របាយការណ៍សេរីភាពសារព័ត៌មានពិភពលោក ឆ្នាំ២០១៨ រកឃើញថា សេរីភាពសារព័ត៌មាននៅកម្ពុជា ក្នុងរបបលោក ហ៊ុន សែន បានធ្លាក់ចំណាត់ថ្នាក់ខ្លាំង មិនធ្លាប់មាន ដោយសារការធ្វើទុក្ខបុកម្នេញ មកលើប្រព័ន្ធផ្សព្វផ្សាយឯករាជ្យ និងរឹតត្បិតសិទ្ធិសេរីភាព ក្នុងការបញ្ចេញមតិ។
តាមរយៈសន្ទស្សន៍នៃសេរីភាពសារព័ត៌មានពិភពលោកឆ្នាំ២០១៨ ដែលចងក្រងដោយអង្គការអ្នកកាសែតគ្មានព្រំដែន (Reporters Without Borders) ប្រទេសកម្ពុជា បានធ្លាក់ចំណាត់ថ្នាក់យ៉ាងគំហុក រហូតដល់១០លេខ គឺធ្លាក់ពីលេខ១៣២ ក្នុងឆ្នាំ២០១៧ មកលេខ១៤២ ក្នុងឆ្នាំ២០១៨នេះ ក្នុងចំណោម១៨០ ប្រទេស។
កម្ពុជា ជាប់ចំណាត់ថ្នាក់អាក្រក់ផ្នែកសេរីភាពសារព័ត៌មាន ដោយឈរនៅលេខរៀង ទាបជាងប្រទេសអាស៊ានដូចគ្នា ដូចជាទាបជាងប្រទេសថៃ និងភូមា ជាដើម។ ប៉ុន្តែ គ្រាន់បើជាងប្រទេស ឡាវ វៀតណាម ប្រ៊ុយណេ និង សិង្ហបុរី។ របបលោក ហ៊ុន សែន កំពុងចម្លងតាមគំរូប្រទេសចិនកុម្មុយនិស្ត ក្នុងការគ្រប់គ្រងប្រព័ន្ធផ្សព្វផ្សាយ ដែលគាំទ្ររដ្ឋ និងបង្ក្រាបប្រព័ន្ធផ្សព្វផ្សាយឯករាជ្យ៕
