លោកនាយករដ្ឋមន្ត្រី ហ៊ុន ម៉ាណែត ថ្លែងអួតអាងប្រាប់ទៅកាន់ក្រុមមេដឹកនាំពិភពលោកនៅឯមហាសន្និបាតអង្គការសហប្រជាជាតិកាលពីចុងខែកញ្ញា ថា កម្ពុជាមានមហិច្ឆតាក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់ ឬប្រទេសអ្នកមាន ប្រកបដោយ «ភាពរឹងមាំ រស់រវើក រុងរឿង និងវិបុលភាព» នៅត្រឹមឆ្នាំ២០៥០។ លោកថ្លែងយ៉ាងដូច្នេះ ក្នុងពេលដែលកម្ពុជាក្រោមការដឹកនាំជិត៤០ឆ្នាំរបស់ឪពុកលោក និងក្រោមការដឹកនាំរបស់លោក ត្រូវបានញាំញី និងបំផ្លិចបំផ្លាញដោយអំពើពុករលួយជាប្រព័ន្ធ ដោយសារអំពើសែស្រឡាយបណ្តាញបក្ខពួកនិយមចាក់ស្រេះពីថ្នាក់ក្រោមដល់ថ្នាក់កំពូលតាមរយៈប្រព័ន្ធ «ឯងជួយអញ អញជួយឯង»។ ប្រព័ន្ធនេះកំពុងចាក់គ្រឹះចូលយ៉ាងជ្រៅក្នុងសង្គមកម្ពុជា និងធ្វើឱ្យទន់ខ្សោយដល់ការគោរពច្បាប់ជាធំ ការអនុវត្តប្រជាធិបតេយ្យ និងការគោរពសិទ្ធិមនុស្ស ក្នុងពេលដែលស្ថាប័នព័ត៌មានឯករាជ្យត្រូវបានធ្វើឱ្យទន់ខ្សោយ។
ទន្ទឹមនឹងការណ៍ដែលលោក ហ៊ុន ម៉ាណែត បង្ហាញពីមហិច្ឆតាក្លាយជាប្រទេសអ្នកមាននេះ រដ្ឋាភិបាលរបស់លោកបន្តអសមត្ថភាពក្នុងការបង្កើតការងារធ្វើជូនដល់ពលរដ្ឋក្នុងស្រុក។ ពលរដ្ឋកម្ពុជាមិនតិចជាង២លាននាក់ឡើយត្រូវបង្ខំចិត្តធ្វើចំណាកស្រុកទាំងស្របច្បាប់ និងខុសច្បាប់ទៅស្វែងរកការងារធ្វើនៅក្រៅប្រទេស ដើម្បីស្វែងរកប្រាក់ចិញ្ចឹមក្រពះ និងគ្រួសារ។ កម្ពុជាមានអត្រាពលរដ្ឋរស់នៅក្រោមបន្ទាត់ក្រីក្រជាង១៧%។ កាន់តែធ្ងន់ធ្ងរជាងនេះ ពលរដ្ឋមិនតិចជាង ១សែន៦ម៉ឺននាក់ទេ បានលក់ដីធ្លីរបស់ពួកគេដើម្បីសងបំណុលធនាគារ ឬកម្ចីឥណទានក្នុងរយៈពេល៥ឆ្នាំចុងក្រោយ ខណៈចន្លោះពី ២៥% ទៅ ៥០% នៃពលរដ្ឋចំនួនជាង ២លាន៨សែនគ្រួសារ កំពុងជាប់ជំពាក់បំណុលវ័ណ្ឌក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។