តំណាងរាស្រ្ដបក្សសមរង្ស៊ី៖ ការកំណត់បង្គោលព្រំដែនធ្វើឲ្យបាត់ទឹកដីកម្ពុជា
2009.12.15
ក្រុមតំណាងរាស្រ្ដបក្សសមរង្ស៊ីនិងពលរដ្ឋប្រឈមមុខនឹងសមត្ថកិច្ចខេត្តស្វាយរៀង ខណៈដែលចុះពិនិត្យស្ថានភាពនៃការបោះបង្គោលព្រំដែនកម្ពុជា-វៀតណាម នៅឃុំសំរោង ស្រុកចន្រ្ទា កាលពីថ្ងៃ១៤ ធ្នូ ២០០៩។
ទោះបីជាមានការរារាំងពីសំណាក់កងកម្លាំងអាជ្ញាធរយ៉ាងណាក៏ដោយ ក៏ប្រតិភូនៃក្រុមអ្នកតំណាងរាស្ត្រគណបក្សប្រឆាំងបានធ្វើដំណើរទៅដល់គោលដៅដូចបំណង ហើយបានធ្វើការសន្និដ្ឋានថា ការបោះបង្គោលកំណត់ព្រំដែនមិនមានភាពត្រឹមត្រូវទេ។
បន្ទាប់ពីក្រុមអ្នកតំណាងរាស្ត្រចំនួន២១រូប ព្រមទាំងមន្ត្រីមួយចំនួនទៀតនៃគណបក្សប្រឆាំង បានចុះទៅពិនិត្យចំណុចបង្គោលព្រំដែនលេខ១៥២ នៅឃុំពងទឹក ស្រុករំដួល និងចំណុចនៃការវាស់វែងកំណត់បង្គោលព្រំដែនលេខ១៨៥ នៅឃុំសំរោង ស្រុកចន្ទ្រា ខេត្តស្វាយរៀង កាលពីថ្ងៃចន្ទ ទី១៤ ធ្នូ មន្ត្រីនាំពាក្យនៃគណបក្សសមរង្ស៊ី លោក យឹម សុវណ្ណ បានធ្វើការសន្និដ្ឋានថា ការកំណត់ព្រំដែនកម្ពុជា-វៀតណាម ពិតជាបានធ្វើឲ្យបាត់បង់ទឹកដីកម្ពុជា។
លោក យឹម សុវណ្ណ មានប្រសាសន៍ដូច្នេះ ៖ «រដ្ឋាភិបាលនិងសភា ជាពិសេសកណៈកម្មការធ្វើការទាក់ទងជាមួយកិច្ចការព្រំដែន កិច្ចការបរទេសហ្នឹង ត្រូវតែចាត់វិធានការជាបន្ទាន់ ដើម្បីពិនិត្យមើលឡើងវិញនូវការបោះបង្គោលព្រំដែន ពីព្រោះរាប់ពាន់បង្គោល ហើយយើងទើបតែបានឃើញតែបួនប្រាំបង្គោលប៉ុណ្ណឹង គឺធ្វើឲ្យប៉ះពាល់ទៅលើដីប្រជាពលរដ្ឋប៉ុណ្ណឹងទៅហើយ ចុះទម្រាំតែរាប់ពាន់បង្គោលទៀត តើវានឹងបាត់បង់ប៉ុណ្ណា?»។
លោក វ៉ា គឹមហុង ទេសរដ្ឋមន្ត្រីនិងជាប្រធានគណៈកម្មាធិការចម្រុះកិច្ចការព្រំដែនកម្ពុជា បានមានប្រសាសន៍ថា ការអះអាងរបស់ក្រុមអ្នកតំណាងរាស្រ្ដគណបក្សប្រឆាំង ពុំមានមូលដ្ឋានបច្ចេកទេស ហើយលោកបានបន្តថា សកម្មភាពរបស់ក្រុមអ្នកតំណាងរាស្ត្រគណបក្សប្រឆាំង គឺជាការយកចំណេញផ្នែកនយោបាយ។
លោក វ៉ា គឹមហុង មានប្រសាសន៍ថា ៖ «គាត់គ្រូទាយ គាត់គ្រូទាយវាសម បើថាអត់គ្រូទាយមិនដឹងនរណាថាបាត់កើតទេ។ គេមានបច្ចេកទេសគ្រប់សព្វគេមិនច្បាស់ផង ទម្រាំយើងគ្រាន់តែដើរអើតមើល ហើយឮប្រជាជនប្រាប់អ៊ីចេះប្រាប់អ៊ីចុះ អាហ្នឹងវាពិបាកថាដែរ»។
ដំណើរទស្សនកិច្ចរបស់ក្រុមអ្នកតំណាងរាស្ត្រគណបក្សសមរង្ស៊ីទៅកាន់ព្រំដែនក្នុងឃុំសំរោង ស្រុកចន្ទ្រា ត្រូវបានរារាំងដោយកងកម្លាំងអាជ្ញាធរប្រដាប់ដោយខែលនិងដំបងឆក់ និងមានការចតរថយន្តយោធាប្រភេទដំរីទឹកកាត់ទទឹងច្រកផ្លូវទៅកាន់វត្តអង្គរំដេញ។
ទោះយ៉ាងណា ក្បួនរថយន្តរបស់ក្រុមអ្នកតំណាងរាស្ត្រគណបក្សប្រឆាំងបានវាងតាមវាលស្រែ ហើយក៏បានចូលទៅដល់ក្នុងវត្តអង្គរំដេញ។
នៅក្នុងវត្តអង្គរំដេញ ក្រុមអ្នកតំណាងរាស្ត្របានជួបជាមួយប្រជាពលរដ្ឋប្រមាណ១០០នាក់ ហើយបានចរចាយ៉ាងតានតឹងជាមួយកងកម្លាំងនគរបាលអន្តរាគមន៍ប្រមាណ២០នាក់ ព្រមទាំងតម្រួតព្រំដែនជាច្រើននាក់ទៀត ដើម្បីសុំចូលទៅពិនិត្យទីដែលលោក សម រង្ស៊ី បានដកបង្គោលតម្រុយកំណត់ព្រំដែនកាលពីថ្ងៃទី២៥ តុលាកន្លងទៅ។
ដោយមិនទទួលបាននូវការអនុញ្ញាត ប្រជាកសិករដែលកំពុងតែមានកំហឹងផងនោះ បានទម្លុះរបាំងនៃកងកម្លាំងអាជ្ញាធរ ហើយទាំងក្រុមអ្នកតំណាងរាស្ត្រ ទាំងប្រជាពលរដ្ឋបានចូលទៅដល់ទីដៅដែលស្ថិតនៅចម្ងាយប្រហែល៣០០ម៉ែត្រពីវត្តអង្គរំដេញដូចបំណង៕
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ