សេចក្ដីប្រកាសព័ត៌មានរបស់ក្រសួងកសិកម្មកាលពីថ្ងៃទី៦ឧសភា បានលើកឡើងថា បើទោះជាជំងឺនេះ មិនទាន់ឆ្លងចូលកម្ពុជា ប៉ុន្តែក្រសួងកំពុងយកចិត្តទុកដាក់ការឆ្លងជំងឺនេះ នៅក្នុងប្រទេសថៃ និងកំពុងសហការយ៉ាងជិតស្និទ្ធជាមួយអាជ្ញាធរនៅតាមព្រំដែន ដើម្បីពិនិត្យនិងបង្ការកុំឱ្យជំងឺនេះឆ្លងចូលមកកម្ពុជា។
កាសែតបាងកកប៉ុស្ដិ៍ ចុះផ្សាយកាលពីថ្ងៃទី៧ ឧសភា ថា អាជ្ញាធរថៃនៅក្នុងខេត្ត មុកដាហាន (Mukdahan) ស្ថិតនៅភាគឦសានប្រទេសថៃ បានប្រកាសរកឃើញជំងឺឈាមខ្មៅចំនួន៤ករណី ក្នុងនោះស្លាប់ម្នាក់។ ជំងឺនេះ ឆ្លងតាមរយៈការប៉ះពាល់ផ្ទាល់ ឬការបរិភោគសាច់គោឆៅដែលមានផ្ទុកមេរោគនេះ។
អាជ្ញាធរថៃ បានអំពាវនាវឱ្យពលរដ្ឋរបស់ខ្លួន ជៀសវាងការទទួលទានសាច់គោឆៅ ឬចម្អិនក្នុងសីតុណ្ហភាព១២០អង្សារសេ និងត្រូវទុកឱ្យពុះរយៈពេល២០នាទី។ ជំងឺអង់ត្រាក់ ឬឈាមខ្មៅ ដែលមានប្រភពចេញពីសត្វគោនេះ មិនទាន់មានថ្នាំវ៉ាក់សាំងការពារនៅឡើយ ហើយភាគច្រើន ត្រូវបានរកឃើញលើសត្វផ្សេងទៀត ដូចជា ក្របី ពពែ និងចៀមជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។