សហភាព​សហជីព​កម្ពុជា​ថា កម្មករ​មួយ​ចំនួន​មិន​ទទួល​បាន​ប្រាក់​ឧបត្ថម្ភ​គ្រប់​ចំនួន​តាម​ការ​សន្យា

ដោយ ជាតិ ចំណាន
2020.07.10
រ៉ុង ឈុន 011520 លោក រ៉ុង ឈុន ប្រធាន​សហភាព​សហជីព​កម្ពុជា
Provided photo

សហភាព​សហជីព​កម្ពុជា អះអាង​ថា កម្មករ​រោងចក្រ​មួយ​ចំនួន​ដែល​ព្យួរ​ការងារ​ដោយសារ វិបត្តិ​ជំងឺ​កូវីដ នៅ​មិន​ទាន់​ទទួល​បាន​ប្រាក់​ឧបត្ថម្ភ​គ្រប់​ចំនួន​តាម​ការ​សន្យា​របស់​រដ្ឋាភិបាល​នោះ ឡើយ។ ប៉ុន្តែ​អ្នក​នាំ​ពាក្យ​ក្រសួង​ការងារ ឆ្លើយ​តប​ថា ក្រសួង​បាន​ចេញ​សេចក្ដី​ជូន​ដំណឹង​ពី​ការ ផ្ដល់​ប្រាក់​ឧបត្ថម្ភ​ជូន​កម្មករ​ជា​បន្ត​បន្ទាប់។

សហភាព​សហីជព​កម្ពុជា នៅ​ថ្ងៃ​ទី៩ ខែកក្កដា ដាក់​លិខិត​មួយ​ច្បាប់​ជូន​លោក​នាយក​រដ្ឋមន្ត្រី ហ៊ុន សែន ដើម្បី​ស្នើសុំ​ជួយ​ពិនិត្យ និង​អន្តរាគមន៍ ចំពោះ​ប្រាក់​ឧបត្ថម្ភ​ចំនួន ៤០ដុល្លារ​ជូន​ដល់​កម្មករ​និយោជិត ដែល​មាន​ការ​យឺតយ៉ាវ។

សហភាព​សហជីព​កម្ពុជា លើក​ឡើង​ក្នុង​លិខិត​នោះ​ថា កម្មករ​មួយ​ចំនួន ទើប​តែ​ទទួល​បាន​ប្រាក់​ឧបត្ថម្ភ​ចំនួន ២០ដុល្លារ ខណៈ​ពួក​គេ​ត្រូវ​បាន​រោងចក្រ​ព្យួរ​ការងារ និង​បិទ​រោងចក្រ​រយៈ​ពេល ២ខែ ទៅ​ហើយ។ លិខិត​ដដែល បញ្ជាក់​ថា កម្មករ​ដែល​បាត់បង់​ការងារ និង​ប្រាក់​ចំណូល គឺ​រំពឹង​តែ​លើ​ប្រាក់​ឧបត្ថម្ភ​របស់​រដ្ឋាភិបាល ដើម្បី​សម្រាល​បន្ទុក​ខ្លះ ប៉ុន្តែ​ការ​ដែល​វិធានការ​បើក​ប្រាក់​នេះ​មាន​ភាព​យឺតយ៉ាវ​នេះ ធ្វើ​ឲ្យ​កម្មករ​ជួប​ការ​លំបាក​ក្នុង​ជីវភាព​រស់នៅ ថ្លៃ​ឈ្នួល​បន្ទប់​ស្នាក់នៅ និង​បំណុល​ជា​ដើម។

ប្រធាន​សហភាព​សហជីព​កម្ពុជា លោក រ៉ុង ឈុន ប្រាប់​អាស៊ី​សេរី​បន្ថែម​ថា ចំពោះ​ភាគី​ក្រុមហ៊ុន គឺ ភាគ​ច្រើន​បាន​ផ្ដល់​ប្រាក់​ឧបត្ថម្ភ​ទាំង​ពីរ​លើក​ជូន​កម្មករ​តាម​ពេលវេលា និង​គ្រប់​ចំនួន ប៉ុន្តែ​សម្រាប់ ភាគី​រដ្ឋាភិបាល​វិញ គឺ​មាន​កម្មករ​ជាច្រើន​នាក់ បាន​រាយការណ៍​ថា មិន​បាន​ផ្ដល់​ប្រាក់​ឧបត្ថម្ភ​ទាន់ ពេល​វេលា និង​គ្រប់​ចំនួន ៤០ដុល្លារ​តាម​ការ​សន្យា​នោះ​ទេ៖ «រដ្ឋាភិបាល ត្រូវ​ផ្ដល់​ប្រាក់​នោះ​មួយ​ខែ ៤០ ឬ​ពីរ​ខែ ៨០ដុល្លារ​តែ​ម្ដង ហើយ​បើ​គាត់​ទទួល​បាន ២០ដុល្លារ​ហើយ​នៅ​សល់ ៦០ដុល្លារ​ទៀត បើក​បង្គ្រប់​ឲ្យ​គាត់ ទាំង​អស់​តែ​ម្តង​ទៀត ដើម្បី​ឲ្យ​គាត់​ងាយស្រួល​បាន​លុយ​ដុំ​យក​ទៅ​ប្រើប្រាស់​ដោះ​បំណុល​ធនាគារ និង​ដោះស្រាយ​ជីវភាព»

កម្មការិនីម្នាក់ធ្វើការនៅ​រោងចក្រ ប៊ឺរី អីភែរីល ខេមបូឌា (Berry Apparel (Cambodia) លោកស្រី វង្ស យូរី រៀបរាប់​ថា រោងចក្រ​ដែល​លោកស្រី​ធ្វើការ​នេះ ព្យួរ​ការងារ​រយៈ​ពេល​ពីរ​ក្នុង​ខែមិថុនា ដល់​ខែ កក្កដា ហើយ​កម្មករ​ទទួល​បាន​ប្រាក់​ឧបត្ថម្ភ ៣០ដុល្លារ​ពី​ខាង​ក្រុមហ៊ុន និង ២០ដុល្លារ​ពី​ខាង​រដ្ឋាភិ បាល៖ «វា​ពិបាក​សម្រាប់​កម្មករ​ណាស់​ដោយសារ​តែ​បាន​ពី​រោងចក្រ ៣០ដុល្លារ ហើយ​បាន​ពី​ក្រសួង​តែ ២០ដុល្លារ ហើយ ២០ដុល្លារ​ទៀត​អត់​ដឹង​អង្កាល់​បាន​ដូច្នេះ ពិបាក​សម្រាប់​គាត់​ណាស់ សម្រាប់ ៥០ដុល្លារ ឯ​ណា​សម្រាប់​ចាយ ឯ​ណា​សម្រាប់​ផ្គត់ផ្គង់​ក្នុង​ផ្ទះ​រាល់​ថ្ងៃ ឯ​ណា​សម្រាប់​ផ្ទះ​ជួល ឯ​ណា​សម្រាប់​ទឹក​ភ្លើង ។សំណូមពរ​ឲ្យ​រដ្ឋាភិបាល ជួយ​ផ្តល់​ប្រាក់ ដល់​កម្មករ​នោះ​ឲ្យ​ទៀងទាត់​តែ​ម្ដង​មក»

ទាក់ទងនឹងករណី​នេះ អ្នកនាំពាក្យ​ក្រសួង​ការងារ​លោក ហេង សួរ សរសេរ​សារ​ឆ្លើយតប​ជា​មួយ អាស៊ី​សេរី​តាម​បណ្ដាញ​ទំនាក់ទំនង​តេឡេក្រាម (Telegram) ដោយ​មិន​ឆ្លើយតប​ចំពោះ​លិខិត​របស់ សហជីព លោក រ៉ុង ឈុន នោះ​ទេ ហើយ​លោក​ជំរុញ​ឲ្យ​អាស៊ី​សេរី​ទៅ​មើល​សេចក្តីជូន​ដំណឹង​របស់ ក្រសួង​ការងារ ។ លោក បញ្ជាក់​ថា មក​ដល់​ពេល​នេះ ក្រសួង​បាន​ចេញ​សេចក្តី ជូន​ដំណឹង​អំពី​ការ បើក​ប្រាក់​ឧបត្ថម្ភ​របស់​រាជរដ្ឋាភិបាល​តាមរយៈ​ធនាគារ​ឯកទេស វីង ចំនួន ១២លើក​ហើយ ក្នុង​នោះ មាន​កម្មករ​និយោជិត​ជាង ២២ម៉ឺន ៣ពាន់ (២២៣.៥៨៥) នាក់ ដែល​ស្មើ​នឹង​ថវិកា​ប្រមាណ ៦លាន ៥សែន​ដុល្លារ​អាមេរិក។

ដោយឡែក សេចក្តីជូនដំណឹង​របស់​ក្រសួង​ការងារ ចុះ​ថ្ងៃ​ទី៩ កក្កដា បង្ហាញ​ថា ក្រសួង​នឹង​បើក​ប្រាក់​ឧបត្ថម្ភ​លើក​ទី២ តាម​រយៈ​ធនាគារ​ឯកទេស វីង ជូន​ដល់​កម្មករ​និយោជិត​ជាង ៣ម៉ឺន (៣០.១៨៩) នាក់​នៃ​រោងចក្រ​សហគ្រាស​វិស័យ​កាត់ដេរ និង​ទេសចរណ៍​ចំនួន៩៦។ ក្រសួង​ការងារ​បញ្ជាក់​ក្នុង លិខិត​នោះ​ថា កម្មករ​ដែល​ព្យួរ​ការងារ​រយៈ​ពេល ១១ថ្ងៃ​ដល់ ២០ថ្ងៃ ទទួល​បាន​ប្រាក់​ឧបត្ថម្ភ ១០ដុល្លារ ហើយ​កម្មករ ព្យួរ​ការងារ​ចាប់​ពី ២១ថ្ងៃ​ដល់ ៣០ថ្ងៃ​ទទួល​បាន ២០ដុល្លារ។កម្មករ​ព្យួរ​ការងារ​ចាប់​ពី ៣១ថ្ងៃ​ដល់ ៤៩ថ្ងៃ​ទទួល​បាន ៥០ដុល្លារ រីឯ​កម្មករ​ព្យួរ​ការងារ ចាប់​ពី ៥០ថ្ងៃ​ដល់​ពីរ​ខែ​ទទួល​បាន ៦០ដុល្លារ។

ទោះជាយ៉ាង​ណា លោក រ៉ុង ឈុន លើក​ឡើង​ថា សេចក្ដី​ជូន​ដំណឹង​របស់​ក្រសួង​ការងារ គ្រាន់​តែ ជា​នីតិវិធី និង​មា​នតែ​នៅ​លើ​ក្រដាស ប៉ុន្តែ​ជាក់ស្ដែង​កម្មករ​មិន​ទាន់​ទទួល​បាន​ប្រាក់​ឧបត្ថម្ភ​គ្រប់ ចំនួន​នៅ​ឡើយ​ទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។