ចាត់ទុកជាអាទិភាពក្នុងការដោះស្រាយបន្ទាន់នោះ គឺបញ្ហាសំរាមដែលពលរដ្ឋចេះតែបោះចោលពាសវាលពាលកាល៖ «អ្នកខ្លះយល់ពីបញ្ហាបរិស្ថាន តែធ្វើមិនយល់ ភ្នែកភ្លឺតែធ្វើជាងងឹត ត្រចៀកស្តាប់ឮតែធ្វើជាថ្លង់ នេះបានជាការលំបាក។ បើគាត់ជិះឡានទំនើប បើកកញ្ចប់បោះកន្ទុយបារី បោះក្រដាស ខាកស្ដោះ នេះមែនពួកគាត់មិនយល់ទេ តែគាត់មិនចូលរួម»។
ព្រៃឈើ គឺជាប្រព័ន្ធការពារបរិស្ថានដ៏សំខាន់។ កម្ពុជា បាត់បង់ព្រៃឈើជាច្រើនតាមរូបភាពផ្តល់ដីសម្បទានសេដ្ឋកិច្ចឲ្យក្រុមហ៊ុនវិនិយោគ។
ឧបនាយករដ្ឋមន្ត្រី លោក យឹម ឆៃលី និងជាប្រធានក្រុមប្រឹក្សាស្ដារអភិវឌ្ឍន៍វិស័យកសិកម្ម និងជនបទនៃរដ្ឋាភិបាលកម្ពុជា ធ្លាប់មានប្រសាសន៍ថា ដើម្បីឆ្លើយតបទៅនឹងការលុបបំបាត់សារធាតុបំផ្លាញស្រទាប់អូហ្សូន និងជួយទប់ស្កាត់ការកើនកម្ដៅផែនដី រដ្ឋាភិបាលកម្ពុជា បានរួមចំណែកយ៉ាងធំធេងរួមមាន ការដាំដើមឈើឡើងវិញដើម្បីឲ្យមានគម្របព្រៃបៃតងនៅទូទាំងប្រទេស និងថែរក្សាព្រៃឈើ សម្រាប់ស្រូបទាញយកការវិនិយោគនូវឥណទានកាបូន (Carbon Credit) ពីព្រោះតែព្រៃឈើ គឺជាទីផ្សារកាបូនដ៏មានតម្លៃនៅក្នុងពិភពលោក។
យ៉ាងណា កិច្ចខិតខំប្រឹងប្រែងដាំដើមឈើឡើងវិញរបស់រដ្ឋាភិបាលកន្លងមក មិនសមាមាត្រនឹងការកាប់ព្រៃឈើយ៉ាងរង្គាលរបស់ក្រុមឈ្មួញ និងអ្នកវិនិយោគនោះឡើយ។
ប្រធានអង្គការកិច្ចការពិសេសសិទ្ធិមនុស្សកម្ពុជា លោក អ៊ូច ឡេង កត់សម្គាល់ថា អ្នកបំផ្លាញព្រៃឈើ និងបំផ្លាញប្រព័ន្ធការពារបរិស្ថានច្រើននោះ គឺមន្ត្រីមានអំណាច និងឧកញ៉ាធំៗដែលមានលុយ។ លោកគិតថា ការចូលរួមការពារបរិស្ថានឲ្យមានប្រសិទ្ធភាព រដ្ឋាភិបាលត្រូវធ្វើយ៉ាងណាឲ្យមន្ត្រីពាក់ព័ន្ធ និងអាជ្ញាធរដែនដី កងទ័ព ត្រូវបញ្ឈប់សកម្មភាពបទល្មើសព្រៃឈើជាមុនសិន៖ «យើងឃើញថា កងកម្លាំងប្រដាប់អាវុធ អ្នកមានអំណាច ឧកញ៉ាធំៗ គឺរកស៊ីមុខរបរធំបំផុតនោះ គឺការកាប់បំផ្លាញព្រៃឈើហ្នឹងហើយ ដែលបំផ្លាញធ្ងន់ធ្ងរដល់ប្រព័ន្ធការពារបរិស្ថាននៅកម្ពុជា ក៏ដូចជាប្រព័ន្ធការពារបរិស្ថានពិភពលោក ដែលធ្វើឲ្យមានការប្រែប្រួលអាកាសធាតុ មានគ្រោះមហន្តរាយធម្មជាតិដូចយើងបានឃើញនាពេលកន្លងមក»។
ក្នុងមួយឆ្នាំៗមានឈើជាច្រើនម៉ឺនម៉ែត្រគូប ត្រូវបានកាប់បំផ្លាញដោយខុសច្បាប់ចេញពីព្រៃរនាម ព្រៃស្រោង និងតំបន់ព្រៃឡង់ និងដឹកយកទៅលក់នៅក្រៅប្រទេស។
អង្គការកិច្ចការពិសេសសិទ្ធិមនុស្សកម្ពុជា រកឃើញកាលពីឆ្នាំ២០១៣ ថា គម្របព្រៃឈើទាំងមូលនៅសល់ប្រមាណ ២៨ភាគរយប៉ុណ្ណោះនៃផ្ទៃព្រៃឈើសរុបដែលមានចំនួន ១០លានហិកតារនៅចន្លោះឆ្នាំ១៩៧៩ រហូតដល់ឆ្នាំ១៩៩២។
ក្រុមអ្នកជំនាញខាងបរិស្ថាន បង្ហាញឲ្យឃើញថា សព្វថ្ងៃនេះពិភពលោកកំពុងតែប្រឈមមុខនឹងគ្រោះធម្មជាតិធំៗជាច្រើន រួមមាន គ្រោះរាំងស្ងួត ទឹកជំនន់ និងខ្យល់ព្យុះជាដើម។ គ្រោះធម្មជាតិទាំងនោះបណ្ដាលមកពីមនុស្សបង្កើតសារធាតុគីមីយកទៅប្រើប្រាស់ ហើយសារធាតុមួយចំនួនបានបំផ្លាញសារធាតុសំខាន់ដែលការពារផែនដី ធ្វើឲ្យផែនដីទាំងមូលបាត់បង់តុល្យភាពនៃការជួយជីវិត និងសុខភាពមនុស្សសត្វ។ យុវជនត្រូវបានក្លាយជាចលករសំខាន់ក្នុងការធ្វើឲ្យមានការផ្លាស់ប្ដូរ ការប្រែប្រួលអាកាសធាតុ តាមរយៈសកម្មភាព និងការចូលរួមគាំពារបរិស្ថាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។