អ្នក​ជំនាញ​ថា ការ​ទម្លាក់​លុយ​ ៥០​លាន​ដុល្លារ អាច​ធានា​តម្លៃ​ស្រូវ​បាន​តែ​មួយ​ផ្នែក

ដោយ ថន ថារ៉ូ
2019-12-07
អ៊ីម៉ែល
មតិ
Share
បោះពុម្ព
បណ្ឌិត យ៉ង សាំងកុមារ អ្នក​ជំនាញ​កសិកម្ម និង​ជាអតីត​ប្រធាន​មជ្ឈមណ្ឌល​សិក្សា​និង​អភិវឌ្ឍន៍​កសិកម្ម​កម្ពុជា ឬ​អង្គការ​សេដាក (CEDAC) ក្នុង​វេទិកា​អ្នក​ស្ដាប់​វិទ្យុ​អាស៊ីសេរី នៅ​យប់​ថ្ងៃ​ទី​២២ ខែ​មករា ឆ្នាំ​២០១៦។
បណ្ឌិត យ៉ង សាំងកុមារ អ្នក​ជំនាញ​កសិកម្ម និង​ជាអតីត​ប្រធាន​មជ្ឈមណ្ឌល​សិក្សា​និង​អភិវឌ្ឍន៍​កសិកម្ម​កម្ពុជា ឬ​អង្គការ​សេដាក (CEDAC) ក្នុង​វេទិកា​អ្នក​ស្ដាប់​វិទ្យុ​អាស៊ីសេរី នៅ​យប់​ថ្ងៃ​ទី​២២ ខែ​មករា ឆ្នាំ​២០១៦។
Photo: RFA

សម្ព័ន្ធ​សហគមន៍​កសិករ និង​អ្នក​ជំនាញ​កសិកម្ម លើកឡើង​ថា ការ​ទម្លាក់​ថវិកា​ចំនួន ៥០​លាន ដុល្លារ​របស់​រដ្ឋាភិបាល​លោក ហ៊ុន សែន នៅ​មាន​ចំនួន​តិច និង​យឺត​ពេល​ដែល​មិន​អាច​ធានា​តម្លៃ ស្រូវ​ឱ្យ​បាន​សមរម្យ​ឡើយ​។ ចំណែក​ក្រសួងកសិកម្ម និង​សហព័ន្ធ​ស្រូវ​អង្ករ​កម្ពុជា ត្រេកអរ និង លើកឡើង​ថា ការ​បញ្ចេញ​កញ្ចប់​ថវិកា​នេះ នឹង​ជួយ​រក្សា​ស្ថិរភាព​តម្លៃ និង​ការ​ប្រមូល​ទិញ​ស្រូវ ពី​កសិករ។

សម្ព័ន្ធ​សហគមន៍​កសិករ​កម្ពុជា និង​អ្នក​ជំនាញ​វិស័យ​កសិកម្ម មិន​រំពឹង​ខ្ពស់​នោះ​ទេ​ថា កញ្ចប់​ថវិកា ​៥០​លាន​ដុល្លារ​ដែល​រដ្ឋាភិបាល​ឯកបក្ស​បាន​បន្តក់​ឱ្យ​ធនាគារ​អភិវឌ្ឍន៍​ជនបទ​នោះ អាច​នឹង​ជួយ​ស្រោចស្រង់​តម្លៃ​ស្រូវ​របស់​កសិករ​ដែល​កំពុង​តែ​ធ្លាក់​ចុះ​នោះ​បាន​ឡើយ។

អគ្គលេខាធិការ​សម្ព័ន្ធ​សហគមន៍​កសិករ​កម្ពុជា (CCFC) លោក ថេង សាវឿន មាន​ប្រសាសន៍​ថា ការ​ផ្តល់​ថវិកា ៥០​លាន​ដុល្លារ​នេះ​គឺ​ផ្ដល់​ប្រយោជន៍​សម្រាប់​តែ​រោង​ម៉ាស៊ីនកិនស្រូវ ឬ​ក្រុម​អ្នក​ប្រមូល ទិញ​ស្រូវ​ប៉ុណ្ណោះ ប៉ុន្តែ​មិន​បាន​ផ្ដល់​ផលប្រយោជន៍​ច្រើន​ដល់​កសិករ​នោះ​ទេ។ លោក​មិន​រំពឹង​ថា ក្រុមហ៊ុន​រកស៊ី​ស្រូវ​អង្ករ អាច​ប្រមូល​ទិញ​ស្រូវ​ពី​កសិករ​ក្នុង​តម្លៃ​សមរម្យ​ដែល​ធ្វើ​ឱ្យ​កសិករ​​ពេញចិត្ត នោះ​ឡើយ​។ លោក ថេង សាវឿន បន្ថែម​ថា ទិន្នន័យ​តម្លៃ​ស្រូវ​ដែល​លោក​ប្រមូល​បាន​ពី​កសិករ​រាល់ថ្ងៃ គឺ​នៅតែ​ធ្លាក់​ចុះ​ពី ២​រយ​រៀល ទៅជិត​៣​រយ​រៀល​ក្នុង​មួយ​គីឡូក្រាម​។ ជា​​ឧទារហណ៍​តម្លៃ​ស្រូវ​សែន​ក្រអូប​មាន​តម្លៃ​ខ្ពស់​បំផុត ១​ពាន់ ៧០ (.០៧០)​ រៀល​ក្នុង​មួយ​គីឡូក្រាម បើ​ធៀប​នឹង​រយៈពេល​ដូចគ្នា ក្នុង​ឆ្នាំមុន​មាន​តម្លៃ​ចន្លោះ ១​ពាន់ ២​រយ (.២០០) រៀល ទៅ​ ១​ពាន់​ ៣ (.៣០០)​ រយ​រៀល៖ «ប្រសិនបើ​ថា ដោះស្រាយ​ភ្លាមៗ​រឿង​តម្លៃ​ស្រូវ​ឡើងថ្លៃ​នេះ ខ្ញុំ​មើល​មិន​ទាន់​ឃើញ​ដំណោះស្រាយ​បែបនេះ​ទេ។ លទ្ធភាព​នេះ​គឺ​រដ្ឋាភិបាល គ្រាន់​តែ ជួយ​សម្រួល​ដល់​អ្នក​រក​ស៊ី​ស្រូវ​អង្ករ​ជាពិសេស​រោង​ម៉ាស៊ីន​កិនស្រូវ អាច​ខ្ចី​ទិញ​ស្រូវ​ស្តុក​ទុក ដើម្បី​កុំ​ឱ្យ​ស្រូវ​នេះ​មិន​មាន​អ្នកទិញ​តែ​ប៉ុណ្ណោះ ប៉ុន្តែ​តម្លៃ​កម្រិត​ប៉ុណ្ណា​នោះ វា​អាស្រ័យ​លើ​ទីផ្សារ​អន្តរជាតិ»

សម្រាប់​ក្រសួង​កសិកម្ម និង​សហព័ន្ធ​ស្រូវ​អង្ករ​កម្ពុជា បាន​បង្ហាញ​ក្តី​ត្រេកអរ​យ៉ាង​ខ្លាំង​ចំពោះ រដ្ឋាភិបាល​ដែល​ទម្លាក់​កញ្ចប់​ថវិកា​ ៥០​លាន​​ដុល្លារ​​នេះ។ រដ្ឋមន្ត្រី​ក្រសួង​កសិកម្ម លោក វេង សាខុន លើកឡើង​ក្នុង​លិខិត​ថ្លែងអំណរគុណ​ចុះ​ថ្ងៃ​ទី​៦ ខែ​ធ្នូ​​ថា ថវិកា​ ៥០​លាន​ដុល្លារ​នេះ នឹង​ជួយ​សម្រាប់​​បម្រើ​​វិស័យ​​កសិកម្ម ជាពិសេស​ប្រើប្រាស់​សម្រាប់​រក្សា​ស្ថិរភាព​ថ្លៃ និង​ប្រមូល​ទិញ​ស្រូវ​ពី កសិករ ហើយ​ស្តុក​ទុក កិន​កែច្នៃ និង​នាំចេញ ដែល​បង្ហាញ​ពី​ការ​យកចិត្តទុកដាក់​ពី​សំណាក់ រាជរដ្ឋាភិបាល​ក្នុង​ការ​ចូលរួម​ចំណែក​ដោះស្រាយ​បញ្ហា​ប្រឈម​នានា​ពាក់ព័ន្ធ​នឹង​វិស័យ ស្រូវ​អង្ករ ដល់​វិស័យ​ឯកជន និង​ប្រជាកសិករ។

រីឯ​សហព័ន្ធ​ស្រូវ​អង្ករ​កម្ពុជា​វិញ​លើក​ឡើង​ថា ការទម្លាក់​ថវិកា​នេះ នឹង​ជួយ​សម្រួល​ឱ្យ​រោង​ម៉ាស៊ីន កិន​ស្រូវ មាន​លទ្ធភាព​ប្រមូល​ទិញ​ស្រូវពូជ​ផ្កា​រំដួល និង​សែន​ក្រអូប ដែល​ចាប់ផ្ដើម​ប្រមូល​ផល​ក្នុង ខែ​ធ្នូ​នេះ។ សហព័ន្ធ​ស្រូវ​អង្ករ​កម្ពុជា បញ្ជាក់​ថា តម្លៃ​ស្រូវ​គុណភាព​ល្អ ផ្កា​ម្លិះ ផ្កា​រំដួល និង​សែន ក្រអូប មានតម្លៃ​ធ្លាក់​ចុះ​បន្តិចបន្តួច​ប្រហែល ១០០រៀល ហើយ​រោង​ម៉ាស៊ីនកិនស្រូវ​នៅ​តែ​មាន​តម្រូវ​ការ​ទិញ​ស្រូវ​ច្រើន​ថែម​ទៀត។ យ៉ាង​ណា​ក្តី កាល​ពី​ពេល​ថ្មីៗ​នេះ ប្រធាន​សហព័ន្ធ​ស្រូវ​អង្ករ កម្ពុជា លោក សុង សារ៉ន បាន​ប្រាប់​កាសែត​ក្នុងស្រុក​ថា សហព័ន្ធ​ត្រូវការ​ថវិកា​ខ្ទង់ ២០០លាន​ដុល្លារ បន្ថែម​ទៀត​សម្រាប់​ប្រមូល​ទិញ​ស្រូវ​ពី​កសិករ ដើម្បី​ស្តុក​ទុក​សម្រាប់​កិន​កែច្នៃ​ឱ្យ​បាន​រយៈពេល ​៦​ខែ។

អាស៊ីសេរី មិន​អាច​សុំ​ការ​ឆ្លើយ​តប​បន្ថែម​ពី​អ្នកនាំពាក្យ​ក្រសួង​កសិកម្ម លោក ចាន់ ហេង និង​ប្រធាន​សហព័ន្ធ​ស្រូវ​អង្ករ​កម្ពុជា លោក សុង សារ៉ន បាន​ទេ​នៅ​ថ្ងៃ​ទី​៧ ធ្នូ ដោយ​ទូរស័ព្ទ​ចូល​ពុំ​មាន​អ្នក​ទទួល។

ការ​ធ្លាក់ចុះ​ទាំង​តម្លៃ និង​ការនាំចេញ​អង្ករ​នេះ កើតឡើង​បន្ទាប់​ពី​សហភាព​អឺរ៉ុប កាល​ពី​ថ្ងៃ​ទី​១៨ មករា ឆ្នាំ​២០១៩ បាន​កំណត់​យកពន្ធ​លើ​ការ​នាំចូល​អង្ករ​ពី​កម្ពុជា សម្រាប់​ទីផ្សារ​អឺរ៉ុប ដោយ ១​ឆ្នាំ​ដំបូង ដោយ​កម្ពុជា​ត្រូវ​បង់ពន្ធ ២០០​ដុល្លារ ក្នុង​មួយ​តោន។ ឆ្នាំ​ទី​២ ត្រូវ​បង់ពន្ធ​ចំនួន ១៧០​ដុល្លារ ក្នុង​មួយ​តោន និង​ឆ្នាំ​ទី​៣ ចំនួន ១៤២​ដុល្លារ ក្នុង​មួយ​តោន។

ទិន្នន័យ​កាល​ពី​ថ្ងៃ​ទី​៦ ខែ​ធ្នូ របស់​សហព័ន្ធ​ស្រូវ​អង្ករ​កម្ពុជា​បង្ហាញ​ថា តម្លៃ​ស្រូវ​ផ្កា​រំដួល​សើម​នៅ​វាលស្រែ មាន​តម្លៃ​ចន្លោះ ៩​រយ ៥០ (៩៥០)​ រៀល ដល់ ១​ពាន់ ១​រយ ៨០​សិប ​(.១៨០)​ រៀល​ក្នុង​មួយ​គីឡូក្រាម។

អ្នក​ជំនាញ​វិស័យ​កសិកម្ម និង​ជា​មន្ត្រី​ជាន់ខ្ពស់​គណបក្ស​ប្រជាធិបតេយ្យ​មូលដ្ឋាន បណ្ឌិត យ៉ង សាំងកុមារ ថ្លែង​ថា ការ​ទម្លាក់​ថវិកា ៥០​លាន​ដុល្លារ​នេះ គឺ​នៅ​មាន​ចំនួន​តិច និង​យឺត​ពេល ព្រោះ​កសិករ​ដែល​ប្រមូល​ផលកាល​ពី​ខែ​វិច្ឆិកា​នោះ បាន​បង្ខំចិត្ត​លក់​ស្រូវ​ក្នុង​តម្លៃ​ថោក​រួច​ទៅ​ហើយ។ លោក​បន្ត​ថា រដ្ឋាភិបាល គួរតែ​ទម្លាក់​ទុក ២០០​លាន​ដុល្លារ ទិញ​ស្រូវ​ពី​កសិករ​ស្តុក​ទុក ដើម្បី​ជួយ​ឱ្យ​តម្លៃ​ស្រូវ​ងើបឡើង​វិញ៖ «ក្រៅពី​តម្លៃ​ទុន​ឱ្យ​វិស័យ​ឯកជន ឱ្យ​សហគមន៍​ដើម្បី​ទិញ រដ្ឋាភិបាល ក៏​ត្រូវ​ទិញ​ស្រូវ​ស្តុក​ទុក​ដែរ ក្នុង​គោល​បំណង​ពីរ ទី​១ គឺ​ជួយ​ទិញ​ដើម្បី​កុំ​ឱ្យ​តម្លៃ​ស្រូវ​ធ្លាក់​ចុះ ហើយ​ទី​២ ដើម្បី​រក្សា​សន្តិសុខ​ស្បៀង ព្រោះ​ថា យើង​អត់​ដឹង​ថា ពេល​ខាង​មុខ​គឺ​មាន​អ្វី​កើតឡើង​ខ្លះ​ដូចជា​ហានិភ័យ​ធម្មជាតិ​ជាដើម»

លោក ថេង សាវឿន និង​លោក យ៉ង សាំងកុមារ យល់ថា ដើម្បី​ធានា​តម្លៃ​ស្រូវ​របស់​កសិករ​មាន តម្លៃ​ខ្ពស់​នោះ លុះត្រាតែ​រដ្ឋាភិបាល ខិតខំ​ប្រឹងប្រែង​បន្ថែម​ទៀត​ក្នុងការ​រៀបចំ​និង​អនុវត្ត​គោល នយោបាយ​គាំទ្រ​វិស័យ​កសិកម្ម​ឱ្យ​បាន​ច្បាស់លាស់ ដូចជា​គោលនយោបាយ​បញ្ចុះ​ថ្លៃដើម​ត្រូវតែ អនុវត្ត​ឱ្យ​មាន​ប្រសិទ្ធភាព មិនមែន​មានតែ​នៅ​លើ​ក្រដាស ជាពិសេស​ពង្រីង​ទីផ្សារ​ជាមួយ​សហគមន៍​អន្តរ ជាតិ​ឱ្យ​កាន់តែ​ទូលំទូលាយ​បន្ថែម​ទៀត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល