តុលាការខេត្តបាត់ដំបង ចេញដីកាកោះហៅលោកមេភូមិ និងអនុភូមិ រួមទាំងអ្នកភូមិនៃភូមិទួលស្នួល ម្នាក់ផង ឲ្យចូលខ្លួនមកកាន់តុលាការនៅថ្ងៃទី២ ខែមិថុនា ឆ្នាំ២០១១ ដើម្បីធ្វើការសាកសួរពីដំណើររឿងប្រើអំពើហិង្សាពេលរកដំណោះស្រាយទំនាស់ដីធ្លីទំហំ ១៦៨ហិកតារ ដែលកើតមានជម្លោះរ៉ាំរ៉ៃរវាងអ្នកភូមិបឹងសង្កែ និងអ្នកភូមិទួលស្នួល ក្នុងឃុំក្តុលតាហែន ស្រុកបវេល ខេត្តបាត់ដំបង។
ព្រះរាជអាជ្ញារងតុលាការខេត្តបាត់ដំបង លោក អ៊ុយ សំភារ បានមានប្រសាសន៍នៅថ្ងៃសៅរ៍ ទី២៨ ខែឧសភា ឆ្នាំ២០១១ ថា តុលាការបានចេញដីកាកោះឲ្យអ្នកភូមិទួលស្នួល បីនាក់ចូលខ្លួនដើម្បីធ្វើការសាកសួរនៅដើមខែមិថុនានេះ ៖ «ទាក់ទងករណីដីធ្លី វាពាក់ព័ន្ធទំនាស់ហ្នឹង ទាំងបញ្ហាដីធ្លី ទាំងបញ្ហាប្រើអំពើហិង្សា កោះហៅតែបីនាក់ទេ»។
ប្រជាពលរដ្ឋទាំងបីនាក់ដែលត្រូវចូលខ្លួនមកតាមដីកាកោះរបស់តុលាការខេត្តបាត់ដំបងនោះ មានឈ្មោះ ណែម សង មេភូមិទួលស្នូល ឈ្មោះ គង់ សុផល ជាអនុភូមិ និងឈ្មោះ ហេង ច្រែង ជាអ្នកភូមិរស់នៅក្នុងភូមិទួលស្នួល ឃុំក្ដុលតាហែន ស្រុកបវេល ខេត្តបាត់ដំបង។
លោក គង់ សុផល ជាអនុភូមិទួលស្នួល បានមានប្រសាសន៍ថា ពួកគាត់ទាំងបីនាក់បានទទួលដីកាកោះរបស់តុលាការខេត្តបាត់ដំបង ហើយនឹងចូលខ្លួនទៅបំភ្លឺជូនតុលាការតាមកាលបរិច្ឆេទ ៖ «ដែលទទួលបានទៅសាកសួរអំពីវិវាទដីធ្លី ខ្ញុំត្រូវតែចូល ព្រោះដីកាកោះហើយត្រូវតែចូល»។
លោក ជន ប៊ុនចាន់ អភិបាលរងស្រុកបវេល បានមានប្រសាសន៍ថា លោក ណែម សង លោក គង់ សុផល និងឈ្មោះ ហេង ច្រែង ត្រូវបានអ្នកភូមិបឹងសង្កែ ចោទប្រកាន់ទៅតុលាការពីបទប្រើអំពើហិង្សាដោយកាំបិត ពូថៅ ក្នុងជម្លោះដណ្ដើមកាន់កាប់ដីធ្លី នៅក្នុងឃុំក្ដុលតាហែន ស្រុកបវេល ខេត្តបាត់ដំបង។
លោកមានប្រសាសន៍ទៀតថា ៖ «មិនអនុវត្តទៅតាម ស.ជ.ណ. របស់ក្រសួងមហាផ្ទៃ ដែលបានធ្វើការបែងចែកដីនោះរួចហើយ ៥០% ដីហ្នឹង។ ដីហ្នឹងវាមាន ១៦៨ហិកតារ អ៊ីចឹងទេធ្វើការបែងចែកបានក្នុងមួយភូមិ ៨៤ហិកតារ»។
លោក ជន ប៊ុនចាន់ អភិបាលរងស្រុកបវេល បានមានប្រសាសន៍បញ្ជាក់ថា កាលពីចុងឆ្នាំ២០១០ ក្រសួងមហាផ្ទៃ បានចេញសេចក្ដីជូនដំណឹង ឬហៅថា ស.ជ.ណ. មួយ ដោយបានសម្រេចធ្វើការបែងចែកដីមានទំនាស់ទំហំ ១៦៨ហិកតារជាពីរចំណែក ក្នុងនោះភូមិបឹងសង្កែ ទទួលបានដី ៥០% ស្មើរ ៨៤ហិកតារ និងភូមិទួលស្នួល បាន ៥០% ស្មើនឹង ៨៤ហិកតារដូចគ្នា។
ចំណែកឯខាងភូមិបឹងសង្កែ ព្រមទទួលយកការបែងចែកដីទំហំ ៥០% ដូចគ្នានេះ ប៉ុន្តែខាងភូមិទួលស្នូល បានបដិសេធមិនព្រមទទួលយក ដោយសំអាងថា ខាងភូមិទួលស្នួល មានការបាត់បង់ដីច្រើន ហើយក៏នាំគ្នាប្រឆាំងរហូតមានការប្រើប្រាស់កាំបិត ពូថៅ និងដាវសាំម៉ូរ៉ៃ ទប់ស្កាត់មិនឲ្យអ្នកភូមិបឹងសង្កែ បង្កបង្កើនផលនៅលើដីដែលបានបែងចែកកំណត់ព្រំដីដោយអាជ្ញាធររួចរាល់ហើយនោះឡើយ។
ជម្លោះដណ្ដើមកាន់កាប់ដីទំហំ ១៦៨ហិកតាររវាងអ្នកភូមិទួលស្នួល និងភូមិបឹងសង្កែ ឃុំក្ដុលតាហែន ស្រុកបវេល ខេត្តបាត់ដំបង បានកើតមានឡើងតាំងពីឆ្នាំ២០០៤ មក រហូតមកដល់ឆ្នាំ២០១១នេះនៅតែកើតមានជម្លោះ។
ប្រភពពីអាជ្ញាធរស្រុកបវេល និងប្រជាពលរដ្ឋភូមិបឹងសង្កែ បានឲ្យដឹងថា មូលហេតុដែលខាងភូមិទួលស្នួល បដិសេធមិនព្រមទទួលយកការបែងចែកដីខាងលើនេះ គឺដោយសារភាគីអ្នកភូមិទួលស្នូល បានលក់ដូរដីជាច្រើនហិកតារនៅមុនការបែងចែករបស់អាជ្ញាធរទៅឲ្យឈ្មួញដីឈ្មោះ ចឹក ស៊ីវ៉ា ហៅតា កវែង និងស្ត្រីម្នាក់ទៀតឈ្មោះ អ៊ី ហ៊ើយ ដែលកំពុងរស់នៅក្នុងខេត្តបាត់ដំបង៕