និស្សិត​ខ្មែរ​នៅ​ប្រទេស​ម៉ាឡេស៊ី​ផ្សព្វផ្សាយ​ពី​វប្បធម៌

និស្សិត​ខ្មែរ​ម្នាក់​ដែល​កំពុង​តែ​សិក្សា​នៅ​ប្រទេស​ម៉ាឡេស៊ី បាន​យក​ទង់​ជាតិ​ប្រទេស​កម្ពុជា​ទៅ​បោះ​នៅ​លើ​កំពូល​ភ្នំ​ដែល​ខ្ពស់​ជាង​គេ​នៅ​អាស៊ី​អាគ្នេយ៍ ដើម្បី​ឲ្យ​គេ​ស្គាល់​កាន់តែ​ច្បាស់​ពី​ប្រទេស​កម្ពុជា។
ដោយ មុំ សុផុន
2010-03-28
អ៊ីម៉ែល
មតិ
Share
បោះពុម្ព
និស្សិត​ខ្មែរ លឹម វិច្ឆិកា ឈរ​កាន់​ទង់​ជាតិ​ប្រទេស​កម្ពុជា នៅ​លើ​កំពូល​ភ្នំ​គីណាបាលូ ដែល​ជា​ភ្នំ​ខ្ពស់​ជាង​គេ​នៅ​អាស៊ី​អាគ្នេយ៍ ស្ថិត​នៅ​ក្នុង​រដ្ឋ​សាបា ភាគ​ខាង​កើត​នៃ​ប្រទេស​ម៉ាឡេស៊ី។
និស្សិត​ខ្មែរ លឹម វិច្ឆិកា ឈរ​កាន់​ទង់​ជាតិ​ប្រទេស​កម្ពុជា នៅ​លើ​កំពូល​ភ្នំ​គីណាបាលូ ដែល​ជា​ភ្នំ​ខ្ពស់​ជាង​គេ​នៅ​អាស៊ី​អាគ្នេយ៍ ស្ថិត​នៅ​ក្នុង​រដ្ឋ​សាបា ភាគ​ខាង​កើត​នៃ​ប្រទេស​ម៉ាឡេស៊ី។
Photo supplied

ទង់​ជាតិ​នៃ​ប្រទេស​កម្ពុជា​ត្រូវ​និស្សិត​ជនជាតិ​ខ្មែរ​ម្នាក់ ដែល​កំពុង​តែ​រៀន​ថ្នាក់​អាហារូបករណ៍​នៅ​ឯ​ប្រទេស​ម៉ាឡេស៊ី យក​ទៅ​បោះ​នៅ​លើ​កំពូល​ភ្នំ គីណាបាលូ ស្ថិត​នៅ​ក្នុង​រដ្ឋ​សាបា ភាគ​ខាង​កើត​នៃ​ប្រទេស​ម៉ាឡេស៊ី ដែល​មាន​កម្ពស់ ៤.០៩៥​ម៉ែត្រ ហើយ​ក៏​ជា​ភ្នំ​ដែល​ខ្ពស់​ជាង​គេ​បង្អស់​​នៅ​ក្នុង​តំបន់​អាស៊ី​អាគ្នេយ៍។

លឹម វិច្ឆិកា អាយុ ២០​ឆ្នាំ ជា​និស្សិត​បរិញ្ញាបត្រ ឆ្នាំ​ទី​២ ផ្នែក​វិស្វករ​សំណង់​ស៊ីវិល​នៅ​ឯ​សាកល​វិទ្យាល័យ​បច្ចេកវិទ្យា ប៉េត្រូណាស់ (Universiti Teknologi PETRONAS) ក្នុង​ប្រទេស​ម៉ាឡេស៊ី បាន​និយាយ​ឲ្យ​ដឹង​ថា នេះ​ជា​មោទនភាព​សម្រាប់​ប្រជា​ពលរដ្ឋ និង​យុវជន​ខ្មែរ ដែល​បាន​ចូល​រួម​ឯកត្តកម្ម​ក្នុង​ការ​ឡើង​ភ្នំ​ខ្ពស់​បំផុត ជាមួយ​នឹង​យុវជន​មក​ពី​ប្រទេស​ចំនួន ២៧ ក្នុង​តំបន់​អាស៊ី​អាគ្នេយ៍។

លោក លឹម វិច្ឆិកា បាន​ឲ្យ​ដឹង​ថា ៖ «កម្មវិធី​ហ្នឹង​គឺ​ជា​កម្មវិធី​មួយ​រៀបចំ​ឡើង​ដោយ​សាលា​ខ្ញុំ​ផ្ទាល់ គឺ Universiti Teknologi PETRONAS មហា​វិទ្យាល័យ​បច្ចេកវិទ្យា PETRONAS។ កម្មវិធី​ហ្នឹង​គឺ​គេ​ជ្រើសរើស​សិស្ស​តំណាង​ឲ្យ​ប្រទេស​មួយ​ៗ មក​ពី ២៧​ប្រទេស ដែល​មាន​នៅ​ក្នុង​សាលា​របស់​ខ្ញុំ​ហ្នឹង ដើម្បី​ទៅ​ឡើង​ភ្នំ​ខ្ពស់​ជាង​គេ​នៅ​អាស៊ី​អាគ្នេយ៍។ នេះ​ជា​ឯកត្តកម្ម​មួយ​ក្នុង​ការ​ឡើង​ភ្នំ​ចំនួន ២៧​ប្រទេស​ក្នុង​ពេល​តែ​មួយ។ ជា​ឯកត្តកម្ម​សម្រាប់​ភ្នំ​ហ្នឹង​ផង ហើយ​អាច​ជា​ឯកត្តកម្ម​ពិភពលោក​ផង»

វិច្ឆិកា បាន​ថ្លែង​ឲ្យ​ដឹង​ទៀត​ថា នៅ​ក្នុង​ការ​ចូល​រួម​បោះ​ជំរំ​ជាមួយ​យុវជន​ចំនួន ២៧​ប្រទេស​ក្នុង​រយៈពេល ៧​ថ្ងៃ​នោះ គឺ​ធ្វើ​ឡើង​ដើម្បី​លើក​កម្ពស់​នូវ​សាមគ្គីភាព ការ​រួម​រស់​ជា​មួយ​គ្នា និង​ការ​ស្វែងយល់​ពី​វប្បធម៌​ទៅ​វិញ​ទៅ​មក រវាង​និស្សិត​បរទេស និង​និស្សិត​ខ្មែរ និង​ជា​មួយ​និស្សិត​នៃ​ប្រទេស​ម៉ាឡេស៊ី​ផង​ដែរ។

និស្សិត លឹម វិច្ឆិកា បាន​រៀបរាប់​ថា ក្នុង​អំឡុង​ពេល​កម្មសិក្សា និង​ឡើង​ភ្នំ​នោះ រូប​គាត់​រួម​ជាមួយ​និស្សិត​នៃ​ប្រទេស​ផ្សេង​ៗ​ទៀត ដែល​តំណាង​ឲ្យ​ប្រទេស​គេ​រៀង​ៗ​ខ្លួន បាន​ចុះ​ទៅ​ប្រាស្រ័យ​ទាក់ទង​ដោយ​ផ្ទាល់​ជាមួយ​ប្រជាជន​នៃ​រដ្ឋ​សាបា ដើម្បី​ស្វែងយល់​វប្បធម៌ និង​ការ​រស់នៅ​របស់​ប្រជាជន​ម៉ាឡេស៊ី ហើយ​ក៏​បាន​ចុះ​បង្រៀន​កូន​សិស្ស​នៅ​ក្នុង​តំបន់​នោះ​ផង​ដែរ។

យុវជន​រូប​នោះ​បាន​ថ្លែង​ទៀត​ថា ក្នុង​រយៈពេល​បោះ​ជំរំ​ជា​មួយ​និស្សិត​៤០​នាក់​នោះ ក្រៅ​ពី​ទទួល​បទពិសោធន៍​ក្នុង​ការ​ឡើង​ភ្នំ​ដែល​ខ្ពស់​បំផុត រួម​ជាមួយ​ការ​យល់​ដឹង​ពី​វប្បធម៌​ឥរិយាបថ​របស់​យុវជន​ដែល​មក​ពី​ប្រទេស​នានា និង​វប្បធម៌​របស់​គេ​ផង គឺ​គេ​បាន​ចូលរួម​ផ្សព្វផ្សាយ​អំពី​វប្បធម៌​ប្រពៃណី​ខ្មែរ ដល់​និស្សិត​បរទេស​ទាំង​នោះ​ផង​ដែរ មិន​ត្រឹម​តែ​ប៉ុណ្ណោះ​នេះ​ជា​មោទនភាព​បំផុត​ដែល​ទង់​ជាតិ​ខ្មែរ​ត្រូវ​បាន​បោះ​នៅ​លើ​កំពូល​ភ្នំ​នោះ។

លោក វិច្ឆិកា បាន​អះអាង​ថា ៖ «ក្នុង​អំឡុង​ពេល​ហ្នឹង ដើម្បី​ផ្សព្វផ្សាយ​ថា យើង​ជា​ខ្មែរ ហើយ​ឲ្យ​គេ​មើល​មក ដឹង​ថា​យើង​ជា​ខ្មែរ គឺ​ខ្ញុំ​បង្ហាញ​ពី​ចរិត​លក្ខណៈ​មួយ​ដ៏​ប្រពៃ​របស់​ខ្មែរ​យើង គឺ​ថា គេ​ស្រឡាញ់​រាប់អាន​យើង។ សំខាន់ អាវ​ដែល​ខ្ញុំ​ពាក់ គឺ​ដូច​ជា​អាវ​រូប​អង្គរវត្ត អាវ​រូប​ព្រះវិហារ​អី​អ៊ីចឹង គេ​ឃើញ​មក គេ​ដឹង​ថា​យើង​ខ្មែរ។ គោលដៅ​ក្នុង​កម្មវិធី​ហ្នឹង គឺ​អ្នក​ដែល​មក​ពី​ប្រទេស​ទាំង​អស់​ហ្នឹង គឺ​ត្រូវ​យក​ទង់ជាតិ​រៀង​ៗ​ខ្លួន យក​ទៅ​ដោត​នៅ​លើ​ហ្នឹង»

តំណាង​សហគមន៍​និស្សិត​ខ្មែរ​នៅ​ប្រទេស​ម៉ាឡេស៊ី បាន​ថ្លែង​ឲ្យ​ដឹង​ដែរ​ថា ការ​ផ្សព្វផ្សាយ​វប្បធម៌​ និង​អរិយធម៌​ខ្មែរ មិន​មែន​តែ​និស្សិត លឹម វិច្ឆិកា ដែល​បាន​យក​ទង់​ជាតិ​ខ្មែរ​ទៅ​ដាក់​នៅ​ភ្នំ គីណាបាលូ ប៉ុណ្ណោះ​ទេ គឺ​ក្រុម​និស្សិត​ដែល​បាន​បន្ត​ការ​សិក្សា​នៅ​បរទេស ជា​ពិសេស​ក្រុម​និស្សិត​ដែល​បាន​ទៅ​សិក្សា​នៅ​ឯ​ប្រទេស​ម៉ាឡេស៊ី​ទាំង​អស់ គឺ​ម្នាក់​ៗ​ក៏​បាន​ផ្សព្វ​ផ្សាយ​ពី​វិស័យ​ទេសចរណ៍​របស់​ប្រទេស​កម្ពុជា ដល់​បណ្ដា​និស្សិត​ដែល​មក​ពី​ប្រទេស​ផ្សេង​ៗ​នោះ​ផង​ដែរ។

តំណាង​សហគមន៍​និស្សិត​ខ្មែរ​នៅ​ប្រទេស​ម៉ាឡេស៊ី លោក ប៊ួយ រីណា ជា​និស្សិត​ឆ្នាំ​ទី​២ ឯកទេស​វិស្វកម្ម​ប្រេង នៅ​ឯ​សាកល​វិទ្យាល័យ​បច្ចេកវិទ្យា ប៉េត្រូណាស់ បាន​និយាយ​ថា នៅ​មាន​យុវជន​បរទេស​មួយ​ចំនួន​ទៀត​នៅ​មិន​ទាន់​ស្គាល់​ប្រទេស​កម្ពុជា​នៅ​ឡើយ ក៏ប៉ុន្តែ​ក្រុម​និស្សិត​តែង​តែ​បាន​បង្ហាញ​អត្តសញ្ញាណ​របស់​ប្រទេស​កម្ពុជា​ទៅ​និស្សិត​បរទេស​ទាំង​នោះ។

លោក ប៊ួយ រីណា បាន​បញ្ជាក់​ថា ៖ «អ្នក​ខ្លះ​គឺ​គេ​អត់​ស្គាល់​ខ្មែរ​យើង​ទេ ដូច​ជា​យើង​នៅ​នេះ និស្សិត​មក​ពី​អាស៊ី​កណ្ដាល មជ្ឈិម​បូព៌ា ពួក​អាហ្វ្រិក ឥណ្ឌា ប៉ាគីស្ថាន​អី​អ៊ីចឹង។ ប្រទេស​ខ្លះ​គាត់​អត់​ដែល​ស្គាល់​ខ្មែរ​យើង​ទេ។ អ៊ីចឹង​គឺ​យើង​តែង​ពន្យល់​ប្រាប់​គាត់​ថា ខ្មែរ​យើង​មាន​អង្គរវត្ត ខ្មែរ​យើង​ខុស​ពី​ថៃ​យ៉ាង​ណា!»

ប៊ួយ រីណា បាន​ឲ្យ​ដឹង​ទៀត​ថា នៅ​ក្នុង​ថ្នាក់​រៀន​របស់​គាត់ គឺ​មាន​ការ​ចែក​រំលែក​ការ​យល់​ដឹង​ឲ្យ​គ្នា​ទៅ​វិញ​ទៅ​មក អំពី​ប្រទេស​រៀង​ៗ​ខ្លួន ហើយ​ក៏​មាន​កម្មវិធី​ប្រចាំ​ឆ្នាំ សម្រាប់​និស្សិត​ដែល​មក​ពី​បណ្ដា​ប្រទេស​នានា ដូច​ជា​ការ​តាំង​ពិព័រណ៍​របស់របរ​ប្រើប្រាស់​ប្រចាំ​ថ្ងៃ និង​វត្ថុ​អនុស្សាវរីយ៍​ដែល​បង្ហាញ​ពី​ប្រទេស​កម្ពុជា​ជា​ដើម។

លោក ប៊ួយ រីណា បាន​បន្ថែម​ថា ៖ «យើង​តែងតែ​មាន​សកម្មភាព​ប្រចាំ​ឆ្នាំ​ដែល​យើង​តាំង​ពិព័រណ៍។ តាំង​ពិព័រណ៍​ហ្នឹង គឺ​យើង​យក​ផលិតផល​ខ្មែរ​យើង​ទៅ​ដាក់​តាំង​ឲ្យ​គេ​មើល ដូច​ជា​រទេះគោ រូប​អប្សរា របស់​ប្រើប្រាស់​នៅ​ចង្ក្រាន​បាយ ក្នុង​ជីវភាព​រស់នៅ​របស់​ខ្មែរ​យើង​ហ្នឹង ដូច​ជា ផ្ទាំង​គំនូរ ហើយ​និង​របស់​មួយ​ចំនួន​ទៀត រូប​ប្រាសាទ​អង្គរវត្ត។ យើង​មាន​ចែក​ក្រដាស​ឲ្យ​គេ​មើល​ព័ត៌មាន​អំពី​ប្រទេស​ខ្មែរ​យើង ពី​វប្បធម៌។ យើង​ក៏​តែងតែ​មាន​ធ្វើ​ការ​សម្ដែង ១​ឆ្នាំ ២​ដង ទាក់ទង​នឹង​របាំ​ប្រពៃណី​ខ្មែរ​យើង។ ការ​សម្ដែង​ហ្នឹង​មាន​ការ​ចូលរួម​ពី​និស្សិត​បរទេស​ទាំង​អស់​មាន ៣៣​ប្រទេស កំពុង​សិក្សា​នៅ​សាកល​វិទ្យាល័យ​ហ្នឹង គាត់​ចូលរួម​ទាំង​អស់​គ្នា»

និស្សិត​រូប​នេះ​បាន​បញ្ជក់​ទៀត​ថា ក្នុង​ពេល​ដែល​មាន​កម្មវិធី​តាំង​ពិព័រណ៍​នោះ​ដែរ គឺ​និស្សិត​ខ្មែរ​ទាំង​អស់​ក៏​មាន​ការ​សម្ដែង​របាំ​បុរាណ និង​សម្ដែង​សិល្បៈ​ប្រពៃណី​ជាតិ​ផង​ដែរ ៖ «ពី​មុន​យើង​មាន​ធ្វើ​របាំ​គោះ​ត្រឡោក របាំ​នារី​ជា​ជួរ ការ​សម្ដែង​ក្បាច់​គុណ បុកតោ ហើយ​និង​របាំ​ជា​ច្រើន​ទៀត ហើយ​នៅ​ប្រហែល​ជា​មួយ​ខែ​ទៀត យើង​នឹង​សម្ដែង​របាំ​ថ្មី​មួយ​ទៀត គឺ​របាំ​ស្វា។ នៅ​ក្នុង​ការ​សម្ដែង​ហ្នឹង គឺ​ពី​មួយ​ឆ្នាំ​ទៅ​មួយ​ឆ្នាំ យើង​តែងតែ​រក​របាំ​ថ្មី​ៗ ព្រោះ​យើង​ចង់​ឲ្យ​គេ​ដឹង​ថា ខ្មែរ​យើង​មាន​វប្បធម៌​ច្រើន ហើយ​និង​ទូលំ​ទូលាយ»

កញ្ញា ណែម សុផា ជា​និស្សិត​ដែល​កំពុង​បន្ត​ការ​សិក្សា​នៅ​ឯ​ប្រទេស​ម៉ាឡេស៊ី​នោះ​ដែរ បាន​ថ្លែង​ស្រដៀង​គ្នា​ជា​មួយ​និស្សិត​ផ្សេង​ៗ​នោះ​ថា ក្នុង​ពេល​ដែល​មាន​ការ​សម្ដែង​របាំ​ប្រពៃណី​ខ្មែរ​នោះ ក្រុម​និស្សិត​ខ្មែរ​ក៏បាន​ទទួល​នូវ​វប្បធម៌​ថ្មី​ៗ ដែល​ក្រុម​និស្សិត​បរទេស​ទាំងនោះ​បាន​យក​មក​ផ្សព្វផ្សាយ​នៅ​ក្នុង​មហា​វិទ្យាល័យ​នោះ​ដែរ។

កញ្ញា សុផា បាន​ថ្លែង​ទៀត​ថា ក្រុម​និស្សិត​ខ្មែរ​នឹង​មាន​ការ​សម្ដែង​របាំ​បុរាណ​នៅ​ពេល​ខាង​មុខ​នេះ ដើម្បី​បង្ហាញ​ដល់​និស្សិត​ក្នុង​មហា​វិទ្យាល័យ​ផង និង​ដល់​មហា​ជន​ទូទៅ​នៅ​ក្នុង​ប្រទេស​ម៉ាឡេស៊ី​នោះ​ផង។

កញ្ញា សុផា បាន​អះអាង​ថា ៖ «ខ្ញុំ​នៅ​នេះ មិន​ថា​តែ​ខ្ញុំ និង​មិត្តភ័ក្ដិ​ខ្ញុំ​ទាំង​អស់​គ្នា​ទេ គឺ​យើង​ព្យាយាម​បង្ហាញ​ពី​វប្បធម៌​ខ្មែរ ដូច​ជា​ការ​សម្ដែង​របាំ​ប្រពៃណី​របស់​ខ្មែរ​យើង។ នៅ​ថ្ងៃ​៩ ខែ​ក្រោយ​នេះ មាន​ការ​សម្ដែង​ធំ​ទៀត គេ​ដាក់ Concert របស់​សាលា គេ​ប្រមូល​ផ្ដុំ​សិស្ស​អន្តរជាតិ​ទាំង​អស់​មក​សម្ដែង ហើយ​យើង​លើក​យក​របាំ​រាមកេរ្តិ៍ ឈុត​ត្រង់​ស្វា​ពុល ហើយ​និង​ទេព​មច្ឆា ដើម្បី​លើក​តម្កើង​ខ្មែរ​យើង ហើយ​ក៏​មិន​មែន​តែ​ម្ដង​ហ្នឹង​ទេ ព្រោះ​យើង​មាន​ការ​សម្ដែង​ហ្នឹង​ម្ដង​ទៅ​ពីរ​ដង​ក្នុង​មួយ​ឆមាស ហើយ​មាន​ការ​តាំង​ពិព័រណ៍​ផ្សេង​ៗ​ហ្នឹង ខ្មែរ​យើង​ចូលរួម​ច្រើន។ មួយ​ទៀត​នៅ​ក្នុង​សាលា​ហ្នឹង គេ​មាន​សមាគម​និស្សិត​ផ្សេង​ៗ​អ៊ីចឹង គឺ​យើង​ចូលរួម​រហូត ហើយ​យើង​ក៏​នៅ​ក្នុង​ថ្នាក់​ដឹកនាំ​ដែរ ដូច្នេះ​គេ​ស្គាល់​ខ្មែរ​យើង​ច្រើន»

ក្រុម​សហគមន៍​និស្សិត​នៅ​ប្រទេស​ម៉ាឡេស៊ី បាន​ថ្លែង​ឲ្យ​ដឹង​ថា នៅ​ក្នុង​ពេល​បុណ្យ​ចូល​ឆ្នាំ​ខ្មែរ​ខាង​មុខ​នេះ ក្រុម​និស្សិត​នឹង​បង្ហាញ​វប្បធម៌​ខ្មែរ​ទៅ​ដល់​និស្សិត​បរទេស​ផ្សេងៗ​ទៀត ដោយ​នឹង​រៀបចំ​ពិធី​ចូល​ឆ្នាំ ដោយ​មាន​លេង​ល្បែង​ប្រជាប្រិយ​ប្រពៃណី​ខ្មែរ​ផង​ដែរ៕

ព័ត៌មាន (1)
Share

អ្នក​អាន​អនាមិក

គួរឱ្យកោតសរសើរណាស់

Mar 29, 2010 08:44 AM

គេហទំព័រ​ទាំងមូល