ប្រធាន​ពន្ធនាគារ​ខេត្ត​ពោធិ៍សាត់​រង​ការ​ចោទ​ថា​ប្រព្រឹត្ត​អំពើ​ពុករលួយ

មន្ត្រី​អនុរក្ស​ពន្ធនាគារ​ខេត្ត​ពោធិ៍សាត់ មួយ​រូប បាន​ដាក់​ពាក្យ​ប្ដឹង​ទៅ​អង្គភាព​ប្រឆាំង​អំពើ​ពុករលួយ​ទៅ​គណៈ​អភិបាល​ខេត្ត និង​ទៅ​អង្គការ​ក្រៅ​រដ្ឋាភិបាល​មួយ​ចំនួន ប្ដឹង​ចោទ​ប្រធាន​ពន្ធនាគារ​ខេត្ត​ថា បាន​ប្រព្រឹត្ត​អំពើ​ពុករលួយ ប្រើ​អំណាច​ផ្ដាច់ការ និង​រំលោភ​សិទ្ធិ​ការងារ​របស់​មន្ត្រី​អនុរក្ស។
ដោយ មណ្ឌលកែវ
2011.11.05
Share on WhatsApp
Share on WhatsApp

លោក នូ ទៀង អាយុ ២៩​ឆ្នាំ ជា​មន្ត្រី​អនុរក្ស​ពន្ធនាគារ ទទួល​បន្ទុក​ផ្នែក​សុខាភិបាល​នៃ​ពន្ធនាគារ​ខេត្ត​ពោធិ៍សាត់។ លោក​បាន​ឲ្យ​ដឹង​នៅ​ព្រឹក​ថ្ងៃ​ទី​៤ ខែ​វិច្ឆិកា ថា កាល​ពី​ថ្ងៃ​ទី​១៧ ខែ​តុលា កន្លង​ទៅ លោក​បាន​ដាក់​ពាក្យ​សុំ​ច្បាប់​ឈប់​សម្រាក​ចំនួន ៣​ថ្ងៃ ដោយ​មូលហេតុ​កូន​លោក​ឈឺ​ធ្ងន់​នៅ​ឯ​មន្ទីរពេទ្យ​បង្អែក​ខេត្ត​កំពង់ឆ្នាំង។ ពាក្យ​សុំ​នេះ​ត្រូវ​បាន​ប្រធាន​ផ្នែក​សុខាភិបាល​ប្រធាន​ការិយាល័យ​អប់រំ និង​លោក​អនុ​ប្រធាន​ពន្ធនាគារ​ខេត្ត​ទទួល​បន្ទុក​ផែនការ​អប់រំ​កែប្រែ​យល់​ព្រម​តាម​លំដាប់លំដោយ​អស់​ហើយ។ ប៉ុន្តែ​លោក​ប្រធាន​ពន្ធនាគារ​នៅ​តែ​មិន​ព្រម​អនុញ្ញាត​ច្បាប់​ឲ្យ​លោក​ឡើយ។

លោក​បន្ត​ថា ដោយ​មាន​ការ​បារម្ភ​ពី​សុខភាព​កូន​ពេក លោក​ក៏​ជម្នះ​ទៅ​មើល​កូន លុះ​វិល​ត្រឡប់​មក​វិញ​លោក​ត្រូវ​បាន​លោក​ប្រធាន​ពន្ធនាគារ​ដាក់​ពិន័យ​ដោយ​ដក​លោក​ពី​ផ្នែក​ជំនាញ​ឲ្យ​ទៅ​ផ្នែក​សន្តិសុខ កាត់​ប្រាក់​ខែ និង​លោក​ត្រូវ​សរសេរ​តារាង​ត្រួត​ពិនិត្យ​ទៀត​ផង៖ «កូន​ឈឺ​ជាក់ស្ដែង កូន​ខ្ញុំ​រហូត​មក​ដល់​ថ្ងៃ​នេះ គឺ​នៅ​ដេក​នៅ​មន្ទីរពេទ្យ​គន្ធបុប្ផា។ អ៊ីចឹង​ហើយ​គាត់​មិន​អនុញ្ញាត​ច្បាប់​ឲ្យ​ខ្ញុំ​ទេ។និយាយ​ឲ្យ​ចំ​ទៅ គឺ​គាត់​អត្តនោម័តិ​តែម្នាក់​ឯង សូម្បី​តែ​អនុ​ប្រធាន​ទាំង​៣ ក៏​គ្មាន​នរណា​បាន​ចូលរួម​ធ្វើការ​សម្រេច​កិច្ចការ​ក្នុង​ពន្ធនាគារ​នេះ​ដែរ។ ខ្ញុំ​សូម​សំណូមពរ​កុំ​ឲ្យ​លោក​ប្រធាន​គាត់​ប្រើ​អំណាច​ផ្ដាច់ការ​បែប​នេះ​ទៀត»

លោក​ថា ការ​ដាក់​ពិន័យ​នេះ​លោក​ប្រធាន​ពន្ធនាគារ​បាន​សម្រេច​អត្តនោម័ត​ដោយ​មិន​មាន​ការ​យល់ព្រម​ពី​ក្រុមប្រឹក្សា​វិន័យ​នោះ​ឡើយ។

ប្រធាន​ពន្ធនាគារ​ខេត្ត​ពោធិ៍សាត់ គឺ​លោក ងួន ឡាយ។ លោក​បាន​ពន្យល់​ចំពោះ​បញ្ហា​នេះ​ថា ការ​ដាក់​ពិន័យ​ចំពោះ​លោក នូ ទៀង គឺ​អនុវត្ត​តាម​បទបញ្ជា និង​វិន័យ​របស់​កង​កម្លាំង​ប្រដាប់​អាវុធ។លោក​ថា ដោយ​កម្លាំង​មន្ត្រី​អនុរក្ស​មាន​ចំនួន​តិច​ទើប​លោក​មិន​អនុញ្ញាត​ច្បាប់​ដល់​លោក នូ ទៀង តែ​មន្ត្រី​រូប​នេះ​បាន​ប្រឆាំង​នឹង​មេ​កើយ​ទើប​លោក​ដាក់​ពិន័យ។

លោក​បន្ថែម​ដូច្នេះ៖ «បើ​យើង​មិន​ឲ្យ​ច្បាប់​តែ​គាត់​នៅ​តែ​ទៅ គឺ​មាន​ន័យ​ថា គាត់​ប្រឆាំង​និង​បទ​បញ្ជា។ បើ​គាត់​ធ្វើ​អ៊ីចឹង​បាន មន្ត្រី​ហា​ហុក​សិប​នាក់​ទៀត​គេ​នឹង​ធ្វើ​តាម​គាត់។ បើ​គាត់​ដើរ​សេរី​បាន គេ​ក៏​ដើរ​បាន​ដូច​តែ​គ្នា​ដែរ​ហើយ យើង​ជា​អ្នក​មើល​អ្នក​ទោស យើង​ធ្វើ​អ៊ីចឹង​ម៉េច​កើត។ ក្រមសីលធម៌​មន្ត្រី​រាជការ​មាន​តើ! បើ​យើង​មិន​អនុញ្ញាត​ហើយ​គាត់​នៅ​តែ​ធ្វើ​ម៉េច​កើត»

យ៉ាង​នេះ​ក្តី មន្ត្រី​សម្របសម្រួល​អង្គការ​លីកាដូ ខេត្ត​ពោធិ៍សាត់ គឺ​លោក អេង ឈុនហាន មាន​ប្រសាសន៍​ថា ប្រសិន​បើ​ដូច​អ្វី​ដែល​លោក នូ ទៀង បាន​អះអាង​លោក​គួរ​តែ​ត្រូវ​ទទួល​បាន​នូវ​ការ​អនុញ្ញាត​ច្បាប់​ដើម្បី​ទៅ​មើល​កូន​ដែល​កំពុង​មាន​ជំងឺ​ធ្ងន់​នៅ​ឯ​មន្ទីរពេទ្យ៖ «យើង​សោកស្ដាយ​ដែល​គ្រាន់​តែ​គាត់​ចង់​យក​កូន​ទៅ​មន្ទីរពេទ្យ តែ​មាន​បញ្ហា​ដូច្នេះ។ ករណី​នេះ​ប្រសិន​បើ​មាន​ការ​ជ្រុលជ្រួស​ដែល​ឈាន​ទៅ​ដល់​ការ​បាត់បង់​កុមារ​ម្នាក់​នោះ វា​ជា​បញ្ហា​ដែល​គាត់​ជា​ឪពុក​នឹង​មាន​ការ​សោកស្ដាយ​អស់​មួយ​ជីវិត​មិន​ខាន ដោយសារ​ខ្លួន​មិន​បាន​បំពេញ​កាតព្វកិច្ច​ជា​ឪពុក​នោះ...»

កាល​ពី​ចុង​ខែ​មេសា កន្លង​ទៅ មន្ត្រី​អនុរក្ស​ពន្ធនាគារ​ជា​ច្រើន​នាក់​បាន​ដាក់​បណ្ដឹង​ទៅ​អង្គភាព​ប្រឆាំង​អំពើ​ពុករលួយ ក្រុមប្រឹក្សា​ខេត្ត និង​គណៈ​អភិបាល​ខេត្ត​ពោធិ៍សាត់ ដោយ​ចោទ​ប្រកាន់​លោក ងួន ឡាយ ប្រធាន​ពន្ធនាគារ​ខេត្ត​នេះ​ថា បាន​ប្រព្រឹត្ត​អំពើ​ពុករលួយ និង​អំពើ​ខុស​ឆ្គង​នានា​ជា​ច្រើន ដោយ​ពួកគេ​បាន​លើក​បង្ហាញ​នូវ​ភស្តុតាង​នានា​ក្នុង​ពាក្យ​បណ្ដឹង​នេះ​ផង​ដែរ៕

រឿង​ដែល​គេ​អាន​​ច្រើន​បំផុត
ព័ត៌មាន​ថ្មីៗ
រឿង​មន្ត្រី​ក្រសួង​កសិកម្ម​ពាក់ព័ន្ធ​ការ​ជួញដូរ​ស្វា​ក្ដាម​ដោយ​ខុស​ច្បាប់ ទូត​កម្ពុជា​ធ្វើ​អន្តរាគមន៍​សុំ​ឱ្យ​នៅ​ក្រៅ​ឃុំ​បណ្ដោះអាសន្ន
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

មតិយោបល់៖

Anonymous
Nov 17, 2011 10:39 PM

មិនចាំបាច់តែនៅខេត្តពោធិ៍សាត់ទេសូម្បីតែជនរងគ្រោះជាច្រើននៅខេត្តកណ្តាលបានខ្សិបប្រាប់ថា ឆ្មាំគុក និង ក្រឡាបញ្ជីបាននាំគេទៅជួប ចៅក្រម និង ព្រះរាជអាជ្ញា ដោយដោះដូវយល់ព្រមគ្នាមុនការកាត់ក្តី ការចូលជួបដំបូងពួកគេតែងសួរថា មានប៉ុន្មាន????

Anonymous
Nov 21, 2011 11:39 PM

កុំចេះតែថា គឺគាត់ប្រឹងប្រែងធ្វើការណាស់ សូម្បីតែមន្រី្តកូនឈឺមិនឲ្យឈប់ធ្វើការបំរើជាតិផង នៅថា គាត់ពុករលួយទៀត យ៉ាប់អី​ យ៉ាប់យ៉ាងនេះ????

Anonymous
Nov 18, 2011 03:51 AM

RFA did good for post all for Khmer around world know what we need to learn. we all need to learn more and more about khmer poor people. they all still suffer from pol pot-ciHanouk regime. now still no Justice and affair most high govt. official corrupt it every corner of Street police corrupted. we thank for this news and our khmer society and govt start some action. But should look from Top to bottom not from Bottom first.

Anonymous
Nov 15, 2011 08:03 PM

I think that it is good for take action for the corruption for public officials.but the RFA radio should post the Polices stand near PHSA DEY HOY traffic light earn much money every day form the TAXI DRIVER.

Thanks so much for RFA radio let me to write a message.

Anonymous
Nov 26, 2011 04:04 PM

ស្រុកខ្មែរយើងរលួយតាំពីលើដល់ក្រោម រលួយតាំងពីហ៊ុន​ដល់ ហោច។​ ធ្វើគ្រាន់តែល្អមើល ព្រោះជិតដល់ថ្ងៃបោះឆ្នោតហើយ!!!!!